Lerikdən o yana haçadır yollar

Cənubun mərkəzi sayılan Lənkərandan Lerikə uzanan yolda hələ ki, sakitlikdir. Dənizə tələsən çay boyunca sıralanan "Çənlibel", "Təbəssüm", "Həyat", "Meşəbəyi", "Qala", "Relax" kimi istirahət və turizm mərkəzləri hələ tam fəaliyyətə başlamayıb. Eyni vaxtda 800 nəfərin istirahəti üçün bütün şəraiti olan bu istirahət obyektlərində 2011-ci ildə 9724 nəfər turist istirahət etmişdir. Otel və koteclərdən ibarət olan bu istirahət ocaqlarından bu ilin ilk rübündə 920 nəfər müsafir yararlanmışdır.

Leriki paytaxtla bərabər respublikanın digər rayonları ilə də birləşdirən 56 kilometrlik Lənkəran-Lerik avtomobil yolu son illər yağan intensiv yağıntılar nəticəsində qəzalı vəziyyətə düşmüşdür. Ekologiya və Təbii Sərvətlər Nazirliyinin müvafiq qurumları da bu rahat yola baxış keçirəndən sonra faktı təsdiq etmişlər. İndi yolda əsaslı təmir-bərpa işlərinin görülməsi zərurəti yaranmışdır. Heyf bu yollardan...

Gələcəkdə çəkilməsi nəzərdə tutulan 39 kilometrlik Masallı-Lerik avtomobil yolu rayon iqtisadiyyatının inkişafına təkanla bərabər paytaxt istiqamətində 50-60 kilometr yolun qısalmasına səbəb olacaq.

"Binələri çadır-çadır"

... Yolumuz dağlaradır. Hələ öz rahatlığını itirməyən bu yeganə Lənkəran-Lerik avtomobil yolu bizi dağlara, ucalıqlara qaldırır. İlan kimi dağlara sarmanan bu yollar uzandıqca havanın soyuduğunu hiss edirsən. Hər yan ancaq bir rəngdədir, yaşıl rəngdə. Nə bir yarpaq, nə bir ot saralmağın nə olduğunu bilmir hələ. Bir-birinə söykənərək üfüqə doğru sıralanan uca dağlara, sal qayalara dağ çayı yorulmadan nəğmə oxuyur.

Yamaclardakı otların, çiçəklərin, güllərin gözlərindəki jalə bahar günəşinin şəfəqləri altında min rəngə çalır. Təbiət nazlı bir gözəl kimi ətrafa meydan oxuyur. Baharı insan ömrünün gəncliyinə bənzədənlər qətiyyən səhv etməyiblər. Hər ikisi gözəl, cazibədar və məğrurdur. Ancaq dağlardakı bahar lap ilk gəncliyə bənzəyir - daha məsum, daha saf.

Çox qəribədir, həm də ağırdır ki, mən bu yolları hər keçəndə Ağdamdan Şuşaya gedən, Şuşadan Laçına uzanan yolları, bu yolların dolandığı dağları xatırlayıram. Oxşarlıq, bənzərlik axtarıram. Tapıram da, tapmıram da. Sonda bu duyğularla bir daha yaşamayacağıma içimdə and içsəm də hələ ki, bu mümkün olmur. Qulağımda böyük Səməd Vurğunun "Binələri çadır-çadır, çox gəzmişəm özüm dağlar" misraları sazın səsində için-için ağlayır, sızlayır. Ah, nə məsud günlər yaşamışıq...

Gözəllik ondur

Təbiətin yaz aylarında gündə üç dəfə üz göstərdiyi Lerikdə həmişə olduğu kimi məni yenə rəsmilərdən ilk qarşılayan Rayon İcra Hakimiyyəti başçısının birinci müavini Cəlil Baxşıyev oldu. Bir az kefsiz olduğumu görüb zarafatından qalmadı:

- Hə, deməli daha qocalmısan. Həmişə qışda da bizi yad edərdin, ancaq bu il gəlmədin.

Yazda, yayda bu dağlara gəlməyə nə var? Oğul ona deyərəm qışın oğlan çağında gələ Lerikə.

Səmimi görüşdən, "kef-əhval"dan sonra əlavə elədi ki, köhnə dostun Miriş Şahıyevlə bir bizim Lerik şəhərini gəz, mən də işlərimi sahmanlaşdırım, bir rahat söhbətləşək.

Lerik şəhəri doğrudan da son vaxtlar xeyli dəyişib, gözəlləşib. Yaşıllıqlar, gül-çiçək qoynunda əzəmətlə dalğalanan üçrəngli bayrağımız Heydər Əliyev meydanına bir əzəmət verir. İcra Hakimiyyətinin yeni inzibati binasının, Ulu Öndərin muzeyinin, Mərkəzi Rayon Xəstəxanasının və digər müasir tikililərin əhatəsində olan bu meydanın gecələri də gündüzü kimi füsunkardır. Şəhərin E.Qarayev küçəsində yeni əkilmiş ağac və yaşıl kolluqlar zövq oxşayır. Digər küçələrdə salınmış gül kolları, yaşıllıqlar səliqəli çiçəklərlə həmahəngdir. Yağıntılardan sonra bərpa edilmiş, yenilənmiş küçə arxları, istinad divarları səliqəli və müasirdir. İşıqlandırma sistemi gecələr şəhərə, həm də bu meydana ayrıca bir çalar verir.

Lerik şəhərinin mərkəzində Lənkərandakı 6 Saylı Vergilər İdarəsinin kompüter terminalının, Rayon Statistika İdarəsinin inzibati binasının inşası isə tamamlanmaq üzrədir. Yəqin ki, yaxın vaxtlarda reallaşacaq Təhsil Şöbəsinin, Lerik rayon Dövlət Yanğından Mühafizə Hissəsinin yanğın deposunun tikintisi də şəhərə özgə bir hüsn verəcək. Rayon mərkəzindəki şadlıq sarayı və iaşə obyekti də yaxın vaxtlarda leriklilərin ixtiyarına veriləcək. Bu il şəhərin Nizami, İ.Yaqubov, C.Cabbarlı küçələri də yenidən salınacaq.

Bir andaca göyün üzünün tutulması güclü yaz yağışının yağmasına səbəb oldu. Miriş Şahıyevin "Bəlkə bir çay içək" təklifi lap yerinə düşdü.

(ardı gələn sayımızda)

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2012.-26 may.-S.21.