Rəşad Məcid
Kimsən?
Sən kimsən, hardan gəlmisən,
İblismisən, mələkmisən?
Dediyin nə, etdiyin nə,
Doğrumusan, kələkmisən?
Bu gəlişin, bu gülüşün,
Bu öpüşün mənimdimi?
Qara gözün, uzun saçın,
Bu ağ dişin mənimdimi?
Kim sənə şübhə eləyər,
Kim sənə yanakı baxar?
Bu duruluq, bu saflığa,
Kim səhv edib qara yaxar?
Bircə sənin hər sirrini,
Hər sehrini bilən mənəm.
Sevə-sevə qucağında
Qəzəbindən ölən mənəm!
Gedib daşa dəyən
SMS-lərim...
Belə olmalıymış, yəqin ki, belə,
Gücüm yox bu çarxı geri döndərim.
Sənə hisslərimi çatdırammadı
Gedib daşa dəyən SMS-lərim.
Soyuq sözlərinlə qayıtmasaydı,
Gülsəydi üzümə yeni səhərim.
İndi heç bu qədər əzab verməzdi
Gedib daşa dəyən SMS-lərim!
Zamanı dəyişər, yolu göstərər,
İçimdə qalmazdı bunca qəhərim.
Bəlkə də bir başqa tale cızardı
Gedib daşa
dəyən SMS-lərim.
Altını çəkirəm soyuqluğunun,
Sənin hallarından yoxdu xəbərim.
İndi
sənidəmi yandırır
görən
Gedib daşa
dəyən SMS-lərim?
Gəl bunu yenə də taleyə yazaq,
Biz çəkə bilmərik
belə qədəri.
Hüznlə, kədərlə qayıdıb
anaq,
Gedib daşa dəyən SMS-ləri...
Aldatdın məni
De, mən sənə
neyləmişdim? -
Balacam, aldatdın
məni.
De, haçan düzünü
dedin,
De, haçan aldatdın
məni?
Mən oldum bir dəli
aşiq,
Ruhum ruhuna sarmaşıq.
Bədəndə od, gözdə işıq,
Dildə
"can" aldatdın məni.
Nə dur dedin, dayan dedin,
Nə yuxudan oyan dedin,
Sonacan yüz yalan dedin,
Sonacan aldatdın
məni.
Darıxanda
Mən sakit darıxmıram,
Adam kimi darıxmıram,
Hüceyrələrim
ağzını açıb
çığırır.
Damarlarım
qanımdakı aclığı
bütün vücuduma
yayır.
Beynim qollarımda
döyünür -
ilikləriməcən darıxıram.
Əllərim, barmaqlarım
uzanır, uzanır,
girir torpağın
altına,
Mən sənsiz darıxanda
Min il əvvəlki
sümüklərim
sızıldayır.
Çıxırsan...
Çıxırsan yavaş-yavaş,
Vətənimdən çıxırsan!
Beynimdən aralanıb,
Bədənimdən çıxırsan.
Məğlub ordu kimisən,
Sınıq-salxaq çıxırsan.
Ərazimdən astaca,
Yorğun, axsaq çıxırsan.
Geri dönür nəfəsim,
Sifətim işıqlanır!
Cadudan ayılmışam,
Gözümün dibi yanır!
Nə yaxşı ki, çıxartdın
Bu tilsimdən, ilahi!
Mənə sakit həyat ver,
Rahat bədən, ilahi!
Vitrindəki mələyim
Səmadan bu an gəlib,
Uçan boşqabnan gəlib.
Gözünə qurban!
Gəlib
vitrindəki mələyim.
Oldum ruhuna təslim,
O möcüzə, o tilsim.
Hüzuruna tələsim
Vitrindəki mələyin.
Qışda bahar kimidi,
Təzə nübar kimidi,
Ağappaq qar kimidi,
Vitrindəki mələyim.
Gələcəyin qadını,
Sovqat etdi dadını.
Unutdurdu
adımı
Vitrindəki mələyim.
O
Baxma ki, sakit dayanıb,
Qəfildən götürər səni!
Qoparıb dostdan, tanışdan
Evindən itirər səni.
Qaldırıb göyün qatına,
Mindirər şahlıq atına.
Dad gətirib həyatına,
Cənnətə yetirər səni.
Əlində yarağın qalmaz,
Dəftərin, varağın qalmaz,
Heç
nəyə marağın
qalmaz,
İşini bitirər sənin.
Quruyarsan
bulaq kimi,
Bezər,
doyar uşaq kimi,
Bir qırıq oyuncaq kimi
Qaytarıb gətirər səni!
BİR
DƏ GƏLMƏYƏCƏK...
Elə möcüzələr yaratmısan
ki,
Elə dəqiqələr yaşatmısan
ki,
Olmayıb heç onun yüzdə biri də
Nə mənim dünyamda,
nə bu dünyada.
Sən elə telləri qırıb getmisən,
Sən elə yaralar vurub getmisən,
Təpəri yoxdu ki, dözüb dayansın,
Nə mənim dünyamın,
nə bu dünyanın.
Qəfil
gəlişinlə suç
eləmisən
Sənsiz
keçən ömrü
puç eləmisən
Vurmayıb heç zaman belə qar-yagış
nə mənim dünyamı,
nə bu dünyanı
Bilmədim iblissən, ya mələk, Qadın,
Ətri, gözəlliyi çiyələk
Qadın.
Bir də gəlməyəcək
sənintək Qadın
Nə mənim dünyama,
nə bu dünyaya.
Üzünə qurban
Ötən hər sirli gecənə,
Gələn gündüzünə qurban.
Kədərlənən baxışına,
Gülən gül üzünə qurban.
Əsən qara tellərinə,
Nur yayan ağ
əllərinə.
Doğru
deyən dillərinə,
Hər yalan sözünə qurban.
Gah müdriksən, gah uşaqsan,
Həm günahkar,
həm də haqsan.
Ayrılmaram hardan baxsam,
Qurban, hər üzünə qurban!
Dik atılıram
Mən bu dərmanları atandan sonra,
Div kimi, daş kimi yatandan sonra,
Sanki bir qalada yuxulayıram,
Nə söz eşidirəm, nə səs duyuram.
Vurub, silkələyib oyatsalar da,
Lap belə yanımda top atsalar da,
Tüküm də tərpənmir,
vecimə olmur! -
Nə şimşək çaxması,
yağış səsindən,
Göylərin, yerlərin titrəməsindən,
Nə fişəng atəşi,
tüfəng səsindən,
Qapı
taqqıltısı, ya
zəng səsindən
- yox, oyanmıram!
Bircə
həyəcanla dik atılıram,
SMS-lərinin cingiltisindən.
Sən yaxşısan
Nə gənc qadın, nə gözəl qız,
Nə istedad? Sən yaxşısan!
İstəmirəm bir özgə
hiss,
Bir özgə dad - sən yaxşısan!
Gah yerə çırp, göyə qaldır,
Gah ağladıb, gah da güldür,
İstəyirsən məhv et, öldür,
Ya da yaşat - sən yaxşısan.
Özgə nursan, başqa nəfəs,
Varlığına yoxdu əvəz.
Deyəcəyəm lap məni əz,
Lap belə at - sən
yaxşısan.
Əgər...
Əgər bircə dəfə
səni
beynimin dərinliklərindən
çıxarıb
yerinə nəsə
qoymağı bacarsaydım,
Əgər ürəyimin üstünə
bələdiyim ürəyini
çıxarıb ovcumda saxlasaydım,
mələşən,
çığrışan,
ağzını açıb
yem istəyən
hüceyrələrimi
süni qidalarla doyuzdursaydım,
Əgər səni cəmisi
bircə dəfə,
heç olmasa, bircə saatlığa -
ya futbola baxanda,
ya tədbir aparanda,
kitab oxuyanda,
çıxış eləyəndə
-
unutsaydım,
unuda bilsəydim,
çoxdan unutmuşdum.
Amma etmədim,
bacarmadım,
istəmədim,
ağlımdan da keçirmədim -
Mən bu yaşamı seçdim.
Beynimin hər an səni düşünməsini,
ürəyimin səninlə
döyünməsini,
hüceyrələrimin səninçün
çığırmasını...
SEVDİM.
Səndən yaxşısı
Əgər səndən yaxşısını
tapmağa ümidim
olsaydı,
çoxdan atmışdım
səni.
Əgər sənin eynini tapa bilsəydim,
həmən unutmuşdum
səni.
Bir az sənə
bənzərinə rastlasaydım
əgər...
Amma neynim,
səndən sonra yüz pillə boşdu.
Yat...
Beynindəki bu qaynaşan dərdləri
Unutmağın bir yolu var
- yıxıl yat.
Yuxun yoxsa şərablardan nuş elə,
Çək başına, viski, araq, çaxır, yat.
Keçmiş olsun yaşananlar,
olanlar,
Şükr elə ki, hələ
yenə qalan var.
Özün tovla öz başını yalanla
Kim danışar indi sənə nağıl, yat!
Düşündükcə bu dərd səni yeyəsi,
Gözünü yum, gəlsin tütək,
ney səsi,
Hər günahın öz sahibi, yiyəsi,
Qəm eləmə
Tanrı göydən
baxır, yat.
Düşüncə
Səni
anlamağa
çalışdım,
gördüm ki,
səhər açılır...g
İstedadlı mələk
Sən sevməyi gözəl oynayırsan!
Başqasının ürəkdən,
candan,
səmimi sevgisindən
də
təbii görünür
sənin sevgini oynamağın!
Vüsala
çatmağı imitasiya
edənlər çoxdu!
Amma sən darıxmağı,
titrəməyi,
kövrəlməyi,
sevinməyi də
gözəl oynayırsan!
Beləsi
çətin tapıla!
Təksən!
Təpədən dırnağa
yalanla, riyayla
yoğrulmuş
istedadlı mələksən!
Qopardım
Abi-həyat, ilahi dad yox oldu dodağından,
dodağımı salladım,
Nə xalından,
nə çiynindən
titrədim.
Bədənimdən bir gizilti keçmədi,
Buz qayaya rastladım.
Səhər səndən qalanları düşündüm.
Gözlərimə bir-iki tel sataşdı.
Saçlarını darağımdan
qopardım,
tulladım.
Çıxma beynimdən
Qurban olum, çıxma beynimdən -
elə et ki, sənsiz bir addım da atmayım,
sənsiz bir işim olmasın,
gecəmi-gündüzümü sənə
görə bölüm,
yuxudan sənə görə ayılım,
sən varsan deyə yuyum əl-üzümü,
siqareti sənə görə çəkim.
Səndən baxım aləmə
elə et ki -
şeiri sənə
görə yazım,
evdən sənə
görə çıxım,
işə sənə
görə gedim.
Elə elə ki,
sənə görə
sevim, sənə görə yaşayım,
diriyə sənə
görə sevinim,
ölüyə sənə
görə ağlayımg
Ən böyük zövq o işdi ki, orda
sən varsan -
Tanrıdan ərmağandı, ilahi bəxşişdi.
Sən olmadığın
heç nəyi qıyma mənə.
Çıxma beynimdən,
ayrılma bədənimdən,
ruhumdan sıyrılma...g
***
Necə də dopdoluyam səninlə -
ağlınla doluyam,
sözlərinlə, coşğunla, ruhunla doluyam,
heyrətinlə, saflığınla doluyam,
inadınla, fədakarlığınla, bəxş eləməyinlə doluyam,
ətrinlə, nəfəsinlə, baxışınla doluyam.
Gülüşün qanadlarımdı -
səmanla, göyünlə, torpağınla doluyam,
təmasınla, həyəcanınla, sevginlə doluyam.
Sənsən varım, varidatım, mülküm, dövlətim -
səninlə dopdoluyam.
Çox zənginəm, çooxg
Son...
Hirsin varsa,
demək yaşayırsan,
demək sağsan,
nəyəsə üsyanın,
qəzəbin var,
etirazın, əsəbin
var!
Vay o gündən ki,
hirssiz, soyuq, laqeyd olasan!
Dünyaya donuq gözlə baxasan!
Bax bu son olar,
son!
Redaksiyadan: 21 avqust Rəşad
Məcidin doğum günüdür. "Ədalət"in
şinelindən çıxıb
böyük uğurlara
imza atan Rəşad Məcidi - dostumuzu, həmkarımızı,
AYB-nin katibini və nəhayət,
"525-ci qəzet"in Baş
redaktorunu doğum günü münasibətilə
təbrik edir, can sağlığı, daha
böyük uğurlar
arzulayırıq.
resad.m
Ədalət.-2015.-21 avqust.-S.3.