Dəmir Çeşməli

Yol yarıdı

Zirvə deyə...Yol əl çalır,

Yoldan-yola yol ucalır.

Yolu keçdin yol qocalır,

Yol yarıdı, yol yarıdı.

Sağ yanında sol ayrıcı,

Qoldan-qola qol ayrıcı.

Yolun yası yol ayrıcı,

Yol yarıldı... yol yarıdı.

Bir azdan yoxuşu başlar.

Yoxuşla savaşı başlar,

Baxt çəkən naxışı başlar.

Yol yarıdı... yol yarıdı.

Naz elədi nazı gəldi,

Qışı getdi yazı gəldi.

Mən hardaydım qızı gəldi

Yol yarıdı... yol yarıdı...

Qaldım

Üşüdən üşütdü... dondum

Öləzimiş közə qaldım.

Həsrətin oduna yandım,

Dildən qopan sözə qaldım.

Baxan baxdı baxış bildim,

Qəmin yedim,naxış bildim.

Yolu keçdim, yoxuş bildim,

Nurdan düşmüş gözə qaldım.

Gecəni gündüzə qatdım,

Dumana bürünüb yatdım.

Deyəsən harasa batdım,

Yönü itmiş izə qaldım.

Yazdığım

Yer Göydü, Göy Yerdi burda,

Dərdə salıb dərdi burda.

Verdiyini verdi burda,

Cəmlənib, cəmdi yazdığını.

Sulanır suyu bilinir,

Girişi quyu bilinir.

Sevlir toyu bilinir,

Bu dəm o dəmdi yazdığım.

Gözləri boşalır,dolur,

Əlləri saçını yolur.

Əhvalı pərişan olur,

Kədərdi, qəmdi yazdığım.

Çöhrəsində üzüm gülür,

Dodağında sözüm gülür.

O güləndə gözüm gülür,

Canımda himdi yazdığım.

Ah çəkir, ahı nalədi,

Üzündə xalı lalədi.

Şehlənib şehi jalədi,

Gözləri nəmdi yazdığım.

...Bu yaz da yazıram onsuz,

Uzağı yaxını sonsuz.

Yarı çılpaq, yarı yönsüz,

Yazmışam kəmdi yazdığım.

Demə

Dərdin kimlə dərdləşibdi,

Çiçəkl ərə desən-demə.

Sağlıq olsun mərdləşibdi,

Mələklərə desən-demə.

Can verib can alıb candan,

Dəyişib halı o andan.

Görəsən əsib hayandan,

Küləklərə desən-demə

Arzusa sonu görünməz,

Düzənsə yönü görünməz.

Səninsə məni görünməz,

Diləklərə desən-demə.

Tanrım

Ovuma ovutdum ovda,

Qaçhaqaçda, qovhaqovda.

Axar su nohurda-novda,

Bilən tək gəlirəm, Tanrım.

Nə yaxşı-yaxşıdı yaxşı,

Qəlbə dolur söz naxışı.

Gözümdən getmir baxışı,

Ölən tək gəlirəm, Tanrım.

Şahidi yox idi şahın,

Dünyanı tutmuşdu ahı.

Get ha gedin nə bəh-bəhi,

Gələn tək gəlirəm Tanrım.

Qalıb

Mənim gəlib-gəlməməyim,

Allaha-Tanrıya qalıb.

Öz yerimi bilməməyim,

İndidən sonraya qalıb.

Biçim-biçim biçilmişəm,

Sudan içib içilmişəm.

Səndən ötrü kiçilmişəm,

Bütövüm yarıya qalıb.

Uzunu-eni bilinmir,

Məzhəbi, dini bilinmir.

Arxası önü bilinmir,

Qalıbsa anrıya qalıb.

Baxtı özündən yeyindi,

Gahdan yerin gah göyündü,

Döyündü qəlbi, döyündü

Yaradan Yar Aya qalıb.

Dağlar

Şeh göz yasım gözə gəlmir,

Öz ovumdu izə gəlmir.

Yenə küsüb bizə gəlmir,

Vremir ömrə ömür dağlar.

O baxışla baxmaq olmur,

Gözlərimə taxmaq olmur.

Axasıydım axmaq olmur,

Suya batıb, çimir dağlar.

Burda göyün yeri olur,

Hər nə görsən diri olur.

Sənnən mənnən biri olur,

Dediyimi demir dağlar.

Bulaq gözüm suda axır,

Yerə axır, göyə baxır.

Tanıdınmı əvvəl-axır?

Mən Dəmirəm, Dəmir dağlar.

Yaşayır məhəbbət

Yayından yayınıb yana bitmişəm,

Qanında qovrulub qanda itmişəm.

Ən gözəl fürsətə ona yetmişəm,

Yerimi yurdumu bilməyib hələ.

Allah rizasında Allaha bağlı,

Batmayıb nəfəsi itməyib ağlı.

Ürəyi niskilli sinəsi dağlı,

Ləngiyib yollarda gəlməyib hələ.

Günəşdən pay alıb ağlar-ağlardı,

Ayrılıq dəmində dağlar-dağlardı.

Bostanı sovulub tağlar-tağlardı,

Baxtına güləni gülməyib hələ.

Buluddan ayrılıb yığmağı qalıb,

Üfüqdən boylanıb doğmağı qalıb.

Doğmaca balasın doğmağı qalıb,

Yaşayır məhəbbət ölməyib hələ.

Dağlar

Zirvədə zirvə dayanıb,

Keşikdi bağlara dağlar.

Gecənin sübhü oyanıb,

Şahiddi çağlara dağlar.

Kimsəsi yox kimi vardı.

Yolu azıb, cığır dardı,

Libası, kəfəni qardı.

Bükülüb ağlara dağlar.

Yan-yana düzülüb düzü,

Qibləyə boylanır üzü.

Var olsun neçəsi... yüzü,

Söykənib dağlara dağlar.

Üstünə gələrdik bir vaxt,

Gecikdi gəlmədi bəd-baxt.

Söküldü, töküldü o taxt,

Çəkildim dağlara dağlar.

Yerimsən

Gələnin gedəni önə düşübdü,

Göylərin göy yeri mənə düşübdü.

Bu tənhalıq enə- enə dübdü,

Sən məndən ayrılan günah yerimsən.

Yolları yormuşam yorulan yerdə,

Bəs niyə möhtacam sən düşən dərdə?

Baxıram bu üzdən o üzə pərdə,

Təəsüf doğuran min ah yerimsən.

Yozulan yuxumsan-yozanım sənsən,

Dərdimi anlayıb yozanım sənsən.

Kərəmim,Qəribim,Ozanım sənsn,

Göyün göy qatında Allah yerimsən.

Yamaclar yaxınım,yamaclar yanım,

Tutub yaxasından durum dayanım.

Bir gözü qıyıqdan qaçım,yayınım,

Tanrının verdiyi dərgah yerimsən.

Rənginə düşmüşəm ağın qaranın,

İtisi baş alıb gedir aranın.

Pozulub pərdəsi-deyin aranın,

Uzaqdan-uzağa agah yerimsən.

El-oba danışır səxavətindən,

Çəkinmə sevənin ədavətindən.

Səadət umuram sədaqətindən,

Sən mənim doğmaca nigah yerimsən.

İtirdim səni

Burda ağac gördüm çiçəkləmişdi...

Yarpaq budaq üstə ləçəkləmişdi.

Burda bir qız vardı... göyçəkləşmişdi..

Axtardiğım yerdə itirdim səni.

Dərələr uzanır üzü yuxarı,

Zirvənin göz yaşı çayın axarı.

Örüşdən qayıdır çoban naxırı.

Axtardığım yerdə-itirdim səni.

Nə səsdi? Kol-kosda çaqqal ulaşır,

Ayağa izin yox tikan dolaşır.

Payıza gedən yol toza bulaşır,

Axtardığım yerdə-itirdim səni.

...Göydən yerə sevgi töküləsiydi...

Həsrətin çarmıxa çəkiləsiydi.

Yolumuz yenidən çəkiləsiydi,

Axtardığım yerdə-itirdim səni.

Xəbərim yox

Əlim əldə, fikir yoxda,

Bir deyən yox, dayan toxta.

Sən qalmısan azla-çoxda,

Sənin boyda qədərim yox.

Gözdən uzaq yurd qalıbdı,

Ondan böyük dərd qalıbdı?

"Boz Çöldə" "Boz Qurd" qalıbdı,

Elə bilmə kədərim yox.

Uzağım-uzağa yaxın,

Baharın sazağa yaxın.

Olan mən yazığa yaxın,

Təkcə səndən xəbərim yox.

Şükür

Yoluma yovuşub gəldim bu yerə,

Dağlar çökmür,duman çökür min şükür.

Üzümə iz gülür, bilir "Boz Dərə"

Kövrələn bulud yaş tökür min şükür.

Dərəyə boylanır zilin baxarı,

Dərənin özüdü suyun axarı.

Bənövşə boy verir boyu yuxarı,

Boynunu əyməyir-bükür, min şükür.

Paylaşdım payımı paydan olmadım,

Ovumu ovutdum ovdan olmadı.

O Taya getdim, bu Taydan olmdım,

Olana-qalana şükür, min şükür.

Unutmur

Baxıram, baxışı tanışdı mənə

Görkəmi gör nələr danışdı mənə.

Bu yerlər anam tək yanaşdı mənə,

Gönçəsi gül doğub, gülü unutmur.

Sirli sirdaş olur, xatırlayıram,

Bacı-qardaş olur, xatırlayıram.

Yol üstü daş olur, xatırlayıam,

Sürünür zirvəyə yolu unutmur.

Dolayı bürüyən duman yüyurur,

Bahardan-bahara buzu əriyir.

Yuxuya qalan qış susub kiriyir?

Hələ dil-dil ötmür,dili unutmur.

Bir yanı doludu,boşdu deyirəm,

Yükünə yüklənib daşdı deyirəm.

Güneydə gününə qışdı deyirəm,

Küləyi hayqırır yeli unutmur.

....Baxıram baxışı tanışdı mənə,

Görkəmi gör nələr danışdı mənə.

Bu yerlər anam tək yanaşdı mənə,

Gönçəsi gül doğub, gülü unutmur.

Ədalət.-2014.-25 dekabr.-S.6.