ZAQATALA: ZƏLZƏLƏNİN VURDUĞU ZİYANLAR ARADAN QALDIRILIR, DÖVLƏT PROQRAMININ İCRASI UĞURLA DAVAM EDİR

(əvvəli ötən saylarımızda)

Rayonun ümumtəhsil məktəblərinin müəllimləri və şagirdləri respublika müsabiqələrində uğurla iştirak etmişlər. Aşağı Tala 1 saylı tam orta məktəbi "İlin məktəbi ", Yuxarı Tala 2 saylı tam orta məktəbinin informatika müəllimi "İlin müəllimi" müsabiqəsinin qalibi olmuş, rayon Təhsil şöbəsi müsabiqələrdə fəal iştirakına görə Respublika üzrə III yerə layiq görülmüşdür. Tala 1 saylı tam orta məktəbinin direktoru Mehnurə İsmayılova "Tərəqqi" medalı ilə təltif olunmuşdur.

"Fövqəladə Hallar uşaqların gözü ilə" Respublika müsabiqəsində Ş.Qurbanov adına 3 saylı tam orta məktəbin II sinif şagirdi Nigar Şabanova və Tala 2 saylı tam orta məktəbinin VI sinif şagirdi İbrahim Paşayev III yeri tutmuş, Fövqəladə Hallar Nazirliyi tərəfindən fəxri fərmanla təltif olunmuşlar.

Dövlət başçısının daim diqqət mərkəzində olan insanların sağlamlığının qorunması istiqamətində də müəyyən addımlar atılmışdır. Rayonda 2006-2011-ci illərdə doğulmuş uşaqlara elektron sağlamlıq kartlarının verilməsi işi başa çatmış, ana və uşaqların sağlamlığının qorunması məqsədilə perinatal mərkəz yaradılmışdır. RMX-nın konsultativ poliklinika şöbəsində, stomatoloji şöbənin binasında aparılmış təmir işləri başa çatdırılmışdır.

Əhalinin dispanser müşahidəsini təşkil etmək məqsədilə Səhiyyə Nazirliyinin səyyar flüoqrafiya maşını rayona gətirilərək, 10 gün ərzində şəhər, Əliabad qəsəbə, Danaçı, Suvagil, Muxax, Bəhmətli, Lahıc kənd əhalisinin risq qrupuna daxil olan 2500 nəfərdən ibarət kontingenti müayinədən keçirilmışdir.

Rayonda mədəni-kütləvi tədbirlərin keçirilməsində yol verilən bir sıra nöqsanlar RİHB yanında Şuranın yığıncağında geniş müzakirə edilmiş, əlaqədar vəzifəli şəxslərə intizam tənbehləri verilmişdir. Mədəniyyət və Turizm şöbəsinin fəaliyyətini daha da gücləndirmək məqsədi ilə bəzi kadr dəyişiklikləri həyata keçirilmişdir.

"2 fevral gənclər günü", 5 mart Bədən tərbiyəsi və idman günü münasibətilə ümumrayon tədbirləri keçirilmiş, fəal gənclər və idmançılar fəxri fərmanlar və qiymətli hədiyyələrlə təltif olunmuş, zaqatalalıların bir çoxu Respublikanın müxtəlif bölgələrində təşkil edilən baxış müsabiqələri və sərgilərdə qalib olmuşlar. Gənclər və İdman Nazirliyi tərəfindən Lənkəran və Şəki şəhərlərində, İsmayıllı və Quba rayonlarında təşkil edilmiş yay istirahət düşərgələrində istirahət etmək üçün 100 nəfər yeniyetmə və gənc yola salınmış, İncəsənət və İnternat məktəbinin nəzdində bir həftəlik düşərgələr təşkil olunmuşdur. "S" kanalının keçirdiyi "Regionun səsi" müsabiqəsində Zaqatala İncəsənət məktəbinin müəllimi Vüqar İsgəndərov I yeri tutmuşdur.

2012-ci ilin sentyabr ayında rayonda Milli Olimpiya Komitəsinin yaranmasının XX ildönümünə həsr olunmuş cudo üzrə açıq rayon birinciliyi keçirilmiş, yarışda 8 rayonun komandası iştirak etmişdir.

01-03 sentyabr 2012-ci il tarixlərində Yevlax şəhərində keçirilən sərbəst güləş üzrə Respublika zona turunda rayon komandası iştirak etmiş, 3 nəfər idmançımız I və II yerlərə layiq görülərək final mərhələsinə vəsiqə qazanmışdır.

9 ay ərzində idman sahəsində 6100 nəfərin iştirakı ilə 45 tədbir həyata keçirilmişdir. Bir çox yeniyetmə və gənclərimiz cüdo üzrə Azərbaycan birinciliyində rayonu ləyaqətlə təmsil edərək mükafatlandırıcı yerlər tutmuş, kompyüter oyunlarının VII çempionatının zona turunda rayon gəncləri komanda və fərdi oyunlarda birinci yeri tutmuşdur.

Vətəndaşların hüquq və mənafelərinin qorunmasına xüsusi diqqət

Rayonda vətəndaşların hüquq və mənafelərinin müdafiə edilməsi, ictimai-siyasi sabitliyin qorunub saxlanılmasını təmin etmək məqsədi ilə rayon icra hakimiyyəti hüquq-mühafizə orqanları ilə bir sıra tədbirlər həyata keçirmiş, insan, vətəndaş hüquq və azadlıqlarının, o cümlədən vətəndaşların fikir və söz azadlığı hüququnun vəzifəli şəxslər tərəfindən məhdudlaşdırılması barədə rayon icra hakimiyyətinə müraciət daxil olmamışdır.

Azərbaycan Respublikası Qanunlarının, Prezidentin Fərman və sərəncamlarının, Nazirlər Kabinetinin qərar və sərəncamlarının icrası vəziyyəti daim nəzarətdə saxlanılmış, RİHB yanında Şura yığıncaqlarında müzakirə edilmişdir. Rayon icra hakimiyyəti Başçısının sərəncamlarının, Şura qərarlarının, qanunlara, normativ hüquqi aktlara uyğun olması təmin edilmişdir.

2012-ci ilin 9 ayında 105 cinayət hadisəsi qeydə alınmış, cinayətlərin 98,0% açılması təmin olunmuşdur. Ağır və xüsusilə ağır cinayətlərin sayı keçən ilin müvafiq dövrü ilə müqayisədə iki dəfə azalmaqla 100 faiz açılması təmin edilmişdir. Rayonda narkomaniya ilə mübarizə tədbirləri davam etdirilmiş, 5 cinayət faktı aşkar edilərək qanunamüvafiq tədbir görülmüşdür.

"Xaş-xaş 2012" şərti adı altında aparılan əməliyyat-axtarış və profilaktika tədbirləri nəticəsində 36 ton 100 kq yabanı halda bitmiş narkotik tərkibli çətənə kolları aşkar olunaraq yandırma üsulu ilə məhv edilmişdir.

"Açıq Hökumətin təşviqinə dair 2012-2015-ci illər üçün Milli Fəaliyyət Planı"nın və "Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı"nın, habelə "Azərbaycan Respublikasında insan hüquq və azadlıqlarının müdafiəsinin səmərəliliyinin artırılması sahəsində Milli Fəaliyyət Proqramı"nın icrasının təmin edilməsi məqsədilə RİHB-nın sərəncamları ilə iş planları təsdiq edilmiş, ötən dövr ərzində bu istiqamətdə müəyyən işlər görülərək mərkəzi icra hakimiyyəti orqanlarına hesabatlar təqdim edilmişdir.

Göründüyü kimi, Zaqatalada Prezidentin xüsusi diqqəti, dövlətin qayğısı insanları bütün problemləri aradan qaldırmaq yolunda daha da ruhlandırmışdır. Eyni zamanda aparılan abadlıq quruculuq işlərinin miqyası və ardıcıllığı da sakinlərin nikbinliyindən və ölkə rəhbərliyinə inamından xəbər verir.

MƏZAHİR ƏHMƏDOĞLU

Ədalət.-2012.-14 noyabr.-S.7.