Hörmətli redaksiya! Təəssüflə qeyd edək ki, AYB Quba bölmə rəhbərliyi lazımi səviyyədə işləyə bilmədiyi üçün (ofisi yox, maaşı yox, avadanlığı yox...) bölgəmizin istedadlı şairlərindən bir neçəsinin şeirlərini sizə təqdim edirik. Bildiyimiz kimi şair dərc olunmağı, oxunmağı sevər. Bu istəkdə qəzetinizin bizə yardımçı olacağına inanırıq.

Sayğılarla: C. Albantürk

Zakir Məmməd

Yol

Bu yolu gəl gedək,

izn ilə gedək.

Bir az ağır-ağır,

hüzn ilə gedə

Beş ilə, on ilə, yüz ilə gedək;

Gedib çıxa bilək

mənzil başına.

Bu yol haqq yoludur,

düz adam gedir.

Qoşulub hər yerdən

yüz adam gedir.

Bu yolu başacan

az adam gedir.

Gedib çıxaq gərək

mənzil başına.

Getdikcə bu yol da

qurtaran deyil.

Yol gedən - yol kəsib

artıran deyil.

Bu yol gedənləri

qaytaran deyil.

Aparıb çatdırar

mənzil başına.

***

Cəlaləddin

Adamlar yarımçıq

dar ağacları

Mənim o yanığlı

tütəyim hanı?

Bu qamış tütəklər

yalaq-tüpürür.

Əlimə gəlməyən

ətəyim hanı?

Ətəyim arxamca

balaq süpürür...

İçib dərd dağıdan

dərdinə şərik

Küçədə min cürə

piyan uyurur

Dilənçi, ələkçi,

hər tinə şərik

Süpürgə satanlar

qiyam uydurur...

Milçək topasının qurbanı arı

Neşdəri havada basılıb qalıb

Adamlar yarımçıq

dar ağacları

Başlar boyunlardan

asılıb qalıb...

Ədalət.-2012.-4 dekabr.-S.7.