İslamı tanıyaq, sevək və yaşayaq

Bismillahir-rəhmanir-rəhim.

Söhbətimi Allahın adı ilə başlayıram.Çünki Allah Rəsulu da bütün söhbətlərini "Bismilləh" ilə başlamış və buyurmuşdur ki, "Hər mühüm işə "Bismilləh" ilə başlanmazsa, o işin sonu kəsikdir".

Həmd ancaq Allahadır,Ona həmd edir,Ondan yardım və bağışlanma diləyirik.Nəfsimizin şərindən və pis əməllərimizdən Allaha sığınırıq.Şəhadət edirəm ki, Allahdan başqa ibadətə layiq haqq ilah yoxdur, O, təkdir,şəriki də yoxdur və şəhadət edirəm ki, Məhəmməd Allahın qulu və Elçisidir.Allahın Rəsulu Məhəmmədə,onun saf Əhli-Beytinə,sadiq səhabələrinə və onların yolu ilə gedənlərə Allahın salamı olsun.

İlk əvvəl,mənə bu səhifəni ayırmaqla mənə öz fikirlərimi bölüşməyə imkan yaratdığına görə "Ədalət" qəzetinə,onun baş redaktoru İradə xanıma öz təşəkkürümü bildirirəm.

İlk əvvəl bildirmək istəyirəm ki, mən dinşünas,islamşünas deyiləm, ali savadlı hüquqşünasam, Azərbaycan Respublikası Vəkillər Kollegiyasının üzvüyəm, lakin cəmiyyətimizdə son dövrlərdə insanların bir hissəsinin emosiyalara uyaraq, "Mən İslama nifrət edirəm", "İslam terror edir" və sairə kimi xoşagəlməz söz və bəyanatlar yayması məni bu yazıları yazmağa vadar etdi.Mən bunu özümə borc bildim,öz düşüncələrimi sizlərlə bölüşmək qərarına gəldim.

Bu gün cəmiyyət insanı özünü ümmət olaraq müsəlman saysa da, əslində bu dinin əsl prinsiplərini, qayəsini,tələblərini bilmirlər,Quranın mənasını demirəm,hətta məzmununu belə, ümumiyyətlə,bilmirlər.İnsan da bilmədiyi üçün din deyəndə mollaları,özünü mömin adlandıran insanları gözünün önünə gətirir,onların dediklərini din bilir, onların hərəkətlərini dinin adına yazır və buna uyğun olaraq da dinə münasibət bəsləyirlər.Amma Allaha and olsun ki,bu din nə mollalardır, nə də özünə mömin deyib cəmiyyətdə yüz oyun çıxaranlardır.Bu dinin adı İslamdır,bu dini göndərən Allahdır,bu dini və "Quran"ı bizə çatdıran Məhəmməd Peyğəmbərdir.Heç kimin dediyi və etdiyi bizim üçün dəlil deyil.Bizim üçün dəlil "Quran" və sünnədir (Peyğəmbərin söz və əmrləri).

İslamdan danışırıqsa,gəlin,Allahın bizə göndərdiyi Quranı və onun Peygəmbərinin söz və vəsiyyətlərini özümüzə örnək götürək.Burda deyilənləri öyrənək,sonra həmin dinə öz münasibətimizi bildirək.

İslam nədir? Bu dini Allah niyə göndərib? Bu din bizə nə verib,bizdən nə tələb edir?Mənə elə gəlir ki,bunları bilmədən İslam barədə fikir irəli sürmək və bu barədə hökm və ya bəyanat vermək düzgün olmazdı.

Allah insanları yer üzündə yaratdı,çoxaltdı,cəmiyyət yarandı.Hər bir cəmiyyət idarə olunmalıdır.Bu cəmiyyəti idarə etmək üçün,insanlara nə məqsədlə yaradıldıqlarını,hansı yolun yolçusu olduqlarını bildirmək üçün elçilərə ehtiyac yarandı.Bu elçilər də peyğəmbərlər oldu.Onlar insanlara özlərindən bir kəlmə də demədilər, Allahın onlara vəhy etdiyindən başqa.Bu dünyanı,onun içindəkiləri,insanları Allah yaratdığı üçün onların da necə idarə edilməsini,nəyin onlar üçün yaxşı və pis olmasını Ondan yaxşı heç kim bilə bilməzdi.Ona görə də insan və cəmiyyətə ziyanlı olan hər bir şeyi Allah insanlara haram və qadağan etdi,onların dünya və Axirətlərini bəxtəvər edəcək əməllərə isə onları sövq etdi öz Kitabları vasitəsilə.

Bu gün bəziləri Allahı qəbul etdiklərini söylədiklərinə baxmayaraq,Onun bəzi qadağa və haramlarını qəbul etmirlər və hər biri də bir məsələ barədə öz fikirlərini irəli sürürlər.Lakin bu zaman başa düşmürlər ki,onlar Yaradanın qaydalarına qarşı çıxırlar.Sadə misal deyim.Hər birimizin əlində mobil telefon var.Həmin mobil telefonu alan kimi ilk əvvəl onun telefonla birlikdə bizə verilən təlimat kitabına baxırıq,bu telefondan necə istifadə etməyi,ona necə qulluq etməyi,nəyin bu telefona ziyan olub-olmadığını öyrənirik.Bu təlimatı oxuyaraq telefonumuzu əlimizdən yerə atmırıq,iki saatdan artıq cərəyanda saxlamırıq,suya salmırıq və sairə... Bunları nəyə görə edirik? Çünki bunları etsək telefonumuz məhv olacaq? Bəs bunları hardan öyrənmişik?Bu telefonu "yaradan"(icad edən) mühəndisin təlimatından.İndi özünüz fikirləşin,bir telefonu icad edib istifadəyə buraxan mühəndis onun təlimatını da əlavə edir ki,bu telefonu istifadə edənlərin telefonu məhv olmasın.Bəs ola bilərmi ki,insanları yaradan Allah bu insanlar üçün təlimat verməsin?!Ağıllı məntiqlə deməliyik ki,əlbəttə olmaz!..Bəs nədir bu təlimat? Həmin "Quran" və İslam dinigBax, bu yöndən yanaşsaq,hər birimiz dinimizi və bu dinin tələblərini dərindən dərk edə bilərik və hər birimiz Allahın əmrlərinə ən azı telefon təlimatına yanaşdığımız kimi yanaşarıq.Əgər telefonun suya salınanda xarab olacağını bildiyimiz üçün onu suya salmırıqsa,Allahın da şərab içməyin bizi məhv edəcəyini öz təlimatımızdan(Qurandan)bildiyimiz üçün şərab içməməliyik və beləcə misalları artırmaq olar.Necə ola bilər ki,sonradan pul ilə ala biləcəyimiz qiyməti 100 manat olan telefonu qoruyuruq,amma heç nə ilə ala bilmədiyimiz canımızı və Axirətimizi qorumuruq?! Bu ağıllı insana məxsus hərəkətdirmi?!Bu barədə düşünməyə dəyər məncə...

Ona görə də bir daha qeyd etmək istəyirəm ki,biz İslama ilk əvvəl Allahın bizə göndərdiyi,onun kamilləşdirdiyi və bizim üçün bəyəndiyi din kimi baxmalıyıq.Çünki Allah öz "Quran"ında demişdir: "Bu gün dininizi sizin üçün kamil etdim,sizə olan nemətimi tamamladım və bir daha sizin üçün İslamı bəyənib seçdim"( Maidə surəsi,ayə 3).İlk əvvəl qəbul edək ki,bu "Quran" Allah tərəfindən nazil olub və bu kitab insanların dünya və Axirətlərini təmin etmək üçün göndərilmişdir.Bundan sonra isə orda qoyulmuş əmr və qadağalara,nəsihətlərə əməl etməliyik.Bu kitabın bir hissəsini qəbul edib,bir hissəsini qəbul etməmək isə müsəlmana yaraşan hərəkət deyil və insanı İslamdan çıxaran əməldir.Çünki biz öz ağlımızla hərəkət edə bilmərik.Çünki əvvəlcədən də qeyd etdim ki,bu təlimat bizə bizi Yaradan tərəfindən göndərilib.İndi kim özünü qorumaq və xilas etmək istəyirsə,bu təlimata əməl etsin,kim özünü məhv etmək istəyirsə,yenə də özü bilər...

Bir daha istəyirəm biləsiniz ki, mənim heç kimə din dərsi keçmək, Allahı tanıtdırmaq fikrim yoxdur. Amma qeyd etməliyəm ki,bizim insanların Allahı tanıma anlamları da tam deyildir.Bu gün kimi dindirsən, deyir ki,hamımız müsəlmanıq, Allahımızı,Peyğəmbərimizi tanıyırıq. Amma vallahi,çoxumuz Allahı tanıyırıq,amma olduğu kimi,haqqı ilə tanımırıq.Allahı bu dünyanı yaradan,bizi yaradan kimi tanıyırıq,amma bizi yaşadan,bizə cəza verən, Axirət gününün sahibi,bizi imtahan edəcək və sonra da layiqli cəzamızı verəcək Allah kimi tanımırıq.Bunu bilsək,indi bəzilərimizin elədiklərini eləməz,dediklərini deməzdik.

Allaha imanın 6 əsası var ki,bunlardan biri də Axirətə imandır.Bu günümüzün insanlarının əksəriyyətinin din probleminin kökündə məhz Axirətə olan imansızlıq,yəni axirətə imanın olmaması durur.Bir çoxları bu barədə söhbət düşəndə, istehza ilə adama baxır və hiss edirsən ki,ürəklərində sənin Axirətə olan imanına gülürlər.Amma vallahi bu gün, bu Günəşin olması necə haqdırsa, Axirət də var, haqqdır və bu Axirət gününün sahibi də Allahdır. Bir anlıq düşünün... İnsan ümumiyyətlə olmayan şeyi arzu edə bilərmi?.. Əlbəttə, deyəcəksiniz ki, xeyr arzu etməz. İndi hamımız bir anlıq hər birimizin yox olmamaq,ölməmək,daimi yaşamaq arzumuzu fikirləşək.Əgər daimi yaşamaq mümkün olmasaydı,biz onu arzu edə bilərdikmi?.. Yəni, azadlıq olmasaydı, biz onu arzu edərdikmi? Sağlamlıq olmasaydı,biz onu arzu edərdikmi?.. İndi də,daimi həyat olmasaydı,biz onu arzu edərdikmi?.. Əlbəttə ki,yox...Deməli daimi həyat var,o da Axirətdə olacaq və Allah da bizə onu vəd edib.Bu daimi həyatı qazanmaq üçün də yolları göstərib və bu yollar "Quran"dan və İslamdan keçir...İnanmaq istəməyənlər də sərbəstdirlər.Çünki ən böyük demokrat da elə Allahın özüdür.İstəyənə Cənnətini verəcək,istəməyənə isə yox.Allah heç kimi məcburi olaraq Cənnətə sürükləyən deyildir.Amma bir var ki,insan bir şeyin var olduğunu bilə,lakin onu istəməyə,bir də var ki,bunun olmadığını inad eləyə...Bax həmin insanların hamısına Allah Axirət günü Cənnəti də,Cəhənnəmi də göstərəcək və deyəcək: "Budur sizin yalanladığınız Axirət günü".Ona görə də gəlin Axirət gününü yalanlayanlardan və Axirət günü peşman olanlardan olmayaq.

Bu gün cəmiyyətdə İslama qarşı yaranmış xoşagəlməz söhbətlərin bir çoxunun səbəbkarı elə İslamla yaşadıqlarını elan edənlərin hərəkətləri və davranışlarıdır.Bunu bilirik.Lakin bir daha qeyd etmək istəyirəm ki,biz İslamı onlardan yox, onun mənbəyindən öyrənməliyik. Hər bir kəsin etdiyi əməl İslamın dəlili deyil,İslamın dəlili "Quran" və bu "Quran"ı bizə gətirmiş Peyğəmbərdir.Bu gün adlarının qabağına Hacı, Məşədi,Kərbəlayi kimi islamda olmayan ləqəbləri artırmış şəxsləri və ya onların hərəkətlərini,sözlərini İslamın meyarları kimi qəbul etmək doğru deyil.Bu gün söz düşən kimi deyirlər ki,namaz qılanlar, hacılar,hicab taxanlar yüz oyundan çıxırlar.Mən də deyirəm ki,polislər 100 oyundan çıxırlar,hicabsızlar 100 oyundan çıxırlar,məmurlar 100 oyundan çıxırlar.Amma bütün bunlar bizə Daxili İşlər Nazirliyinə nifrət edirəm,bütün qadınlar əxlaqsızdır,dövlətə nifrət edirəm kimi məntiqsiz,əxalaqsız sözlər işlətməyə ixtiyar vermir.Eləcə də hər hansı ibadətdə olan,hicab taxan və ya özünə hacı deyən şəxlər hər hansı bir nalayiq hərəkət edirsə,bunun İslama və ya möminlərin hamısına heç bir aidiyyatı yoxdur.Biz gəlin İslamı olduğu kimi bilək,islama ümumi olaraq qiymət verək və yalnız onun prinsiplərindən danışaq,daha ayrı-ayrı fərdlərin hərəkətlərindən nəticə çıxarmayaq.

Bu gün xristian ölkəsi olan Amerika, İngiltərə, Fransa və Almaniyanın orduları müsəlman ölkələrində milyonlarla insanın məhvinə səbəb olan hərbi əməliyyatlar keçirirlər.Bundan əlavə, onların əsgərləri hərbi əsirlərə, həmin ölkələrin qadınlarına qarşı əxlaqsızlıq,zorakılıq hərəkətləri edirlər və bu halları onların öz mətbuatları,məhkəmələri də təsdiq edir.Belə olan təqdirdə,bu gün hansısa dini,şəxsiyyəti məlum olmayan insanların hərəkətlərinə görə "Mən İslama nifrət edirəm", "İslam terror" dinidir deyə bəyanat verən ziyalılarımız nədən "Mən xristianlığa nifrət edirəm", "Xristianlar qatildilər" deyə hayqırmırlar, bəyanat vermirlər?!Çünki həmin ölkələrdən,həmin Dinin sahiblərindən qorxurlar.Amma vallahi İslam da yiyəsiz deyil.Bu dinin sahibi Allahdır, çünki bu dini Allah bizim üçün kamil olaraq yetirib,yalnız bu dini bizim üçün bəyənib və bu dinin Sahibi ona qarşı edilən təhqirlərin,tənələrin,böhtanların cavabını verəcək, inşallah...

(ardı var)

Azər ƏZİZOV,

Azərbaycan Respublikası

Vəkillər Kollegiyasının üzvü,

hüquqşünas

Ədalət.- 2012.- 13 yanvar.- S.5.