İsmayıllı dəyişir, inkişaf edir

Rayonda görülən işlər sosial-iqtisadi problemləri minimuma endirib

Regionların sosial-iqtisadi inkişafı dövlət proqramında şəhər və rayonların inkişaf etdirilməsi üşün konkret müddəalar öz əksini tapıb. Regionlarda yoxsulluq səviyyəsinin azaldılması, yeni-yeni iş yerlərinin açılması və sosial problemlərin həlli baxımından proqramın əhəmiyyəti yüksəkdir.

Aparılan araşdırma onu deməyə əsas verir ki, dövlət proqramı çərçivəsində həyata keçirilən tədbirlər nəticəsində regionların siması dəyişir. Yuxarıda sadalanan problemlərin həll olunması ümumilikdə regionlara marağı daha da artırıb. İsmayıllı rayonunda bununla bağlı görülən işlər müsbət dəyərləndirilə bilər.

Belə ki, İsmayıllı rayonunda son zamanlar həyata keçirilən sosial-iqtisadi tədbirlər nəticəsində şəhərin siması dəyişib. İsmayıllının dağlıq rayon olduğunu nəzərə alsaq demək olar ki, bu inkişaf kəndlərdən də yan keçməyib.

Və bu gün artıq İsmayıllının ən ucqar kəndində belə inkişaf sezilir. Ucqar kəndlərdə yol infrastrukturunun yenidən qurulması, əhalinin mavi qaza olan tələbatının ödənilməsi eyni zamanda vətəndaşların sosial tələbatının araşdırılması və yerində həll olunması prioritet hesab olunur. İsmayıllı Rayonun mərkəzində Heydər Əliyev adına Mədəniyyət və istirahət parkının sakinlərin istifadəsinə verilməsi, eyni zamanda Zərifə Əliyeva adına parkda sakinlərin asudə vaxtlarının səmərəli təşkili üçün lazımi infrastrukturun yaradılması müsbət qiymətləndirilir.

Rayonun Heydər Əliyev prospekti boyunca Qala Divarlarının çəkilməsi isə İsmayıllı rayonuna xüsusi yaraşıq verir. Bu qala divarları bir növ İsmayıllının tarixi keçmişinin göstəricisidir. Qala divarları boyunca tarixi eksponantların yerləşdirilməsi gənc nəslin Azərbaycanın qədim tarixinə ekskursiya etməsi baxımından mühüm əhəmiyyət kəsb edir.

İçməli su problemi öz həllini tapır

İsmayıllı rayonunda vətəndaşların içməli suya olan tələbatını ödəmək məqsədilə xüsusi tədbirlər həyata keçirilir.

Rayonda demək olar ki, istifadə müddətini başa vuran su boruları yeniləri ilə əvəz olunur, ucqar kəndlərdə belə vətəndaşlar bu kimi problemlərdən azad olurlar.

Belə ki, İsmayıllı rayonunda prezident İlham Əliyevin sərəncamı ilə İvanovka zonasına içməli su çəkmək üçün ayrılmış 3,5 milyon vəsaitə uyğun layihə hazırlanıb, işə başlanılıb və 2011-ci ildə istifadəyə verilib. Bununla da İvanovka ilə yanaşı Ruşan, Hacıhətəmli və Mollaisaqlı kəndlərində ümumilikdə isə İvanovka zonasındakı 9 kəndin sakinləri içməli sudan istifadə edirlər.

Mavi yanacaq problemi həll olunur

Bu gün əminliklə demək olar ki, İsmayıllı rayonunda mavi yanacaqla bağlı problem yaşanmır. Bu yöndə davamlı işlər görülür. Yeni qaz xətləri çəkilir. İstifadə müddətini başa vuran xətlər yeniləri ilə əvəz olunur. Məhz bunun səbəbidir ki, artıq Basqal, Lahıc, Topçu və bir necə belə ucqar dağ kəndlərində belə mavi yanacaqla bağlı problem aradan qaldırılıb.

Abonentlərin qaz sayğacı ilə təmin olunması prosesi də davamlı olaraq həyata keçirilir.

İşsizlərin sayı əhəmiyyətli dərəcədə azalıb

İsmayıllı rayonunda həyata keçirilən sosial siyasətin əsasını məşğulluq problemlərinin həll olunması təşkil edir. Bu gün rayonda "Azərbaycan Respublikasında Məşğulluq Strategiyasının həyata keçirilməsi üzrə 2011-2015-ci illər üçün Dövlət Proqramı" nın icrası istiqamətində bir sıra işlər görülür. Məşğulluq problemi ilə qarşılaşan hər bir İsmayıllı vətəndaşı bununla bağlı aidiyyəti qurumlara müraciət etməkdə ciddi problemlərdə qarşılaşmır. Rayon İcra Hakimiyyətindən verilən məlumata görə, Rayonda Dövlət Proqramının icrası ilə əlaqədar tədbirlər planında nəzərdə tutulmuş məsələlərin həllinə nail olmaq üçün idarə, müəssisə, təşkilatlar və fiziki şəxslərlə işgüzar əlaqələr qurulub, 2011-ci ildə 315 hüquqi və fiziki şəxs rayon Məşğulluq Mərkəzində qeydiyyata alınıb. Rəsmi qeydiyyatda olan və işsiz statusu almış vətəndaşların sayı isə 778 nəfər təşkil edib. Onlardan 311 nəfəri qadın, 398 nəfəri gənc, 47 nəfəri isə qaçqın və məcburi köçkünlərdir. Hazırda rayon üzrə 4456 nəfər işaxtaran qeydiyyatdadır. 2011-ci ildə işsiz vətəndaşdan 347 nəfəri işlə təmin edilib. Bu siyasət bu gün də davam etdirilir. Demək olar ki, müstəqilliyimizin ilk illərində xarici ölkələrə üz tutan ismayıllılar artıq daxili imkanlardan yararlanaraq öz doğma yurd-yuvasında fəaliyyət göstərir.

Kənd təsərrüfatının inkişafı

İsmayıllı Dağlıq Şirvan iqtisadi-coğrafi zonasında yerləşdiyindən əhalinin əsas məşğuliyyəti əkinçilik və heyvandarlıqdır. Bu baxımdan kənd təsərrüfatının inkişaf etdirilməsi rayon rəhbərliyinin diqqətində saxlanılır.

Kənd təsərrüfatının inkişafı üçün həyata keçirilən tədbirlər nəticəsində bu gün İsmayıllı rayonunda müstəqilliyimizin ilk illərində dağıdılan üzüm sahələri yenidən bərpa olunur.

Eyni zamanda taxıl sahələrinin genişləndirilməsi, yüksək məhsuldarlığın əldə olunması üçün rayon icra hakimiyyəti tərəfindən davamlı olaraq iş aparılır. Statistik məlumatlara görə, İsmayıllıda ildə orta hesadla 40-50 milyon manat dəyərlərində taxıl, üzüm, kartof, meyvə, tərəvəz. və s. kənd təsərrüfatı məhsulları istehsal olunur. 2010-ci ildə rayonda 45836 ton taxıl, 6182 ton kartof, 7249 ton tərəvəz, 7249 ton meyvə, 3394 ton üzüm məhsulları istehasl olunub.

Rayonda iribuynuzlu mal-qara, qoyun, keçi və donuz bəslənilir.

İnternetdən istifadə genişlənir

Dəyişən və yeniləşən zamanın tələbatına uyğun olaraq İsmayıllı rayonunda internetdən istifadə imkanlarının genişləndirilməsi işi həyata keçirilir.

Həyata keçirilən tədbirlər nəticəsində rayonunda kəndlərin mərkəzlə optik kabellərlə bağlanması sakinlərin sürətli internetdən istifadəsinə şərait yaradıb.

Göyçay rayonunun Qaraməryəm kəndi istiqamətində TAE xəttinə qoşulan rayon rabitəsi daha sürətli və keyfiyyətli xidmətlərlə təmin olunub ki, nəticədə rayonun İvanovka, Qubaxəlilli, Ruşan, Qələyə, Hacıhətəmli və Göytəpə kəndində internetdən istifadə imkanları genişlənib. Həmçinin rayonun İvanovka kəndində ADSL modemləri qurulmuşdur. Bununla da kənd sakinlərinin yüksək keyfiyyətli telefon rabitəsi ilə yanaşı, sürətli internetə çıxış imkanları da təmin edilib.

Turizmin inkişafı

İsmayıllı rayonu həm də turizm rayonu kimi tanınır. Ölkədə həyata keçirilən turizm siyasəti nəticəsində İsmayıllı rayonunda da bu sahənin inkişaf etdirilməsi istiqamətində davamlı addımlar atılır. Yeni-yeni istirahət mərkəzlərinin tikilib istifadəyə verilməsi turizm infrastrukturunun genişləndirilməsi sayəsində İsmayıllıya gələn turistlərin sayında ildən-ilə sürətli artım müşahidə edilir. Bunun nəticəsidir ki, əgər 2009-cu ildə rayona cəmi 15 min turist gəlmişdirsə sonrakı illərdə, yəni 2010-cu ildə bu rəqəm 26 minə, 2011-ci ildə isə 59.500 nəfərə çatıb. Bu ilin mayında Bakıda uğurla keçirilmiş "Eurovision-2012" mahnı müsabiqəsi ilə bağlı ölkəmizə gəlmiş çoxsaylı turistlərdən böyük bir qrupunun İsmayıllıda olması, bu ecazkar diyardan xoş təəssüratla ayrılması sonrakı mərhələdə, xüsusilə 2012-ci ilin yay turizm mövsümündə rayona indiyədək görünməmiş səviyyədə turist axınına şərait yaradıb. Nəticədə ilin ötən dövründə İsmayıllıya rekord sayda-70 mindən çox turist gəlib.

Ədil Ədilzadə

Ədalət.- 2012.- 4 oktyabr.- S.7.