Lerik - təbiətlə yeniliyin sintezi

Lənkərandan Lerikə uzanan yeganə avtomobil yolunda hələ qələbəlikdir. Vazarı çayı boyunca sıralanan istirahət mərkəzlərində dincələnlərin, sərin dağ havası ilə baş-başa qalanların sayı burda kifayət qədərdir. Aşağıların bürkülü istisindən bir neçə saatlığa dağlara, quru və sərin iqlimi olan Lerikə üz tutan insanlara da burda tez-tez rast gəlmək olur.

Yaşıllıqlarla əhatə olunmasına baxmayaraq Lənkəran-Lerik magistral avtomobil yolunun kənarlarına son vaxtlar on min ədəddən çox müxtəlif növ ağac əkilmişdir. Rayon meşə mühafizəsi və bərpası idarəsi tərəfindən bu işlərə dəstək təbii olaraq daha böyükdür.

"Meşəbəyi", "Qala", "Təbəssüm", "Relax", "Həyat" və başqa istirahət mərkəzlərinə təşrif gətirənlərin böyük əksəriyyəti ölkə əhalisi olsa da, son vaxtlar bura Rusiyadan, Türkiyədən, Almaniyadan, İrandan və başqa ölkələrdən gələnlərin sayı xeyli çoxalıb. Burada yaradılmış şəraitin yüksək olması nəticəsində turizm-əyləncə mərkəzlərinə gələnlərin sayı 2011-ci ildə 9724 nəfərə çatmışdır. 2003-cü ildə isə bu rəqəm cəmi 800 olub. 2012-ci ilin ilk yarısında bu istirahət mərkəzlərində dincələnlərin sayı 3734 nəfəri ötmüşdür.

Rayon mərkəzinə 10-12 kilometr qalmış XVI əsrin yadigarı olan "Bobogil" türbəsi yerləşir. Son illər təmir olunduqdan sonra daha yaxşı şəraiti olan bu ziyarətgaha ölkənin hər yerindən hər gün müsafirlər gəlir. Ümidlilər ümidsiz qayıtmır, nəzir-niyazları nazil olur. Əsas odur ki, Lerikə gələnlər ruhən dincəlməklə bərabər bir rahatlıq duyğusu ilə də yaşayırlar.

Ömür bitər yol bitməz...

Yollara bənzədilən ömürlər də elə bu yollar kimi enişli-yoxuşludur. Enəndə də, yoxuşu çıxanda da ömrün günlərindən xərclədiyimiz anlar nə vaxtsa sona yetir. Yollarsa bitib-tükənmir və yeni yolçular gözləyir.

Lənkəran-Lerik avtomobil yolunun uzunluğu 56 kilometrdir. Bir neçə il əvvəl keçilməz olan bu magistral yol indi başdan-başa asfaltlaşdırılıb. Ancaq son vaxtlar Lerikə düşən leysan yağışlar, iri yük maşınları burda öz izlərini qoyub. Yol işçiləri bildirdilər ki, bu xırda qayğılardır, onları vaxtaşırı təmir edirik. Əsas odur ki, Lerikin yol təsərrüfatına son vaxtlar xüsusi diqqət var.

Bu doğrudan belədir. Azərbaycan Respublikası Prezident Aparatının göstərişinə rəğmən əhalinin daha çox yaşadığı, məsafəsi 36 kilometr olan 50-ci kilometr-Xanəgah, uzunluğu 32 kilometrdən çox olan Lerik-Kəlvəz yolu barədə ilkin məlumatlar toplanmış, smeta sənədləri hazırlanmışdır. Prezident Aparatına, Nazirlər Kabinetinə təqdim edilmiş müvafiq sənədlər əsasında 03 aprel 2012-ci il tarixdə Respublika Prezidentinin sərəncamı ilə Lerik-Qosmalian-Kəlvəz avtomobil yolunun inşası üçün ilkin olaraq 3 milyon manat vəsait ayrılmışdır. İndi bu narahat, daşlı-kəsəkli avtomobil yolunun xeyli hissəsinə örtük materialı daşınmışdır. Müxtəlif ərazilərdə hamarlama işləri aparılmışdır. Yaxın vaxtlarda bu yolun yenidən qurulması bir xeyli sürətləndiriləcək.

162 yaşayış məntəqəsini birləşdirən Lerikdə yol infrostrukturu xeyli mürəkkəbdir. Dağ yollarını saxlamaq xeyli çətin olduğundan bu sahəyə xüsusi diqqət tələb edilir. Rayon ərazisində ümumi uzunluğu 496 kilometr olan kəndarası yolların təmirə ehtiyacı var.

Artıq bu işlərə başlanmışdır. Rayon büdcəsindən ayrılan vəsait hesabına ötən il Piran, 2012-ci ildə Loda kəndlərinin daxili yollarına 1 və 0,7 kilometr, Vizəzəmin kəndinə isə 1 kilometr asfalt basılmışdır.

Lərmərud-Masallı yolunda əsaslı təmir işləri aparılır. Artıq bu yolda iri yük maşınlarının belə hərəkəti üçün körpü də inşa edilmişdir. Əliabad-Ağçay yolu təmirdən sonra daha gedişli-gəlişli olmuşdur. Yaxın vaxtlarda Əliabad - 50-ci kilometr yolunun təmir edilməsinə start veriləcək.

Yollar bitib-tükənən deyil, çünki hər yol yeni bir kənd, yeni bir şəhərdir. Bu kəndlərdə, şəhərlərdə isə ömürlər yaşanır - yollardan qısa ömürlər.

"Bu bizim Lerikdir"

Haqqında çox eşitdiyim, ancaq nədənsə heç vaxt təmasda olmadığım Lerik rayon İcra Hakimiyyəti başçısının Nüvədi kənd üzrə ərazi nümayəndəsi İntiqam Mirzəkişi oğlu Əsədovla ilk tanışlığımın təəssüratı yəqin ki, uzun illər yaşanacaq. Çox maraqlı həmsöhbət olan İntiqam müəllim uzun müddət müxtəlif vəzifələrdə çalışıb. Ancaq heç vaxt haqqı nahaqqa verməyən bu gözəl ziyalının bir devizi də olub - İnsan ləyaqətini daim qorumalıdır.

Elə söz-söhbəti də, oturuşu-duruşu da, ətrafı çox gözəl duymağı və qiymətləndirməyi də onun şəxsiyyəti ilə bərabər iş-gücündən də kifayət qədər məlumat verirdi:

- Sən də, mən də, bu dağlara qonaq gələn də, aranda yaşayanlar da nə vaxtsa bu dünyada olmayacağıq. Bu təbiidir, ancaq biz özümüzdən sonra nə qoyub gedəcəyik - bax, əsas məsələ budur. Bu elə həyat dediyimiz məhfumun özüdür. Əvvəlki və indiki Lerikə baxıram, görürəm ki, nə qədər dəyişikliklər var. Lerik indi Azərbaycanın ən gözəl dağ rayonlarından biridir. Rayon mərkəzi müasir bir şəhərdir. 10-15 il bundan əvvəl çoxlarının tanımadığı Lerikə indi haradan qonaq gəlmir.

(ardı gələn sayımızda)

Səxavət Məmmədli

Ədalət.-2012.-5 sentyabr.-S.3.