ERAMIZDAN YAŞLI... CAVAN ŞAMAXI

Yüz-yüz mənbələrdən görünən tarix

Biz hər dəfə Şamaxıdan söhbət açarkən bu qədim diyarın müstəqillik dövründəki, xüsusilə son illərdəki sosial-iqtisadi və mədəni yüksəlişindən yazarkən, mütləq uzaq keçmişləri də yada salmalı oluruq. Səbəbsiz deyil bu tarixi ekskurslar. Çünki çoxəsrlik və mürəkkəb tarixi keçmişi olan Şamaxı, təkcə öz varlığı ilə Azərbaycanı dünyaya tanıdan çox mühüm yaşayış məskənlərindən biridir. Bu qədim şəhər haqqında təkcə elə mənbələrin adlarını sıralasaq, heç qəzetin bütöv səhifələri də bəs etməz. Təkcə bir faktı - eramızdan əvvəl V-IV əsrlərə aid şəhər həyatına xas olan maddi mədəniyyət qalıqlarının aşkar edilməsi gerçəkliyini xatırlamaq kifayətdir ki, Şamaxının nəinki Şərqdə, bütün dünyada belə ən qədim yaşayış yerlərindən biri olduğunu qürurla söyləyə bilək. Eyni zamanda Azərbaycan və dünya ədəbiyyatına bəxş etdiyi korifeyləri...

Ancaq bu elin başı həm də nələr çəkməyib ki? Yadellilərin hücumları, müharibələr, dağıntılar... Bunlar da bəs deyilmiş. Bəşəriyyətə məlum olan ən dağıdıcı zəlzələlərin ikisi ayrı-ayrı vaxtlarda Şamaxının taleyinə yazılıbdır.

Yüksək etimadı necə doğrultmalı?

Azərbaycan adlı böyük vətənimizin simasını ən vacib xüsusiyyətlərlə bəlirləyən regionlardan biri kimi Şamaxı həmişə diqqət mərkəzindədir. Eyni zamanda ölkəmiz son dövrlər möhtəşəm yüksəlişdədir. Bunu görməmək, duymamaq mümkün deyil. Ən pessimist və tərəddüdlü insanlar da artıq Azərbaycanın başdan-başa inkişafını və müasirləşməsini etiraf etmək məcburiyyətindədir. Paytaxt Bakının dünyanın ən gözəl şəhərlərindən birinə çevrilməsi, respublikanın digər şəhər və rayonlarının, qəsəbə və kəndlərinin müasir səviyyəyə uyğun formalaşması, sosial-iqtisadi uğurların ardıcıllaşması, eyni zamanda ölkə rəhbərliyinin - Azərbaycan Respublikasının Prezidenti İlham Əliyev cənablarının daxili və xarici siyasətdə sərbəst fəaliyyəti və qazanılan uğurlar hər bir azərbaycanlını qürurlandırır, yeni uğurlara ruhlandırır. Elə bu mənada Şamaxının da taleyində ən xoş günlər yaşanır. Çünki burada çox işlər görülür, dövlətin və xalqın maraqları bir-birini tamamlayır, insanlar gələcəyə daha böyük ümidlərlə baxır. Rayon rəhbərliyi, Şamaxı Rayon İcra Hakimiyyətinin başçısı Asif Ağayev və komandası dövlətçiliyə və xalqa xidmətdə nümunə göstərir. Yüksək etimadı bütün istiqamətlərdə doğrultmağa çalışan rayon rəhbərliyi daim camaatla bir yerdədir. Sakinlər Şamaxıya xüsusi qayğı və diqqət göstərdiyinə görə Prezidentə həmişə minnətdarlıq edir, Azərbaycanın daha böyük gələcəyi naminə apardığı siyasəti dəstəkləyirlər.

Prezident: "İqtisadiyyatımızın bütün sahələri artımla müşahidə olunur..."

Nazirlər Kabinetinin 2014-cü ilin birinci yarsının sosial-iqtisadi inkişafının yekunlarına və qarşıda duran vəzifələrə həsr olunmuş iclası ilə əlaqədar keçirilən müşavirədə Şamaxı Rayon İcra Hakimiyyətinin başçısı Asif Ağayev məruzə ilə çıxış etmişdir. A.Ağayev çıxışında əldə olunan nailiyyətlərin müxtəlif məqamlarını müşavirə iştirakçılarının diqqətinə çatdırmışdır:

- Ölkəmizin Prezidenti cənab İlham Əliyev iclasdakı giriş nitqində bildirmişdir ki, 2014-cü ilin altı ayında iqtisadi göstəricilərimiz çox müsbət olmuşdur. Həmin iclasda xüsusi olaraq vurğulanmışdır ki, ötən altı ayda iqtisadiyyatımız 2,1 faiz artmışdır. Müsbət hal kimi qeyd edilmişdir ki, iqtisadi sahədə əsas prioritet məsələ olan qeyri-neft sektoru həmin müddətdə təxminən 7 faiz artmışdır.

Ötən altı ayda respublikanın kənd təsərrüfatı sahəsində 6 faiz artım qeydə alınmışdır. Digər iqtisadi göstəricilərimiz də ürəkaçandır. Belə ki, valyuta ehtiyatlarımız xeyli artmışdır. Hazırda valyuta ehtiyatlarımız 54 milyarddan çoxdur. Bu da çox böyük göstəricidir.

İqtisadi imkanlarımız artdıqca əhalinin rifah halının daha da yaxşılaşdırılması istiqamətində mühüm addımlar atılır. Ötən dövr ərzində infilyasiya nəinki birrəqəmli olmuş, hətta 1,6 faiz təşkil etmişdir. Əhalinin pul gəlirləri 4,7 faiz artmış, inflyasiyanı 3 dəfə üstələmişdir. Əhalinin gəlirlərinin artması da davam etmişdir. Bu gün Azərbaycanda orta əməkhaqqı 440 manat və ya 560 dollar təşkil edir. Keçən illə müqayisədə ölkə iqtisadiyyatına qoyulan investisiyalar 3,4 faiz artmışdır.

Üçüncü Dövlət Proqramının uğurlu startı

Məlum olduğu kimi bu ilin fevral ayında regionların sosial-iqtisadi inkişafına dair üçüncü Dövlət Proqramı qəbul edilmişdir. Möhtərəm Prezidentimiz cənab İlham Əliyev bununla bağlı giriş nitqində bir daha qeyd edir ki, bu proqramın icrası nəticəsində artıq bu ilin altı ayında 65 min yeni iş yeri açılmışdır ki, onlardan 52 mini daimi iş yeridir. 2003-cü ildən bu günə qədər - bu proqramlar icra edilməyə başlayandan sonra 1 milyon 300 min iş yeri açılmışdır ki, onlardan təqribən 1 milyonu daimi iş yeridir.

Bəli, Azərbaycanın dinamik inkişafı reallığa çevrilmişdir. Artıq dünya birliyi bunu görür və yüksək qiymətləndirir. Eyni zamanda ölkəmizin beynəlxalq mövqeyi daha da möhkəmlənir, siyasi nufuzu getdikcə artır.

2014-cü ilin birinci yarısının yekunlarını rayonumuz üçün də müsbət qiymətləndirmək olar. Xüsusi olaraq qeyd etmək istəyirəm ki, bu dövrün ən mühüm hadisəsi Azərbaycan Respublikasının Prezidenti cənab İlham Əliyevin may ayının 14-də rayonumuza səfər etməsidir. Həmin səfəri çərçivəsində dövlətimizin başçısı Şamaxı rayonunun Şərədil kəndində yüksək səviyyədə müasir standartlara uyğun inşa olunmuş beşulduzlu "Şamaxi Palace Platinum By Rixos" otelinin açılış mərasimində iştirak etmişdir.

(ardı gələn sayımızda)

Məzahir Əhmədoğlu

Ədalət.-2014.-22 iyul.-S.4.