Bu tibb ocağı Şirvan şəhərindədir

Tez-tez xatırladığım, ancaq adını unutduğum bir məşhur həkimin dediyi iki sözdən ibarət bir cümlənin nəyə qadir olduğunun fərqindəyəm. Böyük rus şairi A.S. Puşkinin şəxsi həkimi onun dueldə aldığı yaradan çox tezliklə öləcəyinin təsiri altında iş yerinə gəlir. Ona bütün varlığı ilə inanan pasientlərindən biri soruşur ki, həkim, mənim vəziyyətim necədir. Böyük psixoloji sarsıntı keçirən həkim " Sən də öləcəksən" deyir. Və səhəri gün pasient doğurdanda dünyasını dəyişir. Həkimin kiçicik bir səhfi bir insan ömrünə son qoyur.

Həkim qədər insanların ehtiyacı olan ikinci bir peşə sahibi varmı görəsən?

Həyatımızı etibar etdiyimiz bu ağ xalatlılar haqqında bu gün söhbət açmağa xüsusi ehtiyac var. Çünki, cəmiyyətimizi inkişaf etdirən, sabahımızı qoruyacaq insanların sağlamlığı məhz onların əlindədir. İnsan ömrünü, sağlamlığını hər şeydən uca tutan belə kollektivlər, həkimlər ölkəmizdə kifayət qədərdir.

Belə tibb ocaqlarından biri də Şirvan Mərkəzi Şəhər Xəstəxanasıdır.

Xəstəxananın keçmişinə qısa səyahət

Haqqında danışdığımız Şirvan Mərkəzi Şəhər Xəstəxanasının özünəməxsus tarixi var. Xeyli əvvəllər burada xırda bir feldeşr məntəqəsi insanlara xidmət edib. Bir qədər sonra isə tibb məntəqəsi kimi fəaliyyət göstərib. Elə o vaxtlar müxtəlif səbəblər üzündən burada tüğyan edən malyariya və traxoma xəstəlikləri əleyhinə dispanserin yaradılması zərurəti meydana çıxmışdır. Sonralar traxoma xəstəlikləri əleyhinə dispanserin əsasında rayon göz xəstəxanası yaradılmışdır. Malyariya dispanserinin bazasında isə tropstansiyasının təşkil edilməsi bu dövrə təsadüf edir.

30-cu illərdə rayon kimi fəaliyyət göstərən bu məkanda təşəkkül tapan mərkəzi xəstəxana köhnə binalarda, kiçik sayda həkim və orta tibb heyyəti ilə fəaliyyətə başlayır. Sovetlər dönəmində bir qədər də genişlənən xəstəxana insanlara xidmətində əsaslı dönüş yaradır.

1963-cü ildə doğum evinin də yerləşdiyi 3 mərtəbəli Mərkəzi Şəhər Xəstəxanası istifadəyə verilir. 85 çarpayılıq bu xəstəxana bir neçə şöbəni özündə birləşdirir.

1980-ci ildə şəhərdə 400 çarpayılıq xəstəxana fəaliyyətə başlayır. Bir sıra yeni şöbələrlə bərabər, müstəqil doğum evi, göz, uşaq və onkoloji xəstəxana, gigiyena və epidiomologiya stansiyası və digər tibb müəssisələri təşkil edilir. 240 həkimi, 500 orta tibb işçini özündə birləşdirən xəstəxana tezliklə regionda öz sözünü deməyə başlayır. Qonşu Sabirabad, Saatlı, Salyan, Hacıqabul rayonunun sakinləri bu xəstəxananın xidmətindən istifadəyə daha çox üstünlük verirlər.

Həkimlərin yüksək peşə hazırlığı, dəqiq müayinələr, effektli müalicə, pasientlərə diqqət bu xəstəxananın imicini xeyli yüksəldir. Respublikada sayılıb-seçilən, nümunə göstərilən Şirvan Şəhər Mərkəzi Xəstəxanası bu ənənəni indi də yaşatmaqdadır.

Hər şey qayğıdan, şəraitdən aıslıdır

Hər bir ölkə vətəndaşının həkimlər tərəfindən ciddi müayinə olunmaq və xəstəliyinə uyğun da xəstəxanada müalicə almaq, haqqı var. Ancaq yüksək ixtisaslı həkimin də təyin etdiyi müalicə üçün müvafiq şəraitin olması labüddür axı.

Son vaxtlar respublikada aparılan böyük abadlıq-quruculuq, təmir-tikinti işləri səhiyyə xidmətindən də yan keçməyib. Əlhalinin sağlamlığını qorumaq məqsədi ilə dövlətin həyata keçirdiyi proqramlarda bu çox yaxşı əks olunur. Regionların sosial-iqtisadi inkişafında daha bariz öz həllini tapan bu abadlıq-quruculuq işləri Şirvan Şəhər Mərkəzi Xəstəxanasında öz izlərini qoyub.

Dörd mərtəbədən ibarət xəstəxananın əsas korpusu 2010-2011-ci illərdə Respublika Səhiyyə Nazirliyinin dəstəyi ilə əsaslı təmin edilib. Xəstələrin qəbul şöbəsi ilə bərabər burada cərrahiyyə, trovmotologiya, terapiya, reanimasiya və digər şöbələr indi müasir avadanlığı olan otaqlarda yerləşir. Xəstələrin müalicə olunduqları palatalar çox səliqəli və rahatdır. 2009-2010-cu illərdə əsaslı təmir edilən doğum evi də bu gün Avropa standartlarına cavab verir desək, yanılmarıq. Yenidən quraşdırılmış istilik, su, elektrik xətləri daha etibarlı, daha effektlidir.

İki mərtəbədən ibarət poliklinika da ötən il təmir olunaraq insanların istifadəsinə verilir. Hər iki mərtəbədə yerləşən bütün otaqlar, sanuzerlər bu gün mübaliğəsiz ən gözəl sözlərə, ifadələrə layiqdir. Qeydiyyat şöbəsindən tutmuş şəkər və vərəm, kardioloji, nevroloji, uroloji kabinetlərin, rentgen otağının, laboratoriyanın yerləşdiyi bu poliklinikada hər şey göz oxşayandır. Məhkəmə Tibb Ekspertizası və Potoloji Anatomiyasının binası indi tamam başqa görkəm alıb. Xəstəxananın mətbəxi də təmir edilərək xəstələrin ixtiyarına verilir.

Bir sözlə, Səhiyyə Nazirliyinin dəstəyi ilə Şirvan Şəhər Mərkəzi Xəstəxanasında son illərdə aparılan təmir-tikinti, abadlıq işləri şübhəsiz təqdirəlayiqdir. Bunun xəstəxananın kollektivi də həmişə minnətdarlıqla qeyd edirlər.

(ardı gələn sayımızda)

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-5 iyun.-S.7.