ZƏLİMXAN

Zəlimxan Yaquba ithaf edirəm

Qurbaninin göru yanır Diridə,

Maralyanda nalə çəkir Pəri də,

Zəngəzurda itib ocaq yeri də,

"Cəngi" üstə qoy köklənsin ürək, can,

Çıxart sazı köynəyindən Zəlimxan!

Qarı düşmən divan tutur Ağdama,

Bu xəyanət ağır gəlir adama,

Qaçqın adı bir ləkədi adıma,

Qoy qalmasın yerdə heç vaxt nahaq qan,

Çıxart sazı köynəyindən Zəlimxan!

Xudafərin Araz üstə göz dağı,

Şuşa, Laçın yağıların dustağı,

Talan olub Füzulinin gül bağı,

Ayağa qalx, susma qardaş heç zaman,

Çıxart sazı köynəyindən Zəlimxan!

Dağ başında yetim qalıb Kəlbəcər,

Cəbrayılın dağı, daşı inci-zər,

Qubadlını yaman kəsdi bədnəzər,

Ayrılığa dözə bilmir Zəngilan

Çıxart sazı köynəyindən Zəlimxan!

Cənnətindən ayrı düşüb Nətavan,

Bəs hardadı Sultan bəylə Pənah xan?

Ələsgərin ruhu qalıb nigaran,

Yarımçıqdı qardaş hələ bu dastan,

Çıxart sazı köynəyindən Zəlimxan!

Nə zamandı yol gözləyir Borçalı,

Nigarandı Dərbənd eli, mahalı,

Saçın yolur, haray çəkir Xocalı,

Kərkük bizə əl eyləyir uzaqdan,

Çıxart sazı köynəyindən Zəlimxan!

Sarı Aşıq Yaxşısına nə desin?

Seyid, Cabbar, Xan yanmasın, neyləsin.

Cıdır düzü gözləyir öz yiyəsin,

Qoç Nəbiyə qələbədən ver nişan,

Çıxart sazı köynəyindən Zəlimxan!

Səhər-səhər üzünü tut Təbrizə,

"Ruhani" çal, qat gecəni gündüzə,

Qorqutdan bir əmanətdi saz bizə,

Sarı simdə Kür dəlidi, Araz xan,

Çıxart sazı köynəyindən Zəlimxan!

Yad əllərdə əsir qalıb Qarabağ,

Bülbül susub, nəğməsizdi bağça-bağ,

Ağı deyir Göyçə gölü, Dəli dağ,

Sarasını soraqlayır Xan Çoban

Çıxart sazı köynəyindən Zəlimxan!

O dağlarda ruhu gəzir Vaqifin,

Göz yaşları qurumayır Arifin,

Bu oyundu, aç ucunu kələfin,

Ayaq açıb yeriməsin qoy yalan,

Çıxart sazı köynəyindən Zəlimxan!

Bu dünyadan nakam köçdü Şəhriyar

Yetişmədi arzusuna Bəxtiyar,

Qədir hər gün nalə çəkib ağlayar,

Ayrı düşüb bir-birindən dağ, aran,

Çıxart sazı köynəyindən Zəlimxan!

Son savaşa səslə eli-obanı,

Yığ bir yerə ayrılanı, qopanı,

Ol bu elin, bu obanın həyanı,

Qoyma qalsın namərdlərə bu meydan,

Çıxart sazı köynəyindən Zəlimxan!

Əziz MUSA

Ədalət.-2012.-2 may.-S.6.