Bir
ürəkdə iki dünya
(əvvəli ötən
sayımızda)
Belə bir ziyalı ailəsində dünyaya göz açmış Paşa (1952), Nazim (1954) və Sevinc (1960) Musayevlərin hər biri Leninkənd orta məktəbini "Qızıl medal"la bitirmişlər.
Ailədə ikinci övlad olan Nazim
Musayev 1971-ci ildə orta məktəbi bitirdikdən sonra elə
həmin il Azərbaycan Tibb İnstitutuna daxil olmuş,
1976-cı ildə ali təhsilini müvəffəqiyyətlə
başa vuraraq farmakoloq ixtisasına yiyələnmiş,
İ.M.Seçenov adına I Moskva Tibb İnstitutunun aspiranturasını
bitirərək, tibb elmləri namizədi elmi dərəcəsini
almış, uzun illər Gəncədə və Bakıda fəaliyyət
göstərmiş, heç bir xəstəlikdən şikayəti
olmadan 2011-ci ildə, anasının vəfatından bir ay
sonra, necə deyərlər deyə-gülə, qəflətən
dünyasını dəyişmişdir.
İsmayıl, Ulduz və Nazim Musayevlər Gəncə
yaxınlığındakı "İmamzadə" adlanan
müqəddəs ocağın ərazisindəki qədim qəbiristanlıqda
əbədi yuxudadırlar.
Musayevlər ailəsinin
sonbeşiyi olan Sevinc Musayeva - Əkbərova 1977-ci ildə orta
məktəbi bitirdikdən sonra elə həmin il Azərbaycan
Tibb İnstitutuna daxil olaraq, 1983-cü ildə ali təhsilini
başa vuraraq oftalmoloq ixtisasına yiyələnmiş,
sonradan İ.M.Seçenov adına I Moskva Tibb İnstitutunun
aspiranturasını bitirərək tibb elmləri namizədi
(1994), bir müddət sonra isə (2000) tibb elmləri doktoru
elmi dərəcəsi almışdır.
Sevinc xanım hazırda akademik Zərifə
xanım Əliyeva adına Milli Oftalmologiya Mərkəzində
çalışır. Ailəlidir, bir övladı var.
Şair Paşa Qəlbinur:
Yuxarıda ötəri da olsa qeyd
etməyə çalışdım ki, Paşa Musayev hələ
yeniyetmə çağlarından, 13 yaşından şeir
yazmağa başlamış və onun ilk şeiri də gələcək
sənət taleyi, göz həkimi olacağı ilə
dolayısı ilə də olsa bağlı olan "Gözlər"
şeiri olmuşdur.
Qəlbinin nurunu hopdurmaqla çox
gözə dünya işığı bəxş edən
şair Paşa özünə "Qəlbinur" təxəllüsündən
başqa hansısa bir təxəllüsü seçə biləcəyini
heç ağlıma da gətirə bilmirəm.
Bu təxəllüs elə onun Zərdüşt
təqvimi ilə doğulduğu "sağlamlıq
ayı", "işıq günü" ilə birgə
doğulmuşdu desəm, yəqin yanılmaram.
Paşa Qəlbinur gözlərə işıq verə-verə,
sözlərə də işıq verdi, hamının
leksikonunda olan adi sözdən böyük söz, müxtəlif
məna çalarlı söz çələngi düzəltdi,
öz söz hakimiyyətini qurdu, öz söz sarayını
tikdi, öz söz səltənətinin hakiminə
çevrildi.
Qarşımda 2003-cü ildə
Bakıda "OZAN" nəşriyyatında çap
olunmuş 656 fiziki səhifədən ibarət olan
"Ağlıma gələnlər başıma gəldi"
adlı bir möhtəşəm şeirlər toplusunun üzərindən
şairin əksi mənə baxır.
Bismillah deyib(axı kitab müqəddəsdir),
kitabı açıram və 54-cü səhifədəki
"Bu gün" şeirini oxuyuram:
"Mən heç kimə
zəng eləmək istəmirəm,
Mən öz tənha kədərimlə
qolboyunam.
Bağrımdadı
ağrılarım,
acılarım,
Səhvlərimin qadasını
alim, Allah!
Qoy onlarla dörd divarın
arasında
qalım, Allah!
Ağ kağızım, boz qələmim,
Kitablarım, dəftərlərim
Bir də, bir də xatirələr..."
Səhfsiz adamın
olmadığını bilən şair, elədiyi səhvləri
belə həyatının ayrılmaz hissəsi kimi, təəssüflənmədən
etiraf edərək tənha kədərilə qolboyun olaraq,
xatirələrini kitablardan oxuduğu oxşarlıqlarla sintez
etməklə boz qələminin ucundan ağ kağıza
çiskinlətdiyi mənzərə nə qədər də
poetik və düşündürəndir.
Kitabın növbəti, təsadüfi
156-cı səhifəsini açıram və "Qürbətdə
yazılan şeir" məni "qarşılayır":
Mənim taleyimin şah
qapıları,
Açıl, dumanlardan, çənlərdən
keçim.
Sinəmi söykəyib, əridim
qarı,
Uca zirvələri başıma
çəkim...
Sinəsində dağların
qarını əritmək qüdrətinə malik bir hərarəti
hiss edən və uca zirvələri bir fincan şirin bulaq suyu
kimi başına çəkmək istəyən şairin
daxili dünyasının ölçülərinin
hüdudsuz olmasına yəqin ki, bu bir işarədir.
Növbəti təsadüfi bir səhifə.
314-cü yarpaq və "AYANIM" şeiri.
Adından da bəlli olduğu kimi,
bu şeir Paşa Qəlbinurun kişik övladı Ayana
(sonbeşik istəməli olur axı) ithaf olunub, tarixi 14
sentyabr 1999-cu il. Ayanın təxminən 4 yaşı olanda
yazılıb bu şeir.
Sənə şeir yazmaq istədim,
Ürəyimin gücü
çatmadı,
Saçlarının ətrinə
Çörəyimin gücü
çatmadı.
Nəfəsində
İşığın ətri,
Günəşin dadı
Səsin -
Allahın adı...
Elə bil bağrımdan
çıxan ürəksən
Elə bil bu dünya heç
olmayıbdı,
Ya mən olmamışam
dünyada min il...
Gəl ürək, gəl görək,
gəl boynuma min
Ürəyim boynumda
dünyanı gəzək.
Şairin başına "oyun
açdığı" sözlərdən (döyülməyən
düyüdən aş olmaz) muncuq kimi sıraya
düzdüyü ifadələrin ağuşunda
mışıl-mışıl mürgüləyən
övlad sevgisinin bundan yuxarı dərəcəsini təsəvvür
etmək, məncə çətindir...
Ötən əsrin 70-ci illərinin
ortalarından, 80-ci illərin ikinci yarısının
ortalarınadək Moskva şəhərində aspiranturada,
doktoranturada oxuduğu dövrlərdə gərgin elmi
araşdırmalarla məşğul olan gənc şair, hər
istədiyi zaman kəsiyində alınmasa da, qəlbindən
doğan, dilinə qonan poeziya nümunələrini imkan tapan
kimi kağıza köçürməyə
çalışırmış.
5 şeir kitabının və 2 romanın müəllifi
olan Paşa Qəlbinurun ilk şeirlər kitabının
işıq üzü görməsi də məhz onun Moskvada
olduğu dövrlərə təsadüf edir. 1984-cü ildə
nəşr olunmuş bu kitab "Ay bir əlçim
buluddur" adlanır.
...Buludlar tala tala.
Gecələrin şahı ay,
Sezilmirdi az qala.
Səhər-səhər elə bil
Ay bir əlçim buluddu,
Bulaq gumuldanırdı:
Unudan unuduldu,
Unudan unuduldu.
Şairin ikinci şeirlər
kitabı da təxminən həmin dövrlərdə, 1987-ci
ildə ərsiyə gəlir ki, şair bu kitabına
"Payız məktubu" adını verir.
Paşa Qəlbunuru 1992-ci ildə
Azərbaycan Yazıçılar İttifaqı öz
üzvlüyünə qəbul edəndə, o, artıq
1987-ci ildən SSRİ Yazıçılar İttifaqınin
üzvü idi.
Şairin "Rəngli göz
yaşları" adlı, sayca üçüncü
işıq üzü görən şeirlər kitabı
1990-cı ilin, "İtmiş həsrət kimi"
dördüncü şeirlər kitabı isə 1996-cı
ilin ədəbi məhsullarıdır.
Şairin beşinci şeirlər
toplusu "Ağlıma gələnlər başıma gəldi"
adlanır (2003).
Paşa Qəlbinurun 2009-cu ildə
Moskvanın "Flinta" nəşriyyatında rus dilində
nəşr olunmuş Azərbaycanda ilk miniatür roman olan
"Qara su" və müəllifin digər - "Göz
dağı" romanları 2012-ci ildə Bakıda "Şərq-Qərb
nəşriyyatında işıq üzü
görmüşdür.
"Təbabət poeziyanın fəlsəfi
əyarı kimi və ya MAYE İŞIQ" adlı elmi-fəlsəfi
tədqiqat əsərində görkəmli oftalmoloq-alim,
şair-filosof Paşa Qəlbinurun ictimai-siyasi həyatımızın
müxtəlif məsələ və problemləri, xüsusilə
də təbabət elmi ilə poeziyanın məntiqi birliyi və
əlaqəsi məsələsi haqqında illərdən bəri
söylənilmiş baxış və mülahizələri
toplanmışdır ("Ozan" nəşriyyatı,
Bakı-2002).
Paşa Musayev Qəlbinurun həyatı,
elmi və bədii yaradıcılığı haqqında iki
monoqrafiya, iki kitab və bir metodiki vəsait çap
olunmuşdur ki, Aybəniz Əliyevanın müəllifi
olduğu "Paşa Qəlbinur" (1996), Altay Məmmədovun
qələmindən çıxan "Qəlbinur poeziyası
XXI əsrin astanasında" (1999) adlı kitablar "Azərbaycanın
görkəmli adamları" seriyasından olan nəşrlər
sırasına daxildir. "Paşa Qəlbinur
yaradıcılığının mədəni-maarif və səhiyyə
müəssisələrində təbliği" adlanan
metodik vəsait isə 2002-ci ildə işıq üzü
görmüşdür.
Paşa Qəlbinurun sözlərinə
yazılmış mahnılardan və şeirlərdən ibarət
4 kompakt disk də buraxılmışdır (2001-2005).
Paşa Musayev Qəlbinur Azərbaycan
Təhsil Nazirliyinin "Təhsil mərkəzi"nin təsis
etdiyi "Nəriman Nərimanov" mükafatının
2004-cü il üzrə laureatı olmuş, "Ən
yaxşı ədəbiyyat xadimi" nominasiyasında
"İctimai rəy Monitorinq mərkəzi"nin
keçirdiyi rəy sorğusunun nəticələrinə
görə isə 2006-cı ildə "İlin ədəbiyyat
xadimi" seçilmişdir.
Belə demək
mümkündürsə, professor Paşa Musayev bir can da ictimai
işlərə "ayırmışdır".
O, 2005-ci ildən Dünya Azərbaycanlıları
Konqresinin (DAK) Azərbaycan Nümayəndəliyinin rəhbəri,
2007-ci ildən DAK İdarə Heyətinin üzvü olmaqla,
2008-ci ildə Brüsseldə keçirilən Konqresində isə
bu qurumun həmsədri seçilmişdir.
Yeni elmi əsərlər üzərində
işləyirsinizmi? - sualıma, Paşa Musayev Qəlbinur sadəcə
olaraq "bəli", deyə cavab verdi.
Paşa müəllimə
ünvanladığım növbəti - Müalicəyə və
ya əməliyyata cəlb etdiyiniz gözlər içərisində
maraqlı ola biləcək detallar və ya məqamlar barədə
nə deyə bilərsiniz? sualıma - "Təmasda
olduğum vaxtlarda gözlər mənə "göz
dili"ndə öz talelərini - əslində mənsub
olduqları insanın taleyini, xasiyyətini doğru-dürüst,
heç bir təhrifə yol vermədən
danışırlar. Ancaq bu barədə ətraflı
danışmayacağam. Bu ayrıca bir söhbətin
mövzusudur" - deməklə kifayətləndi.
Azərbaycanın mütəfəkkir
şairi Bəxtiyar Vahabzadə şeirlərinin birində -
"...Saçlar qara, qaşlar qara, ləblər də bal
olsun, Hər üzdə gözəllik dediyin gözlərə
möhtac..." - demişdir. "Möhtac olduğumuz"
gözəlliklə, təbii ki, söhbət gözəl
qadının gözəl gözlərindən gedir - həkim
olaraq bütün fəaliyyətiniz boyu üzbəüz
dayanmaq, həm də bir kişi olaraq Sizin üçün, yumşaq
desək, çətinlik törətmir ki? - sualımı isə
şair-təbib - "Xeyr, mane olmur!" - cümləsilə
cavablandırdı.
Gözəlin gözəl
gözü ilə üzbəüz dayananda əvvəlcə
bu gözlərə şier yazmaq istəyiniz yaranır, yoxsa
peşəkar həkim olaraq, hissiyyata qapılmadan ancaq sırf
müalicə barədə düşünürsünüz?
- deyə soruşada, "Həkimlik taleyimdir" -
cavabını aldım.
Boş vaxtlarında mütaliə
ilə məşğul olmaqdan zövq aldığını
və mütaliənin onun üçün ən yaxşı
istirahət olduğunu bildirdi Paşa müəllim.
Gözlə poeziya arasındakı
münasibətin olub, olmaması barədə soruşanda isə,
"onların arasında çox yaxınlıq olduğunu, bədəndə
göz nədirsə, ədəbiyyatda da poeziya odur, bədəndə
göz təkrarsız və bənzərsizdir, gözəldir"
- deyə cavab verdi, şair-təbib.
İxtisasca filoloq olan həyat yoldaşınız
Afaq xanımın Sizin sevgi şeirlərinizə olan
münasibətini açıqlaya bilərsinizmi? - deyib və
onun bu sualı necə cavablandıracağını
düşünməyə macal tapmamış, orijinal bir
cavabla - "Afaq xanım poeziyanın əyarını
ölçməyə çalışan professional
oxucularımdandır" - cavabı ilə
qarşılaşdım.
Şair-təbibdən fiziki
gözlə bəsirət gözünün fərqi barədə
soruşanda isə, "onların arasında həm eynilik, həm
də fərq var" - dedi. Paşa müəllim fikrinə
davam edərək, "Fiziki göz bədənimizin məsul
orqanıdır, bizlə real dünya arasında bir
körpüdür, bəsirət gözü isə cəzb edən,
əsrar cazibəsi olan bir gözəllik
hoqqabazlığıdır" - söylədi.
Poeziya Sizin üçün nədir
sualımı - "Balıq suda olduğu kimi, mən də,
ömrümün müəyyən hissəsini orada - poeziya
dünyasında yaşayıram, gah su-poeziya, gah quru-həyat
(mayesiz), gah da ki, cərrahi əməliyyat otağı,
başqa sözlə ifadə eləsək, mən üç
dünyada yaşayıram"- belə cavablandırdı.
Vaxtınızı əsas
işiniz olan həkimlik və könül dünyanız olan
poeziya arasında bölüşdürəndə ədalətsizliyə
yol vermirsiniz deyə soruşanda, Paşa müəllim fikirləşmədən
- "ədalətsizliyə yol verirəm, özü də bu
ədalətsizlik oftalmologiyanın xeyrinə olur" - deyə,
xəfifcə gülümsədi.
60 yaşında
özünüzü hansı ruhda hiss edirsiniz, - sualıma,
filosof babamız Əli Turxanın - "İnsanın
işığı artdıqca bu fani dünya ona daha
qaranlıq görünür" - fikrinə şərh verməyəcəyini,
amma bu deyimin ona maraqlı gəldiyini, öncəgörmək,
insanları yaxından tanıma və bu mənada yarı
sevincli, yarı mütəəssir olduğunu, ruhunun isə rəvan,
30-40 yaşlarında özünü necə hiss eləyirdisə,
elə indi də elə olduğunu" - dilə gətirdi...
Professor Paşa Musayevin bir oğlu,
iki qızı olmaqla, Allah ona 3 övlad payı vermişdir.
Allah özü qorusun! Amin!
Ailənin ilki olan Aysel Qəlbinur
(1980) Azərbaycan Tibb Universitetinin məzunudur. İxtisasca
oftalmoloq olan Aysel xanım, dissertasiya müdafiə edərək
tibb elmləri namizədi elmi dərəcəsinə yiyələnmiş,
hazırda doktorluq işini davam etdirməklə, Azərbaycan
Tibb Universitetinin "Oftalmologiya kafedrası"nın assistentidir.
Tural Paşa oğlu Qəlbinur
(1982) həmyerlimiz, Nobel mükafatı laureatı dünya
şöhrətli alim Lev Landaudan sonra 13 yaşında
Universitet tələbəsi, intellektual dünyası zəngin
olan, Azərbaycanın nadir övladlarından biridir.
Bakı Özəl Türk liseyində
təhsil almış Tural 1995-ci ildə Bakıdakı orta məktəbi
ekstern yolu ilə bitirərək, elə həmin il də Azərbaycan
Tibb Universitetinə daxil olmuşdur.
2001-ci ildə Universiteti fərqlənmə
diplomu ilə bitirən gənc oftalmoloq, 2001-2005-ci illərdə
Türkiyə Cümhuriyyətinin İstanbul şəhərindəki
SSK Vakif Gureba Tədris xəstəxanasının "Göz
xəstəlikləri kafedrası"nda göz xəstəlikləri
üzrə müvafiq təcrübə keçmiş,
2006-2008-ci illərdə isə İsrailin Yerusəlim şəhərindəki
Hadas-sah-Hebrev Universitetinin "Vitreoretinal cərrahiyyə
şöbəsi"ndə "Medikal və cərrahi
vitreoretinal" (Göz dibi xəstəliklərinin cərrahiyyəsi)
üzrə üst ixtisasını bitirmişdir.
Tural Qəlbinur 2004-cü ildə
"Neovaskulyar qlaukomalı xəstələrin yeni kompleks
üsulu" mövzusunda namizədlik dissertasiyası
müdafiə edərək alimlik dərəcəsi
almışdır.
O, 2009-cu ildə böyük rəqabətlə
müsabiqədən keçərək Kanadanın Toronto
Universitetinə qəbul olmuş və orada vitreoretinal üst
ixtisası üzrə əlavə təhsil
almışdır.
Dünyanın ən gənc azərbaycanlı
vitreoretinal cərrahı olan Tural Qəlbinurun "British
Journal Ophthalmology" jurnalının 2011-ci ilin son nömrəsində
dərc etdirdiyi - "Dünyada korluğun əsas səbəblərindən
biri - yaşa bağlı makula degenerasiyası olan xəstələrin
müalicə problemlərinə" həsr etdiyi elmi məqaləsi
San-Fransisko şəhərində keçirilən Amerika
Oftalmologiya Akademiyasının Konqresinə təqdim olunmuş
yüzlərlə işin içərisindən seçilən
ilk orijinal elmi əsər kimi təqdim olunmuşdur.
HAŞİYƏ: II - Paşa
müəllimin anası Ulduz xanımın atası Hüseyn
kişinin atası (Ulduz xanımın ata babası) Şeyx
Hacı Məhəmməd Ağa dövrünün ən
ziyalı insanlarından, İslamın mükəmməl
bilicilərindən olmuşdur.
Doğma dili olan azəri türkcəsiylə
yanaşı ərəb və fars dillərini mükəmməl
bilən, Müqəddəs Qurani-Kərimi, İslam dinini və
əxlaqını dərindən mənimsəmiş Şeyx
Hacı Məhəmməd Ağa deyilənlərə görə
ali dini təhsilini İraqın məşhur Nəcəfül
Əşrəf Universitetində alıbmış.
O, mütəfəkkir insan olmaqla
yanaşı, həm də mahir natiq imiş. Bir gündə
4-5 müxtəlif səviyyəli və təmayüllü məclisdə
iştirak etsə belə, eyni fikri, eyni cümləni bir dəfədən
artıq dilə gətirməz, təkrarçılığa
yol verməzmiş.
Tahir Talıblının müəllifi
olduğu - "Əziz Əliyev - Dövrü, Həyatı,
Şəxsiyyəti" - (Bakı-1997) kitabında (səh.
40) qeyd edildiyinə görə uzun illər İrəvan
xanlığının Şeyxül İslamı olmuş
Şeyx Hacı Məhəmməd Ağanın dəfn mərasimində
(1901) xanlıqda yaşayan əhalinin əksəriyyətilə
yanaşı, Çar Rusiyasının o dövrdə İrəvanda
xidmətdə olan elitası, generalları da iştirak ediblərmiş.
Paşa müəllimin ana
babası (Tila xanımın əri) Hüseyn müəllim
(1898-1972) kimyaçı imiş, İrəvanda Universitet
bitiribmiş.
Paşa müəllimin ana nənəsi
Tila Əli qızının (1910-1984) iki qardaşından biri
- Hüseyn Belçikanın paytaxtı olan Brüssel
Universitetini bitirərək dağ-mədən mühəndisi,
digər qardaşı Həsən isə İsveçrənin
Bern Universitetini bitirərək arxitektor ixtisaslarına yiyələniblərmiş
(1898).
Onlardan hər biri rus, alman, ingilis, fransız və italyan
dillərini mükəmməl bilirlərmiş.
Həsən Əli oğlunun layihə
müəllifi olduğu, İrəvanın mərkəzindən
keçən "Gedər" çayının sahilindəki
"Xanın evi" adlanan arxitektur bina bu gün də xarici
görkəmi və milli ornamentləri ilə baxanları
heyran edir.
...Bir vaxt gələr bu şeirimi
Sahilində oxuyarlar.
Bax o günü,
Səni səndən alacağam.
Mən sabaha
Getdiyimçün qalacağam...
Paşa Qəlbinur hələ 35 il
əvvəl - 1977-ci ildə İrəvan şəhərində
olarkən "Gedər"ə üz tutaraq
yazdığı şeirindən yuxarıda nümunə gətirdiyim
parçadakı nikbinliyə mən də inanıram...
Tila xanımın atası Əli kişi
danışarmış ki, İsveçrədə oxuyan
oğlu Həsənə baş çəkməyə
gedibmiş (1898). O, Həsənlə şəhəri gəzib-dolandıqdan,
parkların birində oturub istirahət etdikdən sonra gecə
vaxtı evə dönəndə, qızıl
portsiqarının cibində olmadığını və
gümanına görə portsiqarın parkda oturduğu
oturacağın üzərinə düşdüyü qənaətində
olur. Və tez Həsəndən onunla parka, portsiqarın
axtarışına getməsini istəyir. Lakin Həsən
onu sakitləşdirərək, "bu ölkədə 100
ildir ki, nə oğurluq eləyən var, nə də cəza
alıb qazamatda yatan, narahat olma, sabah gedib itiyini götürərik"
deyə, atasını sakitləşdirməyə
çalışır.
Oğlunun sözünə baxaraq
gecə vaxtı parka getmək fikrindən daşınan və
səhərisi gün Həsənlə axşam oturduqları
parka gələn Əli bəy, portsiqarını axşam
oturmuş olduğu oturacağın üstündə görəndə
heyrətini gizlədə bilməyibmiş...
5 dil - Azərbaycan türkcəsi,
Anadolu türkcəsi, rus, ivrit və ingilis dillərini sərbəst
bilən 29 yaşlı gənc alim Tural Qəlbinur doktorluq
işi üzərində işləməklə, hazırda
Moskvadakı akademik S.Fyodorov adına Çoxsahəli Tibb Mərkəzində
fəaliyyət göstərir.
Ailənin sonbeşiyi olan Ayan Qəlbinur
(1995) isə Kipr Türk Cümhuriyyətinin Yaxın Doğu
Universitetinin ingilis dilli müalicə fakultəsinin I kurs tələbəsidir.
O da "şəcərə ixtisası"nı davam etdirərək,
sayca 6-cı oftalmoloq olmaq fikrindədir...
Dünyaya təvəllüd
tapdığı günü - doğmalarının, həmkarlarının,
uzun illər yorulmadan sıralarında fəaliyyət göstərdiyi
Azərbaycan Tibb Universiteti kollektivinin, şair olaraq ədəbi
ictimaiyyətin, habelə Dünya Azərbaycanlıları
Konqresinin (DAK) həmsədri olaraq dünyanın hər tərəfində
yaşayan çoxmilyonlu soydaşlarımızın, həmçinin
üzvü olduğu - dünyanın nüfuzlu elm məbədlərinin
tanınmış simalarının şahidliyi ilə -
60-cı dəfə bu gün, 30 mart 2012-ci il tarixdə
doğma Bakı şəhərində özünəməxsus
bir şəkildə qeyd etməklə, yaşamış
olduğu ömür tarixində 61-ci səhifəni açan,
yuxarıda özü, dəyərli sələfləri,
layiqli xələfləri haqqında əldə elədiyim məlumatlar
əsasında qabiliyyətim çərçivəsində
söz demək istədiyim - buna müvəffəq olub-olmadığımı
Sən Əlahəzrət Oxucu deyəcəyin - şair-təbib
Hacı Paşa İsmayıl oğlu Musayevə - Qəlbinura,
yazımdan da göründüyü kimi Uca Yaradan SEVDİKLƏRİnə
verdiklərini əsirgəmədiyi kimi, Paşa müəllimin
özünün də gərgin zəhməti, tutduğu
peşəyə böyük sevgi ilə yanaşması nəticəsində
çoxsaylı uğurlara imza atmışdır.
Təbii ki, həyatda mütləq
xoşbəxtlik yoxdur. Insana xoşbəxtlik bəxş edən
anlar, məqamlar, hadisələr, xoş müjdəli xəbərlər
var.
Bu mənada Paşa Musayev Qəlbinurun
həyat və yaradıcılığında baş
vermiş bu "XOŞ"ları riyazi hesablamalara cəlb edərək,
əldə edəcəyimiz nəticəni sözün
yaxşı mənasında "XOŞ"ları çox
olduğu güman olunan şəxslərlə müqayisə
eləsək, təxəyyülümün gəldiyi qənaətə
görə qəhrəmanımın balansında müsbət
saldo yer almış olar.
Həyat və yaradıcılığının
60 illik balansı artan yekunla müsbət saldo təşkil edən
şair-təbib dostum hörmətli Paşa müəllimə
Allahın onun üçun ayırdığı ömür
payının bundan sonrakı mərhələlərini də
ürəyinin istədiyi və qəlbinin diktə elədiyi
kimi yaşayıb, yaratmağı - fəaliyyət göstərməyi
ən xoş səmimiyyətlə arzulamaqla, İnşallah -
100-də də müsbət saldo ilə görüşmək
ümidiylə...
Paşa Qəlbinur – 60
Ədalət.-2012.-30 mart.-S.7.