Yardımlı bu gün və sabah

(əvvəli ötən sayımızda)

Yaxşı yaşamaq yaxşı işləməkdən keçir

Yardımlı rayonunun kəndləri bir-birindən xeyli uzaqda yerləşirlər. Əsas dolanışıq yeri kənd təsərrüfatı olan rayonda 36776 hektar torpağın mülkiyyətində, 12567 hektar isə xüsusi mülkiyyətdədir. 17377 hektar torpaq ərazisi isə bələdiyyənin səlahiyyətindədir.

Bu ilin məhsulu üçün 2011-ci ildə 2872 hektar ərazidə taxıl səpini aparılmışdır. Daha münasib, daha məhsuldar 200 ton toxum, 90 ton azot gübrəsi gətirilməsi də rayonun aqrar sahəsinə diqqətdir.

Heyvandarlığa xüsusi fikir verən rayon sakinləri iri buynuzlu mal-qaranın sayını 27577 başa çatdırmışlar. Xırda buynuzluların sayını 78473 başa yüksəldən yardımlılılar ötən il 5839 sentner ət, 40192 sentner süd istehsal edə bilmişlər.

Rayonun ənənəvi məşğuliyyət sahələrindən olan arıçılıq təsərrüfatını inkişaf etdirmək, istehsal olunmaq məhsulu satmaq üçün yerli sakinlər arıçılıq birliyi yaratmışlar. Ötən il 4 nəfər sahibkar arıçı paytaxt yarmarkalarında 800 kiloqrama qədər yüksək keyfiyyətli bal sata bilmişdir.

Dağlarda yaşamaqla iqtisadi çətinlik çəkməmək üçün burda daim çalışmaq lazım gəlir. Yardımlılılar əkin-biçindən, dağlara yayılan mal-qaradan, fərdi təsərrüfatlardan istifadə etməyi bacaran camaatdır. Ona görə də indi bu rayonun iqtisadi durumu yüksələn xətlə inkişaf edir.

Həlli vacib sahələr də var

Bu dağ rayonunda "Regionların Sosial-İqtisadi İnkişafı Dövlət Proqramı" əsasında xeyli işlər görülmüşdür. Yardımlıya ilk dəfə mavi qazın verilməsi 2006-cı ilin oktyabrında Ölkə Prezidenti İlham Əliyevin təşəbbüsü və iştirakı ilə olmuşdur. Rayon mərkəzi ilə bərabər cəmi bir neçə yaxın kəndləri əhatə edən bu sahənin indi dairəsi böyüməkdədir. Mayın əvvəllərində Əngövül kəndinə mavi qazın verilməsinə başlanmışdır. Bozayran, Osnağaran, Dəryavar, Hünəş, Daşkənd, Gavran, Şəfəqli kəndlərinə mavi qaz verilməsi üçün sənədləşdirmə işləri aparılır.

Rayonun elektrik təsərrüfatında son illər bir çox layihələr həyata keçirilsə də, sakinlərin işi və təminatında köhnə elektrik xətləri problemlər yaradır.

Kənd yollarının daha rahat olması təklifləri də sakinlərin içindən gələn arzudur.

Bu və ya digər sosial qayğıları yerlərdə görüş keçirən Yardımlı rayon İcra Hakimiyyətinin başçısı Sevindik Hətəmov sakinlərin öz dilindən eşitməyə daha çox üstünlük verir. Yardımlılılar da onları eşitməyə, qayğı göstərməyə hazır olan yeni icra başçısı ilə daha səmimi olmağa can atırlar. Çünki səmimiyyət, açıq söhbət olan yerdə qarşılıqlı anlaşma və uğurlar labüddür. Qısa müddətdə keçirilən 70-dən çox belə görüş rayondakı bir çox iqtisadi-sosial məsələlərin həllinə təkan vermişdir.

Yüksək təhsil yaxşı şəraitdən asılıdır

Yardımlı rayonunda uzun müddət məsul vəzifələrdə işləmiş, indi təqaüddə olan Vaqif Rufullayev təhsildən söz düşəndə həmişə şəraiti önə çəkir:

- Qardaş, uçuq-sökük, heç bir şəraiti olmayan, buz kimi soyuq otaqda lap akademikin özü neyləyə bilər? Ona görə də mən son vaxtlar ölkədə inşa edilən bütün tədris ocaqlarını çox bəyənirəm. Ötən il bizim rayonda 150 yerlik müasir tələblərə cavab verən Uşaq Musiqi Məktəbi tikildi. Hələ ondan əvvəlləri demirəm, dövlətimizin proqramına uyğun olaraq 220 yerlik Ostayır, Alçabulaq, Şəfəqli, 80 yerlik Gendərə, Gügəvar kənd məktəblərinin tikintisinə başlanmışdır. Kürəkçi kəndində 360 şagird üçün məktəb tikiləcək. 180 yerlik Anzov kənd məktəbinin, 55 yerlik Yolocaq uşaq bağçasının tikintisi üçün layihə sənədləri hazırlanır. Bax bütün bunları mənim deməyim, sənin yazmağın çox asandır. Ancaq Yardımlının çox uzaq kənlərində bu işi təşkil etmək, həyata keçirmək elə-belə iş deyil. Hələ mən bunun maliyyə mənbələrini demirəm. Ölkədə son 10 ildə tikilən məktəbləri hesablasaq təhsilə göstərilən qayğının mənzərəsi tam aydın olar. Məktəblilər indi kompüterdə dərs keçirlər. Təhsilin müdiri deyir ki, indi bizdə 210-dan çox kompüter var, hələ arxası da gəlir. Qoy çox olsun, uşaqlarımız nə qədər savadlı olsa səsimiz bir o qədər uzaqdan gələr.

Söhbətin sonunda Vaqif müəllim: "Nəvələrim hərdən mən başa düşməyim deyə başqa dildə danışırlar. Rus dili deyil, alman dili də deyil. Alman dili olsaydı başa düşərdim, axı arvad almandır. Deyəsən ingilis dilində danışırlar" - deyə söhbətə yekun vurdu.

Rayon mərkəzdən uzaq olsa da, qanuna yaxındır

Xeyli böyük ərazisi olmasına baxmayaraq, Yardımlıda narahatlıq doğuran elə ciddi hadisələr baş vermir. Bu ilin ilk aylarında qeydə alınan 13 hadisənin heç biri ictimai fəlakət törətməyən faktdır. Oğurluq, dələduzluq, insan alveri kimi faktlar burda heç vaxt qeydə alınmır. Hərbi çağırışdan yayınma hallarına da rast gəlinmir. Ötən çağırış 87 nəfər gənc ordu sıralarına yola salınmışdır. Belə, dağlarda həyat öz axarı ilə davam edir.

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-23 iyun.-S.21.