TOYUQ BANLAYIR

Dünyanın işləri elə qarışıb,

Yaxşını yamandan gəl indi ayır.

Görün ki, nə qədər həddini aşıb,

Xoruzun yerinə toyuq banlayır.

Fironluq eləyir adi gədə,

Ağsaqqal kişiyə eləyir hədə.

Belə görməmişəm inan heç vədə,

Xoruzun yerinə toyuq banlayır.

Kasıbın üzünə baxılır soyuq,

İnana bilmirəm: məgər biz buyuq?!

Yerini səhv salıb xoruzla toyuq,

Xoruzun yerinə toyuq banlayır.

Çoxları deyildir işində mətin,

İtirib qızıltək kişi qeyrətin.

Kim deyir hökmüdür bu təbiətin?!

Xoruzun yerinə toyuq banlayır.

Görəsən bu sirin səbəbi nədir,

Toyuğun çaşması bir bəhanədir.

Bəlkə səbəbkarı bu zəmanədir?!

Xoruzun yerinə toyuq banlayır.

Çalışsaq da hələ heç nə alınmır,

Zavalı xoruzlar yada salınmır.

Onların havası hələ çalınmır,

Xoruzun yerinə toyuq banlayır.

Hərə öz yerini bilir hardadır,

Hində xoruz yerdə, toyuq tardadır.

Hələ ki, üstünlük toyuqlardadır,

Xoruzun yerinə toyuq banlayır.

Yaxşı eşidilir toyuğun sözü,

Xeyir verdiyiçün çox ağdır üzü.

Çox baxt qarışdırır gecə-gündüzü,

Xoruzun yerinə toyuq banlayır.

Üstünlük ondadır bəxti gətirib,

Zaman istəyini kama yetirib.

"Toyuqluq" adını tamam itirib,

Xoruzun yerinə toyuq banlayır.

Hərə öz yerində olmasa əgər,

Ömrümüz-günümüz ötüşər hədər!

Belə olacaqdır nə vaxta qədər

Xoruzun yerinə toyuq banlayır.

ÖLƏNDƏ ÖLƏRİK, QALSAQ YAŞARIQ

Bizə hədə-qorxu gələn bəzi cahangirlər

Bizi qorxutmasın hər yetən gədə,

Sarsılan deyilik, nə qədər varıq.

Xalqım yenilməzdir azad ölkədə

Öləndə ölərik, qalsaq yaşarıq!

Özünə ağalıq eləsin hərə,

Düşməsin havayı boş fikirlərə.

Budur cavabımız cahangirlərə:

Öləndə ölərik, qalsaq yaşarıq!

Yüz düşmənə cavab verə birimiz,

Çoxdur bizdə Mübariztək ərimiz!

Qüdrətlidir hər cəsur əsgərimiz,

Öləndə ölərik, qalsaq yaşarıq!

Hələ susmamışdır qəlbimin simi,

Müzəffər bayraqlı bir ordu kimi.

Cihada gedərik bir nəfər kimi,

Öləndə ölərik, qalsaq yaşarıq!

Min dəfə düşdük ki, çətin sınağa,

Başımız üstündə olmasın ağa!

Canımız qurbandı Ana Torpağa

Öləndə ölərik, qalsaq yaşarıq!

AXIRIN AXIR OLSUN

Qıymaram vaxt-vədəsiz,

Nə bir çiçək, gül solsun.

Arzularam hər kəsə:

Axırın axır olsun.

Xilaf çıxanda vədə

Təqsir görmə özgədə.

Əvvəlin nəs gəlsə də,

Axırın axır olsun.

Cah-cəlalın olsa da,

Qiymətlidir xoş səda.

Etibarsız dünyada

Axırın axır olsun.

Sirr var hər saatda,

Bunu bilmir saat da!

Elə yaşa həyatda

Axırın axır olsun.

Ötüb keçər çətin də,

El-oba adətində.

Ömrün aqibətində

Axırın axır olsun.

Ömrü vermə yelə ki,

Səninkidir hələ ki.

Salamatsan neçəki,

Axırın axır olsun.

Qızılgülün çətrinə,-

Könül verdim ətrinə.

Bənövşənin xətrinə

Axırın axır olsun.

Uyma şöhrətə, ada,

Aqibəti sal yada.

Əvvəlin şah olsa da,

Axırın axır olsun.

Əjdər QİYASLI İqtisadçı alim, şair

Ədalət.-2012.-11 dekabr.-S.6.