DÜNƏNKİ YEVLAX KEÇMİŞDƏ QALDI

Bugünkü Yevlax sabaha addımlayır

(Əvvəli ötən sayımızda)

Uğurlu addımlar

Yevlax şəhəri bu gün təkcə rayon mərkəzi kimi yox, həm də respublikanın iri şəhərlərindən biri kimi öz həyatının uğurlu səhifələrini yazır. O elə bir salnamədir ki, orda demək olar ki, hər şey abadlıqdan, inkişafdan və ən vacibi isə sabaha inamdan xəbər verir. Təbii ki, söylənilən bu fikirlərin arxasında konkret rəqəmlər, faktlar, yəni görülmüş işlər dayanır. Bu mənada əgər rayonda olarkən əldə etdiyimiz bilgilərə istinad etsək, onda söylədiklərimizi faktlarla da diqqətə çatdıra bilərik.

Bu gün Yevlax şəhərində insanların daha çox ehtiyacı olan sahələr var ki, onlar da xüsusi olaraq şəhər rəhbərliyinin, yəni icra hakimiyyəti başçısı cənab Qoca Səmədovun hər gün diqqət ayırdığı sahədir.

Yevlax şəhərində 2014-cü ilin 1-ci rübündə əhalinin içməli suya olan ehtiyacının təmin edilməsi üçün əlavə su mənbələrinin araşdırılıb tapılması və həmin ərazilərdə artezian və subartezianların istifadəyə verilməsi insanları razı salmışdır. Təbii ki, içməli su ilə yanaşı, şəhərdə digər nasos qurğularının, kanalizasiya xətlərinin yenilənməsi, əlavələrin çəkilməsi sahəsində də xeyli işlər görülmüşdür. İlin 1-ci rübündə magistral və paylayıcı su xətlərinin təmir edilməsi, təzələnməsi, yenilərinin çəkilməsi də diqqət mərkəzində olmuş və nəticədə 1,2 km. uzunluğunda paylayıcı su xətləri çəkilmişdir. Görülən bu işlərin əhatəsində digər sahələr də var. Belə ki, şəhərdə elektrik enerjisinin təminatı ötən onilliklərlə müqayisədə köklü şəkildə dəyişmişdir.

Yevlax şəhərində və rayonlarda əhalinin elektrik enerjisi ilə təmini, bu işin fasiləsiz həyata keçirilməsi istiqamətində uğurlu addımlar atılmışdır. Görülən işlərin nəticəsidir ki, fasiləsiz və dayanıqlı elektrik təminatı məsələsi ardıcıl həyata keçirilməkdədir.

İlin 1-ci rübündə elektrik şəbəkələrində 29,2 min manatlıq təmir işləri görülmüş, 21 ədəd transformator yarımstansiyası təmir edilmiş, 2,3 km. uzunluğunda elektrik xətləri yenilənmiş, 237 ədəd yeni sayğaclar quraşdırılmışdır.

Həmçinin bu müddət ərzində istehlak edilmiş enerjinin dəyərinin ödənilməsi 83,2 faiz təmin edilmişdir. Əhali qrupu üzrə abonentlər tərəfindən istifadə olunmuş 822 min manatlıq elektrik enerjisinin 774 min manatı ödənilmişdir ki, bu da 94 faiz deməkdir.

Yevlax şəhərində və rayonunda təbii qazla təminat məsələləri də daim gündəmdə saxlanılır. Elə bunun nəticəsidir ki, 1 nömrəli şəhər qazpaylayıcı stansiyasından əhaliyə qazın verilməsi istiqamətində yeniliklər edilmiş və qaz kəmərinin yerinin dəyişdirilməsi məsələləri bu gün də davam etdirilir.

Rüb ərzində şəhərin 506 abonenti təbii qazla tam təmin olunmuş, şəhər və kənd yaşayış məntəqələrinə qazın davamlı verilməsi nəzarətdə saxlanılmışdır. Sahənin diqqət mərkəzində olması həm məsuliyyəti hissini artırmış, həm də adamların ehtiyacını ödəməsinə öz müsbət təsirini göstərmişdir. Nəticədə ilin 1-ci rübündə 18,4 mln. kubmetr təbii qaz istehlak edilmişdir. Həmin qazın dəyərinin ödənilməsi istiqamətində də müəyyən addımlar atılmış və əvvəlki illərlə müqayisədə bu istiqamətdə də uğurlar özünü büruzə vermişdir. Əhali üzrə abonentlər tərəfindən istehlak olunmuş qazın 86,6 faizinin pulu tam ödənilmişdir.

Maraqlıdır ki, aparılan maarifləndirici işlər bu sahəyə xeyli təsir göstərmiş, insanların istehlak işinə münasibətində müəyyən dəyişikliklər etmişdir.

Qaz, su məsələləri ilə paralel olaraq rabitə və poçt xidmətləri də Yevlaxda günün tələbləri səviyyəsində həll olunmaqdadır. Bu istiqamətdə görülən işlərin miqyasına diqqət yetirəndə onda məlum olur ki, ilin birinci rübündə Yevlaxda 412 min manatlıq rabitə və poçt xidməti göstərilmişdir. Bu da keçən ilin müvafiq dövrü ilə müqayisədə 26,6 faiz çoxdur. Onu da qeyd etmək lazımdır ki, ilin 1-ci rübündə əhaliyə göstərilən xidmətlərin həcmi də 15,3 min manat çoxalmışdır.

(Ardı var)

Ceyhun RÜSTƏMOV

Ədalət.-2014.-3 iyun.-S.7.