AĞCABƏDİDƏ QALDIRILAN BAYRAQ

Bir anın yazısı

Həmin gün təbiət də çox qəribə olmuşdu və bu qəribəliyin ən diqqət çəkən məqamı göy üzünün birdən-birə qara buludlara bürünüb sonra da şaqqıltı ilə az qala göz boyda damlalara çevrilib yağış şəklində səpələnməsi idi. Bu məqamı ona görə unuda bilmirəm ki, biz Ağcabədiyə gələndə əməlli-başlı yay havası idi. İnsanlar artıq qış paltarından çıxmışdılar. Hər tərəfdə həmişəkindən də artıq bir səliqə-səhman yaradılmışdı. İnsanlar xüsusi bir maraqla səhərin açılmasını gözləyirdi. Bu səhərin tarixə çevrilən bir adı olacaq idi. O adı, o tarixi yaddaşa köçürmək təbii ki, hər kəsin ürəyindən olduğundan havanın belə insanı ütən, yandıran bir şəkildə may ayına xas olmayan bir nəfəs üstündə köklənməsi daxili bir narahatlığa da səbəb olurdu.

Biz Ağcabədidə olanda tanıdığım insanlar, görüşdüyüm dostlar havanın bu şıltaqlığına, qəribəliyinə işarə vurub dedilər ki, ağlımız bir şey kəsir, deyəsən yağacaq. Amma kaş sabah tədbir zamanı yağış yağmayaydı, ürəyimiz istəyən kimi keçirərdik bu tədbiri.

Deyəsən Tanrı bu arzuları, bu diləkləri eşitdi və gecə Ağcabədiyə həmin o göz boyda iri damlalardan ibarət bir gurşad ələndi. Yağışın altında dayanmaq mümkün deyildi. Təsəvvür edin ki, iri damlalar kövrək budaqları, gül kollarını böyrü üstə yıxdı, neçəsi qol-budaq oldu. Amma o çaxan şimşəklər də, o yağan yağış da həm yazdan xəbər verirdi, həm də torpağın ətri adamın ruhuna hopurdu. Elə bilirdin ki, kimsə səni paklamaq üçün, təzələmək üçün, qəlbini, duyğularını ram etmək üçün səpir üstünə bu gürşadı. Bax, beləcə yağdı mayın 7-dən 8-nə keçən gecə Ağcabədidə. Həmin gecənin səhəri isə Ağcabədidə həmin o möhtəşəm tədbir gerçəkləşdi...

Bu da Bayraq meydanı...hər tərəfdə bir səliqə-səhman. Görülmüş işin ilk mənzərəsi dərhal adamı özünə çəkir. Mən bura gələnə qədər rayon mərkəzindəki cənnəti xatırladan parkı da gəzib-dolaşdım. Bir-birinə sarmaşan güllər, uşaqlar üçün əyləncə qurğuları, karusellər, müasir oturacaqlar, yaşlı insanların həmsöhbət olması üçün düzəldilmiş ayrıca yerlər. Bir sözlə, dincəlmək üçün bütün şəraitin yaradıldığı həmin parkdan o qədər də uzaq olmayan Bayraq meydanına qədjər küçə boyu irəliləyən adamlara qoşulub mən də qatıldım o tədbirə. Buadamlara qoşulmaqda bir məqsədim var idi: onların söhbətlərini dinləmək, fiikrlərini öyrənmək. Axı mayın 8-i Azərbaycanda son dərəcə ağır bir itkinin anım günüdü. Bu il isə ölkə prezidentinin sərəncamı ilə həmin anım günü, yəni Şuşanın işğalının 20 illiyi ölkənin hər yerində müxtəlif səviyyələrdə, müxtəlif formalarda qeyd olunur. Ağcabədidə isə bayraq qaldırılır - Azərbaycan Respublikasının Dövlət Bayrağı!

Mənimlə yanaşı addımlayan tanımadığım insanların söhbətlərini dinləyirəm. Orta yaşlı bir kişi həmsöhbətinə deyir:

- Bu gün Şuşanın işğalından 20 il keçir. Belə bir gündə bayraq qaldırmağın nə mənası var ki?

Həmsöhbəti dərhal onun sözünü kəsir:

- Elə əslində bayraq bu gün qaldırılmalıdı. Bilirsən niyə? - Sualı özü verib cavabını da özü deyir. Ona görə ki, düşmən bizim bayrağımızın dalğalandığını görsün.

Bu məntiq mənə çox doğma gəldi. Elə mən də təqribən belə düşünürdüm. Bu düşüncənin üstündə köklənmişdim. Mənim kimi düşünənlər var imiş. Bu mənə elə bil ki, əlavə qol-qanad verdi. Özümü bayraq meydanına daha tez çatdırmağa həvəsləndirdim.

Bayraq meydanında diqqəti çəkən bir izdiham var. Mərasim açıq elan olunur, dövlət himni səslənir. Tədbirdə çıxış edən Ağcabədi rayon İcra hakimiyyətinin başçısı Şahin Məmmədov qısa, amma son dərəcə məntiqli və səmimi çıxış edir. O, üzünü rayon sakinlərinə tutub deyir:

- Əziz ağcabədililər, mayın 8-i Azərbaycanın ən gözəl guşələrindən biri olan Şuşanın işğal günüdür. Biz dövlət bayrağımızı belə bir gündə qaldırırıq. Bu da səbəbsiz deyil. Çünki biz düşmənə , eləcə də bütün dünyaya göstərmək istəyirik ki, Şuşada müvəqqəti məğlub olsaq da, biz Şuşaya qayıtmaq üçün qaldırdığımız bu bayrağı əlimizə götürüb böyük ürəklə Qarabağa, Şuşaya doğru gedəcəyik. Ağcabədidə dalğalanan bayrağın davamı olan qələbə bayrağı Şuşada dalğalanacaq. Düşmən nə qədər fitnəkar, arxalı olsa da, biz Şuşada endirilmiş bayrağı daha əzəmətli bir şəkildə daha hündür bir nöqtədə yenidən qaldıracağıq. Hamı görəcək ki, yüksələn bayrağımız öz zəfər yürüşünü, öz qələbə yürüşünü necə qətiyyətlə davam etdirir.

Bəli, Ağcabədidə qaldırılan bayrağın və bütövlükdə bayraq meydanının tikintisi Dövlət Neft Şirkətinin imkanları hesabına gerçəkləşdiyindən rayon sakinləri şirkətin nümayəndələrini də alqışlarla qarşıladılar. Onlara öz rəğbətlərini ifadə etdilər. Yenidən səslənən dövlət himninin sədaları altında bayraq Qarabağ döyüşçüsü olan Ağcabədi sakini ilə Şuşadan olan qaçqının birgə gücünün hesabına yavaş-yavaş göy üzünə tərəf qaldırılır. Mənə elə gəldi ki, müharibə veteranı ilə şuşalı qaçqının birlikdə dövlət bayrağını qaldırmasının da öz rəmzi mənası var. Yəqin ki, bu şuşalıların tək olmadığına, Qarabağın hamımız üçün müqəddəs olduğuna və bu qələbəyə birlikdə qovuşacağımıza bir işarə idi.

Dövlət bayrağının qaldırılma mərasimində mən hər kəsin təkcə üz-gözündəki ifadələri kağıza köçürsəydim, sanballı bir kitab alınardı. Eləcə də çıxışların mətnini sizlərə təqdim etsəydim, o da bir rəngarənglik təsiri bağışlayardı. Amma əvvəldə dediyim kimi, məhz mayın 8-də bayrağın qaldırılmasının rəmzi mənasının böyüklüyünü ifadə edən sözləri sizə çatdırmaqla bu mərasimin nə qədər möhtəşəm olduğunu yəqin ki, ifadə edə bildim. O ki, qaldı Ağcabədinin bugünkü mənzərəsinə, düşünürəm ki, bu gün inkişafın göstəricisi kimi hansısa bir ünvan axtarmağa ehtiyac yoxdur. Sadəcə, Ağcabədidə olmaq, bu rayonu gəzmək, yerli sakinlərlə söhbət etmək, xüsusilə Ağcabədinin gecə mənzərələrini seyr etmək özü-özlüyündə heç bir təqdimatsız hər şeyi ifadə edə bilər. Birmənalı şəkildə onu xatırladım ki, həqiqətən Ağcabədi yeni bir ömür yaşayır, öz qədim tarixinin üzərində öz keçmiş ənənələrinə söykənib yeni günün, müstəqil Azərbaycanın gəzməli-görməli bir guşəsinə çevrilib. İnanmayanlar və yaxud şübhəsi olanlar buyursnular, gedib Ağcabədini gəzib görsünlər. Hər halda, peşman olmayacaqlar.

Əbülfət MƏDƏTOĞLU

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-15 may.-S.7.