“Məmurun işi heç də ona
müraciət edən insanın problemini həll etməkdən
ibarət deyil”
Rasim Məmmədov: “Gəncliyimiz ötən dövrdə üzləşdiyi problemlərdən daha da təhlükəli problemlə üzləşir”
Sabitlik və İnkişaf Mərkəzinin sədri, Dünya Azərbaycanlılarının Mədəniyyət Mərkəzinin birinci vitse-prezidenti Rasim Məmmədovun Adalet.az-a müsahibəsi
-Rasim
müəllim, siz bir müddət öncə "Ədalət”
qəzetinə müsahibənizdə məmur
özbaşınalığı ilə bağlı ciddi
fikirlər söylədiniz. Üstündən qısa zaman
keçmədi, Prezident İlham Əliyev keçirdiyi
müşavirədə bu məsələyə toxundu və
məmurların xalqa xidmət etməkdə borclu olduğunu
bir daha vurğuladı…
-Hər
zaman prezidentin toxunduğu məsələlərlə
bağlı hər kəs öz payını
götürür. Məmurlarımız
heç də hamının bildiyi kimi deyil. O
müşavirədə səslənən fikirlərdən
sonra mövcud problemlər aradan qalxmağa başlayıb. Biz də məmur özbaşınalığı
haqqında danışmışıq. Bu allahın bir
qismətidir ki, bizim qaldırdığımız məsələyə
prezident dərhal reaksiya verdi. Mən deyərdim ki, məsələlərin belə
üst-üstə düşməsi ilahinin işidir və onu
da qeyd etmək istəyirəm ki, bu həm də bizdə bu
dövlətə, bu hakimiyyətə, cənab prezidentimiz
İlham Əliyevə olan sevgi və istəkdən
qaynaqlanır.
Bilirsiniz, bu gün sosial problemlərin yaranması
heç də insanların pis yaşaması ilə
bağlı deyil. Hərçənd ki, statistik rəqəmlər
də bunu deməyə əsas verir ki, Azərbaycanda kasıb
təbəqə yox vəziyyətindədir. Ancaq müəyyən kəsim var ki, bu insanlar
haqsızlıq, ədalətsizliklə üzləşirlər.
Məmurun işi heç də ona müraciət
edən insanın problemini həll etməkdən ibarət
deyil. Elə vətəndaş ola bilər
ki, heç o doğru-dürüst müraciət etmək
formasını bilməz, bu yöndə müəyyən
problem olar. Bu gün isə vətəndaşları
normal qəbul edib, onların dərdini dinləyib, vətəndaşın
problemini öz problemi bilib bu işə həvəslə,
canla-başla yanaşan məmur azlıq təşkil edir.
Türkiyə və digər ölkələrdəki
yüksək çinli məmurlar vətəndaşlarla
ünsiyyətdə öz vətənpərvərliklərini
dərhal büruzə verir. Hətta vətəndaşların
problemlərinin həlli mümkünsüz olduğu halda məmur
o vətəndaşı elə qəbul edib onun dərdinə
şərik çıxır ki, vətəndaş məmurdan
çox razı halda ayrılır. Ancaq
bizdə məmur kresloya yiyələnən kimi
özünü ağa, şah kimi apararaq xalqdan
uzaqlaşır.
Xalq
adı gələndə nədənsə məmur
Əvvəl yuxarı yox aşağı baxır.
Hərə
öz çiynindən aşağı duran
Kiçik adamları xalq bilir axı.
Bu dörd misra ilə yəqin ki, fikrimi çatdıra
bildim.
-Yeri gəlmişkən,
bu gün kadr siyasəti həyata keçirilir. Bu
siyasət barəsində nə deyə bilərsiniz?
-Hər
hansı məmur vəzifəyə təyin olunursa, onun vətənə
və dövlətə xidmətləri əsas
götürülür. Bu gün həyata
keçirilən kadr siyasətində yeni-yeni simalar vəzifəyə
təyinat alırlar. Bu siyasət müsbət
qiymətləndirilir. Ancaq bəzi hallarda
baxırsan ki, məmurlar dövlətə sədaqətli
insanlara üstdən aşağı baxırlar. Onda özüm-özümə sual verirəm. Müxalifət liderləri bizi sevmirlər. Sevməməkdə haqlıdırlar. Çünki uzun illər biz radikal müxalifətə
qarşı sərt mövqe göstərmişik, onları
ifşa etmişik. Yumurta döyüşünə
çıxmışıq və onların ətrafında
olan sağlam düşüncəli insanları müxalif cəbhədən
ayrılmasına nail olmuşuq. Bəzi məmurların
bizi sevməməsini nə ilə izah etməkdə çətinlik
çəkirəm. Bu sual həmişə
məni düşündürür ki, məqsədimiz,
ideyamız bir, siyasi mövqeyimiz bir olduğu halda məmurlar sədaqətli
insanlara nədən biganə qalırlar. Yəqin
münasibət də əbəs yerə formalaşmayıb.
Çünki biz bu millət, dövlət
üçün qanımızdan, canımızdan keçməyə
insanlarıq. Mən özümdən deyim
ki, mən ümummilli lider Heydər Əliyev siyasətinin
yaşaması, bu siyasətin daha uzun ömürlü olması
üçün qanımdan və canımdan keçməyə
hazıram. Bu daxildən gələn bir
hissdir. Kimsə buna görə mənə
heç nəyi məcbur edə bilməz. Əqidəmiz bəlli, yolumuz bəllidir.
-Müasir
gəncliklə ötən dövrün gəncliyi
arasındakı fərq barəsində nə deyə bilərsiniz?
-Onu deyim
ki, 1989-1993-cü illərdəki gəncliyin problemini hər
birimiz bilirik. Gənclik vətəndaş
müharibəsindən vətəndaş cəmiyyətinə
qədər şərəfli bir yol keçib, dünya gəncliyi
qarşısında öz layiqli sözünü deyib. Azərbaycan gəncliyi dünyaya Xocalı Faciəsini
qəbul etdirib. Müasir, yeniləşən
və sürətli inkişaf edən ölkəmizi layiqincə
tərənnüm edir.
SSRİ dağılandan sonra qısa zamanda Azərbaycan gəncliyi
bir boşluqla qaldı. Onlar müxtəlif qruplaşmalara
qoşuldular. Ancaq onlar harda olmalarından
asılı olmayaraq vətən, millət və xalq
üçün, müstəqilliyimiz üçün can
atırdılar. Ancaq bugünkü gəncliyə
nəzər salanda aydın olur ki, heç də
bugünkü gənclik gələcək üçün
müsbət fikirlərin formalaşmasına zəmin
yaratmır. Gəncliyimiz ötən
dövrün gəncliyindən də daha təhlükəli
problemlərlə üzləşir. Müxtəlif
təriqətlərə qoşulurlar. Bu
azmış kimi xaricdə olan havadarların köməkliyi ilə
dövlətçiliyimizə qarşı kompaniya
aparırlar. Çox şükürlər
olsun ki, Azərbaycan hüquq-mühafizə orqanları bu
yöndə ayıq-sayıqdır. Başqa
dövlətin missioner fəaliyyətini üzərinə
götürən gəncliyə isə heç harda yer yoxdur.
Çünki Azərbaycan gəncliyi Azərbaycan
dövlətinə və xalqına, dahi Heydər Əliyev
ideologiyasına xidmət etməlidir və dünya gəncliyinə
sübut etməlidir ki, Heydər Əliyev siyasəti,
ideologiyası hələ uzun illər yaşayacaq.
-Sizin bir
deyiminiz var: "Kapital və siyasət dövlətə məxsusdur”.
Bunu necə əsaslandırardınız?
-Dünyada
hər bir şey ölüb gedəcək,
Dünyada ölməyən xalq olacaqdır.
Bu misralar Xalq şairi Söhrab Tahirin şerindən bir
parçadır. Burdan da görün düyü kimi
xalqın yaşaması zəruridir. Hər
kəs bu yöndə fəaliyyət göstərməli, əlindən
gələni etməlidir. Mən
"Kapital və siyasət dövlətə məxsusdur”
deyimimi belə əsaslandırıram ki, bir dövlətin
yaşaması üçün kapital və siyasət vacib
amildir. Bu dövlət daimidir. Dövlətin yaşaması üçün kapital
ilkin şərtdir. Kapital olmasa vətəndaşların
sosial-rifah halının yüksəldilməsi, beynəlxalq
layihələrin həyata keçirilməsi mümkün
olmaz. Siyasət isə ona görə
lazımdır ki, mövcud müstəqilliyi qoruyub saxlaya biləsən
və bu siyasətlə sabit bir ölkədə xalqın
xoşbəxtliyinə nail olasan. Bu gün
uğurlu siyasət həyata keçirilir. Dövlət öz siyasəti ilə xalqını
yaşadır. Bu siyasət xalqa xidmət
edir. Ancaq ailədə, dostluqda, kollektivdə
siyasət yox, şəffaflıq və düzgünlük
vacib şərtdir. Çox yerinə düşərdi
ki, ölkə başçısı cənab İlham
Əliyevin dediyi fikirləri sizə eynilə
çatdırım: "Hər bir dövlət məmuru
öz məsuliyyətini dərk etməlidir. Hər
bir dövlət məmuru təmiz işləməlidir, xalqla
bir yerdə olmalıdır, təvazökar, işgüzar və
vətənpərvər olmalıdır, rüşvət
almamalıdır, özünü xalqdan üstün
tutmamalıdır, işlədiyi bölgələrdə, sahələrdə
hörmət qazanmalıdır və Vətənə sadiq, sədaqətli
olmalıdır. Heç bir xarici dairənin
təsiri altına düşməməlidir. Bax, budur əsas prinsiplər. Hər
bir dövlət məmurundan tələb edirəm ki, bu
prinsiplərə əməl etsin”.
Eyni zamanda kapitalla bağlı bu fikirləri demək olar
ki, kapital məhdud çərçivəyə yönəldilərsə,
o zaman bu siyasət də axsayar. Ümumi dövlətin
mənafeyinə xələl gələr.
Bu gün cəmiyyətdə yaranan vəziyyətə nəzər
salanda aydın olur ki, cəmiyyət yalandan bezib. Artıq yalan
işləmir. Bir çox məmurlar isə
dövlətin kapitalını məhdud çərçivəyə
yönəltmək, öz ağırlığını
qoruyub saxlamaq üçün yalan siyasət
yürüdürlər. Bu da cəmiyyətdə
sosial ədalətsizliyin yaranmasına gətirib
çıxarır. Yaranan bu problem isə
bir qrup insanların digər vətəndaşlara yuxarıdan
aşağı baxması ilə nəticələnir. Yerlərdə bəzi icra başçıları
dövlətin onlara ayırdığı vəsaiti elə
istifadə edirlər ki, nəticədə rayon
üçün ayrılan pul ailə büdcəsindən kənara
çıxmır. Halbuki bu vəsait aidiyyəti üzrə
xərclənsə, həm nəticə yaxşı olar, həm
də narazılıqlar az olar.
-"Ədalətsizliklə ən sərt mübarizə
ədalətli olmaqdır” – deyərkən cəmiyyətə
nəyi açıqlamaq istəyirsiniz?
-Bu
yaxınlarda Bakıda beynəlxalq bir tədbir keçirildi. Xocalı Soyqırımına həsr olunan tədbirdə
bir sıra qonaqlar iştirak edirdi. Hər kəs
Azərbaycana qarşı ikili standartlardan, ədalətsizlikdən
danışdı. Mən isə məsələyə
başqa aspektdən yanaşdım. Sual
etdim ki, nəyə görə dünya birliyi hələdə
bizə qarşı ədalətsizlik nümayiş etdirir.
Bəlkə özümüzdə nəyisə
axtaraq?
Bəlkə
özümüzü dəyişək, dünyada dəyişsin
prinsipinə üstünlük verək, bir-birimizə
qarşı ədalətli olmaqla bu problemi həll edə bilərik?.. Qeyd edim ki, yaradan bu
dünyanı haqq-ədalət üzərində qurub. Heç bir ədalətsizlik cavabsız qalmır.
Bəlkə biz hardasa ədalətsizliyə yol
veririk ki, uzun illərdir dünya birliyindən də bu kimi
haqsızlıqla üzləşirik. Bu
baxımdan mən düşünürəm ki, dünya
birliyinin ədalətsiz mövqeyinə qarşı hər bir
Azərbaycan vətəndaşı ədalətli
olmalıdır. Bir-birinin probleminə sevgi
ilə yanaşmalı, problemləri ilə maraqlanmalıdır.
Bu gün müəssisə rəhbəri
işçisinin problemi ilə maraqlanmırsa, onun
işçisi problemləri üzündən işini də
normal həyata keçirə bilməyəcək. Bütün bunlar isə dünya birliyinin ikili
standartları ilə ən gözəl mübarizə vasitəsidir.
Necə ki, ölkə prezidenti
gördüyü işləri ilə dünyanı heyran
qoyur, biz də özümüz-özümüzə
qarşı ədalətli olmaqla dünyadakı ədalətsizliyə
qarşı çıxmış olarıq.
-Bir məsələyə
diqqət yetirmək istəyirəm. QHT sektoru da
fəallığı ilə seçilən qurumlardır.
Ancaq buna baxmayaraq cəmiyyətdə bu və ya
digər problemlər hələ də qalmaqdadır.
-QHT
sektoru ölkədə vətəndaş cəmiyyəti ilə
dövlət qurumları arasında körpü rolunu
oynayır. Bir sıra QHT-lər var ki, daim aktiv fəaliyyəti
ilə seçilir. Mütəmadi olaraq tədbirlər
keçirir, cəmiyyətdə davamlı işlər
görür. Vətəndaş cəmiyyəti
olaraq onlar bu işləri öz hesabına görürlər.
Bəzi hallarda heç bir dövlət qurumu onlara
gördükləri işə görə adi, çox sağ
ol sözünü demirlər. Bir
çoxları da dözümsüzlük nümayiş etdirərək
dövlətdən incik düşürlər. Bu kimi faktlarla rastlaşanda onlara izah edirik ki, problemi
yaradan dövlət deyil, dövlətə kimlərsə tərəfindən
sırınan sədaqətsiz insanlardırlar. Bu insanlar isə bizlərin hər birimizə
yaxın və qohum olan insanlardır.
- Həyatda
ən qiymətli hədiyyəniz?
-Düşünürəm
ki, həyatım boyu ən qiymətli hədiyyəm dahi Heydər
Əliyevin əziz xatirəsinə təsis etdiyimiz "Əbədi
lider” qızıl döş nişanı və fəxri
diplomudur ki, biz bu mükafatla ulu öndər Heydər
Əliyevin müqəddəs ideyalarına sədaqətlə
xidmət edən insanları təltif edirik və bununla Azərbaycanın
qurucusu, ölkəmizi dünyaya tanıdan dünyanı idarə
etmək gücünə malik, dahi Heydər Əliyevə olan
sevgimizi bir daha sübut etmiş oluruq.
Ədil Ədilzadə