Zirvəyə gedən yol
Tarixin bütün dövrlərində Azərbaycan qadını haqsızlığa, ədalətsizliyə, zülmə qarşı mübarizə aparıb, xalqın azadlığı uğrunda çarpışıb, ziyalılığı ilə seçilib. Bərdə hökmdarı Nüşabə uzaqgörənliyi, iti ağlı, dərin zəkası ilə böyük Nizaminin gözəllik simvolu kimi vəsf etdiyi bu torpağa göz tikənlərə silahdan da kəsərli sözlə cavab verib. Öz dövründə insanların əmin-amanlıqla yaşamasına çalışıb. Xan qızı Xurşud Banu Natəvan ədəbi məclislər təşkil edərək, qadınların Dünyaya baxışını dəyişib. Onların gözünə günəşdən nur verib. Dağlardan Şuşaya su çəkdirib. Şuşada Dünyaya göz açanlar onu "Xan Qızı Bulağı" ilə tanıyıb, böyüyəndə tarixi vərəqləyiblər. Koroğlunun Nigarı, Qaçaq Nəbinin Həcəri silaha sarılaraq ərləri ilə çiyin-çiyinə düşmənlə döyüşüblər. Rus artillegiyasının Allahı sayılan general Əlağa Şıxlinskinin ömür-gün yoldaşı, ilk azərbaycanlı hərbiçi, Birinci Dünya müharibəsində zabit qadınlarla birlikdə, ilk dəfə "Qırmızı Xaç" cəmiyyətini yaradıb, həmin cəmiyyətin xəstəxanasına rəhbərlik etmiş Nigar xanım Şıxlinskaya, ilk təyyarəçi qadın, böyük Vətən müharibəsində qırıcı təyyarəçi və qadınlardan ibarət qırıcı aviasiya polkunun komandir müavini, 500-dən artıq döyüş uçuşu keçirmiş Züleyxa Seyidməmmədova, Şərqdə ilk opera yazan xanım bəstəkar Şəfiqə Axundova və daha kimlər, kimlər...
Bu gün Azərbaycan qadını alimdir, diplomatdır, rəssamdır, şairdir, yazıçıdır, xalq hakimidir, hərbiçidir, polisdir, çiynində rütbə daşıyan qanun keşikçisidir. Milli Məclisdə qanunlar qəbul edir, Beynəlxalq təşkilatların tribunalarından Azərbaycanın haqq səsini Dünyaya çatdırır, milli dəyərlərimizi qoruyur.
Əsl insan özündən sonrakı nəsillərin baxması üçün iz, görüb-götürməsi üçün pak əməl, yaxşı ad, san qoyub getməlidir. Bunu isə qanından, genindən, əsl nəcabətliyindən gələnlər, daxili Dünyası xeyirxahlıqla, mənəvi sərvətlə, sevgi ilə dolu olanlar bacarırlar.
İnsan həyatda
düzgün yol tutmalıdır. Yollar çoxdur, hamısı da
bir-birindən fərqli. İnam, əqidə, mənlik yolu var.
İnsanları birləşdirən və ayıran yollar var. Əsas odur
ki, öz yolun olsun. Bu yolu tutub gedəsən, yolunu azmayasan. Bir yol da var. Onun adı ömür yoludur. Bu yol hər
kəsin yalnız
özünə məxsusdur. Belə
insanlar haram tikə
yeməzlər, həyatlarının mənasını xalqa, vətənə
xidmət etməkdə görür, bir şəxsiyyət kimi yetişirlər. Onlardan biri haqqında söhbət
açacağam. O, bu cür yaşamağı
bacarır, başı uca gəzir, hamının gözünə düz baxır. Çalışdığı vəzifələrə hörmət
və şərəf gətirir.
Ləyaqətə qulluq edir ona tapşırılan
sahələrə. Respublikada
tanınan, sayılıb-seçilən
ziyalılarındandır. Ziyalı ailəsində böyüyüb,
alim tərbiyəsi alıbdır.
Təbii,
sadə, təvazökar
insandır. Ədliyyə müşaviridir.
Yaxından tanıdığım üçün bir
jurnalist kimi haqqında mətbuatda yazmaq istədiyimi bildirsəm də razı olmamışdı. Deyir, əgər yaxşı işləyirəmsə, bu mənim
vəzifə borcumdur. Dövlətimə, xalqıma, vətənimə
olan sevgimdir. Mən
belə
düşünürəm,
çünki bu cür görmüşəm. Bu
yaxınlarda ölkə
prezidentinin Fərmanı
ilə təltif olunduğunu
eşitdim. Təbrik edərək, əvvəlki fikrimi yenə dedim. Bu dəfə sözümü
yerə salmadı
Reyhanə xanım.
Bilirsiz, Vaqif müəllim, məni düzgün başa düşün. Mətbuata da, jurnalistlərə də
böyük hörmətim
var. Düzdür, insan bir anda dönüb arxaya baxanda illərin necə sürətlə keçdiyini görüb,
özündən
soruşur. Mən
nə etmişəm? Gələcək nəsillər üçün,
övladlarım üçün hansı yolu, pak əməli qoyub gedirəm?
Əgər yaxşı iz, ad-san qalırsa, onda rahat nəfəs alırsan. Bu, övlad
üçün də
böyük qürur və
baş ucalığıdır.
Ancaq cəmiyyətdə elə adamlar var ki, belə şeyləri özünü reklam elətdirmək, mən də varam, demək kimi başa
düşürlər. Əgər işlədiyim sahədə rəhbərliyin diqqətindəyəmsə, yüksək vəzifələr etibar olunursa mənə, mükafat sayıram bunu. Rahat oluram ki, yaşadığım
cəmiyyətdə dövlətimə, xalqıma az
da olsa köməyim dəyir. Dövlətin mənə çəkdiyi zəhmətin əvəzində bir iş görürəm. Bir də, kim nə aparacaq bu dünyadan?
Reyhanə xanımın sözləri böyük şairimiz Məmməd Arazın bir
misrasını yadıma saldı - "Dünya sənin, Dünya mənim, Dünya heç
kimin".
Həmişəyaşar şair
dünyasını dəyişəndən sonra sanki yenidən bu həyata qayıdaraq, Dünyanı beş
əllə tutan insanlara deyir bunu. Ulu öndər
Heydər Əliyev
deyirdi ki, nə
qədər böyük
hörmət qazansan
da, gərək başını o
qədər aşağı
tutasan, o qədər təvazökar olasan,
qanun çərçivəsində işləyəsən,
yüksək mənəviyyata malik olasan.
İnsanın mövqeyi nə qədər yüksək olsa da o, insan olduğunu
heç vaxt unutmamalıdır. Burada Həzrəti Əlinin bir kəlamı
yada düşür, "özüm də
insan olduğum üçün, heç kəsi özümdən kiçik görmək istəmirəm".
Sadə və təvazökar adamlar səmimi, mehriban, vəzifəsi çərçivəsində ciddi, qanunu həmişə yüksəkdə görürlər. Reyhanə
xanım elə bir
ailədən
çıxıbdır ki, O, belə
də
olmalıdır. Bu cür mühiti
görüb, belə
tərbiyə alıb.
Atası İbrahim Kərimov Azərbaycan Sənaye İnstitutunun birinci
kursunda oxuyanda Böyük Vətən müharibəsi başlayır. Minlərlə azərbaycanlı
gənc kimi o da
könüllü cəbhəyə gedir. Döyüşdən-döyüşə atılır.
Gənc
döyüşçünün şücaəti komandirlərin diqqətindən yayınmır.
Qələbə döyüşlərinin ardınca Ali
Baş Komandan tərəfindən verilən mükafatlar, orden
və medallar, təşəkkür dolu məktublar onu qələbəyə daha da
ruhlandırırdı. 1944-cü ildə Belorusiyanın Qomel
şəhəri uğrunda gedən döyüşlərdə İbrahim Kərimov bir ayağını itirir.
Vətənə dönəndən sonra Azərbaycan Dövlət Universitetinin
hüquq fakültəsinə daxil olur. İnstitutu fərqlənmə ilə
bitirən gənci elə bu elm
ocağında saxlayırlar. İllər bir-birini əvəz etdikcə,
O da elmin yollarında irəliləyərək
bir alim kimi yetişir. Tanrının verdiyi
ömrü həmişəlik bu elm
ocağıyla bağlayır. Onlarla
hüquqşünas alim yetişdirir. Hüquq
sahəsinə aid monoqrafiya və kitablar yazır.
Bu fakültənin
formalaşmasında İbrahim Kərimovun
böyük rolu olmuşdur. Peyğəmbər kimi adam
idi. Müharibədə həlak olanların uşaqlarına,
imkansız tələbələrə necə deyərlər, çörək ağacı olubdur.
Haşiyə: Hazırda ədliyyə orqanlarında yüksək vəzifə tutan, yaxından
tanıdığım bir yoldaş danışır ki, kənddən gəlmişdim. Atam
kolxozda naxırçı, anam isə
sağıcı işləyirdi.
Azərbaycan
Dövlət
Universitetinin ikinci kursunda oxuyurdum. Bizim dekan
İbrahim müəllim
idi. Müəllimlərdən biri mənə qiymət yazmırdı.
Çox dilxor idim, bikef durmuşdum koridorda pəncərənin
qabağında. Necə
deyərlər, aranı dağa,
dağı arana çəkirdim,
özümdə
deyildim. Arxadan kimsə
çiynimdən
çəkdi.
Elə
bil yuxudan oyandım. İbrahim müəllim idi. Soruşdu ki, niyə
bikefsən?
Dedim filan müəllim mənə qiymət yazmır. Xeyli fikrə getdi, qolumdan tutub kafedraya
qayıtdı. Müəllimlər
hamısı içəridə idi. İbrahim
müəllim ciddi adam idi. Üzünü həmin müəllimə tutub dedi: "Həmişə adamı olanlara qiymət yazırsız. Bir dəfə də adamı olmayana yazın. Bu uşağın da adamı mənəm",
- deyib çıxdı. Bir anda otağa
sükut çökdü. Səhəri gün dedilər ki, dekan səni
çağırır. Getdim, telefonla
danışırdı. Başı ilə stolun üstündəki karopkaya işarə edib, götür dedi. Mən də götürüb
otaqdan çıxdım. Yataqxanada
açanda gördüm ki, corab, köynək, kostyum var içində. Düzü, həm
sevindim, həm də kövrəldim. Əvəzolunmaz adam
idi. Ömrümün axırına kimi unutmaram
onu. Bugünkü həyatı
O böyük insan verib mənə.
Tələbələr ürəklərini açırdılar ona. Onun böyük ürəyi vardı.
Təmənnasız yaşadı bu dünyada. Bu da nəsildən gəlirdi. İbrahim müəllimin
atası Şeyx Əhməd
əsrin əvvəllərində "İraq, Təbriz, İsgəndəriyyə"
Ali Ruhani Universitetini bitirmişdi. Şeyx
adını orada vermişdilər.
Bir çox dini kitabların müəllifidir. 1945-54-cü illərdə Bakıdakı
Hacı Əjdər
bəy məscidinin axundu olub.
Sadəlik,
xeyirxahlıq, əl
tutmaq atasından keçmişdi İbrahim müəllimə.
Alimin böyüklüyü onun sadəliyində, səmimiliyində, insanlara diqqət və qayğı göstərməyində, alicənablığındadır. Tarix xeyirxah
insanları unutmur. Onlar yaddaşlarda
qalır, qəlblərdə heykələ dönürlər. 1988-ci ildə
dünyasını dəyişən İbrahim Kərimov kimi. Yetirmələri bu gün də onu böyük
sevgi hissi ilə
xatırlayır, tanınmış ziyalılar xatirələrini yazırlar.
Bax, belə bir ailədə böyümüşdü Reyhanə xanım.
Deyir, orta məktəbdə oxuyanda anam məni balaca müəllimə deyə çağırardı. İstəyirdi böyüyəndə müəllim
olum. Özü M.F.Axundov adına rus
dili və ədəbiyyatı İnstitutunda müəllim işləyirdi. Atam isə deyirdi: mən xanım qızımı
qanunlarımızın keşiyində görmək istəyirəm. Mən də gülüb deyirdim
ki, inşallah, Şeyx babam köməyimə çatar.
Deyirlər insanın taleh yazısı, alın yazısı var.
Sanki ulu Tanrı bu məsum qızın səsini eşidib anası Adilə xanımın, atası
İbrahim müəllimin arzularını birləşdirdi. Reyhanə xanım həm tarixçi, həm də hüquqşünas
oldu.
İnsan onu əhatə edən cəmiyyətdən də əvvəl ailədə yetişir, özünü tanıyır, gələcək həyat yolunu müəyyənləşdirə bilir. Reyhanə xanım Bakı
Dövlət
Universitetinə,
tarix fakültəsinin
axşam şöbəsinə qəbul olur. İşləmək lazım idi.
Dünya yaxşı insanlardan xali deyil. Atasının
tələbəlik yoldaşı, yaxın dostu, səxavətli insan, müdrik
şəxsiyyət, ictimai xadim Arif Əfəndiyev onu Ədliyyə Nazirliyinin notariat
idarəsinə kargüzar təyin edir. Həyat
yolu da burdan başlayır.
Bulağın suyu dərindən çıxırsa qurumaz, deyib babalar.
Tapşırılan işə məsuliyyətlə yanaşması,
işçilərlə ünsiyyəti, hər şeydən əvvəl yüksək mədəniyyəti, etikası, səmimiliyi, davranışı, işinə olan marağı rəhbərliyin diqqətindən yayınmadı. Pillə-pillə yüksəldi Reyhanə xanım. Ümumi şöbənin
rəisi, notariat və VVA idarəsində birinci dərəcəli
məsləhətçi, 2004-cü ildən isə Ədliyyə Nazirliyinin vətəndaşlıq vəziyyəti
aktlarının reysteri xidmətinin
rəisi vəzifəsində
çalışır. Yaxşı
işlədiyinə görə vaxtından əvvəl ədliyyə müşaviri
rütbəsi
verilib. Bu yaxınlarda respublika prezidentinin Fərmanı ilə "Dövlət qulluğunda fərqləndiyinə" görə medalı ilə təltif olunub.
Atdığı bütün addımlarda qanunun aliliyini, haqq-ədaləti həmişə gözləyib. Milli-mənəvi dəyərlərimizi gözünün üstündə saxlayıb. Elə bacısı Kəmalə xanım, qardaşı, polkovnik-leytenant Böyükağa müəllim də belədir. Çalışdıqları sahədə insan amilini və qanunu həmişə yüksəkdə görürlər.
Reyhanə xanım heç vaxt adlı-sanlı, şöhrətli olmağı ağlına belə gətirməyib. Yaşlı qayınanasına, qayınatasına doğma valideynləri kimi baxır, yollarını saxlayır, diqqətli olur, onlara. Qohumları da ondan razıdırlar, çox istəyirlər onu.
Ailə xoşbəxtliyi insan ömrünün bəzəyidir. Bu xoşbəxtlik işığını Reyhanə xanımın evində yandıran elə onun özüdür. Ömür-gün yoldaşı Mübariz müəllim iş adamıdır. Rusiyanın böyük zavodlarından birinin Azərbaycanda nümayəndəsidir. İki min nəfərə yaxın işçisi olan bu istehsal müəssisəsində böyük nüfuz sahibidir. Geniş qəlbi, böyük ürəyi var. Xeyirxahlıq, adamlara əl tutmaq onun genindədir.
Hər ailə özlüyündə kiçik bir dünyadır. Reyhanə xanımın ailəsində sevgi işığı yanır, ailə məhəbbəti yaşanır. Bu işığın şöləsində iki gənc böyüyür. Dan ulduzu kimi parlayan qızı Səmra xanım anasının yolu ilə gedir, on iki yaşlı oğlu Ümid dərs əlaçısıdır. Şahmatla məşğul olur. Bakı məktəbləri arasında keçirilən yarışlarda Fəxri yerləri tutur həmişə. Gələcəyə ümid dolu arzularla gedir.
Hər bir insanın həyatı yazılmamış kitabdır. Yaxşı iş, xeyirxah əməl insanı mənən ucaldır, onu yaşadığı cəmiyyətin ən ləyaqətli üzvünə çevirir. Qurani-Kərim qadının cəmiyyətdəki yerini və hörmətini həmişə yüksəklərə qaldırır. Çiçəklənən ölkəmizdə Azərbaycan qadını zirvəyə doğru gedir, yüksəlir. Zirvədən isə hər yer görünür.
Vaqif
Şükürov
Ədalət.-2014.-14
yanvar.-S.6.