Azərbaycan səfirliklərində 20 Yanvar faciəsi anıldı

Xarici ölkələrdə akkreditasiya olunmuş səfirlik və baş konsulluqlarında 20 Yanvar faciəsinin 23-cü ildönümü münasibətilə anım tədbirləri keçirilib.

Azərbaycanın Qazaxıstanın Aktau şəhərindəki Baş konsulluğu Manqistau vilayətində yaşayan azərbaycanlıların "Dostluq" milli-mədəni cəmiyyəti ilə birgə 20 yanvar şəhidlərinin anım mərasimi keçirib. Konsulluğun mətbuat xidmətindən APA-ya daxil olan məlumata görə, mərasimdə Manqistau vilayətində yaşayan çoxsaylı soydaşlarımızla yanaşı vilayətin tanınmış ziyalıları, müharibə və əmək veteranları, vilayətdə fəaliyyət göstərən digər diasporların nümayəndələri, jurnalistlər iştirak ediblər.

Tədbirdə 20 Yanvar faciəsi ilə bağlı foto stend və kitab sərgisi təşkil olunub.

Azərbaycan Qazaxıstanın Aktau şəhərindəki Baş Konsulluğunun konsulu Elxan Zeynalov çıxış edərək, 20 Yanvar faciəsi barədə, həmçinin Dağlıq Qarabağ münaqişəsi barədə ətraflı məlumat verib.

Azərbaycanın Serbiyadakı səfirliyində təşkil olunmuş mərasimdə isə yerli ictimaiyyətin nümayəndələri, Serbiya parlamentində fəaliyyət göstərən Azərbaycanla dostluq qrupunun üzvləri, Belqraddakı Azərbaycan Mədəniyyət Mərkəzinin və Serbiya-Azərbaycan ticarət-iqtisadi Palatasının üzvləri, Serbiyada yaşayan Azərbaycan icmasının üzvləri və təhsil alan azərbaycanlı tələbələr, KİV, həmçinin Belqrad şəhərinin müsəlman icmasının nümayəndələri iştirak ediblər.

Tədbirdə çıxış edən səfir Eldar Həsənov 20 yanvar faciəsi zamanı Sovet qoşunları tərəfindən törədilmiş vəhşilikləri xatırladıb, müstəqillik yolunda şəhid olan qəhrəmanların xatirəsinin xalqımızın yaddaşında əbədi yaşayacağını diqqətə çatdırıb. Səfir faciə zamanı 130-dan artıq insanın qətlə yetirildiyi və 700-dən artıq insanın müxtəlif dərəcəli bədən xəsarətləri aldığını qeyd edib.

Sonra mərasim iştirakçıları "Azadlığa aparan yol" sənədli filminə baxıblar.

Azərbaycanın Küveyt dövlətindəki səfirliyi də diaspora üzvlərinin, yerli hökumətin nümayəndələrinin və diplomatların iştirak etdiyi anım tədbiri keçirib. Mərasimdə çıxış edən səfir Tural Rzayev keçmiş sovet ordusunun Bakıda və ölkəmizin bir sıra digər şəhərlərində törətdiyi vəhşiliklərdən danışmış, bu qanlı faciədə, başda Mixail Qorbaçov olmaqla, əli olanların insan hüquqları, uşaq hüquqları, vətəndaş hüquqlarına riayət olunmasını tələb edən bütün beynəlxalq hüquq normalarına zidd hərəkət etməsi barədə ətraflı məlumat verib.

Həmçinin səfirliyin təşəbbüsü və yardımı ilə ərəb dilində hazırlanıb, çoxaldılmış "20 Yanvar" fotoalbomu və faciə ilə bağlı sənədli filmin ərəb dilində CD variantı tədbir iştirakçılarına təqdim olunub.

Ədalət.-2013.-22 yanvar.-S.5.