DƏRDİ ALMADIM EYNİMƏ

Ayaqlarımdan ağrılar

Gəlib çatıbdı başıma.

Min cürə həblər qatıram,

Hər gündə üç yol aşıma.

Belə ağrısı çox olan

Dərdi almadım eynimə.

Gözünə döndüyüm dərd də,

Yol tapıb doldu beynimə.

Görün, nə qədər şirinəm,

Dər də mənə üz çöndərib.

Gündüzlər üzümə gülüb,

Gecələr ağrı göndərib.

İndi əl çəkməyir məndən,

Vallah, dəlidi, cinlidi.

Mənə zorla söz öyrədir,

Yamanca qəddar, kinlidi.

Yaxşı bilirəm, belə dərd,

Bələnmir ağa-sarğıya.

Oğul kimi dözəcəyəm,

Tanrıdan gələn ağrıya.

HAYIF Kİ....

Bu baxış, de, nə baxışdı,

Payızda yağan yağışdı,

Ömrə ələnən qarğışdı-

Hayıf ki, bir az gecikib.

Bu baxışın gül bitirməz,

Şaxta vurub, bar yetirməz,

Qaranquş, bülbül gətirməz-

Hayıf ki, quşlar perikib.

Səninki ta "eh"ə qalıb,

Yanaqların şehə qalıb,

Toxtamağın mehə qalıb-

Hayıf o da əsib keçib.

UNUT MƏNİ...

MƏNİ UNUT...

Baxışların dalğın bulud,

Yanaqların yaşdı, qurut.

Hislərini ovut-uyut,-

Unut məni...

Məni unut...

Köksündə qəm çağlasa da,

Kipriyin nəm bağlasa da,

Qəlbin küsü saxlasa da-

Unut məni...

Məni unut...

Mənə gələn yolun bağlı,

Sağın uçurum, solun bağlı,

Əlin açıq, qolun bağlı-

Unut məni...

Məni unut...

Qucaqlayıb dizlərini,

Göyə dikmə gözlərini.

Eşit şair sözlərini:

Unut məni...

Məni unut...

Şərur

İbrahim YUSİFOĞLU

Ədalət.-2012.-13 iyun.-S.7.