FƏRƏHLİ ÖMÜR YAŞAMAQ SƏLAHİYYƏTİ

(əvvəli ötən sayımızda)

Nadir və xoş bir hadisə: Prezident 3 gün ərzində iki dəfə Şəkiyə gəlir

...Sentyabr ayının 12-də cənab Prezidentimizin xanımı Mehriban Əliyeva və ölkəmizdə işgüzar səfərdə olan Türkiyənin Baş naziri Rəcəb Tayyib Ərdoğan və xanımı Əminə Ərdoğanla birlikdə Şəkidə qonaq olması bizim üçün olduqca fərəhli və sevindirici bir hadisə idi.

Cənab Prezidentimiz İlham Əliyev və Türkiyənin Baş naziri Rəcəb Tayyib Ərdoğan Şəkidə türk əsgərinin abidə kompleksini ziyarət etmiş, Şərq memarlığının nadir incisi hesab olunan Şəki Xan Sarayı, Kiş kəndindəki Alban məbədi, Yuxarı və Aşağı Karvansara mehmanxana kompleksləri ilə tanış olmuş, Şəki Cümə məscidinə baş çəkmişlər. Hesab edirəm ki, Cənab Prezidentimiz İlham Əliyev və xanımı Mehriban Əliyeva Türkiyənin Baş naziri Rəcəb Tayyib Ərdoğan və xanımı Əminə Ərdoğanın Şəkiyə olan bu səfəri şəhərimizin ictimai-siyasi həyatında cox mühüm tarixi hadisədir.

Bir-birini əvəz edən əlamətdar sentyabr günləri

...Qeyd etdiyim kimi bu ilin sentyabr ayı şəhərimiz üçün olduqca əlamətdar hadisələrlə zəngin olmuşdur. Sentyabr ayının 22-də şəhərimizdə görkəmli maarifçi və ictimai xadim M. F. Axundzadənin 200 illik yubileyinə həsr olunmuş bayram tədbiri keçirilmişdir. Respublikanın tanınmış elm və mədəniyyət xadimlərinin, millət vəkillərinin, ziyalıların, xarici ölkələrdən dəvət olunmuş qonaqların iştirak etdikləri mərasimdə bildirilmişdir ki, 2012-ci il TÜRKSOY tərəfindən həm də "M. F. Axundzadə" ili elan olunmuşdur. Bu baxımdan Axundzadənin yubiley tədbirlərində TÜRKSOY-un üzvü olan ölkələrdən, o cümlədən Türkiyə, Qazaxıstan və Rusiya Federasiyası, Başqırdıstan Respublikasından dəvət olunmuş qonaqlar iştirak etmişdir.

Yubiley tədbirləri M.F. Axundzadənin ev muzeyinin açılışı ilə başlanmış, daha sonra tədbir M.F. Axundzadənin adını daşıyan mədəniyyət və istirahət parkında təşkil olunmuş "Kitab bayramı" ilə davam etdirilmişdir. Həmin gün bilavasitə cənab Prezidentimizin tapşırığı əsasında inşa olunmuş 600 yerlik "Yay Teatrı"nın açılışı olmuş, burada Azərbaycan Milli Elmlər Akademiyasının Tarix İnstitutu və Şəki Şəhər İcra Hakimiyyətinin birgə təşkilatçılığı ilə "Mirzə Fətəli Axundzadə - 200" mövzusunda Beynəlxalq elmi simpozium keçirilmişdir. Mirzə Fətəli Axundzadənin 200 illik yubileyi onun vətəni Şəkidə ədəbiyyat, poeziya və söz bayramı kimi qeyd olunmuşdur. Sentyabrın 23-də isə şəhərimizdə ilk dəfə olaraq Şəkinin 2700 illik yubileyinə həsr olunmuş "Şəhər günü" bayram tədbiri keçirilmişdir. Şəhərin mərkəzi meydanlarından birində bayramın təntənəli açılışından sonra tədbir Şəki Xan Sarayının həyətində davam etdirilmişdir. "Şəhər günü" çərçivəsində Şəki şəhər bələdiyyəsi ilə Türkiyənin Konya şəhər Məram bələdiyyəsi arasında qardaş şəhər haqqında protokol imzalanmış, "Yuxarı Karvansara" mehmanxana kompleksində rəsm və çiçək sərgisi açılmışdır. "Şəhər günü" bayram tədbirinə Türkiyənin məşhur "Anadolu atəşi" rəqs ansamblının konserti ilə yekun vurulmuşdur. Yubiley tədbirləri nəinki şəhərimizin, bütövlükdə ölkəmizin mədəni həyatında əlamətdar hadisəyə çevrilmişdir.

Uğur strategiyası

2012-cu ilin doqquz ayında ilkin hesablamalara görə, faktiki qiymətlərlə 295 milyon 190 min manatlıq məhsul buraxılmışdır ki, bu da 2011-ci ilin müvafiq dövrü ilə müqayisədə 16,4 faiz çoxdur. Adambaşına faktiki qiymətlərlə 1666 manatlıq, yaxud 2011-ci ilin müvafiq dövrü ilə müqayisədə 15,2 faiz çox məhsul buraxılmışdır. Rayon üzrə orta aylıq əməkhaqqı 230 manat olmuşdur . Bu əvvəlki ilin müvafiq dövrü ilə müqayisədə 9,2 faiz çoxdur. 2012-cu ilin doqquz ayı ərzində Şəki rayonunda 967 iş yeri açılmışdır ki, onların da hamısı daimi iş yerləridir. Bununla yanaşı qeyd olunmalıdır ki, rayonda gedən abadlıq-quruculuq işləri zamanı yüzlərlə insan mövsümü işdə çalışmışdır.

2012-cu ilin doqquz ayında Şəki rayonunda əmtəə dövriyyəsinin ümumi həcmi 202 milyon 567 min manat olmuşdur. Bu 2011-ci ilin müvafiq dövrü ilə müqayisədə 14 faiz çoxdur. Hazırda rayonda 22 sənaye müəssisəsi fəaliyyət göstərir ki, bunların da 13-ü kiçik müəssisədir. 2012-ci ilin doqquz ayında Şəki rayonunda istehsal və qeyri-istehsal sahələrinin inkişafına yönəldilmiş investisiyanın həcmi 77 milyon 896 min manat olmuşdur. Bu 2011-ci ilin müvafiq dövrü ilə müqayisədə 69 faiz çoxdur. İstifadə edilmiş investisiyanın 90,5 faizi dövlət mülkiyyətinin, 9,5 faizi qeyri-dövlət mülkiyyətin payına düşür. 2012-ci ilin doqquz ayında əsas kapitala yönəldilmiş investisiyanın 88,8 faizi tikinti quraşdırma işlərinə sərf edilmişdir ki, bu da əvvəlki ilin müvafiq dövrü ilə müqayisədə 59 faiz çoxdur.

Şəki Rayon Məşğulluq Mərkəzinə 2012-ci ilin doqquz ayında 344 nəfər işaxtaran müraciət etmişdir. Hesabat dövründə 167 nəfər işə düzəlmişdir. İcra Hakimiyyəti başçısının Sərəncamına əsasən müəyyən edilmiş 18 kvota yerinə 8 nəfər işə götürülmüşdür.

(ardı gələn sayımızda)

MƏZAHİR ƏHMƏDOĞLU

Ədalət.-2012.-3 noyabr.-S.4.