RÜBAİLƏR

Oqtay RZA

Günəşi bənzədək nəhəng məşələ,

Yaşının cavanlıq çağıdır hələ.

Bir ulduz təzədirgbir ulduz sönüb-

Min il görünəcək saçdığı şölə.

***

Qapalı xainlər "dostlar" kimidir,

Doğru söz mötəbər hasar kimidir.

Adam var - sifəti tez-tez dəyişən,

Adam var - üzü də astar kimidir.

***

Hər qaya elə bil xəyala dalıb,

Qobustan havası köksümə dolub.

Nə rəssam incisin, nə dilçi alim,

Dünyada ilk əsər zümzümə olub.

***

Qan! Xoşun gəlirmi kim desə "qan-qan"?

Al-qızıl rəngindən yəqin razısan?

Bəlkə insanları qorxutmaq üçün

Bu qədər dəhşətli, qıpqırmızısan?

***

Təzadlı ailənin sakiniyik biz,

Səndə güc üstündür, məndə duyğu, hiss.

Yaxşı ki, ağıllılar bərabər deyil-

Söz yetim qalardı, dünya dahisiz.

***

Yayın istisində tez əriyir buz,

Göy üzü həmişə olmur buludsuz.

Dayanıb od ilə su arasında-

Yaşaya bilmərik susuz və odsuz.

***

Bürüyüb aləmi çox möcüzələr,

Müthəm təbiətdə nələr var, nələr!

İnsan cüt paytaxtlı dövlət kimidir-

Beyinsiz düşünməz, ürəksiz ölərg

***

Yuxumda göy, sarı, yaşıl rəng gördüm,

Baharı, baharı özütək gördüm.

Bu gecə sübhətək bərk qar yağırmış,

Yuxumda rəqs edən gül-çiçək gördüm.

***

Həmkarım, gəl düşmə gen rübaidən,

Dəyərdə dastana tən rübaidən.

Təmiz duyğularla xoş sözlə birgə,

Bilik istəyirəm mən rübaidən.

***

Yayır fəlakəti, şəri qasırğa,

Ulayır nə vaxtdan bəri qasırğa. .

Küləyin cürbəcür oyunları var.

Bir meh, biri yel, biri qasırğa.

***

Məşhur işarələr - iqrek, ikx, zet:

Mərkəzdə birləşən üç istiqamət.

Üç mühüm nöqtəni tapsaq-bilərik:

Ya düz, ya əyridir axtarılan xətt.

***

Deyirəm sönəndə ömür çırağım-

Sehirli qüvvə tək bədəndən çıxım;

Bir titrək şüalı ulduz- göz olub,

Dəfnimə, yasıma kənardan baxım.

***

Halal sayılsa da haram dünyada

Haqq üçün çalınan taram dünyada.

Nə zaman ürəyim, canım ağrıyır-

Mən onda bilirəm varam dünyada.

***

Hər şeyin sonuna inanıram mən,

Qocaldın tutasan gərək çəlikdən.

Məşhur filosofa o gün dedim ki,

Bezər ruh özü də əbədiyyətdən.

***

Qış xoş havalarda yaza çevrilir,

Donun su daşlaşıb buza çevrilir.

Xlor - boğucu qaz-natrium-zəhər,

Birləşib süfrədə duza çevrilir.

***

Bərki çox sınadım boşa nə deyim?

Ömürlə güləşən yaşa nə deyim?

Qayanı heykələ bənzədirəmsə,

Ayağa ilişən daşa nə deyim?

***

Daşıyıb yükünü min əziyyətin,

Ahıllıq çağında yaşamaq çətin.

Lakin çoxaldıqca uzun ömürlər,

Xoşdur qocalmağı bəşəriyyətin.

***

Gərək fərqlənməsin iş ilə vədə,

Mudrik tövsiyyənin əksidir, hədə.

Bütöv kristalın əlamətləri

Sən demə eynidir zərrəsində də.

***

Külək qəzəblənib budaq sındırır,

Dənizi nehrətək çadxalandırır;

Külək - dəyirmanda dən üyüdən güc,

Həm də bayrağımı dalğalandırır.

***

Yatır ağcaqanad duymadan heç nə,

Çovğunu qətiyyən almır vecinə;

Otuz dərəcəlik şaxtada ölmür,

Yayda qanımızı soracaq yenə

***

Güclü söz möhtəşəm ordudur, ordu.

Odlar ölkəsidir Nizami yurdu.

Bütün qitələrdə yanan işıqlar

Edison ömrünün ardıdır, ardı

***

Özündə saxlayır neçə halı su-

Sirli, əsarətli, müəmmalı su.

Qar, yağış, buz, bulud, ildırımgolur

Ərzin ən qəribə mineralı su.

***

Dünyanın hələ də dərd-səri çoxdur,

Qayğılı axşamı, səhəri çoxdur.

Batan gəmilərin faciəsindən

Heyif Arximedin xəbəri yoxdur.

***

Şor torpaq sünbül də, gül də bitirir,

Qarışqa özündən çox yük götürür.

Miss naqil xoşlayır xeyirxahlığı-

Ünvandan-ünvana işıq ötürür.

***

Möhtərəm filosof! De, nədir həyat?

Bəlkə tamaşadır, sərgidir həyat?

Çatsın nəhərinə şöhrətpərəstin:

Sıfırdan-sıfıra yol gedir həyatg

Güclü sel tələsir yarğandan ötrü.

Şimşək - meşədəki yanğından ötrü.

Neolit əsrində silah düzəldən

Yol salıb gələcək qırğından ötrü.

***

Sirlər qapılartək hey açılacaq,

Bir fəsil dəyərdə bir il olacaq.

Sonsuz Kainatda heç nədir zaman,

Zamanı var edən idrakdır ancaq!

***

Ərzin yaxasında daim gül olsun,

Bəd əməl, pis toxum yanıb kül olsun!

İnsanlar! Görüşək meridiantək,

Əqidə yolumuz paralel olsun!

***

Söz gərək pas atıb qalmasın qında,

Sirlər aləmi var ürəkdə, canda;

Fərəhdən ağlasan - göz yaşı şirin,

Göz yaşı acıdır fəryad qopanda.

***

Sabun qohumudur yəqin şamın da,

Azacıq acılıq duydum tamında;

Özü də yox olur - çirk yuyub-yuyub,

Qəribə keyfiyyət var imiş onda.

***

Gərək öyrəşəsən əksliklərə:

Gah qıya qulaq as, gah çik-ciklərə.

Zamanın hər annı atom kimidir-

O da bölünürmüş zərrəciklərə.

***

Qısa söhbətini eyləmə uzun,

Çaşıb çanavara söyləmə quzu.

Aysberq böyükdür göründüyündən-

Qalır su altında onda doqquzu.

***

Şaxə şax budaqda yam-yaşıl idi,

Udub saf havanı, işıq içirdi.

Ocağa atılan quru çöp olub-

Aldığı istini qaytarır indi.

***

İdrak xəzinədir - min incisi var,

Sözün də kobudu, ən incisi var.

Filosof babamız nə gözəl deyib:

"Axtar, tapanadək özünü axtar!"

***

Dünya! Qayğıların daim çox olub,

İnsanın mini ac, onu tox olub.

Silah sərgisinə baxıb deyirəm:

Raketin babası yəqin ox olub...

Ədalət.-2012.-30 oktyabr.-S.6.