EL ÜÇÜN YAŞAYAN ELÇİN

Qərib Mehdinin kitabı barəsində oxucu sözü

Əvvəlcə ordan başlayım ki, dünən sənət məbədgahlandən biri olan Dövlət Dram Teatrının binasında Azərbaycan yazıçılarının XII qurultayı keçirildi. Qurutlayın nümayəndələri arasında hamının hörmətlə hal-əhval tutduğu, qarşıdan gələn yubileyi münasibəti ilə təbrik etdikləri söz adamlarından biri, dəyərli alim, şair, tərcüməçi və bütün mənalarda özünü ifadə edən ziyalı Elçin İsgəndərzadə idi. Məhz bu aurada mən onu izləyə-izləyə bir xeyli müddət bundan öncə əldə etdiyim "Elçin-El Üçün" kitabını və bu kitabda yazılan anları, fikirləri, duyğuları göz önünə gətirdim. Necə deyərlər, həmin kitabda oxuduqlarım elə bil izlədiyim anlarda da bir-birini tamamlayırdı. Ona görə də redaksiyaya qayıdan kimi dərhal həmin kitab barəsində etdiyim qeydlərə yenidən göz gəzdirib onun barəsində düşüncələrimi oxucuların diqqətinə çatdırmaq qərarını verdim.

Dəyərli söz adamlarından biri olan yazıçı-publisist Ümbülbanu xanımın çox səmimi ön sözü ilə başlayan kitab üç hissədən ibarətdir. Kitabın birinci, ikinci hisəsi Gəncə ədəbi mühitinin yetirməsi olan Elçin İsgəndərzadə barəsində qocaman yazıçımız Qərib Mehdinin portret cizgiləri, ustad fikirləri, oxucu yanaşması, bir sözlə, Elçini müxtəlif aspektlərdən təqdim etməkdən ibarətdir. Ön söz müəllifinin yazdığı kimi, "Elçinin həyat və yaradıcılıq marşrutu belədir: Şuşa-Gəncə-Bakı-Dünya. Elmdə professorluq zirvəsinə çatıb, şairliyi ondan geri qalan deyil" - deyə Qərib Mehdi bir müəllim kimi şagirdinin uğurlarını urəkdən arzulayır, xeyir-duasını əskik etmir"". Məncə bu sözlərdən sonra, yəni ustadın öz şagirdi barəsində belə böyük ürək oduyla, sevgisiylə münasibət sərgiləməsi az-çox sözə marağı olan oxucunun mütləq bu kitabı gözdən keçirməyə həvəsləndirəcəyinə mənim şübhəm yoxdur.

Elə burdaca onu da xatırladım ki, Qərib Mehdi özünün bu kitabını şagirdinin 50 yaşına ustad ərməğanı edib. Seçdiyi adı da Elçin İsgəndərzadənin həyat fəaliyyətinin ədəbi fraqmentlər baxımından diqqəti çəkən, həmçinin diqqətdən kənarda qalan məqamlarını hər kəsə sərgiləmək üçün belə bir üslub seçibdir. Maraqlı burasıdır ki, həmin fraqmentlərin hər birində Elçinin həyatının, Gəncədə keçən günlərinin, hətta ən yaxın adamlarının belə bilmədiyi nüanslarını işıq üzünə çıxarıb.

Bu da onu göstərir ki, şagirdinə böyük inamı olan Qərib Mehdi elə ilk təmasdan Elçinin həyatını, onun yaradıcılığını, onun fəaliyyətini diqqət mərkəzində saxlayıb. Görünür, bu instinq həm də Qərib müəllimə imkan verib ki, şagirdinin böyük gələcəyinə bütünlüklə inansın.

Kitabın ikinci hissəsində Qərib müəllim Elçinlə bağlı, daha doğrusu, onun əsərləriylə, kitablarıyla bağlı, hətta konkret şeir və poemalarıyla əlaqəli həm oxucu, həm müəllim fikirlərini bölüşüb. Müxtəlif mətbu orqanlardan verdiyi müsahibələrində Qərib müəllim mütləq böyük ümid bağladığı, güvəndiyi yetirmələrinin, o cümlədən də Elçinin adını xüsusi vurğulayıb.

Kitabın ikinci bölümündə həm də Elçin İsgəndərzadəyə ünvanlanmış açıq məktublar, ona edilən müraciətlər də xülasə şəkilində yer alıb. Kitabın üçüncü hissəsi isə Elçin İsgəndərzadənin bioqrafiyası, əldə etdiyi uğurların sırası, həmçinin professor, şair dostumuzun 14 elmi və bədii kitablarının siyahısı, həmçinin dünyanın müxtəlif ölkələrində çap olunmuş əsərlərinin adı və nəhayət Elçin İsgəndərzadənin müştərək və fərdi qaydada tərcümə ediyi 125 kitabın adı və fotoalbom çap olunubdu. Doğrusunu deyim ki, Elçin İsgəndərzadə barəsində özümü kifayət qədər məlumatlı saysam da, ancaq məhz Qərib müəllimin böyük ürəklə və həm də peşəkarlıqla hazırladığı "Elçin-El Üçün" kitabından mən dostumun həm də çox işgüzar, məsuldar bir tərcüməçi olduğunu öyrəndim. Bu mənim üçün necə deyərlər, xoş bir sürpriz idi.

Mən də bir oxucu olaraq, bu günlərdə 50 yaşını qeyd edəcəyimiz Elçin İsgəndərzadəni, həmçinin Qərib müəllimi bu mükəmməl kitab münasibəti ilə təbrik edirəm.

Əbülfət MƏDƏTOĞLU

Ədalət.-2014.-18 iyun.-S.4.