MÜQƏDDƏS ARZULARA QOVUŞMAQ ZAMANI

Hər dəfə bu yerdən keçəndə...

Siz bu ala qapının "yaralı" tağı altından keçərkən varlığınızda illərlə kök salmış kədərə boyun əyməyin. Bilirsiniz ki, bu qapı yaddaşlarda əbədi yaşayacaq rəmzi bir görüntüdür. Siz kədərə nifrət edib, azca irəliyə baxın; qarşı meydandakı ən hündür yerdə dalğalanan Azərbaycan Bayrağına, Bütöv Azərbaycanın nəhəng xəritəsinə, Vətən uğrunda canlarından keçmiş Ağdam şəhidlərinin xatirə kompleksinə, bir az aşağıdakı gül-çiçəkli çəmənliyə, təbiət gözəlliyini vəsf edən, həyatın davam etdiyini, qələbənin yaxınlaşdığını bildirən hər nə var onlara tərəf boylanın.

Kədərə nifrət edin...

Şəhər necə olur ki?..

Qarşıda Quzanlıdır. Ağdam şəhəri işğal altında olduğundan rayonun inzibati mərkəzi hələlik burada yerləşir. Quzanlıya qəsəbə deyirlər. Ancaq görənlər bilir ki, Ağdam şəhərinin bu kiçik qardaşı, necə səliqəli, necə gözəl və müasir bir şəhərdir. Şəhər necə olur ki? Düşmənə göz dağıdır Quzanlı. Yaraşıqlı küçələri, park və meydanları, modern binaları, Olimpiya İdman Kompleksi və digər idman qurğuları, mədəniyyət ocaqları, işıqforlu küçələri...

Şəhər necə olur ki?

Burada gözəl bir muğam eşitsən, tar, qaval səsi eşitsən, lap addımbaşı musiqi ilə rastlaşsan, təəccüblənməzsən. Çünki sən də bilirsən ki, bütün bunlar Ağdamın havası, suyu, çörəyi kimi gündəlik həyat mənbəyidir. Bənzərsiz muğam ustaları, virtouz sənətkarlar Qarabağın, xüsusilə Ağdamın əbədi ənənəsini yaşadıblar və yaşadırlar.

Birliyin musiqi fəlsəfəsi

Ancaq... Sən bir məktəb qarşısından, mədəniyyət klubu, musiqi kolleci yaxınlığından keçərkən, hər deyəndə eşitmədiyin toplum musiqi təntəsinin sehrinə düşəcəyinə də təəccüblənmə. Daim camaat içində - kəndlərdə, Quzanlıda, tikinti meydanlarında, məktəblərdə, idman yarışlarında... görünən, uşaqdan tutmuş böyüklərə kimi hər bir sakinlə özünəməxsus qayğıkeşliklə söhbət edən, bütün təkliflərə diqqət yetirən icra başçısı Nizami Sadıqov da ayrı-ayrı yerlərdə təsadüfən eşitdiyi xor sədalarına təəccüblənməyib. Nizami müəllimin özü demiş, musiqi janrları içində xorun özünəməxsus fəlsəfəsi var (unutmayın ki, Nizami Sadıqov da qarabağlıdır, Ağdamda dünyaya göz açıb böyüyüb...), xor birliyin, birgə mübarizənin, birgə məqsədin musiqi tərənnümüdür

Həmişə təklifləri, müraciətləri dinləyən başçı, bu dəfə camaatı, yəni daha çox əlaqədar mühitin nümayəndələrini birlikdə dəvət edərək özü təklif verib. Deyib ki, yetişməkdə olan gənc nəslin bütün istiqamətlərdə birlik və mübarizlik əhval-ruhiyyəsini qoruyub saxlamağa, daha da yüksəltməyə çalışmalıyıq. Müharibə veteranları ilə görüşlər, kitab müzakirələri, idman yarışları, digər kütləvi tədbirlər geniş miqyas alsa daha yaxşıdır. Xor kollektivlərinin yaradılması, çoxaldılması, müsabiqələr keçirilməsi, ümumiyyətlə, bu janrın mövsümi deyil, müntəzəmliyinin qorunması çox vacibdir.

Az vaxt ərzində Nizami müəllimin gündəlik nəzarəti altında yaradılan onlarla xor kollektivinin səsi-sədası bu gün Ağdamın hər yerindən eşidilir və qəlblərdə sevinc, qürur hissləri oyadır. Hələ bir bu kollektivlərin müxtəlif mərhələ müsabiqələrinin iştirakçısı olasınız, repertuar zənginliyini, məktəbli qızların, oğlanların iradəsini, həvəs və coşğusunu görəsiniz, xor kollektivi rəhbərlərinin, münsiflər heyətləri üzvlərinin peşəkarlıq iddialarını görəsiniz... Heç vaxt təmkinini pozmayan başçının bu harmoniyanı seyr edərkən üz-gözündəki sevinc təbəssümünü görəsiniz...

Ağdam rayonunun sosial-iqtisadi inkişafı ilə bağlı yazını qələmə alarkən bu hadisədən yan keçmək mümkün deyildi...

Ağdam iqtisadi yüksəlişdə

İndi də bütövlükdə ötən il və bu ilin əvvəllərində görülən işlər barədə. 2011-ci il Ağdam rayonu üçün də uğurlu olmuşdur. Keçən il rayonda tikinti, abadlıq və quruculuq sahəsində müəyyən işlər görülmüş, bir sıra mühüm obyektlər istifadəyə verilmişdir.

Azərbaycan Respublikasının Prezidenti İlham Əliyevin 11 iyun 2011-ci il tarixli sərəncamı ilə ayrılmış 6 milyon manat vəsait hesabına rayonun 21 kəndini, 6 köçkün qəsəbəsini birləşdirən 46 min nəfərdən çox əhaliyə xidmət edən 28 km. uzunluğunda Quzanlı-Xındırıstan-Əhmədağalı-Əfətli avtomobil yolu çəkilib başa çatdırılmışdır.

Azərbaycan Respublikasının Prezidentinin 25 noyabr 2009-cu il tarixli sərəncamı ilə ayrılan vəsait hesabına Quzanlı qəsəbəsində hər biri 15 çarpayılıq doğum evi və uşaq xəstəxanası, eyni zamanda müasir tipli təcili və təxirəsalınmaz tibbi yardım stansiyası tikilmiş, qəsəbədəki mədəniyyət evində əsaslı təmir işləri başa çatdırılmış, avadanlıqlarla təmin olunmuş, bütün bu obyektlər istifadəyə verilmişdir.

2011-ci ildə Quzanlı qəsəbəsində mərkəzi kitabxananın, subartezian quyularının istismarı və su-kanal idarələrinin, dövlət sığorta şirkətinin Ağdam rayon filialının inzibati binalarının tikintisi başa çatdırılmışdır.

(ardı gələn sayımızda)

Məzahir ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-19 aprel.-S.7.