Azay Quliyev: "Bu, bizi çox narahat edir..."

"Koordinasiya mütləq şəkildə qurulmalıdır"

Bir il də başa çatır. Bəs 2012-ci ildə Azərbaycan həqiqətlərinin dünyaya çatdırılması, beynəlxalq təşkilatlarla əməkdaşlıq, Azərbaycanda üçüncü sektorun inkişafı sahəsində hansı işlər görülüb? Lent.az-ın bu yöndə suallarını millət vəkili, Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının sədri, Azərbaycan Respublikasının Prezidenti yanında Əfv Məsələləri Komissiyasının üzvü Azay Quliyev cavablandırıb.

- Avronest Parlament Assambleyası (PA) Azərbaycanın problemlərini, həqiqətlərini dünyaya çatdırmaq üçün dərəcədə məqbul müstəvidir?

- Azərbaycan hər bir beynəlxalq qurumun imkanlarından və hər bir beynəlxalq tribunadan maksimum faydalanır. Bu baxımdan hesab edirəm ki, Avronest PA da fikrimizi söyləmək, Azərbaycanın Avropaya inteqrasiyasını təmin etmək üçün yaxşı bir mexanizmdir. Biz Avronest PA vasitəsi ilə Avropa Parlamentinə birbaşa çıxış əldə etmiş oluruq. Məhz Avropa parlamentariləri ilə təmasda olmaq, onlarla Azərbaycanla bağlı məsələ müzakirə etmək, Azərbaycanın üzləşdiyi problemləri, çətinlikləri avropalıların diqqətinə çatdırmaq, ən əsası isə Dağlıq Qarabağ, ərazi bütövlüyü, Ermənistanın işğalçılıq siyasətinin ifşa olunması üçün biz yeni bir imkan əldə etdik. Avronest PA-nın fəaliyyətini bu il ərzində müsbət qiymətləndirirəm. Avronest PA-da Azərbaycan çox fəaldır. Təsadüfi deyil ki, Avronest PA-nın Avropa Birliyinin sərhədlərindən kənarda ilk illik sessiyası bu il aprel ayında Azərbaycanda keçirildi. Gələn ilin fevral ayında Bakıda Enerji Komitəsinin iclası, ayrı-ayrı seminarlar, konfranslar keçiriləcək. Bu da onu göstərir ki, Azərbaycan bu qurumda aparıcı ölkələrdən biridir, Azərbaycana hörmət var, Azərbaycanın sözünə qulaq asılır, təkliflərinə hörmətlə yanaşılır. Azərbaycanın beynəlxalq təşkilatların tədbirlərinə ev sahibliyi etməsi praktikası dəyərləndirilir.

- Ancaq Avronest PA-nn Bakıda keçirilən iclasında da bəyan edildi ki, bu qurum Dağlıq Qaradağ münaqişəsi kimi problemlərinin müzakirə olunacağı və qərar qəbul ediləcəyi bir qurum deyil. Bu baxımdan məsələyə yanaşmanız necədir?

- Bu ilin fevral ayında İrəvanda Avronest PA-nın Sosial komitəsinin iclası oldu. Bu fürsətdən istifadə edərək nümayəndə heyətimiz İrəvana getdi. Ermənistan parlamentində bilavasitə çıxış etmək imkanımız oldu. Ermənistan parlamentində Ermənistanın işğalçılıq siyasəti apardığını açıq şəkildə bildirdik. İlk dəfə idi ki, Ermənistan öz parlamentində işğalçı dövlət kimi qınanırdı. Bunun çox böyük siyasi əhəmiyyəti oldu. Digər tərəfdən, ilk dəfə idi ki, Ermənistan parlamentində qondarma ::::Dağlıq Qarabağ Respublikası:::: üçün ayrılmış xüsusi yerin qarşısında qoyulmuş lövhə bizim ciddi təkidimiz nəticəsində götürüldü. Təsəvvür etmək çətin deyil ki, bu, ermənilər üçün nə qədər böyük mənəvi zərbə oldu. Yalançı, qondarma da olsa, Ermənistan ali qanunverici orqanından yüz illər boyu uğrunda mübarizə apardığı qurumun adı götürüldü. Onlar bir daha gördülər ki, Azərbaycan Dağlıq Qarabağ məsələsində öz prinsipial mövqeyindən əl çəkəsi deyil.

Ermənilər çox çalışırlar ki, ümumiyyətlə, Dağlıq Qarabağ məsələsi heç bir beynəlxalq təşkilatda, o cümlədən Avronest PA-da müzakirə edilməsin. Biz isə buna imkan vermirik və bundan sonra da bu belə davam edəcək.

Əlbəttə ki, biz başa düşürük ki, Avronest PA Dağlıq Qarabağ münaqişəsinin həlli ilə bağlı konkret qərarların qəbul ediləcəyi rəsmi format deyil, bu iş bu gün heç bir konkret nəticəsi olmayan ATƏT-in Minsk Qrupuna həvalə edilib və təəssüflər olsun ki, Minsk Qrupunun da hələ ki, bir faydası yoxdur. Amma bu, yenə də o demək deyil ki, biz haqq işimizi digər müstəvilərdə müdafiə etməkdən çəkinməli və bunu zamanın axarına etibar etməliyik. Bu gün hamımız - diplomatlar, millət vəkilləri, siyasətçilər öz cəbhələrində vuruşmalı, əsgər, ordu, vətəndaş, jurnalist, QHT öz işini görməlidir. Hamımızı birləşdirən bir ideya, amal var, o da Azərbaycanın ümummilli maraqları, ərazi bütövlüyü və suverenliyinin bərpa olunmasıdır.

- Avronest PA-da nümayəndə heyətimizin fəaliyyətindən danışdınız. Ancaq bu il Avropa strukturlarının Azərbaycana münasibəti ilə bağlı narazılıq ifadə edən bəyanatlar oldu, Azərbaycanın Avropaya inteqrasiyaya can atmasına baxmayaraq bizə fərqli münasibətin olduğu vurğulandı. Bu, məsələnin bir cəhətidir. Bəs Avronest PA-da deyil, AŞ PA, ATƏT PA və digər strukturlarda nümayəndə heyətlərimizin fəaliyyətlərinin daha effektiv qurulması üçün nə etmək lazımdır?

- Bu, çox maraqlı sualdır. Mən konkret AŞ PA-da təmsil olunmadığım üçün oradakı məsələlərdən tam məlumatlı deyiləm. Ancaq digər iki qurumdakı təcrübəmdən çıxış edərək bəzi məqamları qeyd etmək istərdim.

Birincisi, bizim bu gün beynəlxalq təşkilatlarda təmsil olunan millət vəkillərimizlə Xarici İşlər Nazirliyi arasında koordinasiya çox aşağı səviyyədədir. Çox təəssüflər olsun ki, biz bir dəfə də olsun Xarici İşlər Nazirliyinin rəhbərliyi ilə görüş keçirib, müəyyən informasiya mübadiləsi təşkil edib, prioritet mövzularımızı, mövcud boşluqların aradan qaldırılmasında birgə işi və ümumiyyətlə, xarici siyasət sahəsində Azərbaycanın ehtiyaclarının nədən ibarət olduğunu müzakirə etməmişik. Biz Milli Məclisin xətti ilə iştirak etdiyimiz tədbirlərdə Milli Məclisin rəhbərliyinin, prezidentin həyata keçirdiyi siyasətin nədən ibarət olduğunu bilərək və o nöqteyi-nəzərdən çıxış edərək öz işimizi qururuq. Bu, isə bir çox məqamlarda kifayət etmir. Məsələn, bir çoxumuzdan soruşulsa ki, Madrid prinsiplərinin əsas mahiyyəti nədən ibarətdir, yenilənmiş Madrid prinsipləri ilə Madrid prinsiplərinin fərqi nədən ibarətdir, əmin deyiləm ki, hamı bu suala tam dolğun cavab verə bilsin. Çünki, bu kimi kompetent mövzularla əlaqədar məlumatla XİN gərək onları təmin etsin. Və yaxud digər bir məsələ, haqqında tez-tez danışdığımız xalq diplomatiyasına yanaşmada da vəziyyət eynidir. Ümumiyyətlə, Dağlıq Qarabağ münaqişəsinin həllində dövlət qurumlarından kənar digər qurumların, misal üçün QHT-lərin və mətbuatın potensialından necə istifadə olunması ilə bağlı bizdə vahid mövqe yoxdur. Hesab edirəm ki, bu çox mühüm bir məsələdir və bu işlə kortəbii və pərakəndə şəkildə məşğul olmaq olmaz. Burada vahid bir yanaşma, vahid bir taktika olmalıdır. Bu yanaşma həm Milli Məclisin üzvləri, həm QHT-lər, həm də mətbuat orqanları ilə münasibətdə tətbiq olunmalıdır. Bu baxımdan əvvəllər səsləndirdiyim təklifi təkrarlamaq istəyirəm - ayda və ya rübdə bir dəfə Xarici İşlər Nazirliyinin səlahiyyətli nümayəndələri ilə millət vəkillərinin, QHT-lərin və jurnalistlərin ayrı-ayrılıqda qapalı görüşləri keçirilsin və dediyim mövzular ətrafında informasiya və fikir mübadiləsi aparılsın.

- Yeri gəlmişkən, Azərbaycan Respublikasının Prezidenti yanında Əfv Məsələləri Komissiyasının üzvüsünüz və prezident artıq yeni əfv fərmanı imzaladı. Etiraf edilməlidir ki, bundan əvvəl əfv məsələsində beynəlxalq təşkilatlar qarşısında götürülən öhdəliklər, bu beynəlxalq təşkilatların təklif və iradları müəyyən mənada əksini tapırdı. Əfv Komissiyasının işi necə qurulub, bu dəfə əfv siyasətinin prioritetləri nədən ibarət oldu?

- Burda bir prioritet, bir istiqamət var. O da Azərbaycan dövlətinin, prezidentinin öz vətəndaşlarına münasibətdə sərgilədiyi humanizm . Ümumiyyətlə, bağışlamaq bacarığı, ictimai barışıq, vətəndaş sülhünü gücləndirmək, insanların səhvini əfv edərək onu yenidən normal cəmiyyətə qaytarmaq istəyi, insanlara daha bir şans vermək bütövlükdə dövlətin humanizm mahiyyətindən qaynaqlanan məsələdir. Əfv Komissiyasının də əsas məqsədi ayrı-ayrı məhkumların törətdiyi cinayətin ictimai təhlükəliliyindən asılı olaraq həmin məhkumun yenidən normal həyata qayıtmasının mümkünlüyünü araşdırmaq və onunla bağlı prezidentə rəy və təklif verməkdən ibarətdir. Bunun konkret detallarına gəlincə, əfv haqqında Əsasnamə, bu Əsasnamənin tələbləri var. O tələblərə əsasən Əfv Komissiyasına daxil olan bütün müraciətlərə baxılır, araşdırılır. Hansı müraciətə müsbət baxmaq mümkündürsə, bütün Əfv Komissiyasının üzvləri arasında müzakirələr gedir, rəylər toplanır və siyahı hazırlanaraq prezidentə təqdim olunur. Siyahı hazırlanan Komissiyasının üzvləri arasında müəyyən fikir ayrılığı yaranarsa və bunu müzakirələr zamanı bunu aradan qaldırmaq mümkün olmazsa , o halda qərar açıq səsvermə yolu ilə qəbul edilir. Bunu ona görə deyirəm ki, bu haqda maraqlananlar bilsinlər ki, Əfv Komissiyası bütün müraciətlərə tam obyektiv və ədalətli şəkildə baxır və qərar qəbulunda humanizm prinsipindən çıxış edir. Doğurdan da məhbus islah olunubsa, öz əməlindən səmimi şəkildə peşmançılıq hissi keçirirsə, cəzaçəkmə müəssisəsində bütün qaydalara riayət edirsə, törətdiyi cinayət nəticəsində dəymiş ziyan ödənilibsə, zərərçəkən yoxdursa, yaxud onun əfv olunması nəticəsində digər Azərbaycan vətəndaşı narazı qalmayacaqsa və ümumiyyətlə o ictimaiyyətə təhlükə törətmirsə onun haqqında bir qayda olaraq müsbət qərar qəbul olunur.

Dünən isə hörmətli Prezidentimiz növbəti dəfə böyük humanistlik göstərərək bir qrup məhbusu əfv etdi. Yeni il ərəfəsində qəbul edilən bu qərar yüzlərlə ailəyə ikiqat sevinc və bayram əhval-ruhiyyəsi bəxş etdi. Cənab Prezidentin bu addımını çox yüksək qiymətləndirir və fürsətdən istifadə edib ona dərin minnətdarlığımı bildirirəm.

- Azərbaycanda QHT-lərin ümumi ehtiyaclarını bir kənara qoyaq. Yerli donor timsalında Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurası yaradılıb. Lakin maliyyə məsələsinə baxanda, Şuranın QHT-lərə ayırdığı maliyyənin miqdarı Azərbaycanda bəzi dövlət qurumlarının QHT-lərə ayırdığı maliyyədən azdır. Gələn il üçün artım varmı? Bu istiqamətdə hansısa addımların atılmasına, təmərküzləşməyə ehtiyac varmı? Bəlkə də Şura sədri kimi sizə bu sual ünvanlanmamalıdır, ancaq mənzərə fonunda bu suallar ortaya çıxır.

- Həqiqətən də bu gün dövlətin QHT-lərə dəstək verməsi çox mütərəqqi bir haldır. Vəsaitin həcminə, eyni zamanda bu vəsaitlərin doğru-dürüst koordinasiya olunmasına gəlincə, hesab edirəm ki, bu sualın müəyyən əsası var. Məsələn, keçən il QHT-lərin illik büdcəsi, yaxud onların həyata keçirdikləri layihələrin ümumi həcmi 30 milyon manatdan çox olub. Bunun yalnız 2 milyon 80 min manatını, təxminən 7 faizini Şura verib. Bu, çox az rəqəmdir. Mən bunu Milli Məclisdə qaldırmışam, həll olunması bir məsələ kimi qoymuşam. O ki, qaldı Şuranın büdcəsinə, bu il 3 milyon 877 min 189 manat vəsait ayrılsa da, gələn il üçün təəssüflər olsun ki, bu rəqəm azalaraq 3 milyon 200 min manata endirilib.

- Belə çıxır ki, Şuranın büdcəsi artmaq əvəzinə, əksinə 677 min manat azalıb?

- Bəli, doğrudur. Ümumi büdcədə azalma oldu. Amma bu vəsaitin gələcəkdə artırılmasına ehtiyac var. Heç olmasa QHT-lərin illik büdcəsinin 15-20 faizinin məhz Şura vasitəsi ilə ödənilməsi çox vacibdir. Çünki bu, həm xarici donorlardan asılılığı kifayət qədər azaldar, həm də ümummilli məsələlərin, ictimai problemlərin həllinə QHT-ləri daha yaxından cəlb etməyə imkan verər. Etiraf edək ki, bizim ayırdığımız vəsaitlərlə, 5-6 min manatla ciddi problemi həll etmək çox çətindir. Kiçik qrantlarla çalışırıq ki, heç olmasa QHT-lərin təşəbbüsünü dəstəkləməklə onların ictimai həyatdakı rolunun aşağı düşməsinə yol vermirik. Müxtəlif məsələlərin daim gündəmdə saxlanılması, ən azı Azərbaycanın haqq səsinin dünya ictimaiyyətinə çatdırılması baxımından QHT-lərə dəstək verilir. Bu il ərzində biz müxtəlif xarici dillərdə 36-dan çox kitab nəşr etmişik. 20-dən çox internet səhifəsi yaradılıb, onlarla filmlər çəkilib. Azərbaycanın informasiya savaşında Azərbaycan dövlətinin, prezidentinin həyata keçirdiyi siyasətə ictimai dəstəyi təmin etmək məqsədi ilə bu addımlar atılıb. Dağlıq Qarabağ, Azərbaycan həqiqətlərinin dünyaya çatdırılması, məcburi köçkünlərimizin beynəlxalq məhkəmələrdə hüquqlarının qorunması ilə bağlı məqamlar Şuranın dəstəklədiyi layihələrdə əksini tapıb.

Bütün bunlar böyük əhəmiyyətə malikdir. Amma bəzən görürsən ki, digər donor təşkilatlar, qurumlar eyni layihələri maliyyələşdirirlər. Burada çatışmayan cəhətlər ondan ibarətdir ki, bunlar tam şəkildə şəffaf olmur. Məsələn, biz bilmirik ki, hər hansı digər donorlar, o cümlədən dövlət qurumları indiyə qədər nə qədər QHT-yə dəstək verib. Bunu bilsək, heç olmasa eyni sahəyə təkrar vəsait ayırmarıq. Bu baxımdan dövlət büdcəsindən maliyyələşən bütün layihələrin ən azı informasiya baxımından müəyyən bir koordinasiyasına ehtiyac var. Məsələn, Şura qrant verdiyimiz layihələrin hamısını internetə yerləşdirir, hesabatlarımızda bunu göstəririk. Hətta ilin sonunda bütün layihələr haqqında məlumatları özündə əks etdirən kitab çap olunur. Eyni zamanda biz növbəti ilin qrant müsabiqəsinin mövzularını ictimaiyyətlə müzakirə edir, onların fikirlərini öyrənirik. Hesab edirəm ki, dövlət büdcəsi hesabına QHT-lərə vəsait ayıran bütün qurumların hər ilin sonunda bir toplantısı keçirilsə və növbəti ilin prioritet istiqamətləri müzakirə edilsə, bu vətəndaş cəmiyyətinin inkişafına və sosial məsələlərin həllinə öz töhfəsini verə və büdcə vəsaitindən səmərəli istifadəni daha yaxşı təmin etmiş olar.

- Bəs Şuranın bu ilki fəaliyyətini necə qiymətləndirirsiniz, növbəti ildə fəaliyyəti necə qurulacaq, prioritetlər necə olacaq?

- Məncə, Şuranın fəaliyyətinə qiyməti QHT-lər, dövlət qurumları, ictimaiyyət verməlidir. Öz fəaliyyətimizə qiymət vermək bir az düzgün olmaz. Amma bütövlükdə hesab edirəm ki, Şura 2012-ci ildə bir neçə sahədə işini maksimum səviyyədə təşkil etməyə çalışdı. Birinci, QHT-lərin bilik və bacarıqlarının artırılması istiqamətində çox önəmli layihələrimiz oldu. Bura QHT-lərin mühasibat uçotunu düzgün təşkil etməsi, hesabatlılığın verilməsi, yeni proqramlarla təminat və QHT-lərin regionlardakı fəaliyyətinin genişləndirilməsi daxildir. Eyni zamanda bizim qrant proqramlarımız önəmli mövzuları əhatə etdi, çox ciddi ictimai debatlar keçirildi. Məsələn, ::::Eurovision:::: Mahnı Müsabiqəsi ilə bağlı çoxlu sayda layihələrimiz oldu. ::::Eurovision:::: Mahnı Müsabiqəsi zamanı Azərbaycana gələn qonaqları və turistləri yaxşı qarşılamaq, onları lazımi məlumatlarla əhatə etmək, onlara Azərbaycanın gəzməli, görməli yerlərini göstərmək baxımından bizim çox böyük fəaliyyətimiz oldu.

İctimai davranış baxımından bir sıra işlər görülüb. Bu məsələ ilə bağlı xeyli problemlərimiz var. İctimai davranış ictimai nəqliyyatdan tutmuş digər sahələrə qədər özünü göstərir. Şüurlarda müəyyən dəyişikliklərin olması, mədəni səviyyəmizin artırılması, gənclərimizin maariflənməsi, bir çox informasiya resurslarına çıxışın təmin olunması baxımından bir sıra layihələrimiz oldu.

İkinci istiqamət qanunvericilik, normativ hüquqi aktların yaradılması ilə bağlıdır. Çox sevindirici haldır ki, bu il 3 qanun layihəsini hazırlayaraq Prezident Administrasiyasına, Milli Məclisə təqdim edə bilmişik. Bura ::::Peşə birlikləri haqqında::::, ::::Sosial sifariş haqqında:::: və ::::İctimai iştirakçılıq haqqında:::: qanun layihələridir. Əsasnamədən irəli gələn vəzifələrimizə daxildir ki, hüquqi mühitin yaxşılaşdırılması ilə bağlı Şura müəyyən təkliflər, təşəbbüslər hazırlayaraq təqdim edə bilər.

Bundan başqa, biz bu il çox mühüm sənədin layihəsinin hazırlanmasına başlanılmasına nail olduq. Bu, QHT-lərin inkişafı üçün 2013-2018-ci illəri əhətə edəcək Milli Fəaliyyət Planıdır. Artıq bu sənədin layihəsi hazırdır, gələn ilin əvvəllərindən etibarən ictimai müzakirəsi keçiriləcək. Hesab edirəm ki, gələn il bunu hökumətimizə təqdim edə biləcəyik. Eyni zamanda biz uzun müddət üzərində çalışdığımız QHT-lərin standartlarını hazırlamışıq. Bu da layihə şəklindədir. QHT-nin standartlarının nədən ibarət olması, QHT-lərə müəyyən statusların, məsələn, ictimai faydalı təşkilat statusu verilməsi məsələsini burada qoymuşuq. İctimai faydalı təşkilatın üstünlükləri, güzəştləri nədən ibarətdir, onları hazırlamışıq. Bu da çox böyük yenilik olacaq.

QHT-lərin şəffaflığı ilə bağlı 2 il öncə bir Xartiya hazırladıq. Bu Xartiyanın bu il müəyyən çərçivələrini də müəyyənləşdirmişik. Gələn ildən etibarən həmin QHT-lərin həmin Xartiyaya əməl etməsi məsələsini bir daha müzakirə edəcəyik.

- Beynəlxalq sahədə də Şura çox fəal oldu. Bu haqda nə deyə bilərsiniz?

- Biz bu il bir neçə beynəlxalq tədbirlərə ev sahibliyi etdik, çox mühüm xarici səfərlərimiz oldu. Məsələn, bu il Çexiyanın təcrübəsini öyrənmək üçün bu ölkəyə səfər təşkil edildi. Azərbaycanın son illər əldə etdiyi uğurlar çexiyalı həmkarlarımız tərəfindən müsbət qiymətləndirildi. Təsadüfi deyil ki, hələ 2011-ci ildə Azərbaycan QHT-lərinə dövlət dəstəyinin verilməsi Avropanın ən yaxşı modeli kimi qəbul olunmuşdu. Çexiyadakı görüşlərimizdə də bunun avropalılar tərəfindən çox maraqla qarşılandığının şahidi olduq.

Bu il ilk dəfə idi ki, Rusiyaya səfər etdik, Rusiyanın vətəndaş cəmiyyəti institutları ilə bilavasitə işləyən Rusiya Federasiyasının İctimai Palatası ilə görüşlərimiz oldu. Artıq konkret əməkdaşlıqla bağlı razılıq əldə etmişik və gələn ilin mart ayında qarşı tərəf Azərbaycana cavab səfəri edəcək. Həmin səfər zamanı biz anlaşma Memorondumu imzalayacağıq. Rusiya böyük dövlətdir, qonşumuzdur və uzun müddət bir sistemdə yaşamışıq. Amma hesab edirəm ki, indi vətəndaş cəmiyyəti institutları hərəkətə keçməli, qarşılıqlı maraqlara söykənən təkliflər ortaya qoyulmalıdır. Xüsusən Azərbaycanın milli maraqlarının qorunmasında bir çox istiqamətlərdə böyük imkanlar var. Biz burada da QHT sektoru olaraq öz sözümüzü deməliyik.

Bu il ilk dəfə idi ki, Azərbaycanda Qara dəniz İqtisadi Əməkdaşlıq Təşkilatları ölkələrinin təşkilatlarının Forumu təsis olundu. Bütün Qara dəniz İqtisadi Əməkdaşlıq Təşkilatı ölkələrinin nümayəndələri Azərbaycana dəvət edildi, yüksək səviyyəli Forum keçirildi.

Gələn il Şura ABŞ Beynəlxalq İnkişaf Agentliyi ilə əməkdaşlıq haqqında Müqavilə imzalayacağıq. Eyni zamanda Türkiyə ilə ikitərəfli formatda əməkdaşlıq Forumu keçiriləcək. Rusiya tərəfdən də maraqlı bir təklif gəldi. Təklif edildi ki, Azərbaycan, Rusiya və Türkiyə formatında bir əməkdaşlıq Alyansı yaradaq. Şura da bunu dəstəkləyir. Eyni zamanla növbəti ildə bu istiqamətdə bizim bir neçə digər tədbirimiz də nəzərdə tutulub.

- KİV-lərlə əlaqəniz və Şuranın QHT-lərin informasiya təminatındakı rolunu necə qiymətləndirirsiniz? Şuranın növbəti ildə informasiya açıqlığın və şəffaflığın artırılması istiqamətindəki strategiyası nədən ibarətdir?

- Bu il biz informasiya siyasətimizə də çox ciddi yanaşdıq. QHT-lərin fəaliyyəti ilə bir çox televiziya verilişlərimiz oldu. Şuranın informasiya portalı xeyli təkmilləşib. Biz bu il müvafiq avadanlıqla təchiz olunmuş QHT nəşriyyatı təsis etdik. Bundan sonra bu nəşriyyatda QHT-lərin nəşr işləri daha nəfis, daha keyfiyyətli, çox münasib qiymətlərlə nəşr olunacaq. QHT-lərin bu və ya digər formada olan ehtiyaclarını qarşılamağa çalışırıq.

Dövlət dəstəyinin həyata keçirildiyi 5 əsas istiqamətin hər biri ilə bağlı üzərimizə düşən vəzifəni yerinə yetirməyə çalışırıq. Ən vacibi isə şəffaflığı, aşkarlığı təmin etməyə çalışırıq. Növbəti ildə də müəyyən yeniliklər gözlənilir. Şura gələn ildən layihələrin elektron formada qəbuluna başlayacaq. Bu, vacib bir məsələdir. Digər tərəfdən, maliyyə, aralıq və yekun hesabatların elektron formada qəbulunu həyata keçirməyi planlaşdırırıq. Artıq müasir dövrün, iqtisadi inkişafın tələblərini, İKT-nin təkmilləşməsini nəzərə alaraq QHT-lərlə daha rahat əlaqə imkanları əldə etməyə çalışırıq.

Bizim QHT-lərlə bağlı kifayət qədər ciddi tənqidlərimiz də olub. Bu tənqidlərin əsası da var. Ancaq məqsədimiz tənqid etmək deyil. Məqsədimiz məhz QHT sektorunun inkişafı ilə bağlı ciddi islahatları həyata keçirmək, dəstəkləməkdir. Çox sevinirik ki, Şuranın bu istiqamətdə təşəbbüsləri dövlət tərəfindən dəstəklənir. Təkcə bir faktı qeyd edim. Bu ilin iyul ayında Prezident Administrasiyasının İctimai-siyasi şöbəsinin müdiri Əli Həsənovla QHT sektorunun əsas aparıcı nümayəndələrinin qapalı bir görüşü oldu. Həmin görüşdə çox vacib məsələlər müzakirə edildi. Bütün təkliflər və qaldırılan məsələlər ümumiləşdirildi, Prezident Administrasiyasının rəhbəri Ramiz Mehdiyev tərəfindən rəy üçün mərkəzi icra hakimiyyəti orqanlarına göndərildi. Artıq QHT-lər tərəfindən irəli sürülən təkliflərinin bir qismi nəzərə alındı. Məsələn, cənab prezidentin bu ilin sentyabrında təsdiq etdiyi ::::Açıq Hökumətin Təşviqinə dair Milli Fəaliyyət Planında:::: QHT-lərin qaldırdığı bir sıra məsələlər öz əksini tapdı. Ümid edirəm ki, biz bu kimi dialoq və müzakirələrin növbəti ildə də şahidi olacağıq.

Ədalət.-2012.-28 dekabr.-S.4.