AĞ ÖRPƏYƏ BÜRÜNƏN ŞƏHƏR...

(Əvvəli ötən sayımızda)

... Horadiz şəhərinə qayıdarkən yolun kənarında yeni inşa edilmiş müxtəlif ticarət obyektləri və köşklər diqqətimizi cəlb eləyir. Bu ticarət obyektləri və köşklər müasir üslubda və çox səliqəli tikilib. Təbii ki, o da hiss olunur ki, hər şey şəhərin baş planına uyğun qurulur. Milli memarlıq üslubu, tikililərin bir-birini tamamlaması sanki hansısa bir yaradıcı insanın təxəyyülündən süzülüb gəlib. Ətrafda qar yağır. Maşının pəncərəsindən baxanda yaxınlıqda bir neçə tanış adamı görürəm. Yenə özümü saxlaya bilməyib sürücüyə "maşını yolun kənarına verib, saxla!" deyirəm.

Sürücü də elə həmin an əyləci basıb maşını saxlayır. Yenə ağ örpəyə bürünmüş gözəlliklər gözümüz önündə canlanır. Maşından düşüb çoxdan tanıdığım bir ağsaqqala yaxınlaşıram. O da məni görən kimi bizə sarı irəliləyir. Bu kişi mənim atamın dostu və qohumu Cəlil Abdullayevdir. O dəqiqə deyir ki, gəlin gedək bizə, sizə bir hinduşka kababı çəkim. Qarlı havada hinduşka kababının özgə ləzzəti var. Aydındır ki, vaxtımız az olduğuna görə çox da ləngiyə bilməzdik. Cəlil əmimə dəvətə görə "çox sağ ol" deyirəm. Allah qoysa, başqa vaxt qonağınız olarıq. O isə yeni tikilmiş köşkləri göstərərək deyir ki, bunların hamısı icra başçısı Alı müəllimin təşəbbüsü ilə tikilib və heç kimdən də nəsə ummayıblar. Əksinə burda sahibkarlığın inkişafına şərait yaradıblar və ayrı-ayrı iş adamlarına, hətta güzəştli kreditlər veriblər. Bu gördüyün ikimərtəbəli ticarət obyekti isə oğlum Əlinindir. Heç kim gəlib bizdən bir şey ummur. Alı müəllim də deyib ki, kim sizi narahat eləsə və işinizə qulb qoysa "qaynar xətti"mizə zəng vurun. Şükür Allaha, bütün vergini ödəyirik. Çünki burda bizə və dolanışığımıza hər bir şərait yaradılıb. Əvvəllər olduğu kimi kimlərsə gəlib bizim işimizə bayaq dediyim kimi pəl vurmur. Elə iş adamları da ən çox bu şəffaflığa və halallığa görə rayon icra hakimiyyətinin başçısı Alı müləlimə minnətdarlıq eləyirlər. Dolanışığımız lap yaxşıdır.

Qonaq-qaranın da qabağına üzüağ çıxırıq. 10-15 nəfərlə qapımıza gəlsən, heç bir qorxusu yoxdur və onların qulluğunda dura bilərik. Bu ruzunu bizə verən Allahdır. Bu ruzunu qazanırsansa, demək onu qonaq-qaradan da əsirgəməməlisən...

"Qarabağ" istirahət mərkəzi

Horadiz şəhərindən geriyə - Bəhmənliyə qayıdarkən Kərimbəyli kəndinin üstündə çox müasir və orijinal üslubda inşa edilmiş istirahət mərkəzi diqqətimizi cəlb eləyir. O qədər orijinal və qeyri-adi üslubda bu mərkəz inşa edilib ki, adam burda görülən işlərin qeyri-adiliyinə qibtə ilə yanaşır. Ancaq şükür eləyirsən ki, nə yaxşı cəbhə bölgəsində belə bir müasir tələblərə cavab verən istirahət mərkəzi tikilib. İstirahət mərkəzinin sahibi Nəriman müəllim deyir ki, qısa zaman kəsiyində bu gördüyün möhtəşəm tikilini kerçəkləşdirə bilmişik. Təbii ki, bu layihənin həyata keçirilməsində dövlətin və rayon icra başçısının böyük dəstəyi var. Ordan biz kömək görməsək aydındır ki, bu qədər işi az bir vaxtda görüb başa çatdıra bilmərik. Milli üslubda və tarixi ənənələrə uyğun tikilən bu istirahət kompleksi artıq tam hazır vəziyyətdədir.

Allah qoysa bu kompleks istifadəyə veriləndən sonra yayla qış vaxtı burda insanlar gəlib istirahət edə biləcəklər. Bəziləri deyir ki, sərhədyanı cəbhə bölgəsində istirahətə kimlərsə gəlməyə cürət eləməz. Amma mən bu fikirlə qətiyyən razı deyiləm. Çünki hər gün Füzuliyə yüzlərlə qonaq-qara gəlir və onlar da bu tikililərə baxıb, sevinirlər. Deyirlər ki, çox gözəl istirahət mərkəzi inşa eləmisiniz. Yəqin istifadəyə veriləndən sonra bura çoxları gələcək. Bu yerlərin həm havası təmizdi, həm də yüksəlikdə yerləşib. Qar yağanda da gözəl olur, yaz gələndə də. Deməli, belə bir məkanda istirahət eləməyə dəyər.

Yaşıl ağaclar

Böyük Bəhmənli Füzulinin ən iri kəndlərindəndir. Yəni bu kənd qədim tarixə malik və özü də çox şərəfli bir keçmişi olan yurd yeridir. Bu yurdun çoxlu sayılıb-seçilən, tanınan istedadlı ziyalıları var və el-oba da həmişə onlarla fəxr edib, qürur duyub. Kəndin icra nümayəndəsi Sirac İsmayılov cavandır. Amma cavan olmasına baxmayaraq, çox bacarıqlı, zəhmətkeş və həm də böyük işlərə imza atmağa can atan bir insandır. O deyir ki, az bir vaxtda kəndin baş yolu xeyirxah insanlar tərəfindən asfaltlanıb. Yolun hər iki kənarında isə çoxlu sayda ağaclar əkmişik. İndi o ağacların hamısı böyüyüb və ətrafı daha da gözəlləşdirib. Kənddə iki tam orta məktəb fəaliyyət göstərir. Uşaq bağçası isə əsaslı surətdə təmir edilərək istifadəyə verilib. Qarşıda bir çox görüləsi işlər var. Yaxın gələcəkdə kənd xəstəxanasının tikintisinə başlanılacaq. Üstəlik də bir çox sosial obyektlərin inşası nəzərdə tutulub. Bizim üçün əsas sevindirici amil odur ki, kəndimizin iki addımlığında dünya standartlarına uyğun olan Füzuli Diaqnostika Mərkəzi tikilib. İndi bu mərkəzdə ən mürəkkəb əməliyyatlar aparılır. Yaxın vaxtlarda Neft Şirkətinin dəstəyi ilə Mərkəzi Neftçilər Xəstəxanasının kardio-cərrahları diaqnostika mərkəzində çoxlu sayda insanın ürəyində təmənnasız əməliyyatlar aparıb, onları həyata qaytarıblar. Məgər bundan da gözəl və xeyirxah işmi var?!

"Axşam bizdə qalın"

Bu sözləri mənə ziyalı insan və yaxın dostum Elmin müəllim dedi. Bala Bəhmənli kəndinə çatanda telefonuma zəng gəldi. Açanda gördüm ki, yaxın dostum və ziyalı insan Elmin müəllimdir. Dedi ki, məni görməmiş hara gedirsən? "Dörd yol"da gözləyin 5 dəqiqəyə özümü sizə çatdırıram, bir tikə çörək kəsərik, sonra gedərsiniz. 5 dəqiqədən sonra Elmin müəllim biz dayandığımız yerə çatdı və maşından düşüb yanımıza gələrək bizimlə görüşdü. Təbii ki, onunla söhbət eləmək, bir tikə çörək kəsmək və çay süfrəsi arxasında əyləşmək çox xoş idi. Mən bir təhər bəhanə gətirib tələsdiyimi desəm də, o inadından dönmədi və dedi ki, maşını sür dalımca. Gedək dostumuz, qardaşımız Vətənin yeməkxanasına, bir tikə çörək kəsək. Düzü, mən heç həmin yeməkxanada olmamışdım. Bala Bəhmənli kəndində yolun kənarında, arxın qırağında olan bu yeməkxananın çox gözəl mənzərəsi vardı. Fikirləşdim ki, yəqin bura camaat o qədər də çox gəlməz. Çünki yerli adamlar ən çox naharlarını evlərində eləyirlər. Amma yeməkxanaya çatanda gördüm ki, yox, fikrimdə yanılmışam və burda çoxlu sayda yaxın dost-tanışlar var.

Deməli, insanlar çörək qazana bilir, pulları var ki, gəlib, kənd yeməkxanasında doyunca yemək yeyirlər. Aydındır ki, burda da Qarabağın ləziz yeməkləri hazırlanır. Dostum Elmin müəllim kababçıya dedi ki, hinduşka çəkərsən. İndi ancaq hinduşkanın mövsümüdür. Süfrə arxasında söhbətimiz çox uzanırdı. Ancaq mən elə bil iynə üstündə oturmuşdum. Vaxt gedir, biz isə Bakıya tələsməliydik. Bunu dostum Elmin də hiss eləyirdi. Dedi ki, bu axşam mənim qonağım olacaqsınız. Evdə təkəm, odun sobasını yandıracam, səhərə qədər iki qardaş oturub o odun sobasının istisində dərdləşərik. Dostuma "çox sağ ol" dedim. Qismət olsa, başqa vaxt sizə gedib, odun sobasının yanında uzun qış gecəsi dərdləşərik, amma indi Bakıya tələsirəm. Bu sözlərdən sonra Elmin ayağa qalxdı və çölə çıxdı. Sonra da dedi ki, bax, gör, buraların nə gözəl mənzərəsi var? Hələ qar yağanda o qədər gözəl olur ki, adam baxmaqla doymaq istəmir. Görürəm tələsirsən, vaxtını çox almaq istəmirəm.

Biz onunla qucaqlaşıb ayrılırıq və üzü Bakıya doğru maşınımız sürətlə hərəkət eləyir. Maşınımız hərəkət eləyir, hər tərəf isə ağappaq qara bürünür. Qarın içi ilə üzü Bakıya getməyin, özü də isti maşın salonunda özgə ləzzəti var. Maşın gedir, arxada isə onun izi qalır. Bu izlər isə bizi yenidən bu yurda, bu torpağa səsləyir. Ətrafa isə qar yağmaqda davam eləyir...

Faiq QİSMƏTOĞLU

Ədalət.- 2012.- 26 yanvar.- S.6.