FƏRƏHLİ ÖMÜR YAŞAMAQ SƏLAHİYYƏTİ

(əvvəli ötən saylarımızda)

Cari ilin doqquz ayında H.Əliyev, M.Ə.Rəsulzadə, M.F.Axundov prospektlərində, Salman Mümtaz küçəsində müasir işıqlandırma sisteminin qurulması işi davam etdirilmiş, bir sıra çoxmərtəbəli ictimai yaşayış binalarının dam örtükləri, fasadları əsaslı təmir edilmişdir. Bu günlərdə Prezident İlham Əliyevin tapşırığı əsasında inşası başa çatdırılan "Yay teatrı"nın açılışı olmuşdur.

Azərbaycan Respublikası Prezidentinin "Mirzə Fətəli Axundzadənin 200 illik yubileyinin keçirilməsi haqqında " Sərəncamına uyğun olaraq M. F. Axundzadənin adını daşıyan Mədəniyyət və İstirahət parkında yenidənqurma və əsaslı təmir işləri əsasən başa çatmışdır. Şəki Şəhər İcra Hakimiyətinin daxili lmkanları hesabına aparılmış yenidənqurma işlərindən sonra ərazi tamamilə simasını dəyişmişdir. Burada şəhər sakinlərinin istirahəti üçün hər cür şərait yaradılmışdır.Ümumi sahəsi 7 hektar olan parkın 35 min kvadratmetr ərazisində yaşıllıq işləri görülmüş, müxtəlif dekorativ ağaclar və gül kolları əkilmişdir. Parkda uşaqların da istirahəti üçün lazımi şərait yaradılmışdır. Burada iki fəvvarə, sünü şəlalə və göl yaradılmışdır. Ümumiyyətlə şəhərdə son günlər ərzində yeni yaşıllıqların salınması istiqamətində geniş iş aparılır. Bu məqsədlə müxtəlif ölkələrdən Şəkiyə gətirilən ağac və gül kolları yol kənarlarında, park və meydanlarda əkilir, onlara yüksək səviyyədə aqrotexniki qulluq göstərilir.

Təhsil, Səhiyyə, Mədəniyyət və Turizm

Hesabat dövründə təhsil sisteminin tədrisi, təlim-tərbiyə prosesinin yüksək səviyyədə təşkili daim diqqət mərkəzində saxlanmışdır. Şəki şəhər 5 saylı tam orta məktəb üçün 320 yerlik yeni tədris korpusunun, Şorsu kəndində 360 şagird yerlik, Çələbi Xan qəsəbəsində 180 şagird yerlik yeni məktəb binalarının tikintisi başa çatmışdır.

Bununla yanaşı, 2012-ci ildə Şəki Şəhər Təhsil şöbəsinin yeni inzibati binasının, Əliyar kəndində 80 şagird yerlik ümumi orta məktəbin tikintisi, Baş Küngüt kənd tam orta məktəbin və şəhər fizika-riyaziyyat və humanitar təmayüllü liseyin əsaslı təmiri, şəhər 10 saylı tam orta məktəbin idman və akt zallarının, yeməkxanasının tikintisi, şəhər 12, 14 və 17 saylı məktəblər üçün yeni binaların tikintisi aparılır. Son bir il ərzində Şəkidə 11 məktəbin əsaslı təmiri və yaxud yeni binaların inşa olunması cənab Prezidentin rayona olan yüksək diqqətinin və qayğısının nəticəsidir. 2012-ci ildə Şəkinin ümumtəhsil məktəblərini bitirmiş məzundan 1166 nəfəri ali məktəbə daxil olmaq üçün sənəd vermiş, onlardan 587 nəfəri tələbə adını qazanmışdır. Bu məzunlardan 112 nəfəri 500-dən, 35 nəfəri 600 baldan yuxarı nəticə göstərmişdir. Bu Şəkinin təhsil tarixində olduqca yaxşı göstəricidir.

Şəki Mərkəzi Rayon Xəstəxanası və onun tabeliyində fəaliyyət göstərən tibb müəssisələri tərəfindən 2012-ci ilin doqquz ayında əhaliyə göstərilən tibbi xidmətin səviyyəsi yüksəlmiş, tibb müəssisələrinin maddi-texniki bazasının yaxşılaşdırılması sahəsində müəyyən işlər görülmüşdür. Şəki Doğum Evi Kompleksində dövlət vəsaiti hesabına əsaslı təmir, Aşağı və Baş Göynük kənd xəstəxanaları üçün yeni binaların tikintisi davam etdirilmiş, Şəki Mərkəzi Rayon Xəstəxanasında bir sıra əsaslı yenidənqurma işlərinə başlanmışdır.

Şəki bu gün Azərbaycanda turizmin yüksək səviyyədə inkişaf etdiyi bölgələrdən birinə çevrilmişdir. Şəkidə turizm infrastrukturunun yaradılması istiqamətində mühüm işlər görülmüş, müasir tipli istirahət mərkəzləri, yeni otellər istifadəyə verilmişdir. Keçən ilin müvafiq dövrünə nisbətən Şəkiyə gələn turistlərin sayı 5 dəfə artmışdır. Bu günlərdə şəhərin qonağı olan Qırğızıstanın keçmiş Prezidenti Roza Otunbayeva, ABŞ-ın ölkəmişdəki səfiri Riçard Morninqstar, İkinci Bakı Beynəlxalq Humanitar Forumunun iştirakçıları, Diplomatik Akademiyaların Bakıda keçirilən 40 -cı Forumunun iştirakçıları və başqaları da Şəkinin geniş turizm potensialına malik olduğunu bildirmiş və bu şəhərdən xoş təəssüratla ayrılmışlar.

Qarşıda duran vəzifələr

"Azərbaycan Respublikası regionlarının 2009-2013-cü illərdə sosial-iqtisadi inkişafı Dövlət Proqramı"na əsasən yaxın iki ildə rayonun sosial-iqtisadi inkişafının gücləndirilməsi, ərazinin infrastrukturunun yenidən qurulması üçün bir sıra mühüm layihələrin həyata keçirilməsi nəzərdə tutulmuşdur:

Yaxın iki ildə rayonumuzun sosial-iqtisadi inkişafının gücləndirilməsi;

ərazinin infrastrukturunun yenidən qurulması üçün bir sıra mühüm layihələrin həyata keçirilməsi;

sənaye və kənd təsərrüfatı istehsalının genişləndirilməsi;

ərazinin təbii sərvətlərindən səmərəli istifadə olunmasına nail olmaq;

yol təsərrüfatı və nəqliyyat infrastrukturunun möhkəmləndirilməsi;

elektrik enerjisi, istilik və qaz təchizatı, rabitə xidmətinin yaxşılaşdırılması;

su təchizatının və kanalizasiya sisteminin yenidən qurulması;

meliorasiya və irriqasiya sahəsində mühüm işlərin davam etdirilməsi;

yeni iş yerlərinin açılması, quşçuluq və baramaçılıq təsərrüfatlarının yaradılması və digər işlər.

MƏZAHİR ƏHMƏDOĞLU

Ədalət.-2012.-7 noyabr.-S.7.