O DAĞLARIN ZİRVƏSİNDƏN BAXANDA...

(əvvəli ötən saylarımızda)

Ali məktəblərə qəbul üçün sənəd vermiş 403 nəfərdən 189 nəfəri tələbə adını qazanmışdır ki, bu da 2010-cu ilin göstəricisi ilə eyniyyət təşkil edir. Ali məktəblərə qəbul zamanı 29 nəfər 500-dən yuxarı, onlardan 6 nəfəri isə 600-dan yuxarı bal toplamışdır ki, bu da 2010-cu illə müqayisədə 7 nəfər çoxdur.

Ümumtəhsil məktəblərində şagirdlərin fiziki, milli və hərbi vətənpərvərlik tərbiyəsinin yaxşılaşdırılmasına da diqqət yetirilmiş, bu məqsədlə keçirilən yarış və turnirlərdə əksər məktəblərin şagirdlərinin iştirakı təmin edilmişdir. "Gələcək nəsillərlə üz-üzə" mövzusunda keçirilmiş II ümumrespublika inşa müsabiqəsində liseyin XI sinif şagirdi birinci yeri tutmuşdur.

Rayonda fəaliyyət göstərən 1 və 2 saylı texniki peşə məktəblərində 327 nəfər 10 ixtisas üzrə peşə təhsili ilə əhatə olunmuşdur. Hər iki məktəbdə may ayında akkreditasiya keçirilmiş və məktəblərə müvafiq keyfiyyət sənədi verilmişdir. Peşə məktəblərinin maddi-texniki bazasının gücləndirilməsinə və tədris binalarının əsaslı təmirinə ciddi ehtiyac vardır.

Səhiyyə xidməti yeni yüksəliş dövründə

Hesabat dövründə əhaliyə səhiyyə xidmətinin göstərilməsi sahəsində mühüm dəyişiklik olmuş, xəstəxana yeni binada fəaliyyət göstərməyə başlamışdır. Yeni xəstəxana kompleksində mövcud olan müasir tibbi avadanlıq və aparatura burada əhaliyə yüksək səviyyədə tibbi xidmət göstərməyə imkan verir.

İl ərzində 10300 xəstəyə Təcili yardım şöbəsi tərəfindən təcili və təxirəsalınmaz yardım göstərilmiş, ötən illə müqayisədə yardım göstərilənlərin sayı 225 nəfər çox olmuşdur. Profilaktiki peyvəndlər 98-99 % yerinə yetirilmişdir.

Keçən il "Turizm ili" idi...

2011-ci ilin "Turizm ili" elan edilməsi ilə bağlı tədbirlər planı hazırlanmış, turizm marşrutları müəyyən edilmiş, "Bu Vətən bizimdir" devizi altında yay düşərgəsi təşkil olunmuşdur. 27 sentyabr - turizm günü münasibəti ilə "Turizmin inkişafında tarix və mədəniyyət abidələrinin rolu" mövzusunda elmi-praktik konfrans keçirilmiş, "2011-ci il Turizm ilidir" başlığı altında sərgi təşkil olunmuşdur.

Rayon ərazisində aparılmış arxeoloji qazıntılar nəticəsində tapılmış eksponatların hesabına Tarix-diyarşünaslıq muzeyi zənginləşdirilmiş, il ərzində başqa mənbələr hesabına eksponatların sayının artırılması diqqət mərkəzində saxlanılmışdır. Bu da mərkəz və muzeyə gələn ziyarətçilərin sayının artmasına səbəb olmuşdur.

... Bu il "İdman ili"dir

Hesabat dövründə idman sahəsində müxtəlif yarışlar keçirilmiş, respublika səviyyəli 37 yarışda idmançılar 22 dəfə I yeri, 11 dəfə II yeri, 18 dəfə III yeri tutmuşlar. Keçən dövr ərzində rayon idmançıları 13 beynəlxalq səviyyəli yarışlarda ölkəmizi uğurla təmsil etmiş, 4 Yunan-Roma güləşçisi Avropa və dünya birinciliklərində fəxri kürsünün ən yüksək pilləsinə qalxmışlar. Hesabat dövründə idmançılarımız beynəlxalq səviyyəli yarışlarda 4 dəfə I yeri, 3 dəfə II yeri, 4 dəfə isə III yeri tutmuşlar. 2010-cu illə müqayisədə idman yarışlarında iştirak edənlərin sayı, eyni zamanda əldə etdikləri nailiyyətlərin sayı artmışdır.

2012-ci il ölkə Prezidentinin Sərəncamı ilə "İdman ili" elan olunub.

İlin əsas quruculuq istiqamətləri

Cari ildə inzibati ərazi nümayəndəliklərinin 2011-ci ilin yekunlarına dair hesabatları dinlənilərkən kənd təsərrüfatının inkişafı imkanları geniş təhlil olunmuşdur. 2012-ci ildə ümumi əkin sahələrinin 22-24 %, o cümlədən qarğıdalı əkinlərinin 27-30 % artırılmasına nail olunacaq.

Kənd təsərrüfatı məhsulları istehsalının artırılması ilə yanaşı onun realizasiyası istiqamətində də görülən işlər- Katex kəndində soyuducu və qurutma kameralarının tikintisi, Konserv zavodunda yeni istehsal sexlərinin işə salınması rayonda istehsal olunan meyvə-tərəvəzin saxlanmasında və satışında olan problemlərin aradan qaldırılmasına imkan verəcəkdir.

2012-ci ildə rayonda Mədəniyyət evi, Yeni Azərbaycan Partiyasının rayon təşkilatının inzibati binası, yeni məktəblər tikiləcək, sosial infrastruktur obyektləri, çoxmənzilli yaşayış evləri təmir olunacaq, yerli əhəmiyyətli yollarda asfaltlaşma işi, qazlaşma, artezian quyularının qazılması, şəhərin su və kanalizasiya xətlərinin tikintisi işləri aparılacaqdır.

Yerli problemlərin həllində qeyri-dövlət sektorunun, o cümlədən bələdiyyələrin potensial imkanları təhlil edilmiş, perspektiv inkişaf proqramları hazırlanmışdır. 2012-ci ildə bələdiyyələrin imkanları hesabına 12,5 km kənddaxili yolların asfaltlaşdırılması,110 km yolların təmiri, 31,6 km arx və kanalların təmizlənməsi, 1 uşaq bağçasının cari təmiri, 4,0 km su xəttinin çəkilməsi, 32,2 km su xəttlərinin təmiri, Katex kəndində H.Əliyev seyrəngahının yaradılması, "Xeyir və şər" evlərinin tikintisi kimi işlərin görülməsi nəzərdə tutulur.

Hökumətin iclasında maliyyə intizamına riayət olunması, tikinti materialları istehsalının inkişaf etdirilməsi, korrupsiya və rüşvətxorluğa qarşı mübarizənin gücləndirilməsi tapşırığı verilmişdir. Eyni zamanda, aparılan işlər, görülən tədbirlər kampaniya xarakteri daşımamalı, davamlı olmalıdır.

Nazirlər Kabinetində keçirilən müşavirədəki yekun nitqində ölkə başçısı cənab İlham Əliyev: "2012-ci ildə görüləcək işlər çoxdur. Hamıdan fəallıq, fədakarlıq, vicdan və qələbə əzmi gözləyirəm" sözləri ilə cari ildə qarşıya qoyulan vəzifələri müəyyənləşdirdi. Bu vəzifələrin uğurlu icrası, əldə olunan nəticələrin gələcəkdə də təmin olunması üçün ciddi səy göstərilməlidir.

MƏZAHİR ƏHMƏDOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-15 mart.- S.6.