MÜQƏDDƏS ARZULARA QOVUŞMAQ ZAMANI

(əvvəli ötən sayımızda)

Çəmənli kəndində Seyid Lazım Ağanın ziyarətgahında böyük abadlıq işləri aparılmış, Xındırıstan məscidinin həyətində yardımçı bina tikilmiş, Quzanlı qəsəbə qəbristanlığında 1 ədəd subartezian quyusu qazılmış, 500 metr su xətti çəkilmiş, bulaq kompleksi inşa olunmuş, hasar çəkilmiş, ətrafı abadlaşdırılmışdır.

Bundan başqa Əfətli Uşaq Musiqi Məktəbinin binası təmir olunmuş, əlavə 3 sinif otağı tikilmiş, Xındırıstan kəndinin girişində müasir üslubda dayanacaq tikilərək ətrafı abadlaşdırılmış, Quzanlı qəsəbəsində 250 yerlik ictimai xeyir-şər evi tikilib istifadəyə verilmiş, Birinci Dördyol qəsəbəsində belə bir ictimai xeyir-şər evinin tikintisi başa çatmaq üzrədir.

Soltanbud təpəsindəki Bayraq Meydanı yenidən qurulmuş, 16x8 metr ölçüdə yeni Bayraq asılmış, Qalaətrafı parkın abadlaşdırılması davam etdirilmişdir

Quzanlı qəsəbəsində tikinti-abadlıq işləri davam etdirilmiş, Heydər Əliyev prospektinin təhsil şöbəsi ilə yeni xəstəxanaları birləşdirən hissəsində yeni səki salınmış, işıqlandırma sistemi quraşdırılmış, ətrafında ağaclar əkilmişdir.

Akademik Zərifə Əliyeva küçəsinin yeni qəsəbənin qarşısından keçən hissəsində iki tərəfdən səki çəkilmiş, işıqlandırma sistemi quraşdırılmış, ətrafına ağaclar əkilərək abadlıq işləri aparılmışdır.

Dövlət Proqramının icrası

Rayonda "Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"nın icrası ilə bağlı bir çox işlər görülmüşdür. Dövlət Proqramında səhiyyə, mədəniyyət, idman və təhsil müəssisələrinin inşası və yenidənqurulması üzrə Quzanlı qəsəbəsində mərkəzi rayon xəstəxanası, uşaq xəstəxanası və doğum evi tikilərək, həmçinin Quzanlı Mədəniyyət Evinin əsaslı təmir işləri başa çatdırılaraq istifadəyə verilmişdir.

Rayon üzrə 2011-ci ildə ümumi məhsul istehsalının həcmi 96.088.000 manat olmuş, 2010-cu ilin müfaviq dövrü ilə müqayisədə bu 93 faiz təşkil etmişdir. Sənaye məhsulunun ümumi həcmi 4.930.000 manat, ticarətin dövriyyəsi 7.955.000 manat, göstərilən dövrdə əsas kapitala yönəldilən vəsaitlər 17.888.000 manat olmuşdur.

Dövlət Proqramının (2009-2013-cü illər) rayonda icrası ilə bağlı məlumatlar vaxtında toplanıb icmallaşdırılaraq Azərbaycan Respublikası Dövlət Statistika Komitəsinə, rayon icra hakimiyyəti başçısına, digər aidiyyatı orqanlara göndərilmişdir. Rayonun sosial-iqtisadi göstəricilərini əks etdirən 36 bülleten, 20 təhlili məruzə hazırlanmışdır.

Azərbaycan Respublikası Prezidentinin 2004-cü il 1 iyul tarixli sərəncamı ilə təsdiq edilmiş "Qaçqınların və məcburi köçkünlərin yaşayış şəraitinin yaxşılaşdırılması və məşğulluğunun artırılması üzrə Dövlət Proqramı"nın və həmin proqrama prezidentin 2007-ci il 31 oktyabr tarixli və 2011-ci il 21 fevral tarixli sərəncamları ilə təsdiq edilmiş əlavələrin icrası ilə əlaqədar Ağdam rayonu üzrə 31 tədbirin icrası nəzərdə tutulmuşdur. Ondan hal-hazıra kimi 17 tədbir icra edilmiş, icra müddətinə əməl olunmaqla 4 tədbir icra olunur.

Bərdə və Ağcabədi rayonları ərazisində çadır düşərgələrində, eləcə də Bərdə rayonu ərazisində dəmiryolu üzərindəki yük vaqonlarında müvəqqəti yerləşdirilmiş Ağdam və digər rayonlardan olan məcburi köçkünlərin sosial, mənzil-məişət vəziyyətinin yaxşılaşdırılması üçün 17 qəsəbə salınıb istifadəyə verilmişdir.

Ağdam rayonundan olan 35 məcburi köçkün ailəsinə rayonun ərazisində - Qasımbəyli qəsəbəsində evlər tikilib onların istifadəsinə verilmişdir.

Aqrar sahəyə xüsusi diqqət

Ağdam elə əvvəllərdən də inkişaf etmiş kənd təsərrüfatı rayonu olduğundan taxılçılığa xüsusi fikir verilmişdir. Dövlət Proqramı (2009-2013-cü illər) qəbul edildikdən sonra bu sahə daha da ön plana çəkilmişdir. 2011-ci ilin məhsulu üçün 19511 hektar sahədə taxıl əkilmiş, ötən ilin müvafiq dövrü ilə müqayisədə 386 hektar sahəyə artıq taxıl səpilmişdir. Mövsümdə 16162 hektar sahədə biçin aparılaraq 41071 ton məhsul əldə olunmuşdur. Rayonda 2012-ci ilin məhsulu üçün 18419 hektar sahəyə taxıl səpilmişdir, bundan 15869 hektar buğda, 2546 hektarı isə arpa sahəsindən ibarətdir.

Ərzaq məhsulu kimi tərəvəz istehsalı da daima artırılmışdır. 2011-ci ildə 2622 hektar sahədə tərəvəz əkilmişdir ki, bu da 2010-cu ildəkindən 357 hektar və ya 19,7 faiz çoxdur. Artıq bu günə 2622 hektardan 48808 ton tərəvəz, 496 hektardan 8140 ton kartof və 200 hektar sahədən 4200 ton bostan məhsulu toplanmışdır.

Rayon üzrə iribuynuzlu mal-qara 34160 baş, ondan inək və camışlar 15200, qoyun və keçilər 102047 baş, ət istehsalı 3115 ton, süd istehsalı 27100 ton, yumurta istehsalı 8046 min ədəd olmuşdur. Ötən ilin müvafiq dövri ilə müqayisədə iribuynuzlu mal-qaranın baş sayı 9 faiz, qoyun və keçilər 1,3 faiz, ət istehsalı 10,5 faiz, süd istehsalı 0,9 faiz, yun istehsalı 1,6 faiz artmışdır.

(ardı gələn sayımızda)

Məzahir ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-20 aprel.- S.7.