Şuşalılar “Dolu”nu ayaq üstə alqışlarla qarşıladılar

Aqil Abbas: “Qarabağ uğurunda savaşa da əlimdə avtomat sizinlə birgə gedəcəyəm”

Dağlıq Qarabağın Azərbaycanlı İcması İctimi Birliyi 60 illik yubileyi və "Şöhrət” ordeni alması münasibəti ilə yazıçı, millət vəkili Aqil Abbasla Şuşa ictimaiyyətinin görüşünü təşkil edib. Görüş Şuşa rayon İcra Hakimiyyətinin binasında baş tutub. Rayonun icra başçısı Qarabağ İcmasının sədri Bayram Səfərov Aqil Abbası tədbir iştirakçılarına təqdim edərək onun bir əsgər, yazıçı, millət vəkili və vətəndaş kimi Qarabağın azadlığı üçün gördüyü işlərdən danışıb.

İcra başçısı bəyan edib ki, Azərbaycan Respublikasının prezidenti İlham Əliyevin baş komandalığ altında yaxın vaxtlarda Dağlıq Qarabağ və işğalda olan ətraf rayonlar düşmən əsarətindən azad ediləcək: "Biz bu həqiqətə inanırıq. Aqil Abbasın bütün əsərləri, bütün fəaliyyəti məhz bu həqiqət üzərində qurulub”.

Tədbirdə Aqil Abbasın ssenari müəllifi olduğu "Dolu” filminin yaradıcı heyəti də iştirak edib. Bayram Səfərov filmin ssenari müəllifi və yaradıcı heyətini təqdim edəndən sonra sözü Aqil Abbasa verib. Aqil Abbas hər kəsin Qarabağ uğurunda müharibəyə hazır olduğunu deyərək, yazılan əsərlərin, çəkilən filmlərin məhz bu səpkidə olmasının vacibliyini vurğulayıb: "Cənab prezident İlham Əliyevə minnətdaram ki, məni "Şöhrət” ordeni ilə təltif edib. Həmişə özümü xalqımın ən sıravi üzvü hesab etmişəm. Qarabağ uğurunda savaşa da əlimdə avtomat sizinlə birgə gedəcəyəm. Torpaqlarımızın işğaldan azad olacağına hər an inanmaq düşmən üzərində qələbə qazanacağımız günü yaxınlaşdırır. İndi baxacağınız "Dolu” filmində də bütün kollektivlə birgə insanlarımıza məhz bu inamı aşılamağa çalışmışıq.

Tədbirdə "Dolu” filmi də nümayiş olunub. Şuşalı tamaşaçılar filmi ayaq üstə alqışlarla qarşılayıblar. Tədbirin sonunda Bayram Səfərov həm doğum gününə, həm də yüksək mükafata layiq görüldüyünə görə yubliyara bahalı hədiyyələr verib.

Anar

Ədalət.-2013.- 12 aprel.-S.3.