Dünya gözlərinin yaşına dəyməz

Min kaman çəkilə sevda oxuyla

Üstümə çatılan qaşına dəyməz.

Dəyməz bu dünyanın ən uca eşqi

Sevdamın bir qırıq daşına, dəyməz.

Üstümə tökülə sevda naxışı,

Hər damla bir ömrün sevgi naxışıg

Bütün gözəllərin sirli baxışı

Sinəmə sıxdığın qurşuna dəyməz.

Yenə ayrılığa qəlbim tələsdi -

Bu necə sevdadı -

Necə həvəsdi?...

Qurban gözlərinə, ağlama, bəsdi

Dünya gözlərinin yaşına dəyməz.

Son şeir

Ovcumda əlinin ətri qalıbdı -

Bahar çiçəyinin qoxusu kimi...

Bu ömrün...

Sonuncu sətri qalıbdı -

Sonuncu günümün yuxusu kimi.

Daha itirməyə bir günüm də yox,

Hər şey səndə bitir?

Zaman sənindi.

Ömrə bənd olmağa düyünüm də yox...

Açıb qurtulasan,

Aman - sənindi...

Gözünün üstünə süz həsrətimi

Ölüm bu İlahi baxışın üstə.

Çəksinlər sonuncu portretimi

Saçını isladan yağışın üstə...

Ovcumda əlinin ətri qalıbdı -

Bahar çiçəyinin qoxusu kimi...

Bu ömrün...

Sonuncu sətri qalıbdı -

Sonuncu günümün yuxusu kimi.

Sənin portretin

Səni axtarırdım,

Sənig

Sonsuz üfiqlərdə sınan

Baxışlarımın son nöqtəsindəg

Xəzana bürünmüş,

kimsəsiz,

Titrək

payız gecələrindəg

Ürəyimə gömdüyüm sevdaların

Məzar daşları üzərindəg

Rəsmini axtarırdım.

Payız yağışlarının üşütdüyü

Salxım söyüdlərin

İsinmək üçün torpağın altına can atan

budaqlarında

Saçlarını,

Unudulmuş

Qatar dayanacaqlarında

Əllərinin son titrəyişini,

Soyuq şeh damlaları üzərində

Gözlərinin hərarətini,

Axtarırdım...

Xəyalımd

Sevgi portretinin param-parça

Və yarımşıq cizgiləri...

Duyğularımın min yerdən çat vermiş,

Çiliklənmiş koleydeskopa bənzər

Qırıntıları üzərində

İçimə dəfn etdiyim sevdaların

Rəngli eskizləri...

Rəsmini çəkmək ustəyirdim -

Nəfəsim,

Səsim,

Baxışlarım

Üzərinə...

Rəsmini çəkmək istəyirdim

Yollara,

Avtobus dayanacaqlarına,

Hava limanlarının gözləmə salonlarına...

Özümlə baş-başa qaldığım

Hər saniyəyə

Rəsmini çəkmək istəyirdim...

Tənhalıqdan və sənsizlikdən

Üşüdüyüm hər yerdə

Sənə bürünmək üçün...

Bürü məni kirpiyinə,

Tellərinə bürü məni.

Mənsiz keçən aylarına,

İllərinə bürü məni...

Mən bir məhəbbət oxuyam

Atıldım sonsuz yuxuya...

Bu sevginin tər qoxuyan

Güllərinə bürü məni..

Adsız şeirlər

Yollarmı ayrıldı,

Ümidlərmi...

Dəli küləklərmi aldı

yoxsa

Səni əllərimdən?

Sonsuz sevdalarmı?...

Dəli kimi sevdik, aman,

Dəli kimi ayrılaq...

Bu həsrətdən, tənhalıqdan

Bu əzabdan sıyrılaq..

Qoy donsun qapı ağzında -

İzimizdən qurtulaq.

Bu sevda bizə bənzəyir -

Özümüzdən qurtulaq.

***

Getsən...

Payızda get -

Get...

Xəzan vurmuş yarpaqlar,

Çılın-çılpaq budaqlar,

Vida deyən dodaqlar üzərindən

Get...

Yağış yusun saçlarını,

Külək sovursun göyə.

"Dönəcəyəm", - söylə

bir yarpaq pıçıltısıyla,

Get və qayıtma...

Çat-çat olum qəzəbimdən,

Üstümə qızıb da...

çıx get.

Bu sevdanı gözlərindən

Ovcuna süzüb də...

çıx get.

Get...

Yolunda alqışlarım,

Mən bu eşqi...

bağışladım...

Sussun soyuq baxışların

Səbrimə dözüb də...

çıx get.

Demə eşqim öləzidi -

İşıq deyil, qan izidi...

Qəlbim sevda dənizidi,

Qəlbimi gəzib də...

çıx get.

Ovcumda yarpaq əllərin -

Solmamış üzüb də...

çıx get.

Bu eşq Tanrı yazısıdı -

Yazını pozub da...

çıx get.

***

Mən...

Bu sonsuz tənhalığın,

Dəli qəhərin içində

Özümə yol tapammadım

Bu yad şəhərin içindən.

Donub yaşıl budaqları,

Çiçəyi, otu daşlaşıb.

Qəlbimə daş düşüb, Allah,

Qəlbimin odu daşlaşıb.

Sənsiz

Yorğun sevdaların yol ayrıcında

Bir anlıq yuxuya möhtac,

Bir ovuc göz yaşına -

Bir udum suya möhtac

Kimiyəm.

duyğularımın

dünənə uzanan körpüsündə -

addım-addım...

Tək səni uydurdum,

Tək səni yaratdım

içimdə, ruhumda,

gözlərimdə...

Haradasan?

Mən görmədiyim uzaqlardamısan,

Mən getmədiyim yerlərdəmisən?

Haradasan, Tanrım!

... mən getdiyim yerlər qərib -

gələcəkmisən mənimlə?

Sona varan yalanlara -

güləcəkmisən mənimlə.

... Mən öldüm səndən qurtulam -

Öləcəkmisən mənimlə?

Elçin Mirzəbəyli

Ədalət.-2012.-23 iyun.-S.20.