Zaqatala: gözəlliyin və əzəmətin təntənəsi

(əvvəli ötən sayımızda)

Mal-qaranın sayı 2010-cu illə müqayisədə artmış , 3877 (+123) ton ət, 40788(+505) ton süd, 17,1 milyon (+631 min) ədəd yumurta, 149 (+8) ton bal istehsal olunmuşdur.

2011-ci ildə rayonda əhalinin kənd təsərrüfatı məhsullarına olan tələbatı buğda və quş əti istisna olmaqla daxili istehsal hesabına ödənilmişdir. Buna görə də 2012-ci ilin məhsulu üçün 8430 (+67,5) hektar buğda səpilmiş, illik istehsal gücü 500 ton olan quşçuluq fabrikinin istifadəyə verilməsi nəzərdə tutulmuşdur.

Respublika Prezidentinin "Kənd təsərrüfatı məhsullarının istehsalçılarına dövlət dəstəyi haqqında" sərəncamının icrası olaraq 2011-ci ildə 11111 (+139) istehsalçıya 24053,49 (+217,42) ha növündən asılı olmayaraq əkin sahəsinin, eləcə də 1813 istehsalçıya 7807,73 ha buğda sahəsinin becərilməsində istifadə olunan yanacaq və motor yağlarına görə cəmi 1 milyon 274 min 448 manat subsidiya hesablanmış, güzəştli qaydada 568 ton mineral gübrə satılmışdı.

Ekoloji mühitə diqqət

2011-ci ildə rayonda ətraf mühitin kompleks mühafizəsi, ekoloji mühitin yaxşılaşdırılması istiqamətində 110 hektar sahədə mədəni meşə əkinləri aparılmış, 137200 ədəd ağac əkilmişdir. Rayonda təbii sərvətlərin, eləcə də torpaqların mühafizəsinə diqqət artırılmış, torpaqların 439 alqı-satqı, 9 icarə və 25 hərrac əməliyyatı rəsmiləşdirilərək mülkiyyətçilərə 473 ədəd, torpaq islahatı ilə əlaqədar isə 8838 ədəd " Torpaq sahəsinin Planı və Ölçüsü " sənədinin verilməsi təmin edilmişdir.

2011-ci ildə 318,3 min m3 həcmində suvarma kanalları lildən təmizlənərək 15500 hektar torpaq sahəsinin suvarılması təmin edilmiş, 2 pilləli "Alazan Nasos stansiyası"-nın təmiri davam etdirilmiş, 2 ədəd subartezian quyusu qazılmış, dörd zona üzrə sudan istifadəedənlər birlikləri yaradılaraq dövlət qeydiyyatına alınmışdır.

Rayonda sel sularının dağıdıcı təsirinin qarşısının alınması məqsədi ilə 866 pm bənd tikilmiş, 8500 m3 həcmində mövcud bəndlər təmir edilmiş, 600 m3 qabion bənd qoyulmuş, 1,3 milyon m3 həcmində çay yataqları təmizlənmişdir.

Hesabat ilində rayonda bütün maliyyə mənbələri hesabına 29,5 milyon manat həcmində tikinti, abadlıq və quruculuq işləri görülmüşdür.

Tikinti, abadlıq və quruculuq

Büdcə vəsaiti hesabına Tala çayının sağ sahilində uzunluğu 300 metr olan daş-beton bəndin, Aşağı Çardaxlar kəndində 220 şagird yerlik ümumi orta məktəb binasının tikintisi, Muxax kəndində 1 saylı tam orta məktəbin əsaslı təmiri başa çatdırılmış, Muxax kənd 3 saylı ümumi orta məktəb üçün 80 şagird yerlik və Zəyəm kənd tam orta məktəb üçün 180 şagird yerlik yeni məktəb binalarının tikintisinə başlanılmış, rayon statistika idarəsinin və baytarlıq idarəsinin yeni inzibati binalarının tikintisi davam etdirilmiş, beş uşaq bağçasında yenidənqurma və əsaslı təmir işləri aparılaraq yeni inventar və avadanlıqlarla təmin edilmişdir. Heydər Əliyev Fondunun maliyyə dəstəyi ilə Zaqatala şəhərində yeni 50 yerlik uşaq bağçasının tikintisinə başlanılmışdır. Yevlax-Balakən dəmir yolunun 151-ci mənzilində hündür tipli platformanın tikintisi başa çatdırılmış, Yaponiya səfirliyinin maliyyə dəstəyi ilə məişət tullantılarının idarə olunması poliqonu tikilib istifadəyə verilmişdir.

2011-ci ildə rayonda ümumi sahəsi 15088 kvm olan 141 fərdi yaşayış evinin, sahibkarlar tərəfindən yeni ticarət, xidmət, turizm və istirahət obyektlərinin, coxmərtəbəli yaşayış binalarının tikintisi aparılmış, 3,5 milyon manatlıq, o cümlədən yerli imkanlar hesabına 303,0 min manat həcmində abadlıq və təmir işləri görülmüşdür.

Mənzil fonduna daxil olan 11 yaşayış binasının dam örtükləri dəyişdirilmiş, 7 binanın girişləri, qəzalı vəziyyətdə olan binadaxili su xətləri təmir edilmiş, əhaliyə göstərilən kommunal xidmətin həcmi artaraq 319,0 min manat olmuşdur.

Bununla yanaşı şəhərin abadlıq qurğularının, işıq təsərrüfatının qorunub saxlanılması, məhəllədaxili yolların təmiri və abadlaşdırılması işlərinə lazımi əhəmiyyət verilməmiş, məişət tullantılarının daşınmasında nöqsanlar tam aradan qaldırılmamışdır.

2011-ci ildə Əliabad qəsəbəsinə, Yuxarı Tala kəndinin qazlaşdırılmamış hissəsinə, Maqov və Danaçı kəndlərinə qaz xətləri çəkilmiş, əhali sektorunda abonentlərinin sayı 10319-a çatdırılmış, 2012-ci ildə 14 kəndə qaz çəkilişi nəzərdə tutulmuşdur.

"Zaqatala şəhərinin su təchizatı və kanalizasiya sistemlərinin yenidənqurulması və tikintisi"nə dair irimiqyaslı layihənin 2-ci mərhələsinin icrasına başlanılmışdır. Lakin etiraf etmək lazımdır ki, şəhər və kənd yaşayış məntəqələrində əhalinin içməli su ilə təchizatında olan nöqsanlar tam aradan qaldırılmamışdır.

Təhsil və səhiyyə

2011-ci ildə rayonda təhsil sahəsində məqsədyönlü işlər aparılmış, vacib qərar və sərəncamlar qəbul edilmiş, rayonda 67 ümumtəhsil məktəbi, 39 məktəbəqədər, 5 məktəbdənkənar tərbiyə müəssisəsində 2967 müəllim fəaliyyət göstərmişdir.

Mərkəzləşdirilmiş qaydada keçirilən buraxılış-test imtahanlarında 11-ci siniflər 83 faiz, 9-cu siniflər 99 faiz nəticə əldə etmiş, respublika olimpiadalarında 7 nəfər II və IV yerleri tutmuşlar.

XI sinfi bitirmiş məzunlardan 275 nəfəri tələbə adını qazanmış, 13 nəfər abituriyent 600 dən, 43 nəfəri isə 500-dən yuxarı bal toplamışdır.

Respublika Prezidenti Cənab İlham Əliyev gənclərlə aparılan işin vacibliyinə böyük önəm verərək demişdir: - "Gənclərdə çox böyük potensial, böyük enerji vardır, vətənpərvərlik hissləri çox yüksəkdir... Biz gəncləri quruculuq işlərinə daha da fəal cəlb etməliyik".

Zaqatala gəncləri öz bilik, bacarıq və qabiliyyətlərini müxtəlif layihələrdə uğurlu nəticələri ilə təsdiq etmiş,respublika və rayon müsabiqələrində iştirak edən 200-ə yaxın şagird diplom və fəxri fərmanlarla təltif olunmuşdur.

Rayonun ərazisində müvəqqəti olaraq məskunlaşmış qaçqın və məcburi köçkün ailələrinin sosial problemləri ilə daim məşğul olan rayon icra hakimiyyəti onların yaşayış şəraitinin yaxşılaşdırılması üçün bir sıra tədbirlər həyata keçirmiş, "Gülüstan" Turist bazasında müvəqqəti məskunlaşmış 32 ailə yeni inşa edilmiş yaşayış binasına köçürülmüşdür.

Son illər əhalinin sağlamlığının qorunmasına diqqət artırılmış, rayonda 253 həkim, 788 tibb bacısı əhaliyə səhiyyə xidməti göstərmişdir. Bütün növ peyvəndlər vaxtlı - vaxtında aparılmış, mərkəzi rayon xəstəxanası və kənd səhiyyə obyektlərində tikinti abadlıq işləri görülərək, yeni inventar və tibbi avadanlıqlarla təchiz edilmişdir.

Müalicə Diaqnostika Mərkəzində səhiyyə xidmətini yüksəltmək üçün xüsusi laboratoriya yaradılmış, mərkəzə il ərzində 25379 nəfər müraciət etmiş, 1574 nəfər əməliyyat olunmuş, Hemodializ şöbəsində 55 xəstəyə 7932 seans keçirilmişdir.

(ardı gələn sayımızda)

Məzahir Əhmədoğlu

Azərbaycan Respublikasının

Prezidenti yanında kütləvi informasiya

vasitələrinin inkişafına dövlət dəstəyi

fondunun maliyyə yardımı ilə

Ədalət.-2012.-2 mart.- S.6.