"İnanmıram damarında türk qanı olan adam belə söz desin"

"Adını siyasətçi qoyanlar indi durub deyirlər ki, biz Koroğlu, Qaçaq Nəbi deyilik. Bəs onda sən kimsən, Səhl Sumbatsan, Şöylü Məliksən, satqınsan, kimə xidmət edirsən?"

Yeni Azərbaycan Partiyası icra katibinin müavini, deputat Mübariz Qurbanlı "Ədalət" qəzetinə müsahibə verib. Həmin müsahibəni təqdim edirik.

- Ramil Səfərovun azadlığa çıxmasını Siz necə şərh edərdiz?

- Ramil Səfərovun ekstradasiyası və əfv olunması cənab prezidentin qətiyyətli siyasətinin və Azərbaycan ordusuna, zabitinə, vətənpərvər övladımıza diqqət və qayğısının nəticəsidir. Ölkə başçısı bu addımı atarkən yalnız və yalnız Azərbaycanın milli, dövlət marağını, eyni zamanda da Ermənistanla müharibə şəraitində olduğu bir zamanda ölkənin qətiyyətli mövqeyini ortaya qoyub. Prezident dəfələrlə qeyd edib ki, biz siyasətimizi kimlərəsə baxaraq müəyyən etmirik. Bizim siyasətimizin ana xəttini Azərbaycanın milli maraqları təşkil edir və biz milli maraqlar tələb edən hər bir addımı atırıq, bundan sonra da belə olacaq. Ramil Səfərovun Macarıstanda həbs olunması və ömürlük həbsə məhkum edilməsi ədalətsiz idi. O zaman ermənilərin, ermənipərəst dairələrin təsiri, bu məsələ ətrafında yaradılan hay-küy Macar məhkəməsinin qərarının ədalətsiz olmasına səbəb olmuşdu. Ramil Səfərovun erməni zabitini zərərsizləşdirməsi əslində zorən atılan addım idi. Azərbaycan bayrağının təhqir olunması, ermənilərin Dağlıq Qarabağda törətdikləri vəhşiliklər, torpaqlarımızın işğalı zamanı yol verdikləri vandallıqların erməni zabiti tərəfindən tənəli ifadəsi Ramili belə addım atmağa sövq edib. Əslində bu erməni provakasiyası, erməni fitnəkarlığı idi. Bu fitnəkarlığın nəticəsində də bizim zabitimiz həbs olunmuşdu.

- Rəsmi Bakı Ramil Səfərovun ekstradisiyası ilə paralel onu əfv etməklə hansı reaksiyalarla üzləşəcəyini hesablamışdı?

- Hesab edirəm ki, ayrı-ayrı beynəlxalq qurumların, nüfuzlu təşkilatların yaydıqları bəyanatlar Azərbaycanın həmin qurumlarla münasibətinə mənfi təsir göstərməyəcək və biz tutduğumuz yolla gedə biləcəyik. Proqnozlaşdırma məsələsinə gəlincə, Azərbaycan siyasəti tamamilə elmi əsaslara və möhkəm nəticələrə istinadən həyata keçirilir. Yəni xarici siyasətimiz heç bir təsadüfə istinad etmir, hər şey hesablanır. Bu cür reaksiyalardan da Azərbaycan çəkinmədiyini göstərir. Bu Azərbaycanın müstəqil siyasət yeritməsinin bariz nümunəsi, həmçinin Azərbaycanın öz maraqları ortada olduğu zaman heç nədən geri çəkilməyəcəyinin göstəricisidir.

-Ekstradisiya artıq böyük uğur idi. Bununla kifayətlənmək olmazdımı?

-Ekstradisiya olunduqdan sonra Ramil Səfərova qarşı atılan addımların ədalətsiz olduğu nəzərə alınıb və prezident tərəfindən əfv olunub. Beynəlxalq qanunlar var, beynəlxalq hüquq var. Həbs olunan şəxslərin bu və ya digər ölkədən öz dövlətlərinə, vətəndaşlıqlarını daşıdıqları ölkəyə köçürülməsi, ekstradisiyası qaydaları mövcuddur. Həmin qaydalara görə, ekstradisiya olunan məhbus həmin ölkəyə qədəm qoyduqda o ölkənin qanunları çərçivəsində məhbus kimi sayılır. Azərbaycan qanunlarına görə də ölkə başçısı kimi prezident ölkədə əfv etmək səlahiyyətinə malikdir. Ramil Səfərov da Azərbaycan vətəndaşı olaraq ölkəyə qədəm qoyduğu andan dövlətin qanunları ona şamil olunurdu. Prezident də ona görə onu əfv etdi. Əfv etməsəydi, o zaman Ramil Səfərov başqa variantla Azərbaycan həbsxanalarına göndərilirdi və burada həbsdə saxlanılırdı. Amma onu Azərbaycanda həbsxanaya göndərmək erməni fitnəkarlığına haqq qazandırmaq, erməni vəhşiliklərinin, ermənilərin törətdikləri cinayətlərin unudulması demək olardı. Biz erməni vəhşiliklərini, Xocalı faciəsini heç zaman unutmamışıq.

- Əfv qərarının çıxarılması Azərbaycanı dünyayla üz-üzə gətirdi...

- Gəlin sualı elə burda da saxlayaq. Ramil Səfərov məsələsi Azərbaycanı dünya ilə üz-üzə qoymayıb. Bu məsələ Azərbaycanı quduzlaşmış erməni faşizmi ilə, həmçinin də erməni faşizminə, erməni işğalına dəstək verən, erməni pulu ilə siyasi səhnədə olanlarla üz-üzə qoya bilər. Bütövlükdə Ramil Səfərovun əfv olunması dünya ictimai rəyində heç də Azərbaycan əleyhinə kampaniya ilə müşayiət olunmur. Bunu normal anlayan, başa düşən tərəflər də, qüvvələr də, mətbuat da var. Vaxtı ilə ASALA və digər terror təşkilatlarının üzvü olmuş ermənilərin, beynəlxalq miqyaslı terrorçuların, Monte Melkumyan kimilərin Ermənistana gətirilərək azad olunması, milli qəhrəman səviyyəsinə qaldırılması tamamilə dünya qanunlarına, beynəlxalq normalara zidd idi. Təəssüf ki, həmin dövrdə beynəlxalq terror fəaliyyətində iştirak edən ermənilərin Ermənistana gətirilərək bağışlanmasına həmin beynəlxalq təşkilatlar heç bir reaksiya vermirdilər. Biz isə digər məsələlərdə olduğu kimi, bu məsələdə də ikili standartları görməkdəyik. Ona görə də bu gün Azərbaycan, müstəqil qətiyyətli siyasət yeridir.

- Azərbaycana ünvanlanan çağırışlarda atılan addımın Dağlıq Qarabağ probleminin həll danışıqlarına təsirsiz ötüşməyəcəyi təhdidləri gəlməkdədir...

- Bu, nəyə mənfi təsir göstərir göstərsin, biz mövqeyimizdən geri çəkilməməliyik, çəkilməyəcəyik də. Biz düşmənlə üz-üzəyik. Düşmən bütün sahədə-ideoloji, siyasi, beynəlxalq, diplomatiya, iqtisadiyyat, mətbuat, internetdə bizimlə vuruşur. Ona görə də düşmənlə düşmən dilində danışmaq lazımdır. ATƏT-in Minsk Qrupu əgər doğrudan da bölgədə sülhə, əmin-amanlığa çalışırsa Ramil Səfərovun işğal olunmuş torpaqlarının geri qaytarılması istiqamətində çalışsın, işğalçı Ermənistana yox deyə bilsin. Xocalı faciəsi törədiləndə Zori Balayanın yazdığı, yaxud da Monte Melkumyanın qardaşının Kolumbiyada çap olunmuş kitabında yazdıqları vəhşilikləri görsünlər. İşğalçı Ermənistan, dünya bizə bir yaxşı söz deyəcək deyə, biz gətirib zabitimizi həbsxanaya salmalıydıq? Mən tamamilə bunun tərəfdarı deyiləm. Bəzən ölkəmizdə də nadanların, yaramazların "Ramil Səfərov ermənini yatdığı yerdə öldürüb" ifadəsini işlətməsi məndə onlara qarşı ikrah və nifrət yaradır. Vəziyyət o həddə çatıb ki, erməninin uydurduğu versiyaları bu gün bəzi yaramazlar Azərbaycan mətbuatına çıxarıb təsdiq edirlər. Mən onların azərbaycanlı olduğuna inanmıram, inanmıram onların qanı təmiz olsun, inanmıram qanı həqiqi türk qanı olan adam belə söz desin.

- Axı bu elə bir məsələdir ki, birmənalı fikir söyləmək mümkün deyil...

- Bir neçə gün əvvəl Türkiyə televiziyası beynəlxalq miqyasda bizə təpkiləri göstərən bir epizod verdi. Onlar bunu bizim bəzilərə nümunə olacaq şəkildə təqdim etdi. Erməni zabitinin necə bayrağımızı, millətimizi təhqir etdiyini və buna görə də Ramilin onu öldürdüyünü bizimkilərə də nümunə olaraq formada göstərdi. Mən Macarıstanda, paytaxt Budapeştdə türmədə görüşmüşəm və bir saat yarım söhbət etmişik. Ramil mənəvi cəhətdən də, ideoloji cəhətdən də təmiz, bütövlükdə Azərbaycan millətinə xas xüsusiyyəti özündə daşıyan bir gəncdir. Macar həbsxanasında da ona bir zabit kimi yanaşırdılar və macar zabitləri Ramilə deyiblər ki, bizə qarşı belə ədalətsizlik olsa biz də düşmən zabitinə belə edərdik. Adını siyasətçi qoyanlar indi durub deyirlər ki, biz Koroğlu, Qaçaq Nəbi deyilik. Bəs onda sən kimsən, Səhl Sumbatsan, Şöylü Məliksən, satqınsan, kimə xidmət edirsən?

- Azərbaycan ASALA-nın xaricdəki diplomatlarımıza qarşı terror təhdidlərini nəzərə almışdı?

- Azərbaycanın xarici ölkələrdəki diplomatik korpusları, səfirlikləri yüksək səviyyədə qorunur. Onların təhlükəsizliyinin təmin edilməsi üçün Azərbaycan hökuməti kifayət qədər işlər görüb. Həmçinin təmsil olunduğumuz dövlətlərdə də ASALA-nın bu hay-küyü ilə əlaqədar lazımi tədbirlər həyata keçirilib. Inanıram ki, ASALA həmin iddialarını yerinə yetirmək iqtidarında deyil və belə qurumlardan da Azərbaycan çəkinəcək səviyyədə deyil. ASALA terrorçu qrupdu və bu terrorçu qurumun himayəçisi Ermənistandır, erməni lobbisidir, ona yaxın olan dairələrdir. Ermənistan rejiminin özü bu gün terrorçudur, Dağlıq Qarabağda qurduqları terrorçu rejim də elə ASALA-nın quyruğudur. ASALA bir bəyanat verib deyə, biz ondan çəkinəsi deyilik. ASALA əgər hansısa hərəkət edəcəksə ondan da qat-qat güclü adekvat cavabı veriləcək. Azərbaycanın həm iqtisadi, həm siyasi gücü, həm beynəlxalq aləmdə nüfuzu kifayət qədərdir. Azərbaycan öz təhlükəsizliyini təmin etməyə də qadirdir. Avroviziya yarışması ərəfəsində də Azərbaycanda terror törədiləcəyi barədə iddialar vardı. Amma milli təhlükəsizlik, hüquq-mühafizə orqanlarımız elə işlədilər ki, Bakıda heç kim heç nə edə bilmədi. İndi də heç kim heç nə edə bilməyəcək.

- Fəaliyyətini dayandırmış ASALA-nın gündəmə gəlişi təsadüfdür?

-ASALA vaxtılə soyuq müharibə dövründə yaradılmış təşkilatlardan biridir. Soyuq müharibə illərində Sovet İttifaqı ilə Qərb dünyası arasında böyük çarpışma gedirdi. Bu zaman sovet ideologiyasının təbliği, sovet sisteminin fəaliyyəti üçün müxtəlif terror təşkilatları yaradılmışdı. ASALA da onlardan biri idi və erməni terrorçularından, həmçinin sovet pulu ilə çalışan bəzi qruplardan ibarət idi. Eyni zamanda da erməni lobbisinin maliyyə dəstəyi, vəsaiti ilə yaraılmışdı. ASALA Türkiyəyə qarşı yaradılmışdı və türk diplomatlara qarşı terror aktları həyata keçirirdi. Buna adekvat olaraq Alparslan Türkeşin rəhbərliyi ilə Türkiyədə də, Avropada da Bozqurdlar təşkilatı yaradılmışdı. ASALA qudurğanlıq edib türk diplomatlarına qarşı terror törədəndə Bozqurdlar onları zərərsizləşdirirdilər. Nəticədə ASALA Bozqurdların qarşısında təslim oldu və özü müxtəlif vasitələrlə türk diplomatlarına qarşı mübarizəni dayandırmaq istədiyini çatdırmaq istəyir. Terrorçuya qarşı gərək onların öz silahı ilə mübarizə aparasan. Görünür, ASALA keçmiş sahibləri tərəfindən yenidən dirildilərək Yaxın Şərqdə, regionda alətə çevrilmək istəyir. Amma bu gün dünya dəyişib, bu gün bütövlükdə dünyada terrora münasibət dəyişib, terrorun hamı üçün təhlükəli olduğu dərk olunur. Xüsusilə də terrorun mülki vətəndaşlara qarşı yönəldildiyinin nə qədər ağır nəticələr verdiyi hamıya bəllidir. Ona görə də inanmıram ki, ASALA-nı dirildənlər onun vasitəsilə öz məqsədlərinə çata bilsin. ASALA-nı dirildənlər gec-tez öz səhvlərini, yanlış yolda olduqlarını başa düşəcəklər. ASALA-nın Azərbaycanı hədələyən bəyanatları sabun köpüyü kimi əriyib gedəcək.

- Ermənistandakı rejimin terrorçu olduğunu dediniz. Axı terrorçu ilə döyüşürlər, danışıq yolunu seçmirlər. Azərbaycan isə danışıqlar yolunu seçir...

- Dağlıq Qarabağ problemi ilə əlaqədar Ermənistanla zərurətdən danışıqlar aparırıq. Biz danışıqlar masasından kənarda dursaq, beynəlxalq təşkilatlarda danışıqları istəməyən tərəf kimi görünə bilərik. Ona görə də biz danışıqları aparırıq və məsələni sülh yolu ilə həll etmək istəyirik. İrəvan rejiminin başında duran şəxsləri erməni xalqı müəyyənləşdirir. O şəxslər hələlik orda oturursa, onlarla danışacağıq. O şəxsləri digərləri əvəz edəndə onlarla danışacağıq. Yəni rəsmi şəkildə onların terroru dəstəklədikləri bilindiyi halda biz rəsmi danışıqları onlarla aparmalıyıq. Bu beynəlxalq oyun qaydalarıdır, biz də ona əməl etməliyik. Amma danışıqlar apardığımız tərəfin qeyri-konstruktiv və səmimi olmadıqlarını da bilirik. Buna bamayaraq biz beynəlxalq hüququn, beynəlxalq diplomatiyanın qaydalarına əməl edərək danışıqları davam etdiririk. Aparılan danışıqların da qansız, sülh yolu ilə nəticə verməsinə çalışırıq. Zaman bizim xeyrimizə işləyir, qoy bunu kimlər istəyirsə uzatsın. İrəvan rejimi öz qəbirini qazır və erməni xalqını da özü ilə birlikdə fəlakətə aparır. Əgər sülh yolu ulə problem həllini tapmazsa, növbəti müharibə başlasa, bundan ən çox ziyanı erməni xalqı çəkəcək. Erməni xalqı zamanında özünə rəhbərliyə gətirdiyinin kimliyini, mənşəyini müəyyən edərək qərarlar qəbul etməlidir ki, daha az itki ilə bu problemdən çıxa bilsin.

- Azərbaycanın beynəlxalq konvensiyalara uyğun addım atdığı bildirilir. Belə olan halda Azərbaycan niyə Macarıstan da daxil olmaqla həmin konvensiyalara qoşulan dövlətlərdən, qurumlardan bəyanatlar aldı, hesabatlar tələb olundu?

- Bunların bir çoxu daxili rəy üçündür, bəziləri isə erməni lobbisinə xoş gəlməyə çalışır. Desinlər, onların nə deməsi bizim üçün o dərəcədə önəmli deyil.

Gültəkin Qəhrəmanlı

Ədalət.- 2012.- 8 sentyabr.- S.9.