İNKİŞAFIN UĞUR STRATEGİYASI

İl sona doğrudur

2012-ci il sona çatmaq üzrədir. Bu il bütövlükdə uğurlu illərdən biri hesab olunmalıdır. Azərbaycan Respublikasının Prezidenti İlham Əliyevin əzmkar fəailiyyəti nəticəsində ölkəmizin daxili və xarici siyasətində qazanılan nailiyyətlər daha ciddi hadisələrdən xəbər verir. Eyni zamanda ölkə iqtisadiyyatının ildən-ilə artan inkişafı da vətəndaşları yeni qələbələrə ruhlandırır.

Bütün bu məsələlər yerlərdə öz əksini tapmaqdadır. Yəni 2012-nin uğurlu finişə yaxınlaşması indidən hiss olunmaqdadır. Dövlət Proqramında nəzərdə tutulan tədbirlərin uğurlu icrası əksər rayonların sosial-iqtisadi və mədəni həyatında rol oynamaqdadır. Göyçay da belə rayonlar sırasındadır. İlin əvvəlinə qayıdıb diqqətlə nəzər yetirdikdə aydın olur ki, rayon rəhbərliyi inkişafın bütün istiqamətlərdə təmin edilməsi üçün qarşıya qoyulan vəzifələri düzgün və effektiv şəkildə həyata keçirmişdir. Üstəlik hər payız keçirilən ənənəvi Nar bayramı özünün rayon və respublika ampluasından çıxaraq daha geniş miqyas almış, Beynəlxalq Nar Festivalı statusuna yiyələnmişdir. İl boyu keçirilən digər tədbirlər və Beynəlxalq Nar Festivalı özlüyündə Göyçayın həm sosial-iqtisadi, həm də mədəni inkişafını təsdiqləyən amillərdir.

Məsələn, ilin sonuna doğru hələ oktyabr ayınadək əldə olunan nəticələrin özü yekun mərhələsinin uğurlarını təsdiqləyir, axırıncı ayların da müvəffəq sonluğunu stimullaşdırır. Diqqət yetirdikdə görürük ki, həmin dövr üzrə rayonda ümumi məhsul istehsalı 2011-ci ilin müvafiq dövrünə nisbətən 6,6 faiz və ya 9,4 milyon manat artaraq 151,2 milyon manata çatmışdır. Rayon üzrə 12,7 miyon manatlıq sənaye məhsulu istehsal edilmişdir.

Tikinti sahəsi rəqəmlərdə və...

Rayon iqtisadiyyatının digər sahələri kimi tikinti sahəsində də müəyyən uğurlar əldə edilmiş, iqtisadi və sosial sahələrin inkişafı üçün bütün maliyyə mənbələrindən əsas kapitala 25,2 milyon manat və ya ötən ilin müvafiq dövrünə nisbətən 26,7 faiz çox investisiya yönəldilmişdir.Tikinti-quraşdırma işlərində istifadə edilmiş investisiyanın həcmi həmin müddət ərzində 28,3 faiz artaraq 23,5 milyon manat olmuşdur. İnvestisiyaların 90,6 faizi istehsal təyinatlı obyektlərin tikintisində istifadə edilmişdir. 2012-ci ilin yanvar-sentyabr aylarında tikinti təşkilatları tərəfindən 8,3 milyon manatlıq inşaat işləri görülmüşdür ki, bu da 2011-ci ilin müvafiq dövrünə nisbətən 2,2 dəfə çoxdur.

Rayon iqtisadiyyatı üçün xüsusi əhəmiyyət daşıyan Yuxarı Şirvan kanalının Bığır kəndinin ərazisindən keçən hissəsində inşa edilən 3 mva gücündə su elektrik stansiyasının tikintisində işlər davam etdirilir. Obyektdə beton su ötürücülərin istehsal olunan enerjinin ötürülməsi üçün transformator yarımstansiyasının tikintisi başa çatdırılmış, su elektrik stansiyasından Bığır yarımstansiyasına qədər elektrik xəti çəkilmiş, turbinlərin quraşdırılması işləri davam etdirilir.

Yalman kəndində ümumi smeta dəyəri 3,1 milyon manat olan üzüm qəbulu müəssisəsinin və sutkada 8 ton spirt istehsal edən qurğu kompleksi inşa edilir.

Region əhalisinin quş əti ilə təminatının yaxşılaşdırılması üçün 528 min başlıq broyler quşçuluq fabrikində yeni istehsal sexləri tikilir və müəssisə sahibləri tərəfindən bu məqsədlə müəssisəyə 1,5 milyon manat investisiya yönəldilmişdir.

Şəhərin su və kanalizasiya təsərrüfatı yenidən qurulur

Cari ilin fevral ayından şəhərin su təchizatı və kanalizasiya sisteminin yenidənqurulması layihəsinin ikinci mərhələsinin icrasına başlanılmışdır. Tikinti işləri bu sahə üzrə ixtisaslaşmış Türkiyənin «Atinak» şirkəti tərəfindən aparılır. Ötən müddət ərzində şəhərin şimal hissəsində ümumi tutumu 2000 ton olan iki su ambarı inşa edilmiş, buradan M.Ə.Rəsulzadə küçəsindən keçməklə su ötürücü boruların quraşdırılması işləri başa çatdırılmışdır. Bu günə qədər müxtəlif diametrli ümumi uzunluğu 28,7 km. olan su kəmərləri, 27,1 min km. kanalizasiya xətləri çəkilmiş, 690 evə kanalizasiya, 553 evə içməli su bağlantıları aparılmışdır.

Layihənin icrasına 230 nəfər cəlb edilmişdir ki, bunların da böyük əksəriyyəti rayon sakinləridir. Gələcəkdə şəhər əhalisinin içməli su ilə təminatının daha da yaxşılaşdırılması məqsədi ilə «Azərsu» Səhmdar Cəmiyyəti tərəfindən rayon mərkəzindən 14 km. şimalda Göyçay çayının yatağında drenaj şəbəkəsinin qurulması üçün mühəndis axtarış işləri davam etdirilir.

Göyçay Rayon İcra Hakimiyyətinin başçısı Mənsur Məmmədovla söhbətimiz zamanı bir çox sahələrdə qazanılan uğurlarla yanaşı adıçəkilən layihənin icrasında həm rayon rəhbərliyini, həm də əhalini razı salmayan çatışmazlıqların da mövcudluğunu diqqətə çatdırdı.

- Ötən müddət ərzində Heydər Əliyev prospektindən cənub istiqamətində yerləşən demək olar ki, bütün küçələrdə layihənin icrasına başlanılsa da yalnız Ə.Kərim küçəsində layihədə nəzərdə tutulmuş işlərin yerinə yetirilməsi əsasən təmin olunmuşdur. Podratçı təşkilat tərəfindən işlər lazımi səviyyədə təşkil edilmədiyindən son nəticənin əldə edilməsi yubadılır, bir neçə küçədə tikinti işləri başa çatdırıldıqdan sonra digər küçələrə keçirilməsi praktikasından istifadə edilməməsinin nəticəsində küçələrdə qazıntı işləri uzun müddət davam edir, bu isə əhalinin narahatçılığına səbəb olur. Tikinti aparılan ərazilərdə toza qarşı lazımi tədbirlər görülmür, ayrı-ayrı yerlərdə baxış quyuları vaxtında quraşdırılmadığından nəqliyyat vasitələrinin təhlükəsiz hərəkətinə ciddi təhlükə yaranır.

(ardı gələn sayımızda)

MƏZAHİR ƏHMƏDOĞLU

Ədalət.-2012.-5 dekabr.-S.7.