Uğurlar möhkəm təməl üzərində qurulur

(əvvəli ötən sayımızda)

Yollar bitib tükənməzdir, ömürlər kimi

Azərbaycan Respublikası Prezidentinin 07 sentyabr 2013-cü il tarixli 3123 saylı Sərəncamı ilə inşasına başlanılan və 10 min nəfər əhalinin yaşadığı, 3 yaşayış məntəqəsini birləşdirən, uzunluğu 6 kilometr olan Əsgərabad-Muğan-Çaylı avtomobil yolunda isə torpaq yatağı, yol əsası və süni su ötürücü qurğuların tikintisi başa çatdırılmış, hazırda uzunluğu 81,0 metr olan körpüdə tikinti işləri davam etdirilir.

Biləsuvar rayonunda yol tikintisinə xüsusi fikir verilməklə bərabər, həm də onun inkişaf etdirilməsi nəzərdə tutulmuşdur. Kənd yollarının təmir edilməsi, körpülərin salınması qarşıda duran məsələlərdəndir. İlin quraq fəsillərində, xüsusən də yayda bu işlərin görülməsi xeyli asan və sərfəlidir. Buna görə də rayon rəhbərliyi kəndarası yolların təmiri və tikintisinə xüsusi önəm verir.

Əlavə edək ki, Biləsuvar şəhərində kanalizasiya sisteminin tikintisi ilə bağlı yolların böyük əksəriyyəti qazılmışdır. Bu qazıntıların nəticəsində şəhərdaxili yollarda hərəkətin intensivliyi xeyli zəifləmişdir. Lakin çox yaxın vaxtlarda su-kanalizasiya işləri başa çatdırıldıqdan sonra Biləsuvar şəhərinin başdan-başa asfaltlaşdırılması nəzərdə tutulmuşdur.

Aqrar sahənin uğurları

Biləsuvar aqrar rayon olmaqla iqtisadiyyatının əsasını kənd təsərrüfatı məhsulları istehsalından gələn gəlirlər təşkil edir və əhalinin məşğulluğu əsasən bu sahə ilə bağlıdır. Cari ilin birinci yarısında aqrar sahədə ümumi məhsul istehsalının həcmi 45,1 milyon manat təşkil etmişdir ki, bu da 2013-cü ilin müvafiq dövrünə nisbətən 16,7 faiz çoxdur.

Ölkə başçısının aqrar sahənin inkişafına, ərzaq təhlükəsizliyinin təmin edilməsinə göstərdiyi ciddi diqqətin nəticəsidir ki, bu gün respublikamızda aqrar baza formalaşmış, ölkə əhalisinin ərzaq məhsulları ilə təminatında daxili istehsal yüksəlmiş, ixrac yönlü məhsulların çeşid və həcmi artmışdır. "Azərbaycan Respublikası regionlarının sosial-iqtisadi inkişafına dair Dövlət Proqramı"nın həyata keçirilməsi aqrar sahənin inkişafına böyük təkan vermiş, bu sahədə çalışanlara əlverişli şəraitin yaradılmasına səbəb olmuşdur.

2014-cü ilin məhsulu üçün 2013-cü ilin payızında 25697 hektar sahədə dənli bitkilər əkilmişdir ki, bundan 11050 hektarı buğda, 14647 hektarı isə arpadır. Yazlıq əkinlər üçün 18616 hektar əkin aparılmışdır.

Hazırkı vaxtadək mülkiyyətçilər tərəfindən əkilmiş 25642 hektar sahədə taxıl biçini artıq başa çatmışdır. Ümumilikdə rayon üzrə 63,5 min ton taxıl məhsulu əldə edilmişdir. Hər hektarda orta məhsuldarlıq 24,8 sentner təşkil etmişdir.

Bakı şəhər əhalisini ucuz və keyfiyyətli kənd təsərrüfatı məhsulları ilə təmin etmək məqsədi ilə təşkil olunan yarmarkalarda Biləsuvar rayonunun fermerləri də yaxından iştirak etmişlər. 2014-cü ilin 6 ayı ərzində yarmarkalara 456 tondan çox müxtəlif növ kənd təsərrüfatı məhsulları göndərilmişdir.

Sakinlərin asudə vaxtının təşkili

Rayon sakinləri istehsalatda fəal çalışdıqları kimi istirahət vaxtlarını da səmərəli keçirməyi bacarırlar. Əhalinin asudə vaxtlarının səmərəli təşkilində mədəni-maarif müəssisələrinin üzərinə mühüm vəzifələr düşür.

Açılışında möhtərəm Prezidentin iştirak etdiyi Heydər Əliyev Mərkəzinin istifadəyə verilməsi rayonun mədəni həyatında mühüm hadisəyə çevrilmişdir. Hazırda bu mərkəz rayon ziyalılarının, gənclərin hər gün müraciət etdikləri əsil mədəniyyət mərkəzidir. Son aylar Heydər Əliyev Mərkəzində yeni ailə quran gənclərin nikah mərasimlərinin təntənəli keçirilməsi artıq ənənəyə çevrilmişdir. Bu günə kimi bu mərkəzdə 30-dan çox təntənəli nikah qeydə alınmışdır.

Biləsuvar rayonunun təxminən üçdə bir hissəsini təşkil edən gənc nəslin ideya-siyasi və hərbi vətənpərvərlik tərbiyəsinin gücləndirilməsi də hesabat dövründə ən çox diqqət yetirilən sahələrdən olmuşdur.

Azərbaycan Respublikasının Prezidenti İlham Əliyevin tapşırıqlarına uyğun olaraq Biləsuvarda idmanın kütləviliyinin artırılması məqsədi ilə rayon İcra Hakimiyyəti başçısının 25 aprel 2014-cü il tarixli 128 saylı Sərəncamı ilə idmanın 12 növü üzrə klublar və məşqçi müəllim qrupları yaradılmışdır. Yəqin ki, yaxın vaxtlarda bu klubların yaradılması idmanın kütləviliyinin artırılmasına mühüm təkan verəcəkdir.

Səxavət Məmmədli

Azərbaycan Respublikasının Prezidenti yanında kütləvi informasiya vasitələrinin inkişafına dövlət dəstəyi fondunun maliyyə yardımı ilə

Ədalət.-2014.-19 iyul.-S.4.