O DAĞLARIN ZİRVƏSİNDƏN BAXANDA...

Balakən qartalları unudulmaz ki...

Burada dayanıb hansı tərəfə boylansan, əvvəl-əvvəl zirvələri qılınc kimi parlayan qarşı dağların əzəməti gözlərini qamaşdırar. Bir az aşağıda sanki heç qanad çalmadan saatlarla o ucalıqlarda dövr edən qartallardır. Balakənin rəmzinə çevrilib bu qartallar. Bu torpaq, bu el Qarabağ döyüşlərinə göndərdiyi yüzlərlə igid övladını "Vətən uğrunda qartal kimi vuruşun!" deyə öymüşdü. Əbəs deyil ki, mənfur düşmən də bu igidlərin elə təkcə adından vahimələnirdilər. "Balakən qartalları" Qarabağ döyüşlərində yüzlərlə şəhid verdi, "öz yuvalarına" - dağlar qoynuna yaralı döndü, yaralarını sağaldıb yenidən silah götürdü... İndi bu silahlar əsgərlikdə olan "Balakən qartalları"nın övladlarının əllərindədir. Hər an Ali Baş Komandanın əmrini gözləyirlər.

...Balakəndən söhbət açanda "Balakən qartalları"nı xatırlamasam olmur.

Necə ki, bu gün Balakənin zirvələrində qartallar uçuşan, yamaclarında meşələr sıralanan, qayalarından çaylar baş alan əzəmətli dağları kimi kəndləri, qəsəbələri, rayon mərkəzi də böyük bir inkişaf və yüksəliş yolundadır.

Quruculuq prosesinin fəal iştirakçıları

...2011-ci ildə respublikamız sosial-iqtisadi, siyasi, mədəni həyatın bütün sahələrində dinamik inkişaf etmişdir. Ölkənin bütün vətəndaşları kimi balakənlilər də bu inkişaf və quruculuq prosesinin fəal iştirakçısı olmuşlar.

Regional, tarazlı inkişafın təmin olunması istiqamətində qəbul olunan "Regionların 2009-2013-cü illərdə sosial-iqtisadi inkişafı Dövlət Proqramı"nın icrasının sürətləndirilməsi, eyni zamanda, həmin proqramda nəzərdə tutulmayan digər mühüm tədbirlərin həlli məqsədilə rayonun 2011-2013-cü illərdə sosial-iqtisadi inkişafı Proqramı işlənib hazırlanmışdır. Proqramda 10 bölmə üzrə 83 tədbir nəzərdə tutulmuş, 2011-ci il üzrə burada nəzərdə tutulan tədbirlərin icrası əsasən təmin olunmuşdur.

İcra başçısı uğurlardan və qarşıda duran vəzifələrdən söhbət açır

Bütün bunlar barədə Balakən Rayon İcra Hakimiyyətinin başçısı İslam Rzayev bizimlə söhbətində daha geniş məlumat verərək danışır:

- 2011-ci ildə rayonda ümumi məhsul buraxılışı 111,2 milyon manat təşkil etmişdir. Hesabat dövründə 48,8 milyon manatlıq kənd təsərrüfatı məhsulu, 7,6 milyon manatlıq sənaye məhsulu istehsal edilmiş, 15,4 milyon manatlıq tikinti işləri görülmüşdür. Keçən ilin müvafiq dövrü ilə müqayisədə kənd təsərrüfatı məhsulu istehsalı 1 faiz, sənaye məhsulu istehsalı 14,4 faiz, pərakəndə əmtəə dövriyyəsi 17,7 faiz artmışdır. Ümumi məhsul buraxılışında kənd təsərrüfatının xüsusi çəkisi 44 faiz, sənayenin xüsusi çəkisi 6,8 faiz olmuşdur.

Rayonda bitkiçiliklə yanaşı, heyvandarlığın da inkişaf etdirilməsi diqqət mərkəzində saxlanılır. Hesabat ilinin sonunda rayonda iribuynuzlu mal-qaranın sayı 38057 baş, ana mal 18245 baş, qoyun-keçilər 35631 baş olmuş, əvvəlki ilə nisbətən iribuynuzlu mal-qaranın sayı 342 baş, ana malın sayı 732 baş, qoyun-keçilərin sayı 577 baş artmışdır.

İl ərzində rayonda 4654 ton ət, 15656 ton süd, 68,8 ton yun, 8344 min ədəd yumurta, 30 ton bal istehsal olunmuşdur. Əvvəlki ilə nisbətən 10 ton ət, 31 ton süd, 1,6 ton yun, 2 ton bal, 24 min ədəd yumurta artıq istehsal edilmişdir. Heyvandarlıqda bütün növ məhsulların istehsalı üzrə artıma nail olunmuşdur. Bu sahənin inkişaf etdirilməsi ilə əlaqədar olaraq damazlıq işlərinə, o cümlədən süni mayalandırma tədbirlərinin həyata keçirilməsinə diqqət artırılmışdır.

Eyni zamanda, arıçılıq üzrə fəaliyyət göstərən 3 damazlıq təsərrüfatı inkişaf etdirilmiş və həmin təsərrüfatlarda arı ailələrinin sayı 300-ə çatdırılmışdır.

Bütövlükdə 2011-ci ildə aqrar sahədən 48,9 milyon manatlıq gəlir əldə edilmişdir ki, bu da əvvəlki ilə nisbətən 400 min manat çoxdur. İstehsal olunan məhsulun 55,3 % -i yəni 27 milyon manatı bitkiçilik, qalan 44,7 %-i, yəni 21,9 milyon manatı isə heyvandarlıq məhsullarının payına düşür.

Dövlət Proqramına uyğun tikilib istifadəyə verilmiş "Azəryemsənaye" MMC-də il ərzində 1100 ton qüvvəli yem istehsal olunmaqla rayonun və respublikanın digər rayonlarının fermerlərinə satılması təşkil edilmişdir. Eyni zamanda, müəssisə tərəfindən ətlik heyvandarlığın inkişaf etdirilməsi istiqamətində də layihə həyata keçirilir. Rayonun Katex kəndində heyvandarlıq ferması yaradılmış, xaricdən ətlik üçün 418 baş iribuynuzlu mal-qaranın gətirilməsi təmin edilmişdir ki, bu da rayonda mal-qaranın cins tərkibinin yaxşılaşdırılmasına və ət istehsalının artırılmasına imkan verəcəkdir.

Azərbaycan Respublikası Prezidentinin 23 yanvar 2007-ci il tarixli 1907 nömrəli "Kənd təsərrüfatı məhsullarının istehsalçılarına dövlət dəstəyi haqqında" Sərəncamına uyğun olaraq 2011-ci ildə Kənd Ərazi Komissiyalarına müraciət etmiş 2607 nəfər istehsalçıya becərdikləri 5034,60 ha sahəyə görə 201384 manat yardım verilmiş, payızlıq buğda əkmiş 30 nəfər istehsalçıya 132,40 ha sahəyə görə 5296 manat yardım hesablamaqla sənədlər Respublika Komissiyasına təqdim edilmişdir. Yardımların istehsalçılara çatdırılması üçün rayon komissiyası tərəfindən müvafiq tədbirlər həyata keçirilir.

Torpaqlardan düzgün istifadəyə təminat

2011-ci ildə bələdiyyə mülkiyyətində olan torpaqlardan və əmlaklardan qanunvericiliyə uyğun olaraq istifadə edilməsi üçün tədbirlər görülmüşdür. Cəmi 1436 ha torpaq sahəsi icarəyə verilmiş və 98282 manat icarə haqqı alınmışdır. İcarəyə verilmiş torpaq sahələrində kənd təsərrüfatı məhsulları əkilmiş və heyvandarlığa yem ehtiyatının yaradılması üçün istifadə olunmuşdur.

Qeyd olunmalıdır ki, Dövlət Torpaq və Xəritəçəkmə Komitəsinin rayon şöbəsi torpaqlardan təyinatı üzrə istifadə edilməsinə nəzarəti gücləndirməli, təyinatı dəyişdirilmədən müxtəlif məqsədlər üçün istifadə edilən torpaq sahələrinin əvvəlki vəziyyətinə qaytarılması üçün təsiredici tədbirləri həyata keçirməli, vətəndaşların torpaqla bağlı şikayətlərinə və müraciətlərinə vaxtında baxılmasını təmin etməlidir.

Hesabat ilində 60 ha meşə əkini, 60 ha meşə əkinlərinə xidmət və 52 ha torpaq hazırlığı işləri aparılmışdır.

Əkin materiallarına olan təlabatı ödəmək məqsədilə 1,73 ha sahədə tinglik salınmış, hazırda həmin tinglik sahəsində 107 min ədəd müxtəlif növlərdən olan əkin materiallarına aqrotexniki xidmət göstərilir. Bununla belə, müəssisə meşə əkini işlərini davam etdirməli, tingliklərin salınması, ağac yetişdirilməsi istiqamətində də işlərini günün tələbləri səviyyəsində qurmalıdır.

Rayon fermerləri Bakı şəhərində keçirilən kənd təsərrüfatı məhsulları satışı yarmarkalarında iştirak etməklə il ərzində 105 ton müxtəlif növ kənd təsərrüfatı məhsullarının yarmarkada satılmasını təşkil etmişlər.

(ardı gələn sayımızda)

MƏZAHİR ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-13 mart.-S.7.