DAHİLİK ZİRVƏSİ

Zəkalar kəhkəşanında əbədi parlayan Müdrik Xalq yazıçısı İLYAS ƏFƏNDİYEVİN əziz və unudulmaz xatirəsinə

Sən elə dağ idin zirvəsi qarlı,

Əyilən deyildin tufana, qara.

Bir ömür yaşadın qışlı, baharlı...

Sədaqət gətirdin əhdə, ilqara.

Vüqarın bənzərdi uca çinara,

Min cürə nemətli barlı bağ idin.

Zülmətə qərq olub düşsən də dara,

Kəhkəşan qoynunda çilçıraq idin.

Zəkan nur saçırdı... Hikmətin dərin,

Sənin dərdin idi xalqın da dərdi.

Can qoyub yazdığın hər bir əsərin,

Ən yüksək dəyərli gövhərdi, zərdi!

Dram əsərlərin düşdü dillərə,

Oldu səhnəmizin nəcib zinəti.

İncilər bəxş etdin bizim ellərə,

Ucaltdın göylərə eşqi, sənəti.

Nurlu olsun deyə Vətənin yazı,

Canını bu yolda sən fəda etdin.

Bizə ibrət qoyub "Hökmdar və qızı"

Qəlbində Qarabağ yarası getdin.

Ömrə naxış oldu "Körpü salanlar"

Qovuşmaq eşqilə uzandı qollar.

Bulaqtək çağladı "Bahar suları",

Yetişdi kamına "İşıqlı yollar".

Sehirli bir "Mahnı dağlarda qaldı",

Doymadı kamanın, tarın səsindən.

Könüllər mülkü də xəyala daldı,

Dolmuş buludların kişnəməsindən!

"Unuda bilmirəm" - hikmət dəryası,

Bizə xatırladır keçən günləri.

Çox olur bir ömrün eşqi, cəfası...

Dünyaya göz açıb gələndən bəri.

"Dağlardan gələn səs" çağırır bizi,

Qartallı dağ kimi biz də ucalaq.

Əsla qatlanmasın igidin dizi,

Hər yerdə, hər zaman qələbə çalaq!

Ömrün mənasını sərvətdə görən,

Gününü keçirir "Büllur sarayda",

Halal zəhmətinin barını dərən,

Həmişə bəxş edir xalqına fayda!

Xurşudbani Natəvan da Şuşada,

Sənin sənətinə əydi başını.

Dedi: çox sağ ol ki, salmısan yada,

Nisgilli könlünün atdı daşını!

Zəkan işıqlıdır, hikmətin dərin,

Ömrün həm bahardı, həm də ki qışdı.

Dünyaya sığmayan şah əsərlərin

Görəsən bir ömrə necə sığışdı?!

Göylərə baş çəkən uca çinarsan,

Dəyərli töhvən var sənət bağında.

Nə qədər həyat var, həmişə varsan;

Yaradan yaşayır yaratdığında!

Yazdığın əsərlər həkk olub yada,

Öz şirin barını bağ özü yığmır.

Dünyada hər şeyi ölçmək olsa da,

Sənin böyüklüyün ölçüyə sığmır!

Sənin o mənalı ömür kitabın,

Misilsiz dəyərli gövhərlə doldu.

Sənət yollarında dözümlü tabın, -

Dahilik zirvəsi nəsibin oldu!

Adına layiqdir övladların da,

Xalqımın fəxridir alim Timurçin.

Tanınır sınanmış etibarında

Yolunu yaşadan yazıçı Elçin!

Canından çox sevdin Ana Vətəni,

Bu yurdun şöhrəti, düz ilqarısan.

Unudan deyilik heç zaman səni,

Xalqımın həmişə iftixarısan...

Əjdər Qiyaslı

İqtisadçı alim, şair

Ədalət.-2014.-3 iyun.-S.6.