OCAQ İSTİ OLSA...

... Bu torpağın, bu elin, bu obanın yazı, yayı, payızı kimi, qışı da gözəldir. Gözəllik təbii ki, hər yurda qismət olmur. O yurda qismət olur ki, o gözəlliyi qoruyurlar, yaşadırlar və məhv olmağa qoymurlar. Bax onda insan heç vaxt bu füsunkar və qeyri-adi gözəllikdən doymaq istəmir...

Füzulinin qeyri-adi bir ab-havası var. Bu ab-havanı istər-istəməz o torpağa qədəm basan və o torpaqda yeriyən hər hansı adam elə həmin an hiss eləyir, duyur. Sadəcə olaraq, bir balaca diqqətli, bir qədər də həssas olmaq bəs eləyir ki, hər şeyə dəqiq qiymət verəsən. Udduğun hava, içdiyin su sənə o qədər rahatlıq gətirir ki, onun təsirindən uzun müddət ayrıla bilmirsən...

XOŞMƏRAMLI ADDIMLAR

Adama elə gəlir ki, Horadiz şəhərini keçməklə qısa zaman kəsiyində rayonun mərkəzi olan Füzuliyə çatmaq olar. Bu həsrətlə həmişə Horadiz kəndinə qədər olan asfalt yolu çox böyük həvəslə getmişəm. Amma elə ki, qarşıda hərbiçilərimiz olub və "ordan o yana getmək mümkün deyil" deyiblər, bax bundan sonra ümidim qırılıb. Amma içimdə belə bir ümid var ki, nə vaxtsa o postu biz Füzuli şəhərindən uzaqda görə biləcəyik. Və bu inam məni zaman-zaman həmin ana yaxınlaşdırır. Tək məni deyil, on minlərlə füzulili bu inamla yaşayır. Gün gələcək bu yolu hamımız addımlayaraq Füzuliyə, Ağdama, Şuşaya, Cəbrayıla, Zəngilana, Qubadlıya, Laçına, Kəlbəcərə... gedəcəyik.

QAR YAĞIRDI...

Hiss olunur ki, qar yağanda Füzulinin kəndləri və yaşayış məntəqələri öz görkəmini dəyişir. Bayaq dediyimiz kimi, qarlı havada, camaatın söylədiyi fikirlərə inansaq, daha çox oksigen olur. Bu həqiqətən də belədir. Hətta qar yağmayanda havada zəngin oksigen olduğunu hiss eləyirsən. Qar yağanda isə hava daha da təmizlənir və hiss edirsən ki, gözəl bir aləmə düşmüsən.

Ciyərlərinə doyunca o təmiz havanı çəkirsən və elə bil ki, özünü cənnətdə hiss eləyirsən. Bütün bunları demək bəlkə də asandır, ancaq sadəcə olaraq, gərək adamın ürəyində təpər ola və durub gedə Füzuliyə. Bax onda görər ki, ora necə qar yağıb və insanlar bu qardan necə sevinirlər...

ÖLKƏ PREZİDENTİ FÜZULİLƏRDƏN RAZI QALDI

Füzulidə gedən çox böyük abadlıq, tikinti və quruculuq işləri ondan xəbər verir ki, işğaldan sonra rayonun azad olunmuş şəhəri və yaşayış məntəqələri əsaslı surətdə yenidən qurulur. Bəli, Füzulinin işğal altında olmuş 22 kəndi və 1 şəhəri erməni qəsbkarlarından azad olunandan sonra burda çox böyük və möhtəşəm abadlıq, tikinti işləri görülüb. Yanmış və dağıdılmış yaşayış binaları, inzibati binalar, məktəblər və xəstəxanalar əsaslı surətdə təmir edilib və bəziləri yenidən tikilib. Kəndlərin əksəriyyətinə asfalt yollar çəkilib.

Eyni zamanda, təbii qazın rayona çəkilməsi də çox böyük önəmli rol oynayır. Artıq rayonun 19 yaşayış məntəqəsində mavi qaz yanır. Bütün bunlarsa insanların həyat və rifah halını yaxşılaşdırır. Qısa zaman kəsiyində Füzulidə, xüsusən də Horadiz şəhərində çoxlu sayda sosial obyektlər istifadəyə verilib. Horadiz şəhəri Avropa şəhərlərinə uyğun tikilib. İndi şəhərin gündüzü kimi, gecələri də gözəldir.

Son iki ildə bayaq dediyimiz kimi, Füzulidə onlarla yeni obyekt istifadəyə verilib. Bunlardan ən möhtəşəmi Heydər Əliyev parkı, Heydər Əliyev Mərkəzi, ikimərtəbəli mədəniyyət evi, şahmat məktəbi, Heydər Əliyev Fondu hesabına 180 yerlik tam orta məktəb, ikimərtəbəli gənclər mərkəzi, Qarabağ kəndində "Qarabağ" broyler quşçuluq fabriki, soyuducu anbar, su elektrik stansiyası və digər tikililərdir. Ölkə prezidenti bu möhtəşəm tikililərin açılışında iştirak edib və Füzulidə görülən abadlıq, tikinti, quruculuq işlərindən razı qaldığını bildirib. Bütün bunlar isə o deməkdir ki, rayona təyin olunmuş icra başçısı Alı Alıyev ölkə prezidentinin etimadını doğruldub və füzuliləri böyük abadlıq, quruculuq işlərinə cəlb edib.

KİMLƏ SÖHBƏT ETDİKSƏ...

Rayonda kimlə söhbət etdiksə, onlar hamısı görülən abadlıq və quruculuq işlərindən ağızdolusu danışdılar. Rayonun ağsaqqallarından olan İsfəndiyar kişi dedi ki, heç ağlımıza gəlməzdi ki, iki ilə yaxın bir müddətdə bu qədər böyük işlər görülə. Bu işləri əvvəllər 30-40 ilə görə bilməzdilər. Amma "El bir olsa, dağ oynadar yerindən" deyimini atalarımız nahaq yerə söyləməyiblər. Biz füzulilər də bu quruculuq işlərində rayon icra başçısına dəstək vermişik. Çünki hər bir görülən iş və hər bir abadlıq biz insanların rahat həyat şəraitinə hesablanıb. Əgər belədirsə, nə üçün biz bu böyük quruculuq işlərindən kənarda qalmalıyıq?! Ölkə prezidenti İlham Əliyevin rayonumuza səfəri və burdakı obyektlərin açılışınıda iştirak etməsi bizi ürəkdən sevindirdi.

Prezidentimiz öz çıxışında dedi ki, Füzuliyə həmişə böyük Öndər Heydər Əliyev qayğı göstərib və mən də bu qayğını fəaliyyət göstərdiyim bütün dövrlərdə göstərəcəyəm. Bax, bu söz bizim ürəyimizdən xəbər verir, bu torpağa və bu yurda bizi daha çox ürəkdən bağlayır. Biz cəbhə bölgəsində yaşayırıq. Hər gün ermənilər atəşkəsi pozurlar. Amma bundan qətiyyən qorxmuruq. Xüsusən də ölkə prezidenti bizə arxa olanda, inamımız daha da artıb.

CAMAAT SEVİNDİ

Ölkə prezidenti Füzuliyə səfərindən sonra Füzuli rayonun sosial-iqtisadi inkişafının daha da sürətləndirilməsi üçün prezidentin ehtiyat fondundan rayona 2 milyon manat vəsait ayırdı. Təbii ki, bu vəsait tikilməkdə və qurulmaqda olan rayonun daha da abadlaşmasına sərf olunacaq. İlk növbədə həmin vəsait hesabına Qarabağ müharibəsi dövründə yandırılmış və dağıdılmış evlər bərpa ediləcək. Bu evlərin tam bərpası isə o deməkdir ki, qaçqınlıq şəraitində yaşayan insanların bir çoxu yenidən öz isti ocaqlarına dönəcəklər. Çünki əvvəllər də yanmış və dağıdılmış evlər bərpa edilib. İndi isə demək olar ki, rayonda bir yanmış ev belə qalmayacaq. Həmin evlərin əsaslı təmir edilməsi xəbəri isə çoxlu sayda füzulilini sevindirib. Onlar sevinirlər ki, yanmış evlər bərpa olunacaq və onlar yenidən həmin mənzillərdə yaşayacaqlar.

Bununla yanaşı, həmin vəsait hesabına rayon icra hakimiyyəti üçün yeni inzibati bina da inşa ediləcək. Hər bir quruculuq, tikinti və abadlıq işi bütövlükdə rayonun və Horadiz şəhərinin gözəlləşməsi deməkdir. Təsadüfi deyil ki, təkcə Horadiz şəhərində 50 mindən çox İtaliyadan, Amerikadan və Türkiyədən gətirilmiş ağaclar əkilib. Bu ağaclar şəhərə əsrarəngiz bir gözəllik verir və onu daha da abad göstərir.

MÜRACİƏT QƏBUL OLUNDU

Heydər Əliyev Mərkəzi çox orijinal və milli memarlıq üslubunda tikilib. Bu mərkəzin həm də qeyri-adi bir böyük iclas salonu var. Təbii ki, bu salon müşavirələr, iclaslar və toplantılar üçün nəzərdə tutulub. Elə rayon icra hakimiyyətinin keçirdiyi ilk yığıncaq da xoş bir mərama xidmət edirdi. Yığıncağı keçirməkdə məqsəd ölkə prezidentinin Füzuliyə səfərindən sonra insanlar arasında yaranan xoş əhval-ruhiyyəyə bir qiymət vermək idi. Yığıncaqda rayon icra hakimiyyətinin başçısı Alı Alıyev çıxış edərək ölkə başçısına Füzuliyə səfərindən və bir çox obyektlərin açılışında iştirak etməsindən danışdı. Eyni zamanda, başçı qeyd etdi ki, füzulilər həmişə ölkə prezidentinin tutduğu siyasi xətti müdafiə edib və ona bütün dövrlərdə arxa durub. Füzulilər fəxr edirlər ki, onların belə bir prezidenti var.

Təbii ki, ölkə prezidenti Füzulidə gedən böyük quruculuq və abadlıq işlərinə həmişə önəm verib. Məhz onun köməkliyi nəticəsində rayonda son iki ildə möhtəşəm tikinti, quruculuq və abadlıq işləri görülüb. Yığıncaqda çıxış edən digər şəxslər də məhz bu fikirləri xüsusilə vurğuladılar. Onlar qeyd etdilər ki, ölkə prezidentinin diqqəti nəticəsində Füzuli günbəgün gözəlləşir.

Çıxış edənlərdən YAP-ın Füzuli rayon təşkilatının sədri Almaz Həşimova, gənclər təşkilatının sədri Tural Nəbiyev və başqaları ölkə prezidentinə bu dəstəyə görə, öz minnətdarlıqlarını bildirdilər. Sonda yığıncaq iştirakçıları tərəfindən ölkə prezidentinə müraciət qəbul olundu.

YÜZ MİN TON TAXIL

Füzuli həmişə öz çörəyi və ruzisi ilə digər qonşu rayonlara arxa olub. İkinci dünya müharibəsində Füzulinin istehsal etdiyi taxılın hesabına Beyləqanda, İmişlidə, Zəngilanda, Cəbrayılda aclığın qarşısı alınıb. Elə o vaxtların ağsaqqal kişiləri deyirdilər ki, Füzulinin çörəyi olmasaydı, ikinci dünya müharibəsində qonşu rayonların əhalisi acından qırıla bilərdi. Şükürlər olsun ki, bu gün də Füzulidə bol məhsul yetişir.

Bu da təsadüfi deyil. Çünki rayonun bərəkətli torpağı, gözəl havası və saf suyu var. Bu gözəlliklərin hesabına rayonda həmişə məhsul bolluğu olub. Bəlkə də Füzuli torpağı yeganə yerlərdəndir ki, orda hər hansı ağacı əkirsən bir ildən sonra bar verir.

Təbii ki, bütün torpaqlar bərəkətlidir. Amma Qarabağ torpağının yetişdirdiyi nemətlərin dadından heç vaxt doymaq olmur. Bu il də rayon tarixində rekort miqdarda - 100 min tondan çox taxıl toplanıb. Yəqin ki, həmin məhsulu əldə eləmək elə-belə başa gəlməyib. Bunun üçün alın təri tökülüb, əziyyət çəkilib. Çəkilən əziyyət isə nə vaxtsa mütləq öz bəhrəsini verir. Əlbəttə, təhnəsi dolu və süfrəsi ruzili olan insanların üzü də həmişə el-oba qarşısında ağdır...

Faiq QİSMƏTOĞLU

Ədalət.-2012.-25 dekabr.-S.6.