Hacıqabul yeni inkişaf mərhələsində

Keçən əsrin sonlarında - 1991-ci ildə- rayon kimi həyata vəsiqə alan Hacıqabul rayonu ölkədə gedən uğurlu inkişafın bütün sahələrində öz dəst-xəttini qoymaqdadır. Son illər simasını büs-bütün dəyişən rayon mərkəzi - Hacıqabul şəhəri - dediklərimizə əyani sübutdur. Şəhərin əsas yaşayış massivi ilə bərabər bütünlükdə aparılan abadlıq-quruculuq işlərinin miqyası hər gün böyüməkdədir. Küçələri asfaltlaşdırılır, səkilər yenilənir, köhnə binalar təmir edilir, yeni inzibati binalar inşa olunur.

Şəhərin girişində inşa edilmiş yeni inzibati binalar isə kiçik bir şəhərciyi xatırladır. Heydər Əliyev parkının, muzeyinin və heykəlinin ucaldığı məkan çox mənzərəlidir. Rayon İcra Hakimiyyətinin əsaslı təmirdən sonrakı inzibatı binasının, maliyyə və təhsil şöbələrinin, Sosial Müdafiə Fondunun, Əmək və Əhalinin Sosial Müdafiə Mərkəzinin, "Kapital bank"ın, Baytarlıq idarəsinin, əlil və şəhid ailələri üçün yaşayış binasının və digərlərinin yerləşdiyi bu ərazi şəhər haqqında çox gözəl təəssürat yaradır.

Rayon mərkəzinin içərlərinə uzanan rahat avtomobil yolunun hər iki tərəfindəki müasir işıqlandırma sistemi gecələr bu şəhərə başqa bir hüsn verir. Yolun kənarlarında milli ornamentlərlə bəzənmiş daş hasarlar, sütunlar, şəbəkələr hər bir insanda xoş ovqat yaradır. Şəhərin çıxışında, yolun kənarında aparılan tikinti-abadlıq işləri də prossesin davam etməsindən xəbər verir.

Paytaxtdan şəhərə uzanan yolun başlanğıcında tikilməkdə olan böyük və yaraşıqlı bayraq meydanında tezliklə Azərbaycanın üç rəngli rəmzi dalğalanacaq.

Kəndçinin çörəyi torpaqdan çıxar

Bu rayonda yaşayan insanların əsas məşğuliyyəti əkinçilik və heyvandarlıqdır. Ta qədimdən bu aqrar sahəyə xüsusi fikir verən rayon sakinləri bu ənənəni indi də yaşadırlar. Bu ilin ilk 3 ayında bu tendensiya bir az da inkişaf etdirilmişdir. Bu ilin məhsulu üçün 11650 hektar sahədə taxıl əkilmişdir. 360 hektar tərəvəz, 647 hektar bostan, 28 hektar kartof da bu il məhsul verəcək.

Hacıqabulda heyvandarlığın inkişafı bu ilin ilk rübündə ürəkaçan olmuşdur. Ötən ilin müvafiq dövrü ilə müqayisədə süd istehsalı 224 ton artaraq 4499 tona çatdırılmışdır. Ət istehsalının həcmi də 113 ton artaraq 1493 tona yüksəldirilmişdir. Rayondakı iribuynuzluların sayı 36449 baş, xırdabuynuzluların sayı 130055 baş olmuşdur. Bu isə müvafiq dövrlə müqayisədə xeyli çoxdur.

Rayonda əkinçiliklə məşğul olan kənd əməkçilərinə "Aqrolizinq" müəssisəsi tərəfindən 40 ton azot verilmişdir. Buğda məhsulunun istehsalçılarına 224402 manat yardım edilmişdir. Bu rəqəm 827 nəfəri əhatə edir.

Su həyatdır, su dirilikdir

Min illərin sınağından çıxan bu deyimlər bu gün də, sabah da öz aktuallığını itirməyəcək. Yayı çox isti keçən Hacıqabul rayonundakı susuz çöllərdə torpağın hansı rəngdə, hansı keyfiyyətdə olmasını təsəvvür etmək çətin deyil.

Regionların sosial-iqtisadi inkişafı ilə əlaqədar Dövlət Proqramı əsasında Ağsu rayon ərazisindən Hacıqabula çəkilən Baş Şirvan kanalı həyati əhəmiyyətli bir hadisədir. 55 kilometr uzunluğu olacaq bu kanal illərlə su görməyən bu torpaqlara həyat verəcək. Xeyli hissəsi görülən bu işin sona yetməsinə elə də çox qalmayıb. İndi burda qızğın iş gedir. Yəqin ki, yaxın vaxtlarda rayonun Padar, Qarasu, Muğankəndlərinin ərazisindən keçən bu kanal haqqında danışılan kəndlərin torpaq sahələri ilə bərabər digər susuz çöllərə də can verəcək.

Pirsaat çayı üzərindəki su anbarının lildən təmizlənməsi də bu ilin birinci rübündə əsas qayğılardan olmuşdur. Bir sıra çətinliklərə baxmayaraq burda da uğurlu nəticənin əldə olunmasına çox qalmayıb.

Su ilə bağlı həyata keçirilən tədbirlər sona yetdikdən sonra Hacıqabul rayonunda 15 min hektardan çox torpaq sahəsi əkin üçün yararlı əraziyə çevriləcək. Torpaqların suvarılması heç şübhəsiz ki, kənd təsərrüfatının bir çox sahələrinə təsir edəcək. Nəticədə insanların iqtisadi sosial həyatları xeyli yaxşılacaq.

Həll edilən əsas sosial qayğı

Dediyimiz kimi yayı çox isti keçən Hacıqabul rayonunda bir sıra həll edilən sosial qayğılardan ən önəmlisi yenə də su ilə əlaqədardır. Bununla bağlı Hacıqabul şəhərini içməli su ilə daha yaxşı təmin etmək üçün su xətlərinin üzərindəki 22 siyirtmə təmir edilib. İki yeni siyirtmə qoyularaq sıradan çıxmış boru xətləri dəyişdirilmişdir.

Şəhərin daha bir sosial qayğısı- su və kanalizasiya sisteminin yenidən qurulması- intensivləşmişdir. Dövlət Proqramı əsasında şəhərdə "Hidrolotos" tərəfindən bu gün də xeyli iş görülmüşdür. İndiyə kimi 5500 metr kanalizasiya, 3500 metr su xətti çəkilmişdir. 5 min və 2 min kubmetr su tutumu olan anbarlarda işlərin yarıdan çoxu başa çatdırılmışdır.

Layihə başa çatdırıldıqdan sonra Hacıqabul şəhərində su və kanalizasiya sarıdan heç bir problem yaşanmayacaq. Burda da indi işlərin qızğın çağıdır.

Burda evlər tikilir, yollar çəkilir

İki il əvvəl Dəli Kürün daşması nəticəsində bir sıra rayonlarla bərabər Hacıqabulda da xeyli yaşayış binalarına çox böyük ziyan dəymişdir. Daha çox zərər görmüş birinci və ikinci Meyliman kəndlərində onlarla yeni evlər tikilib sakinlərin ixtiyarına verilmişdir. Digər səbəblərdən qəzalı vəziyyətə düşmüş Navahı qəsəbəsindəki 33 fərdi yaşayış evinin inşası son mərhələdədir. Fövqəladə Hallar Nazirinin əməkdaşları bu ilin birinci rübündə 23 mənzilə texniki baxış keçirdikdən sonra 8 mənzilin yenidən inşa olunmasına qərar verilmişdir.

Hacıqabul rayonunda yolların abadlaşdırılmasına xüsusi fikir verilir. İstər rayon mərkəzindəki, istər kəndlərdəki avtomobil yolları imkan daxilində mühafizə olunur, qorunur.

Bu ilin ilk 3 ayında Padar qəsəbəsində, daxili avtomobil yolunda 2,5 kilometr məsafəyə 8 santimetr qalınlığında qum-çınqıl qarışığından əsas qoyulmuşdur. Nəvahi qəsəbəsində bu məsafə 2 kilometr olmuşdur. Udlu kəndinin şəraiti nəzərə alınaraq 1,5 kilometr məsafədə 12 santimetr qalınlığında əsas qoyulmuşdur. Bu işlər Qubalıbaloğlan kəndində də aparılmışdır.

(ardı gələn sayımızda)

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-7 iyun.-S.7.