Üzü sabaha olan qədim yurd yeri

(əvvəli ötən sayımızda)

Muzeyin əməkdaşı Həcər Nəsirova burdakı şəkillər, əşyalar haqqında çox geniş məlumat verəndən sonra əlavə etdi ki, Həzi Aslanov haqqında daha çox yazmaq lazımdır. Çünki çoxları bilmir ki, ilk dəfə 22 dekabr 1942-ci ildə Sovet İttifaqı Qəhrəmanı adını alan igid həmyerlimizin ikinci dəfə 4 iyun 1944-ci ildə bu ada təkrar layiq görülməsi niyə 47 il gec məlum olub? Bəli, yenə əqrəb zəhərli erməni məmurları, onların əlaltıları bu adın H.Aslanova təkrar verilməsini uzun illər ört-basdır edə biliblər. Nəhayət ona ikinci dəfə verilən qəhrəman adı çətin araşdırmalardan sonra 1991-ci ildə rəsmi təsdiqini tapıb.

Yolunuzu burdan salın, sabahın döyüşçüləri, vətən müdafiəçiləri! Çünki, Həzi Əhəd oğlu Aslanov haqqında çox şeyləri, qəhrəmanlığı da elə bu muzeydən öyrənəcəksiniz.

İqtisadi inkişaf zəhmətdən keçir

Neçə illər qabaq tanış olub, ünsiyyət qurduğum gözəl ziyalı, el-obasını çox sevən, uzun müddət müxtəlif vəzifələrdə çalışmış Ələsgər İbrahimovla söhbətimiz də Lənkəran və lənkəranlılar haqqındadır:

- Neçə illərdir gəlib-gedirsən. Lənkəran əvvəl belə idimi? Salınan parklar, meydanlar, tikilən binalar Lənkərana indi bir ayrı gözəllik verir. Bunlar öz yerində, bunları qəzetlər, televiziya kanalları yazıb və göstəriblər. Mən rayonumuzun son uğurlarından faktlarla danışacağam. 2011-ci il ərzində rayon üzrə ümumi məhsul 16,1 faiz artaraq, 2011-ci ildə rayon üzrə ümumi məhsulun həcmi 221,5 milyon manat olmuşdur. Sənayedə 19,2 milyon manatlıq məhsul istehsal edilmişdir. Tikinti quraşdırılma işlərində istifadə edilmiş investisiyanın həcmi 50 milyon manata çatdırılmışdır.

Aqrar bölmədəki aparılan uğurlu islahatlar nəticəsində ötən il biz 3162 ton taxıl yığmışıq. 7112 ton kartof, 125 min ton tərəvəz, 135 ton yaşıl çay yarpağı da 2011-ci ildə istehsal edilmişdir. Ötən illə müqayisədə mal-qaranın sayı 2,1 faiz çoxalmış, ət istehsalı 10,7 faiz, süd istehsalı 3,4 faiz, yumurta istehsalı 1,1 faiz artmışdır. İqtisadi sahədə çalışan lənkəranlıların orta aylıq əmək haqqı 219 manata çatmışdır.

Lənkəranda sosial şəraitin yaxşılaşdırılması həmişə diqqət mərkəzindədir. Rayonun elektrik enerjisi, mavi qazla təminatı istiqamətində görülən işlər öz bəhrəsini verməkdədir. Bu gün rayonumuzda hər 100 ailənin 73-ü telefon xidmətindən istifadə edə bilir ki, bu da respublikanın orta göstəricisindən 7,5 faiz çoxdur. Rayon sakinlərinə xidmət edən, eləcə də idarə və müəssisələrdəki bütün telefonlar elektronlaşdırılmışdır.

İşsizliklə ciddi mübarizə aparırıq, istəyirik ki, gənclərimiz istehsalatın müxtəlif sahələrində çalışsınlar. Ötən il 1435 nəfəri müvafiq ixtisaslar üzrə işlə təmin etmişik ki, bu iş yerinin 70,4 faizi daimidir. Son 3 ildə işlə təmin etdiyimiz vətəndaşlarımızın sayı 4144 nəfərdir. Elə 2011-ci ilin dekabrında istifadəyə verilmiş "Sevimli" ticarət mərkəzində 80 nəfər iş yeri tapmışdır.

Lənkəranda 30 min nəfərdən çox təqaüdçü var, çalışırıq ki, bu təbəqənin insanları təqaüdlərini vaxtında ala bilsinlər. Az təminatlı ailələrin sosial müdafiəsini yaxşılaşdırmaq məqsədi ilə 3880 ailəyə ünvanlı sosial yardım veririk.

Məktəb tikintisinə xüsusi diqqət ayırırıq. Hirkan qəsəbə, Şilavar, Xarxatan kənd məktəblərinin tikintisi başa çatdırılmaq üzrədir. Baliton və Vilvan kənd orta məktəblərinin yeni binaları da 2012-ci ildə şagirdlərin ixtiyarına veriləcək.

Deyəsən rəqəmlər çox oldu axı, ancaq bunlar rayonun əsas sosial-iqtisadi göstəricilərindəndir.

Ələsgər müəllim rəqəmlərin çoxluğundan yorulduğumu düzgün təxmin etmişdir. Ancaq özü demiş hər rəqəmin arxasında min zəhmət durur.

2011-ci il həm də "Turizm ili" idi

İndi həyatın elə məqamlarına gəlmişik ki, insanlar aldığı informasiya nəticəsində imkan daxilində daha çox gəzmək, görmək istəyirlər. Təbiidir, ancaq bunları reallıqda yaşamaq üçün mütləq sərhədlər aşmalı, ölkələr gəzməlidir.

Arxada qoyduğumuz 2011-ci il ölkəmizdə həm də "Turizm ili" kimi qeyd edildi. Bu baxımdan Azərbaycanın müxtəlif regionları ilə bərabər füsünkar təbiətli Lənkəranda da təqdirə layiq tədbirlər həyata keçirilmişdir.

Lənkəranda turizmlə bağlı görülən işlər barədə çox danışılıb, çox yazılıb. Tendensiya 2011-ci ildə bir az da inkişaf etdirilmişdir. Bu məqsədlə rayondakı turizm obyektlərində monitorinqlər keçirilmiş, xidmət səviyyəsini yüksəltmək üçün bir sıra tədbirlər görülmüşdür. Müasir üslubda, bütün normalara cavab verən Lənkəran şəhərində "Xan -Lənkəran" oteli , Sütəmurdov kəndində "Palmalife" istirahət kompleksi tikilmişdir. 3 mərtəbəli otel istirahət mərkəzi 6 koteci, 22 otağı, restoran xidmətini, fitnes zalını, tennis kortunu, hovuz və saunanı özündə birləşdirməklə 80 nəfərə iş yeri vermişdir.

Dəniz suyu ilə təmin edilən qış hovuzu, 150 nəfərlik konfrans zalı, 200 nəfərlik restoranı, idman zalı və digər xidmət sahələri olan "Palıdlı-Sahil" turizm və istirahət mərkəzinin yeni korpusunun inşası 2012-ci ildə başa çatdırılacaq.

Xəzərin sahilində, Talış dağlarının ətəklərində yerləşən Lənkəran haqqında yəqin ki, hələ çox yazılacaq. Çünki gözəl təbiəti, əməksevər insanları olan bu rayonun daha böyük uğurları qarşıdadır.

Səxavət Məmmədli

Ədalət.- 2012.- 25 yanvar.- S.7.