“Onda özümə yazığım gəldi”
“Haqqın “verilməsinin” tərəfində
olsam da, yalnız “alınmaqla” mümkün olduğunu
düşünürəm”
Tanıtım:
Sadıqov Şəmil Kamil oğlu 1978-ci ildə
Naxçıvan Muxtar Respublikası Babək rayonunun Nehrəm
kəndində anadan olmuşdur. Orta təhsili doğma kəndində
alan Şəmil Sadiq BDU-nun filologiya fakültəsini fərqlənmə
diplomu ilə bitirmişdir. AMEA-nın ədəbiyyat
institutunun aspirantı olmuş, Hüseyn Cavid
yaradıcılığında qəhrəman konsepsiyası
adlı dissertasiya işini müdafiə edərək filologiya
üzrə fəlsəfə doktoru elmi dərəcəsini
almışdır.
Müxtəlif
zamanlarda Bakı şəhər 20 nömrəli məktəbdə
müəllim, "Vətən övladı” qəzetində
redaktor, AMEA-nın ədəbiyyat institutunda kiçik elmi
işçi, BPKİYİ-da baş müəllim vəzifələrində
çalışmışdır. Hazırda BPKİYİ-nun
dosenti olmaqla yanaşı, Hədəf Kursları MMC-nin
baş direktoru vəzifəsində çalışır.
2005-ci
ildə "İlin ən yaxşı müəllimi”
müsabiqəsinin qalibi olmuşdur.
Metodik
vəsait, dərs vəsaiti, elmi monoqrafiya və 2 bədii
kitab olmaqla, ümumilikdə, 20 kitabın, 30-dan çox elmi və
elmi-publisistik məqalənin müəllifidir.
"Ədəbiyyat”
metodiki vəsaiti 2010-cu ildə və "Azərbaycan dili” dərs
vəsaiti 2011-ci ildə YYSQ tərəfindən "İlin ən
yaxşı dərs vəsaiti” nominasiyası ilə təltif
edilmişdir.
Bədii yaradıcılığına hələ məktəb illərində başlamış müəllifin ilk mətbu əsəri "Yeni Azərbaycan” qəzetində çap edilmişdir. İlk lirik və satirik şeirlər toplusu "Qəlbin fəryadı” kitabı 2003-cü ildə nəşr edilmişdir. 2005-ci ildə çap olunan "Qana qan qarışdı” kitabında həm lirik, həm publisistik, həm də dram əsərlər yer almışdır. "Dədə Qorqud” dastanının motivləri əsasında yazılmış "Qana qan qarışdı” dramı 2010-cu ildə C.Məmmədquluzadə adına Naxçıvan dram teatrında səhnəyə qoyulmuşdur.
Ailəlidir, iki qızı, bir oğlu var.
- Son dövrlər yazmağa meyl
kütləvi sürətdə çoxalıb, kimi
danışdırırsan, deyir ki, yazaram, bir naşir kimi bilməmiş
olmassınız bunun səbəbi nədi?
- Məncə,
bundan qorxmaq lazım deyil. Çünki hər
hansı bir sahə dəbdədirsə, deməli o sahədə
də olmaq istəyənlərin sayı
çoxalmalıdır. Necə ki bir
zamanlar müğənnilərin, aktyorların sayı
çoxalmağa doğru gedirdisə (təəssüflər
olsun ki, hələ də davam edir) və hər kəs
müğənni olmaq arzusunda idisə, indi də
yazıçı, şair arzusunda olmaq istəyənlərin
sayının çoxalması pis hal deyil. Əgər
belədirsə... Biri var beş nəfərdən
birini seçəsən, biri də var, yüz nəfərədən
birini. Əlbəttə ki, yüz nəfərdən
seçilən daha istedadlıdır. Azərbaycan
çağdaş ədəbiyyatının,
çağdaş oxucunun intibahının
qığılcımlarını görürəm. Həmişəki kimi zaman hər şeyin ən
yaxşı loğmanı və nizamlayıcısıdır.
Ələkdən keçirərək kimlərin
diplomunu verəcəksə, onlar da yazıçı və
şair kimi yaşayacaqlar. Sadəcə
qorxulu tərəf odur ki, yeni yaranmaqda olan bu
yazıçı və şair ordusunu düzgün istiqamətləndirmək
üçün ədəbi cərəyənlar və ya məktəblər
qənaətbəxş deyil. Çünki
indi əvvəlki kimi nə ədəbi məclislər var, nə
də ədəbi rəqabət. Yazıçılar
birliyi isə bu sahədə bugünkü ədəbi
mühitdən çox geridə qalır. Nə
düzgün müzakirələr təşkil edilir, nə ədəbi
gecələr olur ki, yetişməkdə olan gənc nəsil
sözü düzgün cilovlamağın yolların öyrənsinlər.
Bəzi saytların və bəzi QHT-lərin bu
sahədə cəhdi sevindiricidir. Bir
neçə ədəbi mükafatdan başqa əksəriyyəti
öz nüfuzunu itirib və heç bir reytinqə sahib deyillər.
Yazıçılar birliyi isə sanki gəncliyin
arxasınca baxa-baxa qalıb. Nə edəcəyini,
necə edəcəyini belə bilmir. Məncə
ab-ahava dəyişməli, düzgün istiqamət
üçün qələm əhlinə demokratik şərait
yaradılmalıdır. Özbaşına
qalarsa, şou-biznesdəki kimi mahiyyətini itirə və
böyük idiaların üstündən xətt çəkə
bilər.
- Necə oldu ki, yazıçı
oldunuz, yazmasanız Azərbaycan ədəbiyyatında nə dəyişəcək?
- İkinci hissədən başlayım. Məncə mən
yazmasam, əlbəttə ki, Azərbaycan ədəbiyyatında
heç nə dəyişməyəcək. Dəyişsə, dəyişsə mənim
yaradıcılığımda dəyişəcək. Bu da sadəcə şəxsən mənə təsir
edər. Bir də ilk oxucum olan həyat
yoldaşıma. Çünki bir az
başı dincələr. (J) Necə yazıçı
olmağım haqqında indiyə qədər dərindən
düşünməmişəm. Amma lap uşaqlıqdan nəsə
cızma-qara edirdim. İlk şeirimi də 20
yanvar faciəsinə həsr etmişdim 1990-cı ildə.
Məktəb illərində də elə
bilirdim ki, şeir yazıram. Bəlkə də,
filologiya fakültəsinə qəbul olmağım
yaradıcılığımda bir təkan oldu. Rəhmətlik müəllimim Zülfəli Zülfəliyevdən
əruz elmini öyrənərkən vəznin dərinliklərini
mənimsəmək üçün hərdən şeir
yazmağımı tapşırırdı. Və mən
onda hiss etdim ki, şeiri necə yazarlar. Elmi
işim Hüseyn Cavid yaradıcılığı olduğu
üçün bu gün də müəyyən mənada
onun fəlsəfi ideyalarının təsirindən
çıxa bilmirəm. Yaradıcılığımda
ən önəmli hadisə "Qana qan qarışdı”
dram əsərimin Naxçıvan Dram Teatrında səhnələşdirilməsi
oldu. Bu bir təsadüf idi. Sanki mənə stimul vermək üçün
fövqəl-təbii bir varlığın yardımı idi.
Çünki ilk şeirlər kitabım
2003-cü ildə nəşr edilsə də, sonradan müəllimliyə
yönəldiyim üçün yavaş-yavaş bədii
yaradıcılıqdan uzaqlaşırdım. Amma o əsərin
tamaşaya qoyulacağı təklifini eşidəndə bir az da ruhlandım. Nəsrə isə
dostum Müşfiq XAN-nın ciddi təklifindən sonra
başladım. Ədəbi müzakirələrimizin
birində dedi ki, bəlkə, qələmlərimizi
yarışdıraq. Açığı yaman
qıcıqlandırdı məni. Əvvəllər
bir neçə felyoton və hekayə yazmağıma
baxmayaraq XAN-la birgə yazdığım "Ümidlərin
izi ilə” romanı nəsrə müraciət etməyim
üçün sanki yeni nəfəs oldu. Nəsrdə ilk böyük uğurum məncə elə
bu əsərlə oldu. Yaxşı
alındığını söylədilər dostlar.
Bütün yazılarımda ictimai fikir, vətənpərvərlik,
mənəviyyat öndə olduğu üçün deyə
bilərəm ki, mənim yazdıqlarımın ədəbiyyatımıza
ziyanı yoxdur. Xeyrini isə oxucular müəyyənləşdirə
bilər.
- Sizin haqqınızda məlumatlarla tanış olanda həyat fəlsəfənizin
bu misra üzərində qurulduğunu oxuduq: "Haqq dilədim
vermədilər, Sadiqə mən susma dedim, varsa əgər
haqq onu mən diz çökərək yad edərəm”. Siz haqq deyəndə nəyi nəzərdə
tutursuz?
- Mən
birmənalı səslənən ilahi ədalətin
olmağına şübhə edirəm. Çünki
bizim tanıdığımız cəmiyyətin
yaradılışından bu günə bütün
insanları məhz ilahi ədalət
düşündürür. Mən də
düşünmədən dura bilmirım. Bir şeirim
var: "Düşünməz başlarda yaman gözüm
var”. Çünki insanlıq daima haqqa-ədalətə
möhtacdır. Bütün dinlərdə
də bu məsələ açıqdır. Xristianlar İsa peyğəmbərin qayıdaraq ədaləti
bərpa edəcəyini, Müsəlmanlar, daha doğrusu,
şiələr 12-ci imamın zühur edib ədaləti bərpa
edəcəyini gözləyir. Hətta
hind fəlsəfəsində də bu ideya öz əksini
tapır. Adəmə edilən
haqsızlıqdan bu günə hər kəs haqq axtarışındadır.
Məncə hər bir varlığın bu dünyada
haqq axtarmağa və tapmağa haqqı var. O haqq isə
yaşam tərzimizdə qarşımıza çıxan
bütün nemətlərin ədalətsiz
paylanıb-paylanmamasıdır. Hərdən
düşünürəm ki, Yaradan bu qədər adildirsə,
niyə yeni doğulan bir körpənin hər hansı əzasını
qüsurlu, əngəlli yaradıb onu bədbəxt edir?
Burda kimsə deyə bilər ki, onun ata və ya
anasına dərs olsun deyə edilib, onlar imtahana çəkilir
və s. Bax mən bu zaman o ilahi ədalətin
varlığına şübhə edirəm. Axı bu bir yaradılmışın haqqının
əlindən alınmasıdır. Hə,
burda mən haqqın olmasına şübhə edəndə
məhz Tanrının varlığına şübhə kimi
başa düşülməməlidir. Sözsüz
ki, bütün yaradılışların bir yaradanı,
Tanrısı var. Amma bu yaradanın bütün
yaratdıqlarına ədalətli şəkildə haqq verib
vermədiyi insanda şübhə doğurur. Ona görə də mütləq haqq və ədalət
ya yoxdur, ya da hələ mən dərk etmirəm.
- Sonuncu dəfə
hansı haqsız hadisə ilə
qarşılaşmısınız.
- Mənə
görə bu haqsızlıq məsələsi iki
cürdür: biri ilahi haqsızlıq, biri isə məişətdəki
haqsızlıq. İlahi haqq axtarışında olan bir adam üçün məişətdəki
haqsızlıqlar o qədər də önəmli deyil. Haqqın "verilməsinin” tərəfində olsam
da, yalnız "alınmaqla” mümkün olduğunu
düşünürəm.
- Azərbaycanda yazmağın
avantajı və dezavantajı nədən ibarətdir?
-Açığı
mən nə avantaj və ya dezavantaj üçün
yazmıram. Heç Yazıçılar Birliyinə
üzv olmaq üçün ərizə də verməmişəm.
Sadəcə, məni narahat edən mətləbləri
ətrafımla, oxucularla bölüşürəm. Bir dəfə bir yol polisi məni saxladı. Süruculuk vəsiqəm də üstümdə
deyildi. Protokol tərtib edəcəyini və
maşını cərimə meydançasına
aparacağını dedi. Çünki vəsiqəmin
olduğuna inanmırdı. Dözə bilmədim dedim
ki, məni heç tanımadın, heç televiziyada görməmisən,
heç dərsliklərimdə şəklimlə
rastlaşmamısan? Dedi yox. Dedim daha sənə sözüm
yoxdur. Nə edirsən et. İndi
burda bir müğənni olsaydı, yaxşı
tanıyardın. İlin ən
yaxşı müəllimi müsabiqəsinin qalibini, dərs
vəsaitlərinin müəllifini, şeirlərin,
romanların müəllifini tanımaq nəyinə
lazımdır. Dorğrudan daxilən
incidim və o zaman özümə yazığım da gəldi.
Bu dezavantaj ola bilər. Amma
bu yaxınlarda Ukraynadakı səfirimiz Eynulla Mədətlidən,
Tağı Əhmədovdan "Ümidlərin izi ilə”
romanına görə aldığım təşəkkür
məktubunu avantaj hesab etmək olar. Pafoslu görünməsin,
məncə, bir iş millətin xeyrinə və maariflənməsinə
xidmət edirsə, elə bu mənim üçün
avantajdır.
- Naşirsiz, qazancınız kitab
satmaqdan çıxır, kitab yazanlar isə alıcı
qıtlığından şikayətlənir, bəs belə
şəraitdə necə qazanırsız?
- J Mən,
adətən, vurğulayıram, mən yazıçı,
şair olmaqdan öncə müəllim-pedaqoqam. Cəmi beş bədii kitabım olsa da, 20-dən
çox dərs vəsaitinin və metodik vəsaitin müəllifiyəm.
Demək olar ki, gəlirimin əsas hissəsi
sizin də qeyd etdiyiniz kimi kitablarımdan – abituriyentlər
üçün yazdığım vəsaitlərdən gəlir.
Çünki bu kitablar onların
ehtiyacını ödəyir. Mən və həmmüəlliflər
o kitabların üstündə hər il
işləyib təkmilləşdiririk. Əminliklə
deyə bilərəm ki, abituriyentlər üçün
yazdığımız Azərbaycan dili və Ədəbiyyat
dərs vəsaitləri və test bankları Azərbaycanda
satış rekordu vurur və bazarda bu sahədə rəqib
tanımır.
- Özünüzün ən
çox bəyəndiyiniz əsəriniz hansıdır?
-
Elmi-metodik əsərlərimdən ən çox bəyəndiyim
"Hüseyn Cavid yaradılıcılığında qəhrəman
konsepsiyeası” mononoqrafiyam və abituriyentlər
üçün hazrıladığım Ədəbiyyat
metodik vəsaitim. Bədi əsərlərimdən
də yenicə bitirdiyim "OdƏrlər” romanım.
- Bəs oxucularınızın ən
çox bəyəndiyi əsəriniz hansıdır sizcə?
- Oxucular
hələ ki, Muşfiq XANla birgə yazdığımız
"Ümidlərin izi ilə” romanını bəyənir,
deyəsən. Bu əsərdə Aytəkinin
gündəliyini mən, məxfi şöbənin mayoru
Qüdrətovun əməliyyatlarını və Ramilin
yaşantılarını isə Müşfiq XAN yazıb.
Xocalı faciəsi mövzusunda kriminal-detektiv
romandır.
- Mayın 4-də kitab bayramı
keçiriləcək. Həmin gun Sizin "Qana qan
qarışdı” kitabınızın təqdimat mərasimidir,
bu əsəri hansı zərurətdən yazdız?
- Bu kitab
iki pyesdən ("Qana qan qarışdı”, "Axı mən
də vətəndaşıyam”) və hekayə, felyeton,
köşə yazılarımdan ibarətdir. Adından
da göründüyü kimi, kitabdakı birinci pyes mənim
üçün önəmlidir. Əsər
"Dədər Qorqud” dastanlarının motivləri əsasında
yazılıb. 2003-cü ildə 20 nömrəli
məktəbdə işləyəndə bir səhnəcik
kimi yazmışdım. Sonra 2005-ci ildə
üstündə yenidən işlədim və 2010-cu ildə
səhnələşdirildi.
Məni daha çox narahat edən aramızda
dayısı başqa millətdən, xüsusən də ermənilərdən
olan insanlardır. Düzdür, özümü heç bir
zaman qatı millətçi hesab etməmişəm və
xislətimdə də bu yoxdur. Amma bir
şeyə inanıram ki, qan qarışıqlığı
daima türkün bəlası olub. Elə
əsər də bu mövzudadır. Xatırlayırsınıza,
Təpəgözün də anası yad qızı idi.
Dədəmiz bunu bir rəmz olaraq bizə miras
qoymuşdur. Axı Təpəgöz
türk elinin qənimi kəsildi. Məncə
Qorqud Ata onun zatındakı problemi qabartmağa
çalışmış və türk kişilərini bu əməllərdən
yayınmağa çağırmışdır. Qan saflığı mənə görə çox
önəmlidir. Qarışıqlıq
heç nədə xoş görünmədiyi kimi qanda da
özünü göstərir. Düşmənimiz
erməni isə həmişə türklə qohum olmağa
meyilli olub. Qızlarını bizim
kişilərin yatağına salmaqla, bundan həmişə
yararlanıblar. Bu variantdan qədim
çinlilərin də istifadə etdiyini bilirik. Murad
Adjı "Qıpçaq çölünün
yovşanı” əsərində geniş izah edib bu məsələni.
Atilla da bunun qurbanı oldu. O
böyüklükdə Osmanlı sultanlığını da
dağıdan anası başqa millət olan sultanlar oldu. Analarının və ya həyat
yoldaşlarının səyi nəticəsində.
Bu məsələ
həmişə düşündürüb məni. Və
son əsərim olan "OdƏrlər” romanında da bu
ideyanı geniş işləmişəm. Qarışıq
qan heç vaxt şəffaf ola bilməz. Bulanıqlıq isə
heç də xoş görüntü deyil.
- "Hədəf”
kurslarının həmtəsisçisisiz, gələcəyimizi
quracaq insanlar gözləriniz qarşısından keçir.
Necə düşünürsüz, qura biləcəklər?
Mənim üçün orta məktəbin ilk işinin adam yetişdirmək olmasıdır. Elmi, peşəni isə həmişə öyrənmək olar. Biz orta məktəbdə şagirdlərə bunları əldə etməyin yollarını, yaşamağı bacarmağı öyrətməliyik. "Alim yetişdirmək asandır, nəinki adam yetişdirmək” adlı bir məqaləm var. Orda qeyd etmişəm biz balalarımıza insanlığı, sevgini, düzgünlüyü, qabiliyyəti, bacarığı öyrədə və aşılaya bilsək, o nəinki Azərbaycana, o cümlədən də bəşəriyyətə yararlı bir adam ola bilərlər. Azərbaycan dili və ədəbiyyat müəllimi kimi mən sinifdə sintaktik əlaqənin növlərini, "kitab” sözünü "b” və "p” ilə yazmaq bacarığını, əruz vəzninin prinsiplərini öyrətməkdənsə, mədəni və rəvan danışmağı, fikir yürütməyi, başa sala və başa düşə bilməyi, düşündürə bilməyi, dərk edə bilməyi, inandıra bilməyi, əlində olanları istifadə etmək bacarığını öyrətməyin daha önəmli hesab edirəm. Xarici universitetlərin qəbul proqramına baxsaq, görərik ki, universitetlər qəbulda mükəmməl dil bilgisi və məntiq tələb edirlər. Prinsip odur ki, bir insanın anlama qabiliyyəti varsa, məntiqi təfəkkürü düzgün çalışırsa, deməli, bunu istənilən ixtisasa və peşəyə yönləndirmək olar. Düzdür, Hədəf Kurslarının işi abituriyentlərə TQDK-nın tələb etdiyi biliyi vermək və ya möhkəmləndirməkdir. Amma mən Kurikulum üzrə milli məsləhətçi olduğuma görə bu sahəyə daha meyilliyəm. Elə buna görə də, təhsil də sosial fəaliyyət və şəxsiyyət yönümlü iş prinsipinə söykənirik. Mən optimistəm. Çünki gəncliyimiz nə istədiyini bilmək yolunda hər gün bir addım irəliləyir. Keçirdiyimiz tədbirlərdə, kurs daxilindəkə ailə ortamında onların istedadına bəzən heyran qalıram. Elə şagirdlərimiz olur ki, bir tənqidçi kimi çağdaş ədəbiyyatı izləyir, oxuyur, hətta bizə də tövsiyyə edir. Elə şagirdlərimiz olur ki, kompyuter texnologiyasını az qala mütəxəssislər qədər bilir və yararlanır. Elə şagirdlərimiz olur ki, müəyyən QHT-lərdə fəaliyyət göstərir və bizdən müəyyən yardım istəyir, ödənişsiz təhsil almaq üçün imkansız ailələrdən olan uşaqları təklif edir, uşaq evlərinə gedəndə nəşriyyatdan kitab istəyir və s. İstənilən sahədə düzgün yönləndirmə olarsa, onda mükəmməl uğur əldə olunacağına əminəm. Məncə onlar gələcəyimizi heç də bizdən pis qurmayacaqlar. Buna imkanları və potensialları var. Mən ümidliyəm.
Ədalət.-2013.-4 may.-S.14.