İSMAYILLININ QIŞ MƏNZƏRƏLƏRİ

İndi qışın son gücünü göstərdiyi bir məqamdı. Necə deyərlər, kiçik çillə bütün gücünü toplayıb son nəfəsdə daha nələr edə biləcəyini ortaya qoyub. Builki qışın qəribəliklərindən biri də odur ki, ölkənin bütün ərazilərində az qala eyni vaxtda qar yağır, şaxta at oynadır, temperatur elə bir həddə gəlib çatıb ki, təkcə sular yox, elə az qala təbiətin özü də donubdu.

Bax, belə bir vaxtda yola çıxmaq, Azərbaycanın cənnət güşələrini gəzmək həm çətindi, həm də maraqlı. Hidroloqların, xüsusilə, avtomobil müfəttişlərinin xəbərdarlığı tez-tez təkrarlansa da, amma insanın içində bu qış mənzərələrini seyr etmək həvəsi bəzən çox şeyə qalib gəlir. Elə həmin o təbiət vurğunu olanlardan biri kimi biz də bu qışın şaxtalı, sazaqlı günlərində çətinliklərə baxmayaraq, İsmayıllıya üz tutduq. Rayonun sərhəddini keçib İsmayıllı ərazisinə daxil olduqdan sonra ətrafdakı sükut bizi əməlli-başlı heyran etdi. Maşını yol kənarında əyləyib ağacların budağını az qala lap torpağa qədər əyən qarın gücünə tamaşa edə-edə bu bəyazlığı, bu paklığı gözlərimizə köçürüb, canımıza çəkirdik. Açığı, mənzərə o qədər cəlbedici idi ki, adam özündən asılı olmayaraq, eləcə dayanıb baxmaq və gördüklərini öz dünyası ilə eyniləşdirmək, qovuşdurmaq istəyir. Amma soyuğun da nəfəsi sözünü deyir. Ona görə təkrar nisbətən isti maşına qayıdıb yolu davam etdiririk.

İsmayıllı yolları əməlli-başlı buz bağlayıb. Yollarda maşınlar seyrəkdi. Daha çox diqqəti çəkən yol işçiləri və yolu qardan təmizləyən texnikadır. Onlardan birinin yanında maşını əyləyirik. Salamlaşıb "yorulmayasınız!" deyirik. Təbii ki, onlar da bizimlə eyni mehribançılıqla görüşüb yolların təmizləndiyinə baxmayaraq, ehtiyatlı olmağı məsləhət görürlər. Çünki aramsız yağan qar və 12-13 dərəcə şaxta az qala adamın nəfəsini də göydə dondurur. Zarafat zarafat yerində, amma biz doğrudan da bu çətin yolu artıq başa vurmaq üzrəyik. Şəhərin girəcəyində çalışan insanlar təbii ki, yenə də yol işçiləri idi. Ancaq bizim diqqətimizi qaz kəmərinin ötürücüsü yanında dayanmış insanlar da çəkdi. Hiss olunurdu ki, hansısa bir problem yaranıb və onlar da həmin problemlərin çözümü ilə məşğuldular. Bizi görəndə bir anlıq əl saxlayıb "xoş gəldin" etdilər. Məlum oldu ki, havaların kəskin soyuması əhalinin qaz təminatında müəyyən problemlər yaratsa da, ancaq qaz işçiləri gücləndirilmiş iş rejimində çalışaraq tez-tez xətləri yoxlayır, verilən qazın təzyiqinin nəzərdə tutulan normada olmasını diqqətdə saxlayırlar. Bu da İsmayıllı şəhərində və bütövlükdə rayon ərazisində qazdan istifadə edən abonentlərə fasiləsiz xidmətin bir nümunəsidir.

Söhbət zamanı onu da öyrənirik ki, rayonda işıq, su təminatı sahəsində də işlər məhz elə bu cür gücləndirilmiş şəraitdə həyata keçirilir. Təbii ki, işin bu cür təşkili rayon rəhbərliyinin, əlaqədar təşkilatların məsuliyyətindən, öz üzərlərinə düşən vəzifənin öhdəsindən gəlmək bacarığından xəbər verir. Bu həm də onu göstərir ki, Azərbaycan prezidenti İlham Əliyev cənablarının tapşırıq və göstərişləri ölkənin bu bölgəsində də məsuliyyətlə yerinə yetirilir.

Rayon icra hakimiyyətində olarkən öyrəndik ki, ötən il İsmayıllı rayonunda kənd təsərrüfatı məhsullarının istehsal həcmi 55 milyon manata yaxın olmuşdur. Bu da əvvəlki ildən xeyli artıq bir nəticə deməkdir. Məhsulun həcminin əsaslı şəkildə artmasının əsas səbəblərindən biri isə rayonda paxlalı bitkilərə olan münasibətin müsbət yönümdə dəyişməsindən irəli gəlir. Yəni il ərzində 11414 ton paxlalı bitki istehsal olunmuşdu ki, bu da son onilliklər üçün rayonda diqqət çəkən nəticədir. Ümumilikdə isə rayon üzrə 58172 ton dənli, paxlalı bitki istehsal olunmuş və bu da məhsuldarlığın 4 sentner artması deməkdir.

Ötən il rayonda ət, süd, yun, yumurta, kartof, tərəvəz, meyvə, üzüm istehsalında da xeyli irəliləyişlər əldə edilmiş və qazanılan nəticələr sevindirici olmuşdu. Xüsusilə rayon əhalisinin özəl büdcəsinin təminatında sahibkarlığın inkişafı və fərdi istehsal sahələrinin göstəriciləri müsbət rol oynamışdı. Həmçinin heyvandarlıq sahəsində artımın və nəticədə heyvandarlıq məhsullarının da müsbət yönümdə həm kəmiyyət, həm də keyfiyyət baxımından sevindirici nəticələrə səbəb olması rayonun ümumi iqtisadi inkişafında öz sözünü demişdi.

Rayon sahibkarları, fərdi təsərrüfat sahibləri torpağa bağlılıq baxımından da demək olar ki, əvvəlki illərin göstəricilərini təzələmişdilər. Yəni rayonun əkinə yararlı olan 33901 hektar əkin sahəsinin 29000 hektarı əkin altında olmuşdu. Bu da ümumi əkin sahəsinin 85 faizi deməkdir.

Bəli, bu gün İsmayıllıda təkcə kənd təsərrüfatı deyil, eləcə də iqtisadiyyatın digər sahələri də inkişaf relsi üzərindədi. Artıq Azərbaycan prezidentinin Sərəncamı ilə "Aqrolizinq" ASC-nin yaradılması və bu cəmiyyətin vasitəsi ilə yeni texnikaların alınıb sahibkarlara çatdırılması görülən işlərin kəmiyyət və keyfiyyətinə öz müsbət təsirini göstərir. Həmin aqrolizinqlər fermerlərin, sahibkarların lazımi texniki avadanlıqlarla, gübrələrlə, toxumlarla təmin edir və kənd adamının vaxt itkisinin qarşısını alır. Həmçinin rayonda sosial məişət obyektlərinin tikintisi sahəsində də böyük işlər görülür. Yolların təmiri və yolların yenidən çəkilməsi, həmçinin qaz, işıq, su problemlərinin aradan qaldırılması, parkların, xiyabanların salınması, yeni iş yerlərinin açılması rayonda görülən işlər barəsində adamda yaxşı təəssürat oyadır. Bü gun İvanovka kəndində sutkalıq istehsal gücü 18-20 ton olan çörək zavodunun işə salınması və buraya Belorusiyadan gətirilmiş avadanlıqların yerləşdirilməsi həm işin rahat, həm də keyfiyyətli görülməsində öz sözünü deyibdi.

Rayonun Hacıhətəmli kəndində illik istehsal gücü 20000 min ton olan "İsmayıllı Şərab-2" ASC-nin fəaliyyətə başlaması, on adda şərab məhsullarının, eləcə də müxtəlif çeşidli şirələrin istehsalı artıq bir gerçəkliyə çevrilibdir. Həmçinin Xəlilli kəndində "Bismak" şirkəti tərəfindən illik istehsal gücü 24000 min ton olan taxıl terminalının tikilməsi də həm yeni iş yerlərinin açılması, həm də əhalinin sosial rifah halının yaxşılaşması baxımından uğurlu bir göstəricidir. Rayonda olarkən həmsöhbət olduğumuz rayon İcra hakimiyyəti başçısının aqrar məsələlər üzrə müavini Həsən Həsənovun söylədiklərindən aydın oldu ki, bu gün İsmayıllıda "Quşçuluq" ASC-nin tam şəkildə fəaliyyət göstərməsi üçün böyük işlər görülür və fəaliyyət göstərəcək fabrikin 4 sexindən ikisi damazlıq yönümlüdür.

O ki, qaldı rayonda təhsilin, səhiyyənin bugünkü göstəricilərinə, bunlar da ürəkaçandı. Qazanılan nəticələr respublika səviyyəsi ilə nəticədə həm insanların elmə, təhsilə artan marağından, həm də onların sağlamlığı keşiyində dayananların öz işlərinə peşəkarcasına yanaşmadan xəbər verir. Bu qış günündə İsmayıllıda olduğumuz zaman kəsiyində bəyaz qara bürünmüş İsmayıllının uğurlarının müəyyən bir qismini diqqətə çatdırmağa, yaddaşımıza köçürməyə çalışdıq. Təbii ki, qarın yaratdığı problemlər, qışın qayğıları İsmayıllının bütün gözəlliyini görüb seyr etməyə imkan vermədi. Amma burada bir gerçəkliyi etiraf etmək lazımdır ki, o da İsmayıllının həm görkəminin, həm də inkişafının zamanın sürətinə uyğun gəlməsidir.

İslam NİFTİYEV,

Əbülfət MƏDƏTOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-24 fevral.-S.7.