BU VƏTƏNİN TORPAĞINA, SUYUNA...

(əvvəli ötən saylarımızda)

Təhsil, səhiyyə, turizm...

Rayonda təhsil sahəsində əsaslı dönüşə nail olmaq məqsədilə son illər həyata keçirilən islahatlar daha qətiyyətlə davam etdirilməli və mövcud problemlərin həlli üçün ciddi tədbirlər həyata keçirilməlidir. Bu işə dəstək olaraq Masallıda məktəb tikintiləri çox sürətlə həyata keçirilir. Yeni dərs ilində 5 məktəb - Qodman, Sığıncaq, Ərəb, Köçəkli, Dəmirçi məktəbləri tikilib istifadəyə verilmişdir. Hazırda Xıl, Kosakül, Kəlbəhüseynli, Öncəqala və Kubin kəndlərində yeni məktəb binalarının tikintisi, Bədəlan kənd tam orta məktəbinin əsaslı təmiri davam etdirilir.

Görülən işlərə baxmayaraq hələ də rayonda xeyli sayda yeni məktəblərin tikintisinə və təmirinə ehtiyac vardır ki, bu məsələ ilə bağlı hazırlanan proqramın mümkün olduğu qədər qısa müddətdə həyata keçirilməsi nəzərdə tutulur. Məktəblərin istilik sistemlərinin təmir edilməsi və qızdırılması işindəki mövcud çətinliklər də həlli vacib olan məsələlərdəndir. Eyni zamanda şagirdlərin dərsə davamiyyətinin yuksəldilməsi, tədrisin keyfiyyətinin yaxşılaşdırılması Rayon Təhsil Şöbəsinin qarşısında duran ən mühüm vəzifədir.

2012-ci ilin 9 aylıq dövründə rayon əhalisinə göstərilən tibbi xidmətin səviyyəsini yüksəltmək, onun maddi texniki bazasını möhkəmləndirmək üçün bir sıra işlər görülmüşdür. O cümlədən Hişkədərə kəndində həkim məntəqəsinin tikintisi, Kolatan kəndində isə həkim məntəqəsinin əsaslı təmiri başa çatdırılaraq istifadəyə verilmişdir. Bu sahədə ən böyük çətinlik Masallı Mərkəzi Rayon Xəstəxanasının təmirsiz vəziyyətdə olmasıdır ki, bu da yüksək səviyyəli tibbi xidmətin təşkilinə imkan vermir.

Masallı Rayon Gigiena və Epidemiologiya Mərkəzi cari ilin 9 ayı ərzində mütəmadi olaraq ərazilərdə reydlər keçirmiş və yolxucu xəstəliklərə qarşı peyvəndlər aparmış, rayonda istehsal olunan 24 növ yeyinti məhsuluna gigiyenik sertifikat alınmışdır. Hesabat dövrü ərzində keçirilmiş reydlər zamanı yol verilmiş nöqsanlar aşkarlanaraq 398 akt tərtib edilmiş, sanitar norma və qaydalara əməl etməyən 46 cavabdeh şəxs barəsində inzibati cərimə protokolu tərtib edilmişdir.

Rayon Baytarlıq İdarəsi tərəfindən hesabat dövründə ümumilikdə 268345 baş iri və xırda buynuzlu mal-qarada və digər ev heyvanlarında qara yara, quduzluq və dabaq xəstəliklərinə qarşı, eləcə də 560.000 baş ev quşlarında müxtəlif xəstəliklərə qarşı peyvəndləmə işləri aparılmışdır. Quş qripinin profilaktikası ilə əlaqədar 9 ay ərzində ev quşlarından seçmə qaydada 4 dəfə qan nümunələri götürülmüş və müayinə olunmaqdan ötrü Respublika Baytarlıq Laboratoriyasına göndərilmişdir. Rayon ərazisində quş qripi xəstəliyi qeydə alınmamışdır.

Masallı "Folklar Paytaxtı"dır

Bildiyniz kimi Azərbaycan Respublikası Mədəniyyət Turizm Nazirinin 01 fevral 2012-ci il tarixli 37 saylı Əmri ilə Masallı rayonu 2012-ci ildə Azərbaycanın "Folklor Paytaxtı" elan edilmiş və buna müvafiq olaraq Masallı Rayon İcra Hakimiyyəti Başçısının sərəncamı ilə Təşkilat Komitəsi yaradılmış və Tədbirlər Planı təsdiq edilmişdir. Aprel ayının 14-də Masallı şəhərində "Masallı Azərbaycanın Folklor paytaxtıdır" mövzusunda tədbir keçirilmiş və "Folklor Paytaxı"nın kuboku və loqosu təqdim edilmişdir. Tədbirlər planına uyğun olaraq müxtəlif tədbirlər, o cümlədən Masallı rayonunda ilk dəfə olaraq Azərbaycan Muğam müsabiqəsi, Turizm sərgisi, digər konfrans və festivallar keçirilmişdir. Bu çərçivədə Sentyabr ayının 6-dan 10-a qədər Masallıda Beynəlxalq Folklor festivalının keçirilməsi rayon üçün tarixi bir hadisədir. Bu festivalda Azərbaycanla bərabər bir çox ölkələrdən, o cümlədən Türkiyə, Latviya, İran, Kabardin-Balkariya və Dağıstandan folklor kollektivləri iştirak etmişlər. Bu ilk addım və gözəl bir təcrübə oldu. Gələn bu festivalın daha çox ölkələrin iştirakı ilə keçirilməsi nəzərdə tutulmuşdur.

Masallı rayonunda fəaliyyət göstərən 31 turizm obyektindən 26-sı müvafiq lisenziya ilə təmin edilmişdir ki, bu istirahət mərkəzlərində 1146 turist yeri vardır.Hesabat dövrü ərzində rayon 14426 nəfər turist səyahət etmişdir ki, onlardan 696 nəfəri xarici ölkə vətəndaşları olmuşdur.

İdmana xüsusi münasibət

2012-ci ilin Azərbaycan Respublikasının Prezidenti cənab İlham Əliyevin Sərəncamı ilə "İdman ili" elan olunması respublikamızda, o cümlədən Masallı rayonunda idmanın inkişafına böyük təkan verəcəkdir.

Qeyd olunan Sərəncamın icrası ilə əlaqədar olaraq artıq Masallı şəhərində Boks, Taekvando məkəzlərinin, Boradigah qəsəbəsində isə İdman Kompleksinin inşası surətlə davam etdirilir. Eyni zamanda hazırlanmış tədbirlər planına uyğun olaraq mütəmadı şəkildə rayon və Respublika səviyyəli idman yarışlarının keçirilməsi nəzərdə tutulur. Onu da qeyd etmək lazımdır ki, Boradigahda tikilən idman kompleksi alternativ enerji mənbələri hesabına qızdırılıb işıqlandırılacaqdır ki, bu da çox əhəmiyyətli bir hadisədir.

Rayon rəhbərliyi: qəbullar, görüşlər, müraciətlər

Hesabat dövrü ərzində rayon İcra hakimiyyətinə 1371 ərizə-şikayət daxil olmuşdur ki, onlardan 648-i vətəndaşların, 723 ərizə isə yuxarı təşkilatların payına düşür. Bu dövr ərzində İcra Hakimiyyətində keçirilən qəbullar zamanı 882 nəfər şikayətçi qəbul edilmişdir. Səyyar qəbullar zamanı 295 nəfər çıxış edərək ərazinin sosial-iqtisadi inkişafı və problemləri barədə təkliflər vermişlər.

Rayonun idarə, müəssisə və təşkilatlarında, şəhər, qəsəbə və kənd icra nümayəndəliklərində vətəndaşların qəbulu, ərizə və şikayətlərə baxılması işinin daha da yaxşılaşdırılması sahəsində xeyli iş görülmüş, onların müraciətlərində qaldırılan məsələlərin vaxtında və obyektiv həlli istiqamətində məqsədyönlü tədbirlər həyata keçirilmişdir. Yerlərdə müntəzəm olaraq keçirilən səyyar qəbullar ictimaiyyət arasında böyük razılıqla qarşılanır.Bununla bərabər bir çox ərazi numayəndələrinin vətəndaşların müraciətinə laqeyd münasibət göstərdiyi və maliyyə məsələlərində ciddi nöqsanlara yol verdikləri müəyyən olunmuşdur.

Qarşıda duran vəzifələr

R.Hüseynov sonda görülmüş işlərə bir daha yekun vuraraq dedi:

-Görülən işlərə, əldə edilən uğurlara baxmayaraq hələ də görüləsi işlərimiz çoxdur. Masallı şəhərində abadlıq işlərinin və su-kanalizasiya xəttinin çəkilişinin yüksək səviyyədə həyata keçiriməsi üçün bütün imkanlar səfərbər edilməlidir. İşimizin kifayət qədər çox olmasına baxmayaraq vaxtımız azdır. Ona görə də hər birimiz rayonun inkişafı naminə görülən bu işlərdə yaxından iştirak etməliyik. Rayon ərazisində qazlaşdırılmanın və elektrik təsərrüfatının yenilənməsinin başa çatdırılması da həllini gözləyən vacib problemlərdəndir. Xüsusilə də xətt təsərrüfatının yenilənməsi üçün bütün imkanlardan istifadə edilməlidir. Kəndlərimizə içməli su xəttinin çəkilməsi, yeni yolların salınması, habelə yeni təhsil və səhiyyə müəssisələrinin tikilməsi kimi bir çox abadlıq və quruculuq işlərinin həyata keçirilməsi, "Yaşıllıq və ağac əkmə" aylığı çərçivəsində noyabr ayı ərzində rayonun bütün ərazilərində geniş ağac əkini kampaniyasının aparılması qarşımızda duran əsas vəzifələrdəndir.

Məzahir ƏHMƏDOĞLU

Ədalət.-2012.-30 oktyabr.-S.7.