Unudulmaz xatirələr

AZƏRBAYCAN SSR-nin BAŞ PROKURORU VƏ ALİ MƏHKƏMƏNİN HAKİMİ SEYFULLA ƏKBƏR OĞLU ƏKBƏROV...

Hazırda sıralarımızda olmayan Azərbaycanın görkəmli hüquqşünası və ictimai xadimi, sağlam düşüncəli, layiqli ziyalısı, XX əsrin ortalarından Respublikamızda qanunçuluğun möhkəmləndirilməsi naminə bir məqsəd uğrunda mübarizə apardığımız mərd insan Əkbərov Seyfulla Əkbər oğlu haqqında fikir söyləməyi özümə şərəf bilirəm.

Dünya filosofları yaşadıqları həyatın sonunu bununla nəticələndirmişlər ki, dünyada ən böyük nemət sağlamlıq və insanlıqdır. Yüksək insani keyfiyyətlərə malik, ədalətli, rəhmli, obyektiv, saf, etibarlı insan olan kəslər heç vaxt unudulmur. Həyatın bir sirri də diqqəti cəlb edir. Bu da ondan ibarətdir ki, insan gəncliyini keçirir, yaşa dolur və qocalığa təslim edilir. Sonra isə həyatda nə edibsə, nə qazanıbsa - yaxşısını da, pisi də qoyub, dünyasını dəyişir.

Bəli ! Bunlar, həyatın ümumi qanunudur. Bunun qarşısını almaq qeyri-mümkündür. Ona görə də hər bir insan harada işləməsindən asılı olmayaraq çalışmalıdır ki, bu dünyadan köçərkən, təmiz və yaxşı ad-san qoysun. Övladları, qohum-əqrəbaları, dost-tanışları onunla fəxr etmək əvəzində xəcalət çəkməsinlər.

Qeyd olunan dövrlərin canlı şahidi kimi göstərə bilərəm ki, 1959-1963-cü illərdə Azərbaycan SSR-nin Baş prokuroru işləmiş, 1964-1970-ci illərdə Azərbaycan SSR-nin Ali Məhkəməsi, Rəyasət Heyətinin üzvü, eyni zamanda sonralar başqa rəhbər vəzifələrdə çalışmış Seyfulla Əkbərov yuxarıda təsvir etdiyim yüksək insani keyfiyyətlərə sahib olan şəxsiyyətlərdəndir. O, həqiqətən özündən sonra yaxşı ad-san qoyub getmişdir. Şərh edilən ən yüksək insani keyfiyyətlərlə fərqlənmişdir. Bu fikirlərimi Azərbaycanın tanınmış ziyalıları, istedadlı hüquqşünasları: Sabir Hüseynov, İlyas İsmayılov, Ələddin Sultanov, Akif Rəfiyev, Əlisahib Orucov, Cabir Kərimov, Əfşən xanım Əfəndiyeva, İdris Əsgərov, Eynal Əliyev, Nurəddin Cəfərov, Faiq Allahverdiyev, Oqtay Maqsudov, Ramiz Cəfərov, Cəmil Fərzəliyev, Firidun Məmmədov, Oktay Qasımov və qeyriləri təsdiq edə bilərlər.

Oxucu hər şeydən əvvəl soruşa bilər ki, Xaçmazlı Cahangir Nəsirov hara, Göyçaylı Seyfulla Əkbərov hara ? Onların tanışlıqları və dostluqları haradan başlanmışdır ?

Təvazökarlıqdan kənar olsa da, həmin suallara tam cavab vermək üçün iş fəaliyyətimlə bağlı bəzi məqamların işıqlandırılması yerinə düşərdi.

Keçmişdə S.M.Kirov adına Azərbaycan Dövlət Universitetinin (indi BDU) hüquq fakültəsini 1963-cü ildə bitirərkən, dövlət imtahanlarının başlandığı günlərinin birində Quba Birləşmiş Rayonlararası Komsomol Komitəsinin Konfransında katib vəzifəsinə seçilmişəm.

1964-1967-ci illərdə Qazax Birləşmiş Rayonlararası Prokurorluğunda ilk partiya təşkilatının katibi və Baş müstəntiqi vəzifəsində olmuşam.

1967-1975-ci illərdə Azərbaycan SSR Baş Prokuroru Yanında xüsusilə mühüm işlər üzrə müstəntiq, 1975-1983-cü illərdə Yevlax, 1983-1988-ci illərdə Bakı şəhərinin mərkəzi rayonu, 26-larda (Səbail), 1988-1991-ci illərdə Qazax, Ağstafa, 1991-1992-ci illərdə Əzizbəyov (Xəzər) rayonlarında prokuror vəzifəsində, 1992-1997-ci illərdə Azərbaycan Respublikası Prokurorluğunun İstintaq İdarəsində zona üzrə prokuror işləmişəm.

10 aprel 1997-ci ildə təqaüdə buraxılmışam. O zamandan hazırkı vaxta qədər Azərbaycan Respublikası Vəkillər Kollegiyasının üzvü və eyni zamanda Azərbaycan Respublikası Veteranlar Şurasında Müharibə, Əmək və Silahlı Qüvvələr təşkilatının Nəzarət Təftiş Komissiyasının sədriyəm.

Göstərilən rayonlarda XDS-nin deputatı olmuşam.

İş fəaliyyətimdə müsbət göstəricilər əldə etdiyimdən həmişə növbədən kənar rütbələrə sahib çıxmışam. 1974-cü ildə SSRİ-nin Baş Prokuroru Roman Andreyeviç Rudenkonun imzası ilə Baş ədliyyə müşaviri rütbəsinə yiyələnmişəm. 1983-cü ildə SSRİ Ali Soveti Rəyasət heyətinin fərmanı ilə "Əmək Veteran"ı medalı ilə təltif olunmuşam.

1983-cü ildə SSRİ Baş Prokurorunun Sərəncamı əsasında SSRİ Prokurorluğunun "Fəxri işçisi" döş nişanı ilə təltif edilmişəm. Dəfələrlə SSRİ və Azərbaycan SSR Baş Prokurorlarının fəxri fərmanlarını almışam. Müsbət iş fəaliyyətimlə bağlı istintaq işləri üzrə təcrübəm bütün rayon prokurorluqlarına göndərilmişdir.

Məhz göstərilənlər mənə mənəvi ixtiyar və əsas verir ki, alnı-açıq, ehtiyat etmədən ideal şəxsiyyət, cəmiyyətimizin hörmətini qazanmış, Vətənini, millətini, xalqını sevmiş Seyfulla Əkbərov kimi görkəmli hüquqşünas barəsində xoş sözlərimi ifadə edib xatirələrimi açıqlayım.

Əsas məqsədə keçdikdə, xatirəsi bizə əziz olan Seyfulla Əkbərovla nə vaxt və harada tanış olmağım maraqlıdır.

Qazax Birləşmiş Rayonlararası Prokurorluğunda Baş müstəntiq işlədiyim zaman rayon prokuroru Baş ədliyyə müşaviri, həmişə hörmətini saxladığım Məmmədov Qadir Muğbil oğlu idi. Artıq o, dünyasını dəyişmişdir. Allah ona rəhmət eləsin !

Qadir Məmmədov da o dövrün tanınmış prinsipial prokurorlardan idi. O, 1965-ci ildə Qazax rayon prokurorluğunun iş planına uyğun olaraq, ümumi nəzarət qaydasında (hazırda bu nəzarət sahəsi prokurorluq orqanlarından silinmişdir) Kür çayının sahilində yerləşən, Gürcüstan Respublikası tərəfindən maliyyələşdirilən Poylu daş-qum karxanasında mütəxəssislər vasitəsilə yoxlama aparmış və nəticədə xüsusilə külli miqdarda dövlət əmlakının mənimsənilməsini üzə çıxarmışdı. Odur ki, prokuror Azərbaycan SSR Cinayət Məcəlləsinin 88-1-ci maddəsi ilə (xüsusilə külli miqdarda dövlət əmlakının mənimsənilməsi - indiki AR CM-nin 179-cu maddəsi), 167-ci maddəsi ilə (vəzifəli şəxsin vəzifəsindən sui-istifadə etməsi - indiki AR CM-nin 184-cü maddəsi), 172-ci maddəsi ilə (rəsmi sənədlərin saxtalaşdırılması indiki AR CM-nin 320-ci maddəsi) cinayət işi başlayaraq istintaqın aparılmasını mənə tapşırmışdı.

Cinayət işini icraatıma qəbul edib, toplanmış təftiş materialları ilə tanış oldum. İş barəsində istintaq planı tərtib edib istintaqa başladım.

İlkin istintaqda müəyyən edildi ki, Ağstafa çınqıl-qum karxanasında 1963-1965-ci illərdə istehsal edilən xammal, daş məhsulları Gürcüstanın Rustavi və digər iri tikinti təşkilatlarına göndərilmişdir.

Mütəxəssislərin tərtib etdikləri aktdan da məlum olurdu ki, hazır mallar anbarından təbii itkilər nəzərə alınmaqla 45. 000 manat dəyərində 26. 611 kub metr xır-çınqıl məhsulları çatışmayır.

İş üzrə istintaq operativ və intensiv aparıldığından Daş-qum Karxanası İdarəsinin kadr şöbəsinin inspektoru Valentina Boldıreva, xəzinədar Motya İvanova etirafedici ifadələr verərək göstərmişlər ki, karxananın rəisi Xunsariya Aleksey (Alyoşa) Qriqoryeviç hər ay faktiki işləməyən adamların adına yazdırdıqları pulları baş mühasib Babayev vasitəsilə mənimsəyirlər. Bu hesabla karxanada işləməyən cəmi 60 nəfər "ölü canlar" (mertvıe duşi) vardır. Əmək haqqı cədvəllərində bu şəxslərin adlarına yazılan iri məbləğ pulları Xunsariya imzalayaraq almışdır. Səbəbini də onunla izah etmişdir ki, guya bu insanlar Gürcüstanın uzaq şəhərlərində yaşayırlar, maaşlarını almaq üçün Qazax rayonuna gəlmək imkanları olmur. Özü o şəxslərin pullarını aparıb özlərinə çatdıracaqdır.

İstintaqın gedişatında məlum oldu ki, cinayət işi Gürcüstan SSR-nin Rustavi, Tbilisi, Kabuleti və Adler şəhərləri ilə əlaqədardır. Yəni yuxarıdakı 60 nəfər bu şəhərlərdə yaşayıb işləyirlər.

Məlum olmuşdur ki, karxananın tabe olduğu Zaqafqaziya Metal-Tikinti İdarəsi Tbilisi şəhərində yerləşməklə heç zaman Xuntsariyanın iş fəaliyyəti ilə maraqlanmamışlar və nəzarət etməmişlər.

Bu vəziyyətdə Azərbaycan SSR Prokurorluğu cinayət işinin çox epizodlu və mürəkkəbliyini, qonşu respublika ilə əlaqədar olduğunu nəzərə alaraq, gələcəkdə işin istintaqının davam etdirilməsi AR Prokuroru Yanında xüsusilə mühüm işlər üzrə müstəntiqi işləyən Bəhmən Qurbanova və mənə tapşırılması barədə qərar qəbul etdi.

Hazırda sıralarımızda olmayan Baş ədliyyə müşaviri Bəhmən Qurbanov cinayət işi ilə tanış oldu. İşdə olan çətinlikləri ona izah etdim. İstintaqı hansı qaydada davam etdirilməsi müzakirə edildi.

Gürcüstanın Tbilisi, Rustavi, Qori, Kabuleti şəhərlərində yuxarıda adı çəkilən 60 nəfər şəxsin yaşayış və iş yerlərini müəyyən edib onları şəhid qismində cəlb etdik. Onların hansı təşkilatlarda işləmələri barədə arayışlar, iş üzrə məhkəmə xətt ekspertizaları keçirilməsi məqsədi ilə eksperimental və sərbəst yazı, xətt nümunələri alınaraq işə əlavə edildi. Bu sübutları toplayan zaman müqavimətlərlə də rastlaşdıq. Belə halda rayon prokurorları bizə kifayət qədər köməklik göstərmələrinin şahidi olduq.

Müəyyən edildi ki, bu iş üzrə cəmi 50.000 manat dövlət vəsaiti mənimsənilmiş və israf edilmişdir. 300 nəfər şahid dindirilmiş, çoxsaylı ekspertizalar, o cümlədən mühasibat, mühəndislik-texniki, iqtisadi, məhkəmə xətt ekspertizaları keçirilmiş və 20 nəfər şəxsə ittiham elan edilmişdir. İş üzrə başqa millətlərin nümayəndələri dindirilərkən tərcüməçilərin biliyindən istifadə edilmişdir.

İş üzrə cəmi 40.000 sənəd toplanmış və maddi sübutlarla cildlərə əlavə edilmişdir.

Dövlət əmlakını mənimsəyənlərin, vəzifələrindən sui-istifadə edənlərin, səhlənkarlığa yol verənlərin, sənədləri saxtalaşdıranların dairəsi müəyyən edilərək onlara həmin əməllərinə görə Azərbaycan SSR CM-nin 88-1, 167, 169 (səhlənkarlıq), 172-ci maddələr ilə ittiham elan edilmişdir.

Müttəhimlərə (hazırda təqsirləndirilən şəxslər) elan edilən ittihamlar özlərinin etirafedici ifadələri ilə, şahidlərin dindirilmə və üzləşdirilmə protokolları ilə, keçirilən ekspertizaların rəyləri ilə, işə əlavə olunan əşyayı dəlilləri ilə tamamilə sübuta yetirilmişdi. Bununla da iş üzrə tərtib olunan ittihamnamə (ittiham aktı) Azərbaycan SSR Prokurorunun təsdiqi ilə yekunlaşaraq cinayət işi baxılması üçün Azərbaycan SSR Ali Məhkəməsinə göndərilmişdir.

1966-cı ilin yay günlərinin birində iş otağımda olduğum zaman, çox hörmətlə yanaşdığım prokuror Qadir Məmmədov telefonla zəng edib dedi ki, Ali Məhkəmədən, Respublika Prokurorluğundan qonaqlarımız gəlib, buyurun, gəlib tanış olun. Prokurorun kabinetinə daxil olanda orada tanımadığım iki nəfər mülki paltarda şəxsləri gördüm.

Qazax rayon prokuroru qonaqlardan, döşündə Azərbaycan SSR Ali Sovetinin deputat nişanı olan, orta boylu, başı açıq, sarıyanız, səliqəli geyinmiş, haqqında söhbət apardığımız Seyfulla Əkbərovu və eyni zamanda Respublika Prokurorluğunun məsul işçisi, xoş sifətli, üzü gülər Urxan Həşimovu mənimlə tanış etdi. Digər tərəfdən hörmətli prokuror məni də qonaqlara təqdim edərək dedi ki, məhkəmədə baxılacaq cinayət işi üzrə tərtib olunan çoxsaylı cildlərin müəlliflərindən birisi də bu cavan oğlandır, Cahangir Nəsirovdur.

Prokurorun kabinetində aparılan söhbətlərdən mənə məlum oldu ki, Seyfulla Əkbərov əvvəllərdə Naxçıvan Muxtar Respublikasının prokuroru işləmişdir. Konstitusiyada nəzərdə tutulan 5 il iş fəaliyyəti sona çatmış və sonra Azərbaycan SSR Prokuroru vəzifəsinə irəli çəkilmişdir. Vəzifəsinə görə Azərbaycan SSR Ali Sovetinin deputatı seçilmişdir. Azərbaycan SSR Prokuroru işlərkən onun iş fəaliyyəti sona yetmiş və Azərbaycan SSR Ali Məhkəməsinin hakimi təyin edilmişdir. 2-ci dərəcə dövlət ədliyyə müşaviridir (generaldır).

İkinci qonaq Urxan Həşimovun Azərbaycan SSR Prokurorluğunda Məhkəmələrdə Baxılan Cinayət İşləri İdarəsində prokuror işləməsi məlum oldu. Həmçinin məlum oldu ki, ədliyyə müşaviri rütbəsində o, A.Xunsariya və qeyrilərin müqəssirlənmələri (təqsirləndirilənləri) barədə olan cinayət işində dövlət ittihamını müdafiə etməlidir.

Beləliklə, yuxarıda şərh edilən hər iki qonaqla yaxından tanış oldum. Cinayət işinin istintaqı ilə əlaqədar hakim Seyfulla Əkbərovun suallarına cavab verdim.

Başa düşdük ki, qonaqlar uzun müddət Qazax rayonunda ezamiyyətdə olacaqlar. Bu şəhərdə işgüzar fəaliyyətlərini təmin etmək üçün onların Partiya Komitəsinə məxsus olan mehmanxanada yerləşdirilmələri məsələsi ortaya çıxdı. həmin mehmanxana Mərkəzi Komitədən gələn qonaqlar üçün nəzərdə tutulduğundan orada prokurorluq qonaqlarının yerləşdirilməsi barədə Partiya Komitəsinin Birinci Katibinin razılığı tələb olunurdu. Odur ki, Qadir Məmmədov o vaxtlarda Qazax rayon Partiya Komitəsinin Birinci Katibi işləyən Fikrət Hüseynova zəng çalaraq məsələni müsbət həll etdi.

Cinayət işinin məhkəmədə baxılması 5 iyul 1966-cı ildən başlayaraq 26 dekabr 1966-cı il tarixədək 7 ay davam etdi. Bu müddət ərzində Seyfulla Əkbərovla, Urxan Həşimovla dəfələrlə Tbilisi və Qazax rayonundan 100 kilometrilikdə yerləşən Ermənistanın Sevan şəhərlərində, iş vaxtından kənarda səyahətdə olduq. Qonaqlar belə istirahət saatlarını eyni zamanda rayon prokuroru Qadir Məmmədovla da həyata keçirirdilər.

Məlum olduğu kimi Qazax rayonu Azərbaycanın Şərqində yerləşməklə gözəl təbiət mənzərələrinə malikdir. Burada mehriban, qonaqpərəst, ədəbiyyatı və incəsənəti sevən insanlar yaşayırlar. Hakim Seyfulla Əkbərovun xahişi ilə əlaqədar qonaqları sevimli şairimiz Səməd Vurğunun anadan olduğu Yuxarı Salahlı kəndindəki ev muzeyinə, şairin sağlığında ən çox sevdiyi Damcılı bulağına, Göyəzən dağına gedərək təbiətin gözəlliklərini birgə seyr etmişik.

Bununla da qonaqlarla bizim aramızda mehribançılıq, səmimiyyətçilik, dostluq münasibətləri yarandı.

Mən belə başa düşdüm ki, qonaqlar dövlətə sadiq olmaqla öz vəzifələrini layiqincə yerinə yetirdilər və eyni zamanda Qazax rayonunun görməli yerlərini ziyarət etməklə bu torpağa və əhaliyə qarşı öz sevgi və məhəbbətlərini ifadə etdilər.

Nəhayət, Azərbaycan SSR Ali Məhkəməsinin Cinayət işləri üzrə Məhkəmə Kollegiyasının səyyar heyəti öz işini yekunlaşdırdı. Məhkəmə iş üzrə ittihamedici hökmünü elan etdi.

Hökmdən məlum oldu ki, Xunsariya və onun cinayətkar yoldaşları layiqli cəzalarına çatmışlar.

Hörmətli qonaqları Bakı şəhərinə yola saldıqdan bir müddət sonra Respublika Prokurorluğundan zona üzrə prokuror, hazırda dünyasını dəyişmiş Baş ədliyyə müşaviri Adil Əsgərov telefonla Qadir Məmmədova zəng çalaraq demişdir ki, Ali Məhkəmə müstəntiqlər Bəhmən Qurbanovun və Cahangir Nəsirovun apardıqları keyfiyyətli və səriştəli istintaqlarından razı qalmışlar. Ali Məhkəmənin göndərdiyi təqdimata Respublika Prokurorluğu baxmış və xüsusilə mühüm işlər üzrə müstəntiq Baş ədliyyə müşaviri Bəhmən Qurbanova, I dərəcəli hüquqşünas Cahangir Nəsirova, rayon prokuroru Qadir Məmmədova 23 yanvar 1967-ci il tarixli, 12 saylı əmrlə təşəkkür elan edilmişdir.

Biz başa düşdük ki, bu sevinci bizə bəxş edən şəxsən Seyfulla müəllim olmuşdur.

Azərbaycan SSR Prokurorluğunun İstintaq İdarəsi yuxarıda göstərilən cinayət işinin istintaqını nümunəvi hesab edərək təcrübə mübadiləsi aparılması məqsədi ilə tikinti işlərinin istintaq metodikası haqqında məlumatı məktubla rayon prokurorluqlarına göndərməyi qərara almışlar.

Mən Respublika Prokurorunun əmrini və təcrübə mübadiləsi barədə rayonlara göndərilən məktubun surətini dəyərli qənimət kimi indiyə qədər digər sənədlərlə arxivimdə saxlayıram.

Əlbəttə ki, yeddi ay ərzində Seyfulla Əkbərovla yoldaşlıq etdikdə mən tam inandım ki, o, hüquqşünasların komandiri olmağa qadirdir.

Qazax rayonunda müstəntiq işlədiyim illərdə dostluq etdiyim rayon qəzetinin redaktoru, ziyalı bir şəxs Qasım Murquzovla 1969-cu ildə Bakı şəhərində rastlaşdım. Hal-əhval tutduq. O, mənə danışdı ki, Tovuz rayon Milis İdarəsində müstəntiq işləyən qohumumuz Mustafa Murquzov, guya rüşvət alıb deyə, onu həbs etmişlər. Onun haqqındakı cinayət işi hazırda Azərbaycan SSR Ali Məhkəməsinin hakimi Seyfulla Əkbərovun icraatındadır. Rayondan gələn dostum əlavə etdi ki, Mustafa Murquzov əslində rüşvət almamışdır. Bu məsələni süni qaydada onu istəməyən bir nəfər quraşdırmışdır.

Mən redaktoru dinlədikdən sonra güldüm. O, gülməyimə təəccübləndi. Dedi ki, nə üçün güldünüz ? Cavab verdim ki, sizin bəxtiniz gətirib ki, o işə Əkbərov yoldaş baxacaqdır. Arxayın ola bilərsiniz. Mən hörmətli Əkbərovu yaxşı tanıyıram. O, son dərəcə savadlı, obyektiv və rəhmdar hakimdir. Heç kəsdən qorxmur. Heç kəsin təsiri altına düşmür. Əgər M.Murquzova elan olunan müqəssirçilik (ittiham) sübuta yetməzsə, o, bəraət alacaqdır.

Q.Murquzov sözlərimdən təsəlli taparaq məndən ayrıldı. Bir aydan sonra Qazax rayonundan mənə zəng vuraraq yaxşı ovqatla sevincini bildirdi və dedi ki, kaş ki, bütün hakimlər Seyfulla Əkbərov kimi olaydılar. Onun sədrliyi ilə keçirilən məhkəmə iclasının sonunda Mustafa Murquhov haqqında bəraət hökmü elan olundu və o, məhkəmə zalından azadlığa buraxıldı.

Buradan da məlum oldu ki, Seyfulla Əkbərov haqqında ağız dolusu danışdıqlarımız təriflər həyatda da öz təsdiqini tapır.

Oxucu bilsin ki, şərh olunanlar həqiqətdir. M.Murquzovun və A.Xunsariyanın haqqında baxılmış cinayət işləri hazırda da Azərbaycan Respublikası Ali Məhkəməsinin arxivində saxlanılır.

Qeyd etmək lazımdır ki, qanunçuluğun, ictimai asayişin mühafizəsi kimi sərt, ciddi, tələbkar qaydalarla uzun müddət qüsursuz işləmək, hamının hörmətini, etibar və etimadını qazanmaq, mehriban, qayğıkeş insan olmaq, sevilib xatırlanmaq hər kəsə nəsib olmur. Məhz Seyfulla Əkbərovu hörmətli edən onun prinsipiallığı, qanunpərəstliyi, tələbkarlığı, adamların talehinə ədalətli yanaşması, qanunların tələblərini düzgün yerinə yetirməsi olmuşdur.

Seyfulla Əkbərovu hörmətli edən bir də onun yüksək mənəvi keyfiyyətləri idi. Sadə, zəhmətkeş insanları daha çox sevmiş, onların qayğılarına heç vaxt biganə qalmaması idi.

Seyfulla Əkbərov həm də nümunəvi ailə başçısı olmuşdur. Aldığım məlumata görə onun dörd oğlu və beş qızı vardır. Onların hamısı ali savad almış və ailə həyatı qurmuşlar. Ataları ilə həmişə fəxr edirlər.

Göstərilən xatirələrin xarakterik xüsusiyyəti ondan ibarətdir ki, Seyfulla Əkbərovun həmkarları, onunla birlikdə işləyənlərin əksəriyyəti artıq dünyalarını tərk etmişlər.

SSRİ Prokurorluğunda və Azərbaycanda tanınmış görkəmli hüquqşünas, III dərəcəli dövlət ədliyyə müşaviri Seyfulla Əkbərovun xatirəsini bugün yad edərkən, onunla bir dövrdə işləyərək dünyalarını dəyişmiş dostlarının, yetişdirdiyi-tərbiyələndirdiyi və formalaşdırdığı adamlarının, silahdaşlarının adlarını çəkməmək, onları yada salmamaq qəbahət olardı.

Seyfulla Əkbərovun səviyyəsində olmuş, o korifeylər kimlərdir ?

Belə ki, XX əsrin ortalarından başlayaraq SSRİ-nin ən yüksək ixtisaslı prokuror kadrları arasında Azərbaycandan da əvəzolunmaz prokurorlar yetişərək layiqli fəaliyyət göstərmişlər.

İndi biz fəxrlə qeyd edə bilərik ki, nəzərdə tutulan istedadlı, prinsipial, ədalətli, obyektiv, saf prokurorları yada saldıqda, hələ SSRİ dağılmamışdan qabaq Moskvada Baş Prokurorluğunun kitabında adları qızıl hərflərlə yazılmış Seyfulla Əkbərov, Akif Abdullayev, Abbas Zamanov, Şamil Qasımbəyov, Şükür Rzayev, İsmət Qayıbov, Sabir Qasımov, İsmayıl Əliyev, Qadir Məmmədov, Vəli Gülməmmədov, Kamal Hacıyev, Nurəddin Zeynalov, Zakir Zeynalov, Hüseyn Nəsirov, Salman Cəfərov, Elmar Qarayev, Ağakərim Kərimov, Tapdıq Əmirov, Ata Əliyev, Mehdiqulu Mahmudov, Ağaverdi Abbasov, Afəridə xanım Xəlilova, Soltan İmanov, Novruz Xudiyev, Nadir Mürşüdov, Yamən Yusifov, İbrahim İsmayılov, Həbib Rzayev, Kazım Talıbov, Həmid Rəhimov, Bəhmən Qurbanov, Tələt Qəmbərov, Aydın Hüseynov, Oruc Abdullayev, Tofiq Vəliyev, Əliş Əliyev, İsmayıl Hacıyev, Emin Eminov, Abbas Əliyevin və qeyrilərin adları vardır.

Mən şəxsən bu dahi insanların hamısı ilə ünsiyyətdə olmuşam. Prokurorluqdan söz düşəndə onların salamat olduqlarını təsəvvür edirəm. Mənim qəlbimdə onların adı, işləri, zarafatları, incə nitqləri canlanır, zahirə çevrilir. Hiss edirəm ki, həmin gözəl qamətli prokurorlar yanımdadırlar. Gecələr də yuxularda onları görürəm.

Şübhəsiz ki, göstərilən dahi insanlar unudulmamışlar. Onların xatirələri bizə əziz və doğmadır.

Razılıq hissi ilə göstərmək lazımdır ki, Azərbaycan dövləti bütün dövrlərdə prokurorluq işçilərinin qayğısına qalmış və əməklərini yüksək qiymətləndirmişdir.

Yadda qalan xatirələrə yekun vuraraq deyirəm ki, korifey prokurorların arasında Seyfulla Əkbərovun özünəməxsus xüsusi yeri olmuşdur. Onun həyatı, iş prinsipləri, iş fəaliyyətində gördüyü işlər gənc nəslimiz üçün tərbiyə məktəbidir.

Adını çəkdiyim əziz insanların xatirələri onların yaxınlarının, dostlarının qəlbində həmişə yaşayacaqdır. Allah onlara rəhmət eləsin !

Cahangir Nəsirov

Ədalət.-2014.-6 mart.-S.5.