"Cavid Qurbanovun işıqlı keçmişi"

və yaxud "Gündəm" qəzetinin baş redaktoruna Açıq məktub

Ramiq Muxtar şair-dramaturq, prezident təqaüdçüsü

Hörmətli baş redaktor!

Sizin rəhbərlik etdiyiniz "Gündəm" qəzetinin 31 avqust 2013-cü il nömrəsində dərc olunan "Cavid Qurbanovun qaranlıq keçmişi" adlı yalan, böhtanla dolu, qərəzli yazınızı oxuyandan sonra bu qənaətə gəldim ki, müstəqil Azərbaycanımızda elə adamlar, elə qruplar var ki, onlar günü-gündən çiçəklənən, dünya dövlətləri arasında böyük nüfuz qazanan, iqtisadi cəhətdən Qafqaz regionunda at oynadan, xalqın rifahı naminə yeni-yeni planlar, layihələr hazırlayan, bütün işləri göz qabağında olan Azərbaycanımızın əsl qurucu, yaradıcı adamlarının gördüyü işləri gözləri götürmür və həm də həzm edə bilmirlər.

Belə adamlar bütün əsrlər boyu olmuş və olmaqdadır. Bu adamların xisləti insanlara qara yaxma, işlərinə kölgə salma, ancaq riyakarlıqla məşğul olan, gözləri kor, qulaqları kar olan bir ovuc varlıqlardır. Onlar göydə günəşi də qaranlıq, Ayı da nursuz görürlər. Bu adamlar kimlərdir? Vaxtilə kreslo görmüş, sonralar murdar əməllərinə görə işdən qovulmuş, xalqın gözündə nüfuzunu itirmiş, ancaq özünü düşünən, var-dövlət naminə mənliyini satan, Vətən və torpaq təəssübündən çox-çox uzaq olan nankorlardır.

Qəzetinizin əməkdaşı Elçin Əmirov yazır ki, Xaçmazda polis rəisi Şəhriyar Şəmşirlinin rayonda əxlaqsızlıq yuvasına dayaq olması haqda məlumat araşdırıldıqdan sonra, aydın olmuşdur ki, bu məlumatı internetə yerləşdirən adamın özü dələduz və məhkum olunmuş şəxsdir. Ortaya belə bir sual çıxır: Ay peşəkarlıqdan uzaq olan məqalə müəllifi, niyə işin, faktın dərinliyinə getmədiyin halda, dövlətin qanunlarının keşiyində duran polis rəisinin adını qəzetinizdə hallandırırsan (özü də, adı respublikamızda qurucu, işgüzar kimi tanınan, ulu öndərimizin sədaqətli silahdaşı Şəmsəddin Xanbabayevin rəhbərlik etdiyi bölgədə)?

Şəhriyar Şəmşirli böyük ocağın oğludur. Onun babası Dədə Şəmşir hələ ulu öndərimiz Heydər Əliyev ikinci "Qızıl ulduz" alanda 87 yaşlı ustad belə gözəl sətirlərlə rəhbərimizi vəsf etmişdi:

Azərbaycanımın igid oğluna

Qızıl ulduz qoşa-qoşa yaraşır.

Alqış kamalına, alqış ağlına

Zərli tac kamallı başa yaraşır.

Ataların gözəl bir məsəli var: Yalan ayaq tutar, ancaq yeriməz. Müəllif yazısında Cavid Qurbanovun Maştağa qəsəbəsinə yol çəkməsini elə təqdim edir ki, guya o qəsəbədə ancaq bir nəfər yaşayırmış və həmin qadın da eks prezident Ayaz Mütəllibovun qaynanasıymış. Doğrudan çox gülünc görünür. O qəsəbədə neçə min insan yaşayır. Bu gülməli son lətifədir. Cavid Qurbanov Qubaya gözəl, müasir, yaraşıqlı yol çəkibdir. Onu da belə hallandırmaq olar ki, Cavid Qurbanovun Mircəfər Bağırova olan sevgisindən onun doğulduğu rayona yol çəkibdir! Qəribə anlayışdır.

Müxbir yazır ki, Cavid Qurbanov ulu öndərimiz Heydər Əliyevə sui-qəsd hazırlayan qruplarla yaxınlıq edib, planlar cızırmışlar. Bu, Cavid Qurbanov barəsində ağ yalandır! Heç bir kəs bu böhtana, yalana inanmaz. Çünki mən prezident təqaüdçüsü, Gürcüstan respublikasının ali "Şərəf" ordeninə layiq görülən, 1980-ci ildən AYB-nin üzvü, YAP-ın yaradıcılarından olan on nəfərdən biri kimi, 1987-ci ildən Ulu Öndərimiz Siyasi Bürodan uzaqlaşdırılanda Kremllə ilk döyüşə atılan mən, Ramiq Muxtar olmuşam.

Bu haqda gözəl şairimiz İlyas Tapdıq "Azərbaycan" qəzetinin birinci və ikinci səhifəsində Heydər Əliyevlə mənim qurultay fasiləsində söhbətimizi geniş dərc etmişdir. Ulu öndər anamla həm orta məktəbdə, həm də Pedoqoji texnikumda birgə oxumuşdular. O venetka hazırda H.Əliyev Fondunda nümayiş etdirilir. O şəxsiyyət məni özünə ən sədaqətli dost, silahdaş bilirdi. Bunun şahidləri olan Prezident Aparatının əməkdaşları Fatma xanım Abdullazadə ilə köməkçisi Tariyel Ağayev yaxşı bilirlər. Heydər Əliyevə kim dost olubsa, mən onu özümə dost bilmişəm. Kim ona qarşı çörəyi dizində olubsa, onlara qarşı nifrətim böyük olubdur.

1992-ci il dekabr ayının 30-da Gənc Tamaşaçılar Teatrında mənim əlli illik yubileyimdə mənə yerdən Heydər Əliyevlə bağlı verilən suala belə cavab verdim:

- O, böyük şəxsiyyətdir, dünya arenasında xüsusi çəkisi var, Allah mənim ömrümdən kəsib, ona versin ki, bəlkə gəlib Azərbaycanı bu bəladan qurtara! (həmin kaset evdə saxlanır)

Sonra mən Naxçıvana Heydər Əliyevin görüşünə gedəndə o kaseti Heydər Əliyevin şəxsən özünə təqdim etdim. Düzdür, mənim bu cavabım o vaxt iqtidarda olan Xalq Cəbhəsinin nümayəndələrinin xoşuna gəlmədi.

Lakin mən ona qarşı sevgimi gizlədə bilməzdim. Hələ 1992-ci ildə mənim xalam oğlu Əli Nağıyev, rəhmətlik Fərəməz Maqsudov YAP-ın layihəsini hazırlayanda biz, yəni Ziya Bünyadov, Fikrət İsmayılov, Səriyyə Abutalıbova, Səlimə xanım, Sona Vəliyeva, Eldar Sabiroğlu, Qafar Əliyev, Ağabəy Əsgərov, Əhliman Tağıyev və mən düşünmürdük ki, Heydər Əliyev sonradan prezident seçiləcək və biz onun ətrafında toplaşacağıq. Ölkədə ağır vəziyyət idi. Hər dəqiqə Azərbaycanın ziyanına işləyirdi. Heydər Əliyevin ağlına, zəkasına xalqın böyük ehtiyacı var idi.

Bəli, YAP yarandı. "Əlincə" xeyriyyə cəmiyyəti YAP-ı doğdu və bütün ümidlər Naxçıvana dikildi. Tanrının bu millətə yazığı gəldi, H.Ə.Əliyevə qüvvət, güc verdi və bu ağır missiyanın öhdəsindən gəlmək üçün yeni üfüqlər açdı.

Heydər Əliyevin Bakıya gəlişindən bircə gün sonra bizim ailənin ən yaxın adamları Nazim Nağıyev (polis rəisi), bəstəkar Nəriman Məmmədov, şair dostum Nəriman Həsənzadə, Dədə Şəmşirin oğlu Qəmbər Qurbanov, Ənvər Əsgərov (Ziyafət Əsgərovun qardaşı), mənim bacanağım mərhum İlyas Hüseynov bizə toplaşdıq, ilk badəni ulu öndərimizin sağlığına içdik. Həmin qonaqlıqda Qəmbər müəllimin söylədiyi bu sözlər yaddaşımda əbədi qaldı: "Bir il yubandıq. Xalq Cəbhəsi gələn kimi gərək kişini tez dəvət edərdik, onda bu qədər torpaqlarımızı itirməzdik".

Hörmətli redaktor!

Şəxsən mən, Ramiq Muxtar Cavid Qurbanovla ailəvi dostuq. Bunun iyirmi beş illik tarixi var. Özü də bizim dostluğumuz "görək dostluğu", çörək dostluğu deyil, ürək dostluğudur. Əgər mənimlə dostluq edən bir şəxs H.Ə.Əliyevə sui-qəsd hazırlayıbsa, deməli mən də qrupun üzvü olmuşam. Cavid Qurbanovun atasını ispalkom edən, onun babası Aşıq Şəmşirin anadan olmasının 110 illiyinə sərəncam verən Ulu Öndərimizin bu ailəyə xüsusi hörməti vardı.

Mən son sözümü bu sətirlərlə bitirmək istəyirəm: Bu günlərdə Aşıq Şəmşir Mədəniyyət Mərkəzində prezident seçkiləri ilə əlaqədar olaraq böyük yığıncaq keçirildi.

Həmin yığıncaqda bütün ziyalılar bir səslə bildirdilər ki, xalqın bir namizədi vardır, o da İlham Əliyevdir.

Həmin tədbirin sonunda Aşıq Şəmşir Mədəniyyət Mərkəzinin rəhbəri Qəmbər Qurbanov iştirakçılara üz tutaraq, seçkilərdən sonra hamını Yevlağa İlham Əliyevin şərəfinə veriləcək ziyafətə dəvət etdi.

Ədalət.-2013.-3 sentyabr.-S.3.