GƏLƏCƏYƏ UZANAN YOL...

...İnsan dünyaya gələndə çox şey arzulayır. İnsan arzulayır ki, onun istəkləri zaman-zaman gerçəkləşsin. İnsan arzulayır ki, övladı böyüsün, orta məktəbə getsin və sonra da bu təhsil müəssisəsini bitirərək ali məktəbə qəbul olsun. Ali məktəbdən sonra isə onun sonrakı yaşayacağı anlar gəlir...

Bütün bunlar insanları zaman-zaman düşündürən və gələcəyə daşıyan bir qüvvə olub. Kim o qüvvədən, o gücdən yapışıbsa, gec-tez istəyinə və arzusuna qovuşub...

MƏKTƏBƏ GEDƏNDƏ ÇOXLARI SEVİNİB

Məktəb elə bir müqəddəs yerdir ki, onu sonradan zaman-zaman anlamağa başlayırsan. Düzdür, əvvəlcə 1-ci sinfə gedəndə çoxları göz yaşını saxlaya bilmir və ağlayır. Bu ağlayan uşaqlar analarından, atalarından ayrıldığı üçün kövrəlirlər. Amma elə ki, getdikləri məktəbdə müəllimlərinə sığınır, onların məhəbbətini və qayğısını hiss eləyir və bu uşaqlar yenidən ikinci bir ocaq tapırlar. O ocaq onların hər gün gedib qayıtdığı məktəbdir.

Füzuli rayonu da həmişə öz təhsili və qabaqcıl müəllimləri ilə seçilib. Yəni məktəbdə şagirdlərin təlim-tərbiyəsi ilə məşğul olan müəllimlər ömür günlərini bu şagirdlərin üstündə qoyublar. Daha doğrusu, onlar saçlarını dərs dedikləri məktəbdə ağardıblar. Amma buna görə qətiyyən Füzuli müəllimləri heç vaxt peşmançılıq hissi keçirməyiblər. Çünki onların "xərclədikləri" ömür heç də boş-boşuna getməyib. Burda böyük şairimiz Mikayıl Müşfiqin aşağıdakı misraları yadımıza düşür:

Bu vəfasız ömür, bu coşqun dərə,

Gərək boş-boşuna axıb keçməsin.

Bu gözəl cahanı sanıb pəncərə,

Hər gələn sadəcə baxıb keçməsin...

Füzulidə də zaman-zaman təhsil sistemində çalışan insanlar öz sözlərini və öz izlərini qoyublar. Bu izlər və bu ləpirlər zamanından, məkanından asılı olmayaraq həmişə yaşayıb, yadda qalıb. Yadda qalıb ki, filankəs 40 il təhsil sistemində çalışdı və öz sözünü dedi...

ƏNƏNƏLƏR YAŞAYIR...

Füzuli təhsilinin zəngin ənənəsi və tarixi var. Kimliyindən asılı olmayaraq rayon təhsil şöbəsinin müdiri vəzifəsində çalışıbsa, həmişə bu ənənəni qoruyub və yaşadıb. Bizim də orta məktəbdə təhsli aldığımız illərdə dərs deyən Füzuli müəllimləri yadımıza düşür. Yaxşı, savadlı və istedadlı müəllimlərin adları bu gün də qürur və iftixar hissi ilə çəkilir. Böyük Bəhmənli kənd orta məktəbinin direktorları işləmiş rəhmətlik Yaqub Əliyev və Əvəz Əliyev təhsil sistemində elə bir iz qoyub ki, onların adı 60 il, 70 il keçsə də yenə yaddan çıxmır. Bu da təsadüfi deyil. Çünki Füzuli təhsil sistemində Yaqub müəllim kimi, Əvəz müəllim kimi onlarla gözəl pedaqoqlar və ziyalılar olub.

Füzuli rayon maarif şöbəsinin (indiki təhsil şöbəsinin) uzun müddət müdiri işləmiş Hüseyn Hüseynovun adı çoxlarının yaxşı yadındadır. Rəhmətlik Hüseyn müəllim Füzuli təhsilində elə bir nizam-intizam yaratmışdı ki. o nizam-intizam bu gün də bir çox məktəblərdə və təhsil ocaqlarında qalıb. Indiyə kimi, yaxşı yadımızdadır Hüseyn müəllim özü heç bir xəbərdarlıq eləmədən qəfil məktəblərə baş çəkər və dərslərdə əyləşərdi. Elə ki, dərs keçən müəllim hazırlıqlı gəlirdi və tədrisi yüksək səviyyədə aparırdı, bax onda Hüseyn müəllimin çöhrəsində təbəssüm hiss olunurdu. Vay o günə ki, müəllim hazır olmayaydı və dərsi də səviyyəsiz keçəydi. Bax onda rəhmətlik Hüseyn müəllimin rəngi qapqara qaralardı və dilxor olurdu. Dərsi zəif keçən müəllimin məsələsi maarif şöbəsində müzakirə edilirdi və nöqsanlara yol verdiyinə görə həmin müəllimə töhmət elan olunurdu. Təbii ki, bu cür ciddi tədbirlərdən sonra digər məktəb direktorları dönüş yaradır və tədrisin keyfiyyətinə, səviyyəsinə önəm verirdi.

Həmin ənənələri Füzuli təhsil şöbəsinin keçmiş müdiri Hafiz Tahirov da davam etdirdi. Hafiz müəllim bir pedaqoq və ziyalı kimi işlədiyi uzun illər ərzində Füzuli təhsilində öz izini qoydu və sözünü dedi. Aydındır ki, insan harda işləməyindən asılı olmayaraq, gərək hər hansı işə yaradıcı yanaşsın və pedaqoji kollektivlərin dilini tapa bilsin. Məhz bu dil, bu münasibət yarananda həmin kollektivdə xoş əhval-ruhiyyə hökm sürür.

ALMAZ HƏŞİMOVANIN GƏLİŞİ

Əlbəttə, bayaq dediyimiz kimi, təhsil sistemində islahatlar aparmaq, yeniliklər yaratmaq və yaxşını pisdən ayırmaq o qədər də asan deyil. Ən azından ona görə ki, rayon təhsil şöbəsinin müdiri vəzifəsində işləmək savadla, bacarıqla yanaşı, zəngin təcrübə də tələb eləyir. Yəni zəngin təcrübəsi və dərin biliyi olan insanlar nəsə təhsil sistemində yeniliklər eləməyi bacara bilər. Bu mənada uzun müddət məktəb direktoru işləmiş, gözəl ziyalı və pedaqoq Almaz Həşimovanın rayon təhsil şöbəsinin müdiri vəzifəsinə təyin edilməsi heç də təsadüfi deyildi. Bayaq dediyimiz kimi, Almaz xanımın Füzuli təhsil sistemində öz çəkisi, öz yeri və öz nüfuzu var. Üstəlik də bu xanım həmişə rayonun ictimai həyatında yaxından iştirak edib və bəzən də ona dəmir xasiyyətli insan kimi baxırlar. Çünki bu xanımın xasiyyətinə və xarakterinə hamı yaxşı bələddir. Həm ürəyi yumşaqdır, həm sadədir, həm də tabeliyində olan işçilərə qarşı çox tələbkardır.

Məhz bu məziyyətlərinə görə də Almaz Həşimovanın rayonda çox böyük hörməti və nüfuzu var. O, fəaliyyətə başladığı ilk gündən ciddi addımlar atdı. Yəni rayon təhsil sistemində mövcud olan bir çox problemləri həll etdi. Ali və orta ixtisas məktəblərinə qəbul zamanı zəif nəticə göstərən məktəb direktorlarına ciddi xəbərdarlıq elədi, hətta bəzilərini vəzifədən çıxardı. Amma buna görə heç də Almaz xanımdan vəzifədən çıxan adamlar narazılığını bildirmədi. Çünki onlar yaxşı başa düşürdülər ki, öz vəzifə borclarını lazımi səviyyədə yerinə yetirməyiblər və buna görə də tutduqları vəzifədən uzaqlaşdırılıblar.

Bütün problemləri qanun çərçivəsində və demokratik prinsiplər əsasında həll edən Almaz Həşimova yaxşı bilirdi ki, bu atılan addımlar gec-tez öz bəhrəsini verəcək. Almaz xanım həm də bir neçə yaşlı direktoru yeni gənclərlə əvəzlədi.

Əlbəttə, bayaq dediyimiz kimi, bu yeniliklərin həyata keçirilməsi zaman-zaman öz bəhrəsini verməyə başladı. Orta məktəblərdə intizam daha da möhkəmləndi, şagirdlər müxtəlif olimpiyadalarda və müsabiqələrdə uğurla çıxış elədi. Üstəlik ayrı-ayrı müəllimlərin və pedaqoqların da işində əsaslı dönüş yarandı. Bütün bunlar ona dəlalət edirdi ki, Füzuli təhsili keçmiş ənənələri yaşadaraq gələcəyə doğru daha inamla irəliləyir...

(ardı gələn sayımızda)

Faiq QİSMƏTOĞLU

Ədalət.-2012.-7 avqust.-S.3.