Biləsuvar rayonu 2012-ci ili də uğurla başa vurdu

94040 nəfərdən çox əhalisi olan Biləsuvar rayonu son zamanlar sözün həqiqi mənasında simasını xeyli dəyişmiş, bir çox uğurlara imza atmışdır. Rayon iqtisadiyyatında çalışan əhalinin sayı 50000 nəfərə çatmışdır. İqtisadiyyatın müxtəlif sahələrində fəaliyyət göstərənlərin 89,5 faizi qeyri-dövlət sektorunda işləyənlərdir. Dövlət idarə və müəssisələrində çalışan 5000 nəfərin də rayonun iqtisadi-siyasi həyatında öz layiqli yeri vardır.

2012-ci ildə rayonda əhalinin gəlirləri 208,6 milyon manat olmuşdur. Müqayisə üçün deyək ki, bu ötən ildəkindən 14 faiz çoxdur. Rayonda inşa edilən böyük və müasir 137 fərdi evin inşası da sakinlərin həyat şəraitinin yaxşılaşmasından xəbər verən amildir.

"Azərbaycan Respublikası Regionlarının 2009-2013-cü illərdə sosial-iqtisadi inkişafı Dövlət Proqramı"na uyğun olaraq ötən il Sahibkarlığa Kömək Milli Fondu tərəfindən Biləsuvarda 39 sahibkara 13 milyon manatdan çox güzəştli kredit verilmişdir. 1009 nəfərin daimi iş yeri ilə təmin olunması da insanların sosial həyatlarının yaxşılaşdırılmasına hesablanmışdır.

Rayon mərkəzində aparılan abadlıq-quruculuq işlərinin miqyası hər gün bir az da çoxalmaqdadır. Biləsuvar şəhərinin mərkəzində 1,7 hektar ərazidə bu gün inşaat işlərinin çox qızğın çağıdır. Burda Heydər Əliyev parkının yenidən qurulması prosesi davam etdirilir. Bu parkda Heydər Əliyev Mərkəzinin, Rayon İcra Hakimiyyətinin, Yeni Azərbaycan Partiyasının Biləsuvar rayon təşkilatının yeni inzibati binalarının tikintisi böyük sürətlə aparılır. Kiçik şəhərcik olacaq bu parkda Heydər Əliyev abidə kompleksi ucaldılacaq. Ətrafdakı fəvvarələr, yaşıllıqlar, müasir işıqlandırma sistemləri bu parka xüsusi bir gözəllik verəcək.

Gözəlliyin sərhədi olmur

Sabah yaradılacaq gözəl bir şəhər, yaraşıqlı bir bağça bugünkündən daha gözəl və yaraşıqlı olacaq. Bu həyatın qanunauyğunluğudur. Son bir neçə ildə Biləsuvar rayonunda, eləcə də rayon mərkəzində aparılan abadlıq-quruculuq işləri həm də illərin izidir. Bu gün şəhər və kəndləri ilə öyünən Biləsuvar sakinləri bu şəraiti, bu gözəlliyi damla-damla yaradıblar.

Sahibəli kişi də rayonun bu günü, sabahı üçün maraqlı olan ağsaqqallardan biridir. Kifayət qədər həyat və iş təcrübəsi olan Sahibəli Mirzəyev Biləsuvar haqqında fəxrlə danışır:

- Yurdumuzun hər gün artan nüfuzu ilə bərabər regionların inkişafı da məni qəlbən sevindirir. Ötən il bizim Biləsuvarda iqtisadiyyatın müxtəlif sahələri üzrə 178,9 milyon manatlıq məhsul istehsal edilmişdir. Abadlıq-quruculuq işlərinə isə xüsusi fikir verilmişdir. "Azərbaycan Respublikası Regionlarının 2009-2013-cü illərdə sosial-iqtisadi inkişafı Dövlət Proqramı"nın tələblərinə çox ciddi əməl olunduğu göz önündədir. Ölkə Prezidentimizin "Biləsuvar rayonunun sosial-iqtisadi inkişafının sürətləndirilməsinə dair əlavə tədbirlər haqqında" 23 iyul 2012-ci il tarixli Sərəncamı ilə 17000 əhalinin yaşadığı 6 yaşayış məntəqəsini birləşdirən, uzunluğu 21 kilometr olan Biləsuvar-Əskərabad-Amankənd-Ovçudərə avtomobil yolunun tikintisi üçün 5,2 milyon manat vəsait ayrılmışdır. Bu vəsait hesabına yüksək keyfiyyətli, asfalt-beton örtüklü yol salındı. Rayonun Bağbanlar, Çinarlı-Aranlı, Ağayrı, Nəsimi, Xırmandalı kəndlərində 9,6 kilometr məsafədə yola asfalt döşənmişdir. Biləsuvar magistral avtomobil yolunda 11 kilometr asfalt yol salınmışdır. Burda iş bu gün də davam etdirilir.

Rayonumuzda tikinti işlərinin sürəti bir an belə azalmamışdır. 2012-ci ildə Biləsuvar şəhər ərazisində Vergi Terminalının inzibati binasının, Bitkilərin Fitosanitar karantin idarəsinin, rayon Baytarlıq müəssisəsinin, bu müəssisənin Yuxarı Ağalı kəndindəki məntəqəsinin, şəhər 2 saylı uşaq bağçasının 40 yerlik binasının, Zəhmətabad kəndində 50 yerlik körpələr evinin təmir işləri yekunlaşmışdır. Rayon Polis şöbəsinin Zəhmətabaddakı polis bölməsinin inzibati binasında, Biləsuvar şəhər 1 saylı uşaq bağçasında, Xırmandalı kənd 1 saylı orta məktəb binasında, Zəhmətabad kənd orta məktəbinin idman zalında aparılan təmir işləri də başa çatmışdır.

Şəhərimizin H.Əliyev, M.İbrahimov, Nizami küçələrində hasarların tikintisi, dekorativ ağ lay daşlarla üzlənməsi, piyada yolunun üzlük tava daşlarla döşənməsi işləri davam etdirilir. Bu işlərdən sonra burda quraşdırılan müasir işıqlandırma sistemləri Biləsuvar şəhərinə ayrı bir gözəllik verəcək.

Kənd yerləırində yaşayan sakinlərin sosial şəraitinin yaxşılaşdırılmasına hesablanmış "Modul" tipli su durulducu qurğuların sayını xeyli artırmışıq. 2012-ci ildə daha 5 kənddə su durulducu qurğu inşa etmişik.

Camaatımızın digər qayğılarını da həll etməyə çalışmışıq. Biləsuvar şəhər ərazisində bütün tələblərə cavab verən 500 yerlik yeni şadlıq sarayı inşa etmişik. Ağalı kəndində isə xeyir-şər evinin tikintisi davam etdirilir. Xırmandalı kəndində 2 hektar ərazidə kənd təsərrüfatı məhsulları yetişdiriləcək istixananın, Biləsuvar dolama yolunun başlanğıcında soyuducu anbar kompleksinin inşası davam etdirilir. Deyəsən axı xeyli şey danışa bildim.

Rayon ağsaqqalı Sahibəli Mirzəyev rayondakı tikinti-quruculuq işlərindən əslində kifayət qədər məlumat vermiş oldu.

(ardı gələn sayımızda)

Səxavət Məmmədli

Ədalət.- 2013.- 12 fevral.- S.7.