YASA
GETMİŞDİM...
(Düşüncələr)
Dövrü
mətbuatın gündəmə gətirdiyi qədim adət-ənənələr,
ələlxüsus toy-yas mərasimlərinin keçirilməsi,
daha doğrusu, necə təşkili haqqında yazılar,
müxtəlif düşüncələr rayon yazarı kimi məni
də bu mövzuya əl uzatmağa sövq elədi. Necə
olsa, zəngin həyat təcrübəm, gördüyüm həqiqətlər
ortadadı.
Komsomol
toyları, yaxın dostların, qohumların 50-60 nəfərlik
şənlik, çal-çağır məclislərini
sevinclə, şadyanalıqla təşkil eləmək,
subaylığın daşını atan gənclərə
xeyir-dua vermək lazımdır. Bəs yas mərasimləri
neçə gün və hansı səviyyədə
olmalıdır? Bax, mənim niyyətim bu istiqamətə
doğru, bilgilərimi ortaya qoymaqdı.
"Ölüm
haqdı, qaçmaq olmaz əmrdən" söyləyib
Aşıq Alı... Əslində labüd və
qaçılmaz həyat gerçəkliyi - xöşbəxt
ölüm hamınındı. Ağlı başında olan
hər kəs sinəsinə döyüb deyə bilməz: mən
əbədi, dünya durduqca yaşayacam. Əgər belədirsə,
niyə yas mərasimlərinə gah sağa, gah sola doğru
yön veririk? Qədim bir adəti saxtalaşdırıb dələduz,
fırıldaqçı, millətin başına torba tikən,
bəsit düşüncəli, karyerasını göylərə
qaldıran savadsız mollacıqların ixtiyarına niyə
veririk? Saqqal buraxıb, yaşıl əba geyən,
başına fəs qoyan, özünü Allah yolunun təqvaçısı
kimi təqdim edən mollacıqlar bizim ölənimiz
üçün vay-şivənimizi, kədərimizi hiss edib,
daha çox qazanc əldə etsinlər deyə
ağlımızı alırlar əlimizdən, bəhsəbəhslik
xəstəliyimizi şiddətləndirməklə yas təziyyələrinin
mahiyyətini öz bildikləri səmtə yönəldirlər.
3-4
il bundan irəli hər yanda 3 gündən sonra çadır
yığışdırılsın-kampaniyasına
başlanıldı. Rayonun icra başçısı dəfələrlə
barmaq silkələdi, tapşırıq verdi yerli nümayəndələrinə:
yas 3 günlük bəsdir. O müddət kifayət eləyir
qohum-qonşuya gəlib təziyyədə iştirak eləsin,
ölənə rəhmət oxusun! Çəkinib eləməyin,
4-cü gün çadır qalsa, orda oturan molla haqqında xəbər
verin polisə. O, polis rəisinə də ucadan dedi: qorxma
yazı-pozudan, gətir həyasız mollanı, at kepezeye, mən
cavab verəcəm...
Başçının
sərt mövqeyi dələduz mollaların əl-ayağını
möhkəmcə bağladı, heç
cınqırlarını çıxara bilmirdilər. Əksinə,
mədhnamə oxuyurdular rayon rəhbərinin ünvanına: -
Qanundu hökumətin sözü. Ağa deyir sür dərəyə,
sən də sür. Haqqın yoxdu böyüyün bir
tapşırığını iki eləyəsən.
Valın
o biri üzünü qoymuşdular ha! Moizələr söyləyib
deyirdilər ki, onsuz da neçə müddət təziyyə
saxlamağın, ehsan verməyin haqq dünyasına
qovuşana nə istisi var, nə soyuğu. Təziyyə,
ehsan, yeyib-içmələr ancaq dirilər
üçündür. Mizan-tərəzi Axirət evindədi,
savabın çox, günahın az, günahın çox,
savabın az, bax, haqq-hesab ordadı. Mələklər
hamısını bitdə-bitdə yazıblar...
Heyf,
uzun müddət davam eləmədi bu haqq-ədalət
kampaniyası. Başçı getdi təzəsi gəldi. O,
heç maraqlanmadı ki, rayonda yasla bağlı hansı
tapşırıqlar verilib və o, necə icra olunur.
Hə,
burda vəziyyət təzədən dəyişdi. Dələduz,
fırıldaqçı mollalar və yasdan xeyir götürən
ünsürlər, "dirildilər", baxmadılar bu
kasıb, o dövlətlidi, girdilər ölü sahibinin cibinə
- yası yenə qaldırdılar 7 günə, hələ
cümə axşamları, 40, il təziyyələri...
görün necə soyğunçu oldu onlar:
Ölü
götürülməsi - 100 manat.
7
gündə 2 Quran oxunuşu - 200 manat.
Çadırqurma - hər gün 100 manat, cəmi 700
manat.
Aşpaz - 7x20=140 manat.
Çayçı - 7x10=70 manat.
Montyor - yəni mollanın aparatını, mikrofonu
nizamlayan, işıq sönəndə benzinlə işləyən
mühərriki xəttə qoşan - 7x10=70 manat. Mollanın iki
yançısı - 7x20=140 manat.
Günorta və şam yeməkləri - azı 10-12
növ soyuq və isti yeməklər, sular- 7x200=1400 manatlıq
ehsan.
Saat 15-də qadınların, 16-da kişilərin qəbir
üstə getmələri üçün taksi
çağırmaq - 7x10=70 manat.
Bunlar çadırda kişilərin məclisi
üçün zəruri xərclər. Qadınlar
ayrıca böyük otaqlardan toplaşır, 7 gün
Mollabacının rəhbərliyi ilə ağlaşır,
bozbaş yeyib, çay içirlər.
Mollabacının
xidmətini başqası yox, öz xanımım şərh
etdi:
- On birin
yarısında onu maşınla gətirməli, saat 4-də
göndərməlisən evinə. Gedəndə
fətir, lavaş, bozbaş, şəkərbura, paxlava
yığmalısan torbaya, verməlisən əlinə.
7-də 140 manatın qoymalısan cibinə.
Hə, hər gün də qazancı olur onun.
-Necə?
Hardandı o qazanc?
-Hər
yasa gələn ona 1 manat verməlidi ki, ölüsünə
salavat çevirtdirsin. Üçdə gülməli
söz oldu.
-Nə təhər?
Yasda gülərlər?
4 qadın ayağa durub, manatı ötürdü ona. Üç dəfə
"salavat" dedi o. Dördüncü dilləndi:
- Ay
bacı, bu mənim pulum? Yaddan
çıxdım?
Molla
ucadan qışqırdı:
-O, daldan
verənin də əmvatına bir salavat!
Asta-asta
gülüşdülərə
-Deyəsən
kişi mollasından az qazanmır o
mollabacılar...
-Hə, hə,
büyün 30 qadın təziyyəyə gəlibsə, 30
manatı var.
Xanımım
susdu və az keçməmiş yadına
nə düşdüsə soruşdu məndən:
-Tanımırsan
onu? Mehdi Hüseyn küçəsində olur.
Zavod tərəfdə. Adı
Gülsümdü. Göyçək qadındı,
yaxşı səsi var... Mərsiyə deyəndə
adamın ürəyi gedir.
Qəsdən
dedim:
-Yox, yox
tanımıram. Əslində gözəl,
nazlı-qəmzəli, hündürboylu univermaq
satıcısı Gülsüm yaşlıların hələ
yadındadı. Alışıb-yanan
vaxtı idi. Rəhbər vəzifədə
işləyən yoldaşla "dostluq" edirdi. Ikisi
birlikdə Soçi, Qaqra, Kislovodsk... kurortlarına gedib-gəlirdilər...
-Bilirsən,
o gün məni yanlamışdı. Xısın-xısın
dedi:
-Ay
qız sənin ərin söz adamıdı. Çadırda
şıkil çəkdirim, ver ona. Qoy mənim
haqqımda yazsın rayon qəzetinə. Oruc
tuturam, namaz qılıram. 4 dəfə Məşhəddə,
1 dəfə Kərbəlada olmuşam... Dedim: "sənə
nə lazımdı o yazı?" güldü: "Heç
ağlın yoxdu ki... qoy o biri mollalar yanıb
tökülsün də".
Mən
avam, sadəlövh xanımımı öyrətdim:
-Harda səni
yenə yanlasa, de: yox, yox, bacı, bizim kişi
mənim sözümə baxmır. Çöl-bayırda
sakitdi, amma evdə ağızdan pərtovdu... Qorxuram...
* * *
İlk və son məkanım Biləsuvar
İİR-nın qulağının dibindədir. O tayla aramız 18.5
km-dır. Bəzi kəndlərə gediş-gəliş
çətindi, nəinki İrana. Bizim
cammat üçün get-gəl su içmək kimi
asandı. Elə pasportun olsun, bəs eylər.
5-ci gündən başqa hər gün İrana
gedib gələrsən. Saat 10-da
gömrüyü keç, Ərdəbilə kimi gəz-dolan,
axşamüstü dön geri. Un, ət,
araq, narkotik maddədən başqa nə istəsən
alıb gətir. Onların pulu olan tümənlə
bizim manatın fərqi yerlə göy qədər. 1 manat bərabərdi 4.500 tümənə. 100 manatın varsa, azı 2-3 həftəlik, bir
aylıq ərzaq və sənaye məhsullarını al, gətir.
Yağ, qənd, çay bizlə müqayisədə
ucuzdu.
Mən
İranın farspərəst molla rejiminə nifrət edirəm
deyə bir balaca ehtiyatlanıram, daha doğrusu, qorxuram
keçəm o taya, dilimi dinc qoymayam və "Ettellata" təşkilatının
böhtançı, şərçi, satqın ünsirlərinin
güdazına gedəm, ahıl vaxtımda iki cavan
şairimizin taleyini yaşayam.
Dözdüm,
dözə bilməyib, öz-özümə dedim: hisslərimi
cilovlamaq, ağılla hərəkət eləyib, hətəran-pətərən
söz-söhbəti bir kənara qoymaq bəyəm çətindir?
Bir yaz günü keçdim sərhəddi, üz qoydum
qədim Ərdəbilə. Gəzdim-dolandım.
Naxçıvan, Gəncə, Lənkəran, Şəki kimi
şəhərdi Ərdəbil. Hamı bizimkidi, azərbaycanlıdı...
İstədim axşamçağı gələm.
olmadı, istiqanlı, xoşüzlü
Qasım, təzəcə tanışım bərk
yapışdı. "hara gedirsən, baba
2-3 gün qal, qonağım ol"... sözarası deyim ki, mənim
o tayda yaxın-uzaq qohumum yoxdu, çünki nəsil-nəcabətim
Ağdamın Əvətli kəndindədi.
Sağ
olsun Qasımı, tanış kimi yox ey,
dost kimi 3 gün qonaq saxladı məni. Gəzdirdi
Ərdəbili, görüşdürdü qohumları ilə.
Getdiyim
günün səhərisi, qonşuda
dünyagörmüş ahıl bir kişi
rəhmətə getmişdi. Maraq məni götürdü, əhə,
fürsətdi, qoy öyrənim, bilim bu islam
ölkəsində yas mərasimi necə keçirilir. Bizdəki kimi, yoxsa?
Darvaza
açılmışdı, vay-şivən qopmadı, molla gətirilməlidi,
ehsan üçün hazırlıq görülmədi... Həyətə
göy rəngli maşın və 4 nəfər yaşıl
libaslı adam gəldi. Onlar ölənin cənazəsini
qoydular maşına və çıxıb getdilər...
Qasımı çəkdim sorğu-suala:
-Baba
qonşu sonsuz idi? Niyə onun meyitini urvatsız,
vay-şivənzis harasa göndərdilər?
-Yox, baba
o kişinin 4 oğlu, 4 qızı, nəvə-nəticələri
var. Bizdə dəfn başqa cürdü. Xəbər verirsən
məscidə, qurtardı getdi... Kəfn-dəfnlə
məscid məşquldu.
-Necə?
Nə təhər?
-Məscid
sənə kağız verir. Orda hamızı yazılıb:
Meyiti
aparmaq, yumaq, qəbir qazmaq, dəfn eləmək... Sən ancaq kağızda göstərilən xidmətin
haqqını ödəyirsən.
-O kağızın
birini tapa bilərsən?
-Hə, hə,
baba, nəmənə şeydi. Keçən il
nənəm ölmüşdü, sandığımda var
ondan. Gətirim, bax... adicə vərəqdi, məscidin
möhürü üstündə. Sıra
ilə xidmət, qarşısında qiymət.
-Qasım
oxudu, mən tümni çevirdim manata. Təxminən
120-130 manat civarında. Bizdəkindən
qat-qat fərqli rəqəm.
-Bəs
ehsan vermirsiz?
-Bu
gün yox. Sabahdan başlayacaq ehsan. Qayda
belədi: səhər-səhər sənə ehsana
çağıracaqlarının sayını bilib,
kağız verəcək, get dükan-bazardan bu qədər ərzaq
al, gətir ver məscidin arxasındakı yeməkxanaya, sonra adamlarına xəbər elə gəlsinlər.
Sən də, tutaq ki, 30, ya 40 nəfərə - qohuma,
qonşuya deyirsən: ay filankəs bu gün zöhr, ya şam
namazı vaxtı filankəs səni rəhmətə
getmiş atasının ehsanına dəvət edir.
-Mən də
ora gedə bilərəm, Qasım?
-Hə, hə,
aparacam səni.
Qasımın sözü düz çıxdı. Sabah biz ikilikdə
olduq məsciddə. Günorta namazı
qılındı, sonra süfrə salındı, ehsan verildi.
Məclisi aparan orta yaşlı molla
söz-söhbətdən dərin mühakiməsi, həyata,
bu günə optimist baxışı ilə yadımda qaldı.
O, bizimkilər təki əlindəki risalə, təfsir
kitablarını ərəbcə qırıldadıb, sonra tərcümə
eləyib çatdırmırdı ehsana gələnlərə...
Allah kəssin bizimkiləri, yas təziyyəsində
özlərini alimi-biəmməl, hətta ərəb dilinin
qramatikasını dərindən bilən mütəxəssis
kimi göstərirlər. Moizələrində ancaq bir məqama
tez-tez toxunurlar: hamını cəhənnəm oduyla qorxuzmaq!
Ərdəbilli molla təxminən yarım saat
kitabsız, dəftərsiz, sadə, hamının başa
düşəcəyi dildə danışdı. Təqva yolu,
onun üş mərhələsi - iman, həya və abır
haqqında moizə elədi. Sonda Həzrəti Əlinin
şücaətini, qeyrətini önə çəkib, dedi:
-İki
il bundan əqdəm, elə ötən gecə (iyunun 21-i idi)
o üzdəki Biləsuvardan Əli qeyrətli Mübariz
İbrahimov torpağını, Vətənini yağmalayanlara
ağır zərbə endirdi, təkbaşına nə qədər
düşməni məhv elədi. O, bizim hamımızın
qəhrəmanı oldu. Gəlin bir ağızdan fatihə
oxuyub, Mübarizin ruhunu şadlandıraq!
-Qürur
duydum, təsirləndim, Milli Qəhrəmanımız, 2010-cu
ilin adamı Mübarizimizi yada salan mollaya ürəyimdə
"sağ ol" dedim.
-Fatihə
verildi, süfrə yığışdırıldı. Dağılışdıq. Kimi iş
başına, kimi ev-eşiyinə. Beləcə,
Ərdəbildə sadə, yığcam, urvatlı yas mərasimi.
Axşamçağı Qasımla getdim qəbiristanlığa. Səliqə-sahman,
güllü-çiçəkli, bir-birinə bitişik qəbirlər.
Rəhmətə gedənin adı, soyadı, doğum
və ölüm tarixləri əks edilən kiçik
başdaşları. Hamısı bir boyda, bir
biçimdə.
Bizdə
isə tamam bambaşqa mənzərə,
görünüş. Imkanlının ya atası, ya anası
ölübsə, o uca, bahalı heykəl qoydurur və 2-3
sotluq torpağı qamarlayıb dəmir hasara alır ki, gələcəkdə
ailədə kimsə ölsə, o da burda dəfn edilsin.
Başqa bir mənzərə. Bu fani dünyada eyş-işrətlə
gün keçirən narkomanın, içki aludəçisinin,
oğrunun, dələduzun məzarı üstdə qara
saqqallı, başında əmmamə, əlində təsbeh
olan heykəl ucaldılır, yəni bax, gör, ay millət,
mənim ölənim ömrü boyu Allaha hidayət yolu tutan,
təqvalı bəndə olub.
Qasımla
tanışlığımız dostluğa çevrildi,
üç gündən sonra, o, oğlunun maşınında
məni gətirdi sərhəd-keçid məntəqəsinə.
Yolda soruşdum:
-Qasım
qardaş, sizin o məsciddəki molla Mübariz İbrahimovu
hardan tanıyır?
Dostum
təəccübləndi:
-Nə
danışırsan, baba, bizim camaat Mübarizin qəhrəmanlığını
unutmur. Yas təziyyələrində, namaz üstdə, onun
ruhuna dualar oxuyuruq... 22 yaşında, vətən uğrunda
düşmən üstə gedəsən, ona ağır zərbə
vurasan. Bu qəhrəmanlığın iki-üç qat
ucalığıdı, baba.
Özlüyümdə
düşündüm: "bizimkilər, savadsız
mollacıqlar bəhsəbəhslik mərəzimizdən
yararlanıb azı 7 gün təziyyə keçirir, pul
qazanırlar, amma Mübariz İbrahimov kimi qəhrəmanın
adını dillərinə gətirmirlər. Əclaflar!".
Beləcə
yas mərasimini təşkili haqqında gördüklərimi
və eşitdiklərimi gətirə bildim gündəmə.
Əlibala Rəhimov
Ədalət.-2013.-24 yanvar.-S.7.