20 İLLİK ŞUŞA HƏSRƏTİ

"Əsgər Analarına Dəstək" İctimai Birliyi Şuşanın düşmən tapdağında qalmasının 20 illiyi ilə əlaqədar tədbir keçirdi. Tədbiri giriş sözü ilə açan İctimai Birliyin sədri Növrəstə İbrahimova ilk öncə bu günlə əlaqədar hamıya başsağlığı verdi. Sonra isə insanlarımızın laqeydliyindən danışdı: "Torpaqlarımız neçə illərdir inildəyir, deyir ki, axı səni boya-başa çatdırdım, gəl məni bu zülmdən qurtar. Bu iniltiləri mənəvi və cismi duyğu ilə duymaq, şəhidlərimizin ruhunu şad eləmək əvəzinə gözdən pərdə asmaq üçün ildə bir dəfə "filan yerin işğal günüdür" deyilir. Hələ üstəlik ağla, əxlaqa sığmayan hərəkətlərə də yol verilir. Dünyada gözəlliyi ilə ikinci yeri tutan çinar meşəli, səfasından gözlər doymaz Zəngilanı, firuzə, qızıl yataqlı, məlhəmləri daxili və xarici xəstəlikləri sağaldan gözəl Kəlbəcəri, uca dağlar zirvəsində qartalların oylağı Laçını, Azərbaycanın görən gözü, vuran ürəyi, axan qanı, mirvari Şuşanı, qəhrəmanları ilə ün salan Qubadlını, gözəl mənzərəli Cəbrayılıg əldən verməsinə baxmayaraq, bu gün şənlənərək, təmtəraqla şouları xalqa sırıyanları ən azından arsız adlandırmaq olar. Halbuki qız-gəlini erməni əlində əsir olan ölkənin kişilərinin gərək gecələr yuxusu qaçsın, gündüzlər rahatlığı pozulsun".

Ədalət.-2012.-9 may.-S.4.