Bəhram Bağırzadə: "Mən ümumiyyətlə tamaşaçıları görmürəm"

- İlk olaraq ondan başlayaq ki, hazırda Bəhram Bağırzadə nə ilə məşğuldur?

- Bu yaxınlarda "Qorxma mən səninləyəm" adlı filmə çəkildim, Yeqor Konçalovski tərəfindən çəkilən yeni "Bakı, mən səni sevirəm" filminə dəvət almışam. Orada məni hansısa bir seriyada görürlər. Kastinqi keçsəm orada Bakılı obrazını canlandıracam. Bu yaxınlarda "Qorod moey molodosti" ("Mənim cavanlığımın şəhəri") adlı kitabım çıxıb. İlin ən yaxşı kitabı kimi "Humay" mükafatı aldım. Mayın 4-də Muzey mərkəzində karikatura və foto işlərimdən ibarət sərgim keçiriləcək. Paralel olaraq KVN-ə hazırlaşırıq. Fikrimiz var ki, "Parni İz Baku" komandası yığışaq və Yurmalada musiqili müsabiqədə iştirak edək.

- "Qorxma mən səninləyəm" filmində necə bir obraz yaradırsınız?

- Qafur obrazını. O, 1919-ci ldə ADR-də deputatdır, həm bəydir, həm də quldurdur.

- "Məhəlləli Natiq", yoxsa "deputat Qafur" obrazını yaratmaq daha rahatdır sizə?

- Mənim ulu babam da bəy olub, digər tərəfdən o biri babam Bakı qoçusu olub. Atamın əmisi ADR-də birinci təhsil naziri olub. Nəslimizdə qoçusu da, bəyi də var, naziri də. Mən də aktyoram, gərək aktyor kimi bütün obrazları yarada bilim. Bu bığları da rolumla bağlı saxlamışam. Ulu babamın da bu cür şəkil var. Son illər ümumiyyətlə şəkil yığıram, məndə Bakının inqilabdan əvvəlki iki minə yaxın şəkli var. Kolleksiyam, həmçinin Şamaxı , Şəki , Gəncə, Lənkəran kimi bölgələrimizin də şəkilləri var. Mənim arzum var ki, Bakıda foto-muzey açım. Təsəvvür edirsiniz, "Avrovizion", Bakıya minlərlə insan gəlir və həmin muzeydə Azərbaycanın bütün tarixini izləmək şansı qazanırlar. Arzu var, istək var, gərək dəstək olsunlar ki, reallaşdıra bilim.

- Maraqlı layihədir, niyə dəstək olmurlar bəs?

- Yəqin maraqlı deyil.

- Məşhurluğunuzda KVN-in böyük rolu oldu, bəs başqa cür necə məşhur ola bilərdiniz, nə ilə məşğul olardı Bəhram Bağırzadə?

- Deyə bilmərəm hansı işlə məşğul olardım, amma deyə bilərəm ki, hansı işlə məşğul olmazdım və heç vaxt istəməzdim. Birincisi, heç vaxt polisdə işləməzdim. Baxmayaraq ki, rəhmətlik atam polis polkovniki idi. Heç vaxt bank sistemində və metroda sürücü işləyə bilməzdim. Elə sənətlər var ki, orada özümü görmürəm. Fəhlə, mühəndis, ofisiant işləyərdim, amma dövlət işlərində işləyə bilməzdim.

- Niyə dövlət işlərində işləmək istəməzdiniz?

- Sıxıntı hiss olunacaqdı, mən azad insanam, çərçivədə olmaq istəmirəm. Yaxud elə bir iş var ki, orada işlədiyin müddətdə xaricə gedə bilməzsən, mən onda sıxıntı hiss edirəm.

- Hiss olunur ki, Bakını çox sevirsiniz, heç düşünmüsünüz ki, Bakının icra hakimi olsaydınız nələri dəyişərdiniz?

- Bakının hazırda ən böyük problemi odur ki, digər rayonlarımızda, şəhərlərimizdə, kəndlərimizdə iqtisadiyyat çox zəifdir. Əgər rayonlarımızda, kəndlərimizdə iqtisadiyyat yüksək səviyyədə olsaydı, Bakıya çörək dalınca gələn insanlar (mən onları da başa düşürəm çörək dalınca gəlirlər) öz məmləkətlərinə qayıtsaydılar Bakı da rahat nəfəs alardı. Bakının bir problemi var ki, milyon yarımlıq şəhər birdən-birə üç milyon olub.

- Problem sadəcə əhalinin çoxluğundadır?

- Bəli, sadəcə çoxluqdadır.

- Maraqlıdır, KVN-in səhnəsindən Azərbaycan tamaşaçısı necə görünür?

- Mən ümumiyyətlə tamaşaçıları görmürəm. Stanislavskinin qanunu var ki, dördüncü divar olmalıdır. Bu tamaşaçı ilə aktyor arasında olur. Mən onların reaksiyasını və əks-sədasını tamaşadan, disklər çıxandan sonra hiss edirəm. Mən də normal vətəndaş kimi şəhərdə gəzirəm, taksidən, metrodan istifadə edirəm, xalqımın, millətimin arasında oluram. Onların istədiklərini mən tamaşada, səhnədə rupor kimi deyirəm.

- Amma reaksiyadan bilmək olar ki, tamaşaçını ən çox nə güldürür.

- Bilirsiniz, onu demək çox çətindir. Bir şeyi deyə bilərəm ki, tamaşaçının intellektual səviyyəsi çox düşüb. Bu da biz aktyorları uçuruma aparır. Halbuki, biz onları qaldırmalıyıq yüksək səviyyəyə, amma əfsuslar olsun ki, biz də düşürük onların səviyyəsinə.

- Niyə? Tamaşaçı düşünmək istəmir?

- Düşünmək istəmir, qaçırlar yüngül yumorun arxasınca. Mən də bundan çox əziyyət çəkirəm.

- Sizcə bu nə ilə bağlıdır?

- Televiziya kanallarının çox olması ilə. İnsanlar televiziyaya baxır və kitab oxumağa vaxt qalmır. Əgər gələcəkdə güclü, savadlı nəslimizin olmasını istəyiriksə birinci növbədə gərək təhsilə fikir verək.

- Mənə elə gəlir ki, tamaşaçıya daha çox sosial problemlərin qabardılması, məmurların parodiyası maraqlı gəlir, daha çox güldürür. Bu nə ilə bağlıdır? Biz niyə problemlərə gülürük?

- Bu həmişə belə olub, indi də elədir.

- Həqiqət yəni bu qədər gülməlidir?

- Doğurdan da, indi gülünc vəziyyətdəyik. Əgər bir küçəyə əvvəl asfalt çəkib, sonra onu dağıdıb kanalizasiya çəkirlərsə bu gülünc vəziyyətdir.

- KVN-də ölkənin kifayət qədər nüfuzlu məmurları parodiya olunub. Sizdən sonra gələn digər klublar, komandalar isə buna cəsarət etməyiblər. Haradan idi KVN-in bu cəsarəti, səlahiyyəti?

- Yəqin imandandır. İnsan allahdan başqa heç kimdən qorxmamalıdır. Bir tərəfdən də biz həmin məmurlara yardım etmiş oluruq. Çünki onlar çox vaxt iş başında olurlar və böyük problemləri görmürlər. Biz də çalışırıq ki, o problemi göstərək. Ondan sonra da həmin məmurlar nöqsanları, minusları düzəltməyə çalışırlar.

- Kömək edə bilirsiniz?

- Əlbəttə.

- Amma bayaq qeyd etdiyiniz yol problemləri hələ də qalır...

- Yəqin yol çəkənlər bizim KVN-ə baxmayıblar. Baxsaydılar düzəldərdilər.

- Siyasətə gəlməyi düşünmüsünüz heç?

- Mən siyasətdən uzaq insanam. Məni ancaq bir siyasət maraqlandırır, o da işğal olunan torpaqlarımızın qayıtmasıdır. Sabah səs vermək, müharibəyə getmək lazım olsa, ancaq o siyasətdə iştirak edə bilərəm. Başqa siyasət məni maraqlandırmır.

- Karikaturalarınızda məşhur obrazlardan istifadə etmisiniz?

- Xeyr, mən dostluq şarjı çəkmirəm. Demirəm istəmirəm, sadəcə alınmır. Mən ümumiyyətlə özümü, karikaturaçı, fotoqraf, heç naşir də saymıram. Sadə aktyoram, rejissoram həyatı belə görürəm. Sadəcə məndə alınır, yalandan da olsa çəkirəm, kitab istehsal edirəm. Əgər əksini iddia etsəm peşəkar insanları incidə bilərəm. Mən sərgi günü də deyəcəyəm ki, məndən inciməsinlər, mən sadəcə olaraq vətəndaşın və şəhərimin vəziyyətini belə görürəm. İstəyirəm ki, mənimlə şərik olsunlar.

- Hansı filmdə rol almaq istərdiniz, yaxud yaratmaq istədiyiniz bir obraz var?

- Özümü. İndiki vəziyyətimi, indi yaşadığım həyatı oynamaq istərdim.

- Bu sizcə insanlara maraqlı olardı?

- Əlbəttə, çox maraqlı olardı məncə.

- Siz həm də çılğın futbol azarkeşisiniz...

- Bəli, 1979-cu ildən bəri, atam məni ilk dəfə futbola apardığı gündən. Baxmayaraq ki, "Barselona" iki oyundur ki, dalbadal uduzur, mən o fəlsəfənin davamçılarından biriyəm və yenə də dəstəkləməyə davam edirəm. İnsan da, komanda da həmişə uduzmur, uduzmaq lazımdır ki, sonra böyük qələbələr gəlsin.

- Məsələn, mən də Milli Yığmamızın həmişə uduzacağına əmin olduğum halda yenə izləyirəm.

- Yüksək səviyyədə oynamaq tək 11 nəfərin deyil, 9 milyonun problemidir. Biz əgər öz sahəmizdə peşəkar olsaq futbolçular da gəlib həmin səviyyəyə çatacaqlar. Bu gün heç kimin ixtiyarı yoxdur ki, futbolçuya desin ki, axı sən niyə yüksək Avropa standartlarına uyğun səviyyədə futbol göstərmirsən. Bəhram Bağırzadə Mahir Şükürova deyə bilər ki, sən niyə "Real Madrid"ə qol vurmamısan? O mənə haqlı olaraq deyər ki, sən Oskor almısan? Onu Çingiz Abdullayev edə bilər, hansı ki, 32 dildə kitabı çıxıb, milyonlarla kitabı satılıb, Tahir Salahov, Sakit Məmmədov, Lütfizadə edə bilər və sair. Ona görə də 9 milyondan ən azı 900 nəfər bunu xahiş edə bilər.

- Bəlkə futbol oynamaq üçün bizim birlik anlayışımız elə də formalaşmayıb?

- Birlik olması üçün bəzi adamları tutub 15 sutkadan 15 ilə kimi içəri salmaq lazımdır. Bəzilərini elə şəhərin ortasındaca cəzalandırmaq lazımdır. O zaman birlik olacaq.

- Kimdir o bəziləri?

- Kimlər ki, birincisi, allahın qanunları, ikincisi, Azərbaycan konstitusiyasının qanunları ilə yaşamır. Kim ki, qaydanı pozdu ora... O zaman görəcəyik buranın problemləri düzəlir yoxsa yox.

- Bəhram Bağırzadəni səhnədən, futbol meydanından, sərgi salonlarından başqa harada görmək olar?

- İntellektual, savadlı, müdrik insanların yanında. Məni heç vaxt çayxanalarda, qumarxanalarda, avara-avara oturub qeybət məclislərində görə bilməzsiniz. Halbuki son vaxtlar, adam hərdən dəhşətə gəlir ki, qadınlardan daha çox kişilər qeybət edir.

- Bəhram Bağırzadənin ən böyük arzusu...

- Hər dəfə dua edirəm ki, Allah mənə imkan versin ki, ömrümün sonuna kimi müsəlman olum və onun yazdığı qayda-qanunlardan kənara çıxmayım.

Ədalət.-2012.-3 may.-S.8.